Calon Araṅ. Digital Diplomatic Edition of Leiden Or. 5387-5279

[Folio 1v]
1// tū // Om̐ avighnam astu nama siḍəm· // tū // Ana: ta: vuvusira: saṁ maha:tuva, Uma:◯jarakən ri katatvanira: śira śri mpu baraḍaḥ, ri sḍaṁṅira: hana:ṅaśrama:nira, hi tkanaṁ L̥maḥ tulis·,
2tan popama: ri kasaktinira, makaṅuṇi denira:haṅraṣa:ni ḍarmma:, tlasireṅ paṅraṣa, vruḥ ◯ pasuk vətuniṁ bhuhana:taḥ, Antyanta: denira: humula:hakən kasutapa:nira, ya ta maputri pva: śira śa
3siki, maṅaran saṁ meda:vati, kanya: sḍaṁ papaṅkas·, Antyanta: ri hayunira, lvir tapsaryya:ṅiṇda◯rat·,, yryuvus mahaṅkaṇa:griṁ pva sira:, śvaminira śri mpu baraḍaḥ, rena:nira: saṁ medavatika:,
4ya ta paratra: pva sira, Alara: taṅisira: maṅaran medavati, Akuśa: ta ya: riṁ śavanika⌈◯ṅ reṇa:nya, sambat-sambatnya:mlasa:rṣa:, vuḍuḥ hinduṁ hulun kita, sapa pva ya: hasiheṅulun kaṣya:siḥ,
[Folio 2r]
1 ya ta kinvan ya mbatən mareṁ səma, hikaṁ layvan·, basminən pva heṅ səma. huvus pva sida məntas ta ya. tan liṅən pva yəka. ya ta saṅ mpu baradah mamet svami muvah. ya tika manak sira sasiki laiki-laki. huvus pava maṅkin atuva saka vayahnya, vayah apapalayvan , təkani bisa ta ya:bəbəd. ya ta sri mpu baradah umareṅ patapanira, ri uṅgvanira:pəniṅan hana ṅkana, maṅaran riṅ visyamuka. i ṅkana pva sira umulahakən yajña, sineva deniṅ sisyanira makveh. hana ṅkana umajar-ajar tikeṅ tutur yukti rāyu . henəṅakna ndah sakarəṅ, saṅ vedavati huvaca. yatəkaiṅalpan vuvus deniṅ kavalvan ika , tandva:gəṅ vuyuṅira saṅ edavati manaṅis pva ya, tan kəneṅ pahyas mvaṅ boga . ya ta umara pva ya marəṅ tunvan iṅ rəna nika , ana ṅ səma ṅkana . le-
[Folio 2v] #1 2 pas ta lampahira , vus təka ri həb niṅ vandira magəṅ. amaṅgih ta sira kunapa, sava niṅ matya sinaṅgva:nluh, papat kveh iṅ kunapa ­. hana ta ya veka:nyajəṅeṅ manusu pva ya riṅ savanyenduṅnya pinarəbutan pva de nikaṅ səmut gatəl. antyantavelas sira saṅ vedavati tumvaneriya. lumakva sira:lon kesah sakerika, annuli mareṅ tunvani renanira. aluṅguh ta yeṅ həb niṅ kəpuh, manaṅis aliṅan tambiṅ iṅ kəpuh , asambatsambatibunira, ‘ibu dudut mami sigra-sigra.’ maṅkana liṅ saṅ vedavati amelas arsa . tan liṅən ta dyah vedavati . vacana pva ya sri mpu baradah umantuk pva ya sira sakeṅ mayajñabyasa, sakəṅ visyamuka. aliṅgih pva sireṅyasapasevan . marək ta yestrinira, haturnya:ṅliṅ ri vihaṅnya vedavati ,amupu səkar lavan arinyəka. ya tika rinə.
[Folio 3r-v] butnya ikaṅ səkar, parəṅ ya pada ṅaṅis, anuli pva ya luṅa. rinuluh eṅ kadaṅ-kadaṅ tan katemu pvaya. umujar ta saṅ munivara, ‘ṅhulun maṅky aṅulataneriya’. ləs viyaṅ ta saṅ munîndra, tumut aṅulatana ry anaknira, təka pva ya ri təgal-təgal. hana ta raryaṅvan tinēmunira, matakvan ta saṅ mahamuni. liṅnira alus, ‘ih raryaṅvan,vruh ta kita putri iṅaran vedavati, hana rika yan panēmvanta mvaṅ paranika’? mvajar ta raryaṅvan, matur i saṅ jativara, ‘hanestri hajəṅ antyanta rupanira, manaṅis pva ya masambat ibunika, yeka makuduṅ-kuduṅ anṅidul aṅulvan, lakunira’. mveṅgal ta lampah saṅ mrədu, umanty atmajanira. sigra dataṅ pva sira ri tunvani patninira, tinəmunira tampaknira:kusa:naṅis, ulat lvar kidul kulvan, vetan saṅ munîndra. katvan ta saṅ putri manaṅis aluṅgviṅ , maliṅan tambiṅ iṅ kəpuh. mvajar ta saṅ rəsi, ‘uduh anakiṅhulun, antyanta kakartalanta:naku, denta pareṅ səmasana ṅke, umara ri tunvaneṅ renanta. uvus ibu hayva maṅkana, apan kramanya riṅ mahurip, pati vəkasan ika . lah ta ibu mulih, hayva sora masku’. umujar ta saṅ putri, ‘ṅhulun tumuta pəjah juga riṅ renamami, malara təmən ajñana iṅhulun, tan sah mami dumulureṅ ibuṅku ’. aṅliṅ ta saṅ munîndra, ‘ibu masku hidəpən ṅhulun maṅke kevala’. anuli ta ya lumampah saṅ putri kenamulih. kasurupan ta saṅ hyaṅ prabaṅkara, təkeṅ ləmah tulis, pituturan ta ya saratri saṅ vedavati de saṅ munîndra, laku mariṅ kayogryan . mamintuhu ta saṅ vedavati riṅ liṅ saṅ mahamuni. ry uvus pva maṅkana a-
[Folio 4r] vəkasan dataṅ pva saṅ mārəsi muvah mayajña byasa mareṅ visyamuka. irika ta saṅ munîndra iṅayap de sisyanira kabeh , iṅatur-aturan pva sira ṅkana. mavarah-varah saṅ munîsvara riṅ niti yogya, umareṅ sisyanira:tah, tiṅkaṅ darma mvaṅ putusiṅ aṅaji. tan liṅən ta saṅ munîndra. vacana pva saṅ vedavati, iṅalpa dya saṅ bibi kavalvan muvah. manaṅis pva ya saṅ putri, kepvan riṅ polahira, mageṅ suṅsutira. ya ta sira mareṅ tunvan iṅ renanira muvah. tan liṅən lakunyeṅ avan, sigra prapta ta yakuseṅ tunvan manaṅis. liṅnya masambat, ‘induṅṅhulun, tiṅhali kasyasih mami denta, aṅhiṅ paminta ṅhulunə ri kita, dudut mami sigra-sigra. tan sah mami dumulurəṅ kita ibu’. maṅkana sambatnya:ṅənakən vaspa karuna saṅ vedavati. hayva sama sira . liṅən ta saṅ rəsi. dataṅ pva sira sakeṅ mayajña hayu,
[Folio 4v] aliṅgih ta sireṅ palaṅka sevanya. sinyaṅnira tanayanira, ‘om putrid kitatmaja ṅhulun, para ṅke kita masku vedavati, karva:rinta:pasevan’. nda tan hana sahur. dadi umarək tikaṅ bibi kavalvan ika makata. liṅnya, “pukulun saṅ jativara, ranak sri munîndra vihaṅ ta ya manih, marəbut pva ya təka arinyeka. ṅhulun manayuti tan pvalih, kagyat yan luṅa, rinuruh eṅ kadaṅ-kadaṅnya tan temu ya“. umajar ta saṅ mārəsi, ‘uduh kalud ika parəṅ tunvan iṅ renanya ṅka’. nər tumədun pva saṅ munîndra sakeṅ salə. umulatana ry anaknira, dataṅeṅ paṅlahan prayanira. mveṅgal aku saṅ jativara, sadataṅireṅ səma ṅka saṅ mahamuni, kolaran anayanira nahan liṅ saṅ rəsi, ‘uduh tanayanku kita , edavati mas mirah ṅhulun, lah ta ibu umantukeṅ asrama. ṅhulun iriṅakən kita. tan iyan pinaka .
[Folio 5r] jivatma tələṅ iṅ tvas, kambaṅ iṅ aṅga ṅhulun kita’. tan sahur pva saṅ vedavati. vacana saṅ rəsy aminta kasih . kepvan ta deha saṅ mahasanta tumvan ri polaha nikaṅ atmajanira. aliṅgih ta saṅ mrədu ri həb niṅ kəpuh. nër varah-varah ta sira niti yogya eṅ saṅ putri. masve de nira makata saṅ pravara riṅ atmajanira. ri vəkasan mojar ta saṅ vedavati, ‘ atur iṅ ləbu talampakanira, tanayan saṅ jativara, aləməh umantuk eṅ ləmah tulis, paratra yeṅka juga karsa tanaya saṅ rəsi , tumutureṅ ibuniṅhulun. mamy asiluṅluṅeṅ həb niṅ kəpuh, sapəjah-pəjahamami. ṅhulun mati yeṅke juga’. umvajar pva sri baradah, eṅ vəka sisya . tan dva makon umusuṅeṅ patanya vesma , makapaṅəba nireṅ səmasana ṅka. dadya maṅkana praya saṅ mərdu,
[Folio 5v] gavyanən asrama ikaṅ səma tunvan. maṅrata-rata pva ləmah , bumi sudanən, madəgakən patani, patamvan, pakuləm-kuləman, makadi bukur, dvara tinunda-tundanireṅ sisi. plaga suru-suru jinajar sapanta panta, pəte-pətetan. hanasoka, andul, surabi, tañjuṅ, kamuniṅ, campaka gondok, varsiki, asana, jəriṅ, lyan bujaga puspa sinvan. tan liṅən ikaṅ sarva səkar, cabol atuva , gambir, malati puspa , caparnuja , kuranta, tari naka, cina,tələṅ , vuṅa vari dadu pətak jiṅga baṅ, vuṅa tali, padma, luṅid sabraṅ, tan kantun ikaṅ bayəm raja, suluh, kanduyuhan gimbalnajaknira, mvaṅ taluki hemakani, saruni pətak jəne, mayana reṅreṅ, nila. hana jënar, luṅid sabraṅ, andoṅ cinara-cara, mvaṅ tahən kañcana, puriṅ, tuñjuṅ, ara padu nika. gənəp ikaṅ sarva səkar mvaṅ sarva sari, pandan janma sampun apagəh, tiṅkah iṅ asrama antyanta la-.
[Folio 6r] ṅən ika, konaṅ-unaṅ , lvir visnva bavana:ṅindarat. inak ta:mbek saṅ vedavati, ry uvus nika dady asrama, ikaṅ səma tunvan iṅ renanya. apagən pva liṅgihira sri munîndra, aneṅ patapanira ṅkana, sineva deniṅ sisya nom atua rahineṅ kulem. tan liṅen ta sira saṅ mahasanta. vacana pva saṅ nateṅ daha, inak de nira amraboni, manyakravati, landuh təduh ikaṅ rat ri pamavanira, maharaja erlaṅgya:bisekanira, antyanta:hayu dahat, tiliṅəṅ karəsyan. tan sama nikaṅ nusantara:ntah samedëp iṅ sira. hana pva ya randa liṅən, umuṅgv i ṅkana ṅ girah, calvan araṅ paṅaran ika . ma:nak ta ya stri sasiki, maṅaran ratna maṅgali, lvistu hayu rupanira, byakta ratna niṅ puri . masove pva tan hana vvaṅ lumamare ri ya, mvaṅ vvaṅ eṅ girah ṅka, makaṅuni sakeṅ nagara daha .
[Folio 6v] tan liṅən deseṅ pamiṅgir, sama tan hana lumamara, vani irikaṅ anak saṅ randa, maṅaran maṅgali eṅ girah, apan karəṅə deniṅ rat yan adyan iṅ girah laku gələh. madoh vvaṅ lumamar eṅ saṅ maṅgali. samaṅkana umvajar pva saṅ randa, ‘uduh mapeki baya tanayaṅhulun, dumeh ya tan hana lumamar i ya, ahayu pva rupanya, paradenya tan hana tumakvane riya. səṅit juga hrədayamami denta. lamakanya ṅhulun maṅke maṅgaṅsala pustaka pinakaṅhulun. yan mami huvus gumaṅsal ikaṅ lipyakara, ṅhulun amarəka eṅ padanira paduka sri bagavati, ṅhulun aminta anugraha, ri tumpura nikaṅ vvaṅ sanagara’. ry uvusira gumaṅsal ikaṅ sastra, umara ta sireṅ səma ṅka, anəda ta sira:nugraha vidi, riṅ paduka batari bagavati, iṅiriṅ den i sisyanira kabeh. kunaṅ pratekan iṅ aran iṅ,
[Folio 7r] sisya nia, si vəksirsa, mahisavadana, si lendya , si ləndə, si ləndi, si guyaṅ, si laruṅ, si gandi. ika ta kaṅ umiriṅ mareṅ saṅ randeṅ girah, sama:ṅigəl pva səmasana ṅka. tan dva umijil paduka batari durga kalavan vadvanira katah, sami milva umigəl. maṅastuti ta maṅaran calvan araṅ riṅ paduka batari riṅ paduka batari bagavati. umujar pva batari, “uduh tanayanku kita, calvan araṅ. apa sadyanta marəkeṅ ṅhulun, mataṅnya kita dumular iṅ para sisyanta kabeh, pareṅ sama:ṅañjalyeṅhulun.‘ umatur pva saṅ randa maṅastuti , ‘ pukulun, atmajanira:hyun anəda tumpura nikaṅ vvaṅ sanagara. maṅkana gati niṅ vəkan ṅhulun’. maṅliṅ pva batari, ‘ uuh sunumami kita . lah maveh iṅoṅ, aṅiṅ hayva pati təkeṅ təṅah, hayva pati ya:gəṅ vuyuṅta:naku’. amintuhu pva saṅ randa, amit amuhun ta sireṅ batari bagavati. saṅ calvan araṅ
[Folio 7v] saksana sah, lampahira ləpas , iṅiriṅ deniṅ sisyanira kabeh. umigəl ta ya ṅkana vavala, sədəṅ madya ratri, muni taṅ kamanak, kaṅsi, pinarəṅnya sama:ṅigəl. ry uvus nika:ṅigəl mulih ta yeṅ girah pada vijah-vijah pva ya təkeṅ vesmanya. tan suvy agəriṅ tika vvaṅ sadesa-desa, makveh pəjahnya animpal-tinimpal. tan liṅən ikiṅ calvan aran. vacana pva saṅ prabv iṅ nagara, tinaṅkil ta sireṅ maṅuntur sri maharaja erlaṅgya. təhər umatur ta sira rakryan apatih. liṅira ‘pukulun patik batara umatureṅ ləbu talampakanira, deniṅ vadva paramesvara akatah pəjah, panas tis gəriṅnya,’ sadina roṅ dina paratra. ikaṅ katiṅhalan maṅganali randeṅ girah, maṅaran calvan araṅ. umigəl ta ya ṅkaneṅ vavala , teka sisyanya:tah. makveh vvaṅ tumvane ri ya samaṅkana’. mahaṅkana aturira ken apatih.
[Folio 8r] samyak vvaṅ i ṅkana panaṅkilan sama:ṅiṅgihakən,, yan tuhu maṅkana, kady ature ken apatih. mojar sira saṅ prabu tan soba, təhər runtik sira, ‘ěndi kavulaiṅoṅ para brətya’. tan asuvya sama dataṅ kavula kapətəṅan. “pamara kita cidra patyani calvan araṅ, hayvay pva kita:davak, pakanti kita para brətya den makveh hayva pepeka“ kapvamvita kavula bretya, maṅastuti ṅ jəṅ saṅ prabu, ‘atəda patik aji deva paṅastuṅkara, cumidra eṅ randəṅ girah’. lumampah pva kavula brətya. tan liṅən lakunyeṅ avan, sigra prapta yeṅ girah. cumunduk taṅ bretya ṅkanaṅ kahananikeṅ calvan araṅ, sədəṅ sirəp iṅ vvaṅ ya cumidra. tan hana svabvan iṅ vvaṅ mataṅi. tan dva vavaṅ saṅ brətya umuləṅeṅ kesa saṅ randa, lumigeṅ kadganya. sədəṅ umayhun pva ya tuməvəkeṅ saṅ randa, lumigeṅ kadganya. sədəṅ umahyun pva ya tuməvəkeṅ saṅ randa, abvat pva asta saṅ brətya gumətar. tan dva kagyat mataṅi calvan araṅ mijil
[Folio 8v] bahni sakeṅ aksy, aṅgrana, tutukkapə, umurub muntab mabar-abar guməsəṅeṅ saṅ brətya. paratra ikaṅ brətya kalih siki. vaneh ika mandoh, magəlis layvan ikaṅ brətya. tan liṅən lakunyeṅ avan, sigra prapta pva ye kadatvan. umatur pva saṅ brətya sesanikaṅ paratra, “pukulun tan paguna bretya paduka paramesvara. pəjah pva ya kalih siki deniṅ drəstinira randeṅ girah. mijil taṅ apvi skaa riṅ garba muntab, geməsəṅəṅ bretya paduka batara. ya tika humənəṅ kamitəṅgəṅən saṅ naradipa, deniṅ hatur iṅ vadva, nəhər mojar saṅ narendra, “e mahapatih, kepvan manahmami dene aturi ṅ kapətəṅan. apa denta rumasa eṅ mantriniṅoṅ kabeh“. ləs umantuk saṅ prabu sakeṅ panaṅkilan, embəh duka saṅ bupati dene pəjah iṅ kapətəṅanira kalih. tan kavacana saṅ naranata. liṅən saṅ randəṅ girah. magaṅ avuvuh vu-
[Folio 9r] yuṅira, dera kapareṅ brətya, tur ta vadva saṅ bupati. mvajar ta calvan araṅ maseṅ iṅ sisyanyatah, majak pareṅ səma ṅka, lagi pva ya maṅgaṅsal ikaṅ lipyakara. ry uvus gumaṅsal ikaṅ ləpihan, saksana vihaṅ ta ya, iṅiriṅ pva ya deniṅ sisyannya kabeh. dataṅ ta yeṅ tambiṅ iṅ sema, uṅgvan ri həb niṅ kəpuh, vinilət iṅ karamyan. rvan ika marənəb rumambya təkeṅ kasyapa. isvar nika daran ya maradin, llvir kasapvan rahineṅ kuləm. irika ta randeṅ girah maliṅgih, pinarək de sisyanira kabeh. mvajar pva si ləndya umatureṅ saṅ randa, ‘punapa pvaṅkulun reha kadi maṅke, ri duka saṅ amava rat? lehaṅ umuṅsi ya ulah rahayu, sumambaheṅ jəṅ saṅ mahamuni tumduhakna svarganiṅ paratra’. dadya mvajar pva si laruṅ, ‘apa kasaṅsayan ikaṅ rasa ṅhulun ri duka saṅ prabu? balik ta binaṅət kaṅ u-
[Folio 9v] lah den təka eṅ təṅah’. samy aniṅgihakən ta sira kabeh, ri sojarira laruṅ, tumurut ni calvan araṅ. nəhər mvajar ta sira, ‘ya dahat danteku laruṅ. lah unyakən kamanak kaṅsinteka. lah rvaṅ pada umigəl, sasiki-siki sovaṅ, dak tiṅhalanyə ulahta sasiki-siki, məne yan təkeṅ karya, lah parəṅ kita umigəl’. saksana umigəl pva si guyaṅ, paṅigəlnya duməpa-dəpa aṅəpyak. sinuṅsaṅnya hos nika, karva siñjaṅ. pandələṅnya mulirak-mulirak, mvaṅ nolih ya kanan keri. umigəl pva si laruṅ, tandaṅnya kadi saṅ moṅ umahyun duməmaka, caksunya:səmva mirah, mavuda-vuda ya. murya rambutnya:ṅarsa. umigəl ta si gandi, lumumpat-lumumpat pva denya:ṅigəl, umurya kesanya:ṅiriṅan, nayana nika:səmu aṅganitri. maṅigəl ta si ləndi, paṅigəlnyaṅijig-ijig karva sinjañg. aksyanya du-
[Folio 10r] milah, kadya bahni meh murub, umarəka kesarjanya. maṅigəl pva si vəksirsa, maṅunduk-unduk denya:ṅigəl, levih tolih netranya dumələṅ tan aṅədep, umurya:ṅiriṅan pva rvamanya, mavuda-vuda ya. si mahisavadana:ṅigəl masuku tuṅgal. uvusnya masuku tuṅgal, ya ta manuṅsaṅ meled-meled lidahnya, taṅanya kady ahyun maṅgrəmusa. suka ta manahira calvan araṅ. ry uvusira sama:ṅigəl, adum pva sira bobohan, amañca desa de niradum. si ləndə kidul, si laruṅ həlor, si guyaṅ vetan, si gandi kulvan, calvan araṅ eṅ təṅah, mvaṅ si vəksirsakalavan mahisavadana. ry uvus nika:dum amañca desa, umareṅ təṅah iṅ səmasana ṅka calvan araṅ. umaṅgih pva ya sava niṅ kadadak, eṅ tumpək kalivon. ya tika:dəgakən ya, iṅi-
[Folio 10v] kətnyeṅ kəpuh. ya teka huripakəna, binayvan-bayvan. si vəksirsa maṅlekakən drəsti mvaṅ mahisavadana, maluya:hurip təkaṅ layvan. dvadi mojar təkaṅ sava. liṅnya, “sapa sira ta pukulun umuripakən i ṅhulun, antyanta hutaṅ i ṅhulun, tan vruh panahuran i ṅhulun. mamy aṅavula eṅ sira, cinuculan pukulun sakeṅ vit niṅ kəpuh. ṅhulun maṅabakti maṅarcamana, mandilatana lobu kaṅ haneṅ talampakan pada“. tan dva mojar si vəksirsa, ‘de mu saṅguh ko maveta mahurip, maṅko ko dak praṅeṅ badama gulumu’. saksana pinraṅ gulune yaṅ badama, məsat mastaka nikaṅ byasu inuripkənya mumbul taṅ rahnya mulakan. ya teka kajamasakna kaṅ rudira dya saṅ calvan araṅ, magimbal pva kesanira deniṅ marus, ususnya makasavitira, mvaṅ ki-
[Folio 11r] nakaluṅakənya. lagavanya iṅolah kinabasaṅ kabeh, makacaru eṅ buta:tah, sahana nikanaṅ səma ṅkana, makaṅuni paduka batari bagavati, adinika inaturanya. saksana mijil ta sira pada batari, sakeṅ kahyaṅanira. nəhər mojar ta sireṅ calvan araṅ, ‘uduh atmajamami kita calvan araṅ, apa kaliṅanta maṅaturi tadah tuməkeṅhulun, bakti maṅarcamana? atarima ṅhulun ri paṅastutinta’. umatur taṅ randeṅ girah, “pvaṅkulun saṅ amava rat dukeṅ tanayan paduka batari. kahyun iṅ patik batari, anəda asuka pada batari, ri tempura nikaṅ vvaṅ sanagara, de pun teka eṅ madya ṅkana‘. aṅliṅ pva batari, ’lah, suka iṅoṅ clavan araṅ, aṅhiṅ ta kita hayva tan prayatneṅ lampah, hayva peka-peka“. təhər amvit pva randeṅ girah ma-
[Folio 11v] ṅastuti ṅ batari. sigra ləpas ta lampahira, sama:ṅigəl ta sira catus pata. magriṅ baṅət ikaṅ sanagara, griṅnya savəṅi rvaṅ vəṅi tan lyan panas tis lara nika. paratra ikaṅ vvaṅ, animpal-tinimpal, kaṅ vvaṅ animpal rvaṅ nike ñjiṅ, məne sore ya katimpal. kunapa:naṅ səma tumindih atumpuk. tan ana səla nikaṅ setra vatas uruṅ-uruṅ, deniṅ kveh nikaṅ sava. lyan eṅ təgal mvah riṅ ləbuh, vaneh lukrah eṅ vesma nika. sona:ṅahuṅ mamaṅan kunapa. gagaknya muṅ asələṅəran, pada pva ya manucuk-nucuk vaṅkya. laler məṅəṅ eṅ grəha:ṅrəṅ. makveh ikaṅ grəha, pomahan suvuṅ. vaneh vaṅnya luṅha mareṅ doh, mamet desa uṅgon ika tan kəneṅ marana prayanya muṅsi ya:hurip, ikaṅ mahva griṅ pinikulnya, vanya:n a:ṅemban anak mvaṅ tinuntun ika, mapundut-pundut pva ya, mulata ṅ buta:ṅuhuh, ya təka:ṅuhuhan. liṅnya, ‘hayva
[Folio 12r] kita luṅa, desantu huvus krəta,marya:griṅ kamaranan, vaṅsul pva kita para ṅke, mahurip te kita’. ry uvus niṅ buta maliṅ maṅka, makveh paratra eṅ avan. ikaṅ vvaṅ miyaṅ apundut-pundut. ikaṅ buta:neṅ pomahan suvuṅ, pada vijah-vijah pva ya, mapiñcul-piñcul ya, masivo-sivo kunaṅ. lyan iṅ ləbuh mvaṅ riṅ marga guṅ. si mahisavadana umañjiṅ iṅ vesma, mahavan pva yeṅ səla niṅ kikis. magriṅ ta ikaṅ vvaṅ sagrəha. si vəksirsa mañjiṅ eṅ paturvan iṅ vvaṅ, mahavan iṅ vire-vire, aṅuṅkab-uṅkabeṅ paṅrət, aminta carva gətih məntah dagiṅ məntah. ‘ika kaptin iṅ hulun hayva ta masove’. liṅnya. tan katakna ikaṅ vvaṅ pəjah lyan maṅriṅ, mvaṅ tiṅkah iṅ buta manambət. vacana saṅ prabu riṅ nagara, tinaṅkil ta sira voyəṅ maṅuntur, tan soba tiṅkeṅ panagkilan, deniṅ tan pranasuka sira saṅ naradipa, kepvan polahira, de ni-
[Folio 12v] kaṅ vvaṅ sanagara makveh paratra, lyan təkeṅ magriṅ makatah. kadi tan pateja ikaṅ nagara. tan dva mojar pva saṅ prabu riṅ apatih mvaṅ riṅ para mantri adi, motus mundaṅeṅ saṅ dvija, saṅ rəsi, saṅ buhjaṅga, mvaṅ para guruloka. kin vanira sama umulah tiṅhal, mvaṅ mahoma, de nikaṅ vvaṅ sanagara kamaranam. mahoma ta sira para guruloka:tah, mvaṅ saṅ dvija, maṅaradaneṅ saṅ hyaṅ agni. avyatara sədaṅ madya ratri, umijil pva saṅ hyaṅ caturbuja, saka riṅ saṅ hyaṅ agni. təhər mvajar ta sira, ‘om-om, hana ta sira, maṅaran sri munîndra baradah, umuṅgveṅ asrama ṅke, anank səmasaneṅ ləmah tulis, sida yogîsvara. yeka rumuvateṅ nagaranta, umilaṅakən kaləṅkan iṅ buvana, kavasa landuh ikaṅ rat de nika’. ry uvusira saha vacana, moksa namu-namu mur sira. enak samat ruməṅə atah saṅ maharəsi, sa-
[Folio 13r] kveh ikaṅ mahoma, ri vacana saṅ caturbuja. dadi ṅ rahine əñjiṅ, sama umatur ta yeṅ saṅ prabu, ri sojar saṅ caturbuja, sədəṅ hana tinaṅkil ta saṅ naradipa rikanaṅ, yavi maṅuntur. umvajar ta saṅ mahadvija, ‘pvaṅkulun saṅ prabu sira, aneki caturbuja, umijil saka rikaṅ saṅ hyaṅ agni, nəhər mavacana, yaṅ saṅ munîndra baradah rumuvateṅ nagareṅ aji. saṅ asrameṅ səmasana ṅ ləmah tulis, sira umilaṅakən kaləṅkan iṅ rat. mahaṅkana liṅ saṅ caturbuja’. amintuhu ta saṅ sri narapati, ry aturira sri guruloka:tah. mvandika ta saṅ prabu, motus umarəkeṅ saṅ munîsvara, ana ṅ səmasana ṅka ‘e kanuruhan mahas pva kiteṅ asrama, eṅ səmasana ṅ vihcitra, umundaṅeṅ saṅ jativara, sri yogîsvara sira mpu baradah, dakvan rumuvateṅ nagara mami kamranan,
[Folio 13v] hayva ta kita tan meṅgal’. saksana: mvita saṅ kanuruhan, sumambaheṅ jəṅ sri naranata. mahavan ta sira syandana, mvaṅ asva, magəlis lampah nikeṅ kanuruhan. kavəṅiyan pva sira ṅhavan, lakva juga sira majaṅ lek. kajinəman ta ya hema, amrəgil ta sireṅ havan. ěñjiṅ laku saṅ kanuruhan, sigra dataṅ pva sireṅ asrama. tumurun ta ken kanuruhan saka riṅ sakata. umañjiṅ pva sireṅ gopura niṅ asrama, paṅgih saṅ muniîndra eṅ patapanira, sarama sira napeṅ saṅ titi, tuhu budiman sira ‘lah bahagya kita laki-laki, katanvruhan pinakṅhulun tuməke­ kita. kunaṅ donta taṅ asrama, mataṅnyan jumujug kiteṅhulun prapteṅ əñjaṅ, aṅhiṅ ṅhulun vruh huvus ri prayanteka’. mvajar ta sahur ta nikeṅ kanuruhan umatur eṅ sri munîsvara, “pvaṅku-
[Folio 14r] lun sakeṅ nagareṅ kairi, pun kanuruhan, invan umarəkeṅ ləbu talampakanira, saṅ mahasanta. om mundaṅəṅ saṅ munîsvara, inutus de saṅ amava rat. kunaṅ praya saṅ mrədu, yan pareṅ nagara. sira saṅ amava rat aminta kasihaneṅ saṅ mahamuni, anəda uripa nikaṅ vvaṅ sanagara, eṅ saṅ mrədu. saṅ yogîsvara ta rumuvateṅ nagara, de niṅ magriṅ kamaranan makveh paratra. nahan doniṅ nagara kamaranan. vantən ta randeṅ girah, maṅaran calvan araṅ, yeka pinaləh, manak ta ya istri maṅaran maṅgali, yeka nimita niṅ duka, maṅaran calvan araṅ, i rehanika tan ana vvaṅ lumamareṅ anak nika maṅaran maṅgali. magaṅ vuyung ika saṅ calvan araṅ. “ tan dva maṅliṅ saṅ jativara, ‘kaliṅanika maṅka lvirnya. ṅhulun tan vihaṅ mami samaṅke.ana ta yen i sisyamami, sasiki, den mil viṅ kita kanuruhan ya
[Folio 14v] reṅ nagara. apuspata ta mpu kebo bahula. ika takvan lumamareṅ saṅ maṅgali. umatura kita kanuruhan, eṅ saṅ amava rat, yan mpu bahula lumamareṅ maṅgali. sapamalaku nika tukvan təkani de sri naradipa. mahaṅkana pavəkas iṅ ṅhulun tuməkə kita kadi. ṅhulun pva hələm tumutureṅ mpu bahula, yan ya huvus saharseṅ ratna maṅgali pakurənyeṅ jinəm’. mamisiṅggih pva saṅ kanuruhan. mvajar muvah pva saṅ munîsvara, iṅkanaṅ pəpədəkira, makvan maṅrati ṅ aneṅ pala boga, uṅgvanira umiveh aneṅ kanuruhan. tan masve dataṅ ta ikaṅ pupundutan, sopacara ta sri tiniṅhalan, tok, səkul, ulam, tampva, bərəm, kilaṅ, lyan tekanaṅ srəbəd budur. saksana bojana sira ṅ kanuruhan sarvaṅ nika:tah. ramya sama:ṅinum cakilaṅ, pada vijah-vijah manah nika. ana:ṅiduṅ acarita
[Folio 15r] atandak-tandak kunaṅ. apa ta karana nika maṅkana, i reh ni kantun kinon de saṅ naranata, tur amaṅguhakən pala boga. tan saksat uvus krəta mahurip ya tikaṅ sanagara, idəp ika. akuləm ta sira, ṅ asrama savəṅi. ěñjaṅ pva saṅ kanuruhan amit eṅ saṅ jativara, maṅañjali ta sira, kahatur pva sira mpu bahula, sigra dataṅ pva sireṅ kadatvan. kapaṅgih ta patih voya tumaṅil, anuli ta sira mareṅ panaṅkilan ken kanuruhan mvaṅ siro mpu bahula. sumamabah pva ken kanuruhan mvaṅ siro mpu bahula. sumambah pva ken kanuruhan ri jəṅ saṅ sri munîsvara, de patik aji. punika sisya kevala maṅaran siro mpu bahula, marək eṅ paduka narendra, kinvan lumamareṅ pun maṅ-
[Folio 15v] gali. mahaṅkana pavəkasira saṅ jivatmeṅ buh citra, manavi pinalampah rəkya deniṅ tukvanya, sapamalampah iṅ saṅ calon araṅ tinəkan ugi rəke de paduka batara, yan uvus saharsa siro mpu bahula kalvan ratna maṅgali hələm. samaṅkana ta rəke saṅ munîsvara lumavadeṅ mpu bahula.“ təhər mvjar ta saṅ nata, “mamintuhu ṅhulun, ryaturta kanuruhan, lah kvan atərən denta siro mpur bahula, umareṅ girah, iniriṅ deniṅ rvaṅ nikeṅ kanuruhan. tan vacana pva sireṅ avan, sigra dataṅ ta sireṅ girah, təhər cumunduk ta sireṅ karaṅira calvan araṅ. aliṅgih ta siro mpu bahula rikanaṅ palaṅka titi ṅka. kañcit umə-
[Folio 16r] dal pva calvan araṅ. tan dva sarama sira napeṅ saṅ titi. liṅira, ‘m-om bahagya kita laki, saṅ pinakatiti ṅhulun, sakeṅ əndi pinakaṅhulun? muvah umahyuneṅ əndi saṅhulun? ləvih rupa varnanta kaya tan tus iṅ vvaṅ ahala, katandruhan ṅhulun sumapeṅ saṅ tamuy’. tumurun ta siro mpu bahula sakeṅ sale,mvaṅ luṅsur basahan.təhər sahurira:lus, ‘tuhu-tuhu sira vicaksaneṅ sastra:gama, lvir mijil iṅ madu juruh sakeṅ tutuk pukulan ri tan salah pasarameṅ saṅhulun mambagyakneṅhulun. lah asuruda pinakaṅhulun, ri pambagenireṅhulun. ndon iṅ ṅhulun yan daaṅ, amalampah kusudenana ṅhulun, ri pinakarasaṅhulun yasa dihin, sama:liṅgih ta siro mpu bahula, kalavan saṅ calvan araṅ. mvajar
[Folio 16v] ta sira mpu bahula, ‘ṅhulun mahyun anəda sukanira saṅ magraha, aminta kasihana ṅhulun, karsa niṅhulun lumamareṅ vəka sira ra saṅhulun, maṅaran sira ratna maṅgali, sugya tan vruha pinakarasaṅhulun ry apanaṅkan iṅhulun, buhjaṅga ṅhulun sakeṅ gaṅga citra, anak pva sri mahamunîsvareṅ ləmah tulis, apuspata ṅhulun siro mpu bahula. saṅ jativara makvan lumamareṅ vəkanira si ratna maṅgali. tan salah pvaṅkulun sira umavaraṅeṅ saṅ munîndra’. mənəṅ hənəṅ sira randa, dvadi linociteṅ tvas, arsa dahat pva sira umantuha, mareṅ siro mpu bahula, univeh avaraṅeṅ saṅ yogîsvara suka dahat rasa ny atinira calvan araṅ. təhər mavacana ta sira, ‘apa pva tan sukaha mami, yan mpu bahula lumamreṅ atmajamami, makadi pakvanira saṅ munîn-
[Folio 17r] dra. aṅhiṅ avay tan tuhu kiteṅ ratna maṅgali. aṅliṅ pva mpu bahula, ‘punapa ta pvaṅkulun, ri dumeh tan tuhveṅ pun maṅgali. pun bahula, aṅhiṅ savalanya jugeka. makamuni pukulun deniṅ tukvan, sapamalampah ra saṅhulun, ṅhulun tuməkanana’. mvajar ta calvan araṅ, ‘e kaki niskaranan guṅ ikaṅ tukvan, yan tuhuva kevala kiteṅhulun, sapavehta kami tumaṅgap’. ya tika pinəhakən niro mpu, ikaṅ sədeh paṅlaraṅ pirak panomah patiba sampir, mvaṅ spatika navaratna dipata. təhər kataṅgapan dera calvan araṅ atah. sapavehiro mpu bahula. adava yan katakna. tan liṅən ikaṅ rahineṅ kuləm, sidya apaṅgih ta siro mpu bahula, kalavan ratna maṅgali, enak ta panəmvanira asilyasa, atut sadeva-sadevi rahineṅ kuləm. tan liṅən siro mpu bahu-
[Folio 17v] la. vacana saṅ calvan araṅ yaṅ maṅayunakən sore, gumaṅsal ikaṅ lipyakara. uvus pva ya ṅgaṅsal ikaṅ patra, saksana viyaṅ ta ya pareṅ səma ṅka. ri dataṅ nika sakeṅ səmasana ṅka, avyatara madya ratri. mahambana pva ya sari-sari. umvajar ta mpu bahula eṅ saṅ maṅgali, ‘rari kita antəniṅhulun, umapa karih sy andikanira bibi, dumeh ya luṅa lumaku riṅ vəṅi juga, sandeya ṅhulun rari, kahyuniṅhulun tumuta juga mami, matya uripa parəṅa hulun eṅ andikanira bibi, jatyani hulun masku induṅ. punapa karya təmən sy andikanira ibu rari, yan ya sədəṅ mahaṅkana, sandeya dahat ṅhulun’. təhər mvajar maṅgali eṅ laki, ‘kakaṅ iṅhulun mamy apajare ri kita, sajatya ṅhulun ayomohtan vənaṅ kakaṅeṅhulun yan milva ulah maṅkana, apan pareṅ səmasana ṅka sy andikanira ibu,
[Folio 18r] lakv anəluh linakvakənira, ya marmaniṅ nagara tempura. ya teka vvaṅ nimitanika kveh paratra, kunapa aṅəbəki təgal mvaṅ səma, grəha makveh suvuṅ. maṅkana prayanira ibu’. maṅliṅ pva siro mpu bahula eṅ saṅ antən, ‘mas mirah ry arya juvita tələṅ iṅ tvas, saṅ pinakaratnan iṅ nagara. mahyun vruha kakanta pinicayan anon tiṅkeṅ ləpihan, ikaṅ ginaṅsal de nira ibu, ṅhulun mahyun maṅgaṅsala’. ya tika sədəṅira viaṅ calvan araṅ pareṅ səma ṅka, sinuṅakənira ikaṅ lipyakara eṅ saṅ kaka de saṅ maṅgali. tan dva vinaca dya mpu bahula, təhər pinamvitakənira mareṅ saṅ antən, yan mahyun pintokna eṅ saṅ mahasanta, ya tika sinuṅkakənya. saksana mahas pva siro mpu bahula mareṅ buh citra. tan varnanan pva yeṅ avan, sigra dataṅ ta sire ṅ səma srama
[Folio 18v] ṅka. jumujug ta sirômarek eṅ saṅ jativara, kapaṅguh aliṅgih eṅ bukur sineva riṅ sisya:tah saṅ munîndra. kagyat dataṅ siro mpu bahula mamava lipyakara, manambah eṅ jəṅ saṅ mrədu, təhər mandilati ləbu kaṅ aneṅ talampakanira saṅ yogîsvara, ənahakənireṅ vunvunan. suka ta manahira saṅ mahavaval ya, tumvan ri sisyanira dataṅ. maṅliṅ pva sira, ‘om-om teka pva sira:naku mpu bahula, mamava pustaka kiteṅhulun, sugya ika drəbyane calvan araṅ’. umvatur siro mpu bahula, eṅ saṅ mahasanta, yan tuhu ləpihan iṅ calvan araṅ. saksana ginaṅsal pva nikaṅ patra dya saṅ mahamuni. ulya nikaṅ sastra antyanteṅ ayunya, paṅlaku dahat mariṅ kayogyan, umareṅ kasidyan, təlas pva yeṅ agama, paṅisin ikaṅ pustaka, təka pveka mariṅ dudu linakvakən ya, de saṅ calvan
[Folio 19r] araṅ, dadyaṅiva mareṅ gələh, kaləṅkan iṅ buvana ginəlo. mvajar ta saṅ munîsvara mariṅ sirompu bahula; ‘pamulih kteṅ girah, sigra-sigra, vava pustaka denta, kon simpənaneṅ antənte maṅgali. ṅhulun beñjaṅ əñjiṅ tumutureṅ kita. kunaṅ avanan mami, riṅ desa gənahe siṅ kamaranan nika, mvaṅ eṅ səma batas təgal, lakva juge kita dihin’. tan dva:m vita:ṅañjali umusapi jaṅ saṅ munîndra siro mpu bahula, mahas ta sira. tan liṅən pva yeṅ avan, sigra dataṅ ta yeṅ girah, makvan sumimpən ikaṅ patra, eṅ saṅ maṅgali. tan varnanən tiṅkeṅ mpu bahula lavan ratna maṅgali, pateh asilih asih rahineṅ kulem, suka dahat manahira calvan araṅ, ləvih sihira vəka mantu. pinupundutan ta ya esuk soren, tan ilaṅ takonakna. vacana pva saṅ munîsvareṅ ləmah-
[Folio 19v] tulis.ěñjiṅ ta sira laku sakeṅ asrama, inuriṅ pva sira deniṅ sisyanira katrini. uməṅgal ta lampah saṅ jativara baradah. tan varnanan pva sireṅ ənu, sigra dataṅ sireṅ desa kaṅ kamaranan, marga samun dukutnya ṅremben. dadi amaṅgih pva sira vvaṅ mandadyakən bahni, mahyun tumunu eṅ sava.ya tika kolaran ikaṅ sava dya saṅ yogîsvara, kinusa deniṅ svaminya manaṅis. ikaṅ kunapa, rinuṅan pva ya tayan, sveta varna. maṅliṅ ta saṅ jativara, ‘uduh kami vəlasən ṅhulun tumvan i ra kita, manaṅis makuseṅ layvane ṅ lakinteka, lah uṅkabi denta, ikaṅ layvane lakinta, ṅhulun tiṅhalanye vaṅke i nika’. iṅuṅkaban pva ikaṅ layvan, dady ana kətəg-kətəg nika. koṅkab piṅ rva, ana ambəka nika. avyatara rvaṅ səpah, dady aluṅguh ikaṅ uvus paratra iṅ saṅ
[Folio 20r] mahasanta. təhər maṅliṅ pva saṅ uvus paratra, matureṅ saṅ jativara, ‘pukulan antyanta guṅe utaṅ iṅhulun eṅ pada saṅ jivatma. tan bisa ṅhulun amanahuri utaṅ ṅhulun eṅ talampakanira saṅ mahamuni’. mvajar ta saṅ sri yogîsvara baradah, ‘e, niskarana ika vuvusteka:yva maṅka. lah pakari kita:pa muliheṅ vesmanta. ṅhulun lumaris’. mahas pva sira saṅ jivatma. ya tika maṅgih ta sira kunapa, tigaṅ siki majajr. ikaṅ rva lagi vutuh, ikaṅ sasiki uvus rusak. siniratan pva ya tirta gaṅga mərta. ikaṅ lagi vutuh, sida mahurip tekaṅ gata. sakasana sah ta sira sakerika, umarati sireṅ grəha suvuṅ, natar nika masamun, dukutnya ṅrəmbən. umañjiṅ pva sireṅ vesma, anəmva ta sira vvaṅ magriṅ. kalih siki uvus paratra. kuneṅ vaneh eṅ taṅga-taṅga nika sama griṅ. ikaṅ sasiki lagy a-
[Folio 20v] ṅintih-intih. kaṅ tuṅgal lagi kəkətəg ni kevala. sama siniratan tirta pva ya de saṅ munîsvara. sida mahurip te kalih, sama:ṅastuti ya maṅarcamana, ri jəṅ saṅ munîndra. təhər mandilati ləbu kaṅ aneṅ talampakan iṅ pada saṅ jativara. mvajar ta saṅ yogîsvara baradah, makvan eṅ sisyanira kalih siki mantukeṅ asrama i reha nika:səpi, patapanireṅ səmasana ṅka. umantuk pva sisya kalih siki. amvit ta sireṅ sri munîsvara maṅañjali. uvus ləpas ta lampah ikeṅ sisya, sigra dataṅ pva yeṅ asrameṅ səmasana buh citra. tan liṅən pveka. varnane saṅ yogîsvara, kesah ta sira sakeṅ rika, aṅidula aṅulvan laku saṅ jativara, mahavan pva sireṅ setra vatas təgal-təgal, dukutnya kakajar mvaṅ pakis vaduri, kayunya. srəgala abahuṅ mamaṅsya kunapa
[Folio 21r] anaṅ sukət pakis. vayasanya munya:ṅalik-alik anaṅ tahən. dataṅ pva sira ṅka saṅ yogîsvara baradah. rəpumənəṅ taṅ svana:bahuṅ, mvaṅ gagak muni, tumvun riṅ saṅ mahasanta dataṅ. sakveha nikaṅ kahavan de saṅ jivatma prapa yan lagyôtuha kevala, sida mahurip tikaṅ paratra:tah, satiṅhalira saṅ munîsvara ṅkana madya niṅ səma. aneki str maṅinakən vaspa karuna sasiki, malayv aṅalor aṅidul, tan vruh ri polaha nika, kolaran ta nayanya r saṅ yogîsvara dataṅ, umara ta ya maṅastuteṅ jəṅ saṅ jativara, təhər aturnyeṅ saṅ mrədu, ‘pvaṅkulun anəda kasihana ṅhulun, de ləbu talampakanira saṅ munîsvara. ṅhulun mahyun tumutureṅ svaminiṅhulun. malara juga:ti niṅ ṅhulun ləbu talampakanira, sinuṅ vidi ta pukulun, depun katemviṅ
[Folio 21v] laki niṅ ṅhulun ləbu talampakanira pukulun’. maṅliṅ pva saṅ yogîsvara, ‘tan kavasa yan maṅkana. yan duriṅ rusaka sy layvane lakinteka, bilih kita katəmva malih deniṅ ṅhulun. rusak pva ya uvus ikaṅ layvanya, tan təmu kita muvah, kapaṅguh kita yan pati. ṅhulun tumuduhakna ṅ svarganta mvaṅ svargane lakinta. mvah iki paranti sakeṅhulun, taṅgapi avay peka. muvah varah mami i ri kita keṅətakna denta, kapaṅgih kiteṅ lakinta’. sumambah taṅ i str tumaṅgap iṅ vacana saṅ mahasanta. tan liṅən tẽkaṅ stri, prasida uvus məntas. liṅən pva saṅ munîndra. laris lampahireṅ madya niṅ səma. kapaṅgih ta ya si vəksirsa, kalavan mahisavadana, sisya nikaṅ calvan araṅ. satiṅhalnya:na saṅ jivatma dataṅ umarək ta yeṅ saṅ mahasanta kalih, maṅastuti ri jeṅira, si vəksirsa mvaṅ mahisavadana, mvajar ta saṅ sri
[Folio 22r] yogîsvara baradah, ‘e, voṅ-voṅ paran kita, təka sumambahe ṅhulun təṅah iṅ səma ṅke, kalavan sakeṅ əndi saṅkanta mvaṅ sapveki namanta? katanvruhan ṅhulun, jateni mami’. umvatur pva ya si vəksirsa mvaṅ mahisavadana. liṅnya, ‘pukulun sahature pun vəksirsa, pun mahisavadana sumambah eṅ jaṅ talampakanira saṅ mahamuni, kasisya ləbu talampakanira pukulun dya saṅ randeṅ girah. ləbu talampakanira anəda sihira saṅ jativara, anəda linukat pukulun deniṅ alaku tan sareh’. tan dva ṅliṅ saṅ yogîsvara, ‘tan kavasa kita lukatarumuhun, yan tan calvan araṅ lukata dihin. pamaṅkat kiteṅ calvan araṅ, pa:jar kita ṅhulun yan ana ṅke, ṅhulun mahyun savacana alavan i varaṅ’. amvit aṅañnjali si vəksirsa:nikəl tur. mvaṅ mahisavadana təhər lumampah
[Folio 22v] ta ya kalih. liṅən saṅ calvan araṅ, sədəṅ ta ya maṅayap iṅ kahyaṅan anaṅ səmasana ṅka. vahu umantuk paduka batari bagavati tinaṅkil, sakeṅ sapvacapan kalavan randeṅ girah. mavəkas pada batari ṅuni riṅ saṅ calvan araṅ. ‘e ayva kita tan prayatna meh sarupanta’. maṅka liṅ batari. ya tika sandeya manahira calvan araṅ, mənəṅ kaṅmitəṅgəṅən tan pv aṅliṅ, deniṅ umaṅən-aṅən pavəkasira batari. saksana dataṅ pva si vəksirsa mvaṅ mahisavadana adulur. umatur ta ya umuhun, riṅ saṅ calvan araṅ aturnyeka yan saṅ yogîsvara baradah dataṅ. maṅliṅ pva saṅ calvan araṅ; ‘e kaliṅanika varaṅ baradah pva yan adataṅ ṅke. lah lamakane ṅhulun maṅke sumapahe ri ya’. saksana lumampah ta saṅ calvan araṅ. ravuh pva yeṅ ayunira saṅ mahavaval, sumapeṅ saṅ jivatma saṅ randeṅ girah. liṅni-
[Folio 23r] ra, ‘pvaṅkulun bahagya saṅ jativara, varaṅeṅhulun saṅ yogîsvara baradah, pinaka suka mami saṅ vitaraga dataṅ. mahyun ulun pituturana ṅ ayu’. maṅliṅ ta saṅ sri munîndra, ‘#, ni varaṅ rahayu dahat vuvusta karsanta yan maṅka. lah ṅhulun mavaraheṅ niti yogya, avay ta kita mənya:gaṅ vuyuṅta, ni varaṅ. ṅhulun katakna dihin. denta:mati-mati janma lakugəlah, maveh kaləṅkan iṅ buvana, magavya dukanikaṅ rat, mvaṅ amati-mati sarat. pira-pira denta tadahi malapataka niṅ rat, maṅka veni yan vvaṅ magriṅ, kadalvan denta amava malapataka, amatyani vvaṅ sanagara. tan kavasa kita yan lukata, yan tan mahavan pati kaliṅanika. iva maṅkana yan duriṅ vruh pasuk vətu niṅ lumukat, masa kita lukata’. mvajar ta saṅ calvan araṅ, ‘kaliṅanika gaṅ dahat patakamami eṅ sarat.
[Folio 23v] yan maṅkana lukatən ṅhulun saṅ jativara, sihanta mavaraṅ eṅhulun’. mavacana ta sira saṅ munîndra, ‘tan bisa ṅhulun lumukate kita maṅke’. təhər mvajar teki saṅ calvan araṅ, kroda mabaṅ duka vuyuṅira, deniṅ dinohan vuvus de saṅ yogîsvara. ‘yan don iṅhulun avaraṅe ri kita. ṅhulun mahyun lukata. ləməh pva lumukateṅhulun. lah misan-misan mami aṅəmasanaṅ pataka papa kavignan. lamakane dak təluhe kita rəsi baradah’. təhər umigəl ta saṅ calvan araṅ, sumuṅsuṅ kesa, hakvanya mulirak-mulirak, kadi nayana niṅ saṅ moṅ mahyun duməmakeṅ nara. karanya karva manudiṅ iṅ saṅ maharəsi. ‘pəjah kita maṅke vvaṅ deniṅ ṅhulun yogîsvara baradah, sugya tan vruha kita varaṅ. ikiṅ groda magaṅ dak ṅhulun təluhe. deleṅ denta mpu baradah’. saksana rəmok tikaṅ vrəksa groda
[Folio 24r] gaṅ, de nikaṅ saṅət drəsti nikaṅ calvan araṅ təkaṅ vodnya. tan dva ṅliṅ saṅ mahamuni, ‘lah, ni varaṅ, təkakən jugeki muvah panəluhteka den asaṅət, masa ṅhulun kagavokana’. təhər binaṅət denira tuməluh. ua tika mijil bahni muntab murub aṅabar-abar, lvir kadi gəlap guməsəṅ iṅ sarva taru, saka riṅ nayana, grana, srote, jihva, murub muntab ry aṅga saṅ jativara. tan vigani pva ya saṅ jivatma, ebaj denira ruməgəp urip ikaṅ sarat. maṅliṅ pva saṅ mahavaval, ‘tan pejah ṅhulun denta təluh, ni varaṅ, kakukud uripta den iṅhulun, moga kita matiyeṅkaṅ paṅadəganmv ika’. ry uvusnya tiniban hastacapala de saṅ munîndra. ya tika paratra saṅ calvan araṅ, rikana paṅadəganya juga. dvadi umaṅən-aṅən siro mpu baradah rikaṅ daləm tvas, ‘uduh, duriṅ mamy avara-
[Folio 24v] heṅ kaləpasan mareṅ ni varaṅ. lah vastu si kita ni varaṅ valuya mahurip muvah’. ya tika mahurip calvan araṅ. təhər runtik maṅuman-uman ikiṅ calvan araṅ. liṅnira, ‘ṅhulun uvus paratra, apa pva ṅhulun denta uripakən manih’. masama pva saṅ munîndra. ‘e, ni varaṅ dvan iṅhulun umuripakəneṅ kita muvah, t uruṅ mami mavaraheṅ kaləpasanta, mvaṅ tumuduheṅ svarganta, kalavan hilaṅa nikaṅ vignanteka, makadi huruṅ vruh kita putus iṅ aṅaji’. mvajar ta calvan araṅ, ‘uduh, kaliṅanika maṅka. lah kamayaṅan lamun ana sihira saṅ yogisvareṅ kami, lumukateṅhulun. ṅhulun maṅke sumambaheṅ jaṅ ləbu talampakan saṅ jativara, yalon lumukateṅhulun’. saksanômuhun pva saṅ calvan araṅ eṅ jəṅ saṅ munîndra, ya tika vinhutakən kaləpasanira, mvaṅ tinuduhakna ṅ svarga, mvaṅ pasuk vətu nikaṅ buva:natah.
[Folio 25r] ry uvusira vinarah-varahan tiṅkeṅ tin dya saṅ sri yogîsvara baradah, suka ica ləga lila varana ajñana saṅ calvan araṅ, tan katiliṅ caranyeṅ ṅuni, aṅhiṅ gineṅnya ṅ vacana saṅ yogîsvara. pitutur i rāyu uvus rinəṅənyatah, mvaṅ karasa denika. ya tika:mvit pva sira calvan araṅ, maṅastuteṅ jaṅ ləbu talampakanira saṅ pravara. liṅ saṅ mahamuni, ‘lah, məntas kita:lukat lugas jati ni varaṅ’. ya tika:təmahan paratra calvan araṅ, sida-sida lukat, umor sireṅ atah. tunvanən sava saṅ randa dya saṅ jivatma, uvus ləbur avu tan pasesa. taṅ liṅonyeka. ya tika si vəksirsa mvaṅ mahisavadana, samyasurudayu, amalakva vikonaneṅ saṅ mahamuni. apa ta karana nika maṅka, i reha nika tan kavasa tumut alukat pa-
[Folio 25v] reṅ kalavan randeṅ girah. ya ta sama vinikon karva dya saṅ munîsvara. tan varnan nikatah mvaṅ calvan araṅ, sama saṅ jivatma mahas pva sira karsa ṅ girah ṅka, tumilikeṅ mpu bahula, mapajara yan calvan araṅ uvus paratra. sigra dataṅ ta saṅ yogiîsvareṅ girah, cumunduk pva sireṅ kabuyutan iṅ vvoṅ girah. dady ana vvaṅ maveh vruh mareṅ siro mpu bahula, yan saṅ munîndra dataṅ. tan dva mahaseva siro mpu bahula, eṅ saṅ jativara, atur sambah anuhun jaṅ talampakanira saṅ mahamuni. ləbu kaṅ aneṅ talampakanira yadi saṅ vitaraga, dinilatan pinakôpajiva mvaṅ ənahakna ṅ vunvunan de saṅ mpu bahula. maṅliṅ pva saṅ yogîsvara, ‘e mpu bahula ṅhulun amuhute ri kita, varaṅ mami calvan araṅ uvus paratra ya. sida mur lukat sida de niṅhulun, maṅkveki karsaniṅhulun, laku ta kiteṅ nagara, pamatureṅ sri narendra yan calvan araṅ uvus pəjah. si vəksirsa,
[Folio 26r] mvaṅ mahisavadana uvus asurud ayu aṅavasya, karva amarəkeṅ ṅhulun. aturanta yan ṅhulun ana ṅke,’ saksana:mvit aṅastuti, siro mpu bahula ri jaṅ saṅ mahamuni. mahas ta sireṅ nagara. tan varnanan ana ṅ avan siro mpu bahula, sigra dataṅ pva sireṅ rayja. paṅguhnira sri naradipa sədaṅ ana sira tinaṅkil, atəṅeṅ tiṅkaṅ panagkilan. para:dipati patih amaṅkubumi, makadi rəsya bujaṅga siva brahmana, tan ya uniṅa tikaṅ para satrya:di. sopacara sama sri tiniṅhalan, saha kandaga təvək, sapanda-panda. sadataṅira siro mpu bahula, kady asinaṅ tiṅkaṅ yati maṅuntur, sama ciṅak tikanaṅ vvaṅ panaṅkilan. tan dva anaṅkil parek təhər umatur siro mpu bahula. liṅnya, ‘pukulun sira saṅ amava rat sahaturane mpu bahula, eṅ paduka batara, pun calvan araṅ sampun paratra, dya saṅ mu-
[Folio 26v] nivara. pun vəksirsa, mvaṅ mahisavadana, sampun asurud ayu, sama:ṅavasya nuhun jaṅ ləbu talampakanira saṅ yogîsvara. saṅ munîndra maṅke sira voyeṅ girah ṅkana’. mvajar ta saṅ naranata, ‘e bahagya si yan maṅkadi liṅteka mpu bahula, pinakasuka n iṅoṅ kady aturta yan sira saṅ mahamuni ana ṅ girah ṅka. e patih darmamurti, padandan syandana kita, mvaṅ aliman, iṅoṅ jaga amarəkeṅ saṅ jativara, kalavan yayîsvari tumut mareṅ girah’. akrigan tikaṅ vvaṅ sanagara, umvaṅ gumuruh svaran iṅ tabəh-tabəhan, goṅ gəndiṅ curiṅ iṅ abaruṅ tan paparuṅvan. paṅkrik niṅ kuda krəbət niṅ dvaja kətəb niṅ lumampah, kadi bubula taṅ buhtala, lam-
[Folio 27r] pah nikaṅ vadva səsək syuhpənuh ikaṅ avan tan papəgatan, lvir larvan-larvan, umijil ma sakeṅ vivaranika. tan liṅən laku saṅ nateṅ hənu, sopacara sri dinirya, t papando rovaṅira ugihan pipiṅitan. ana nuṅgaṅ sakatra lyan tatan kinaharsan madarak adarat kunaṅ, van maguyva-guyvan, pada vijah-vijah polahnya. sigra dataṅ pva ya saṅ bupati ṅ girah. tan liṅən ikanaṅ vvaṅ manonton. ana kapva manonton, ana kavudan kapivure kesa. ana kelaṅan ken nika tan katolih, deniṅ gəṅya mahyun umulata, vaneh malajaṅ kapinyandəm. tan dva jumujug ṅkanaṅ kahananira saṅ yogîsvara baradah, ana ṅ kabuyutan iṅ vvoṅ girah. sadataṅira ṅkana maharaja erlaṅgya, sarama:napa saṅ jivatma. liṅnira, ‘om-om pvaṅkulun saṅ prabu, bahagya yan dataṅe ṅhulun, kamantyanta de saṅ prabu sumadyeṅ saṅ vvoṅ kabranan,
[Folio 27v] lah sama liṅgiyeṅke saṅ amava nagara. ṅhulun katakne ri pəjah nikiṅ calvan araṅ, si vəksirsa, mvaṅ mahisavadana, uvus ya masurud ayu, milva ya ṅumilageṅ ṅhulun’. maṅliṅ pva sri naradipa, ‘bahagya sya pukulun, yan pəjah nikiṅ calvan araṅ. antyanta tusta manah i ṅhulun. mur maṅke kaləṅkan iṅ buvana gəlah-gəlah iṅ sarat karəsrəs iṅ jagat, uvus-uvus kadi tarulata gulma jaṅgama, masa hama katrini, ləbu mələtuk alisyus milək, ruksa rvan ika ruru tibeṅ butala, aminta-minta javəh tan ana. maṅkana sama nikaṅ nagara, uvus ruksa tan vriṅ deya i ṅhulun. tan pateja ikaṅ nagara, de nikaṅ calvan araṅ, aminta-minta urip tan ana. maṅke pva sadataṅira ləbu talampakanira ana ṅ girah ṅke, kadi tarulata aṅayunakən taṅgal iṅ masa kartika, deniṅ ləbu talampakanira anetes i gaṅga tirta kamandalu. tan vruheṅ valuya:gəsaṅ tikaṅ sanaga-
[Folio 28r] ra muvah de sri munîndra. maṅke pveki pakulun, pira-pira utaṅeṅhulun, riṅ ləbu talampakanira saṅ jativara. gaṅ tan kena pinəluk, dava tan kəna dəpanana. tan kəna ṅhulun sahur, aṅhiṅ ṅhulun sakarəh-karəh iṅhulun hələm sumahuram eṅ ləbu talampakanira saṅ yogîsvara, deniṅ tan sipi-sipi gaṅe utaṅ iṅhulun’. mavacana pva munîsvara, ‘e, niskarana vuvus saṅ prabu ika maṅkana. duruṅ təlas pva den i ṅhulun umutahakən nikaṅ calvan araṅ. ry uvus pva ya pəjah ya teka kahyun iṅhulun gavyanən ayu muvah. ikaṅ banaspati gəlah-gəlah ikeṅ calvan araṅ, dady ana daṅka iiṅ girah prascitanən, kabaktyanana deniṅ vvoṅ girah ṅke atah. arananeṅ rabut girah. tan ana umigrahana muvah ikeṅ nagara lyan pamiṅgir. apan uvus sida rabut girah’. amintuhu ta saṅ narendra, sotusira saṅ yogîsvara. maṅliṅ muvah saṅ mahasan-
[Folio 28v] ta, ‘e saṅ prabu umantuka juge karuhun mareṅ nagara. ṅhulun lagy amrascita ta lətəh ikiṅ calvan araṅ. yan ṅhulun uvus amrascita ikiṅ rabut girah ṅke, ṅhulun maraheṅ rajya nagara, umikveṅ saṅ prabu’. mvajar ta saṅ nata erlaṅgya, ‘e, kaliṅanika maṅka, maṅke ta pukulun uvus kariyan’. vacana saṅ mahamuni, ‘yan abot adaṅan, maṅke ta pukulun ayun amvit ra putu ləbu talampakanira saṅ jivatma. mantuka:ruhun mareṅ kadatvan ra putunira. pun kanuruhan den ipun kantun iriki, umiriṅeṅ ləbu talampanira, mareṅ rajya nagara’. hələm tan amvas mantuk ta saṅ prabu, iṅiriṅ deniṅ vadvanira atah. tan varnanan pva sira ṅ avan, sigra dataṅ pva sireṅ kadatvan. liṅəṅ ta saṅ yogîsvara baradah, ana ṅ girah amrascita calvan araṅ, beya pva sakeṅ saṅ nata. ken kanuruhan maṅarva yan i saṅ mahamuni, saṅkəp tekaṅ saji-saji.
[Folio 29r] ry uvusira amrascita, sida iṅaranan rabut girah, pinaka kabuyutan iṅ vvaṅ girah, katəkan iṅ maṅke. sinəmbah iṅarcamana, uvus saṅ mahamuni karyanira, tan amvas umilag pva sira madampa syandana. ken kanuruhan mahavan asva, umikuheṅ jaṅ saṅ jativara, lakva mareṅ nagara. tan kantun siro mpu bahula manitih ya vayja baṅ. tan liṅən pva sira ṅa avan. sigra dataṅ ta sireṅ nagara, kavətra heṅ saṅ prabu yan saṅ yogîsvara dataṅ. tan dva umjil saṅ prabu erlaṅgya sakeṅ kadatvan, amapageṅ saṅ mahamuni baradah, vaṅən iṅ jaba kuta nikiṅ maṅuntur. umvaṅ svara niṅ tabəh-tabəhan, goṅ gəndiṅ pəreret tan paparuṅvan. kadirya pva saṅ yogîsvara de saṅ naranata. saksana tumurun ta saṅ narendra sakeṅ sakata, təhər iṅiriṅakenira ta saṅ mahamuni mareṅ kadatvan. anulya liniṅgyakənira saṅ maha-
[Folio 29v] rəsya riṅ patanya anta. kunaṅ saṅ naranata:liṅgih sira voyeṅ palipir. tan dva mvajar ta saṅ narendra, matur eṅ saṅ mahasanta, ‘pukulun sature pun erlaṅgya, kahatur iṅ ləbu talampakanira saṅ jativara. maṅkveki sampun krəta ikaṅ sanagara de saṅ munîsvara. maṅke ta pukulun kahyun iṅ ra putunira, mahyun umikuveṅ jaṅ saṅ mahamuni, anəda sih saṅ jativara. tumuta tumaki-taki saṅ hyaṅ darma, asurud ayu vara tumiṅgalaken ikaṅ budi mahala. baṅga kuhaka paradara cara cara mareda, ikaṅ dremba, moha, loba, dama creyan, trəsna gaṅ, suṅsut, sadaka forava kagugva pva dera putunira. uvus prabu visesa nyakravati, suka pradana vah akaravahan, vayo sarva makveh tan liṅən ikaṅ ratna rajya mulya, anaṅ kadatvan. aṅhiṅ kapti niṅ ra putunira maṅke, vruha tiṅkah iṅ agurvan-gurvan, maṅrasa ana
[Folio 30r] saṅ hyaṅ darma. vruheṅ kapatin mvaṅ kaṅ uṅsinən, vruha isi niṅ svarga naraka, mvaṅ pasuk vetu niṅ buvana aguṅ alit, vruheṅ marga:guṅ aṅənərgana simpaṅan, kaṅ yogya tutən de saṅ vusman, mvaṅ kapaṅgihnya de saṅ mahavan marga ṅkana’. mahaṅkana aturira maharaja erlaṅgya riṅ saṅ mahamuni. maṅliṅ pva sri munîndra baradah, ‘uduh rahayu dahat vuvus saṅ prabu, antyante yukti nikaṅ sarat yan maṅkana. kita pva ruməgəpeṅ saṅ hyaṅ darma, mvaṅ umovahana ṅ budi mahala. tan sipi yukti ratna nikaṅ nagara’. mvajar ta saṅ nata muvah, umvatur tiṅkeṅ sasari, ‘pukulun pira ta gaṅ ikaṅ sasari, kaṅ kahatureṅ ləbu talampakanira? kunaṅ pirak, vinarah jugeki putnira, riṅ nista madyôtama ikaṅ sasantən’. mvandika pva saṅ mrədu, ‘e, kaliṅanika maṅka karta niṅ saṅ prabu, nissarana ika tiṅkahiṅ beya. yadyan tan pabeyaha,
[Folio 30v] yan atəgav iṅ tuhuva kevala kagurvan-gurvan, sama pva lavan abeya. riṅ ṅabeya yan tan atəgviṅ tuhu riṅ saṅ guru, pada kalavan tan beya, tan kadi riṅ tegv iṅ tuhu uməntasakən deha sakiṅ ṅke. ṅhulun maṅkya:varaheṅ beya, mvaṅ lvir ikaṅ sasantən. ikaṅ piraṅ sabuvana ṅaran, yeka ta poṅkab sabda ṅaranya. batur iṅ sasari, kaṅ sapaha nista ika. madya ikaṅ pataṅ ivu, utama valuṅ ivu, utama niṅ utama valuṅ laksa. yeka geṅ lit iṅ sasari. iva maṅkana yan tan atəgv iṅ tuhu, denya gurvan-gurvan, sama kalavan kaṅ tan pasasantən. kaṅ atəgv iṅ tuhu juga yəka makasasari, ot tatan ot aṅel nora udan mvaṅ panas, yan paṅutus iṅ guru linakvanan juga. tan vənaṅ manikəlakna ṅ tuduh, yeka makasasari. utama yan agiṅ sasantən, tur atəgv iṅ tuhu, mvaṅ tan panikəlakən tuduh. utama dahat yan ana vvaṅ maha-
[Folio 31r] ṅkana.. kita pva saṅ prabu, yan pajəg iṅ karya moyah arəṅ, sakahyun sri narapati juga davniṅ sasari. ṅhulun tan vənaṅ yan umastiya’. mvajar ta saṅ sri narendra, ‘ikaṅ valuṅ ivu pukulun, kalakvan de ranak ləbu talampakanira, katura ṅ paduka sri munîndra.’ maṅliṅ ta saṅ jativara, ‘lah amaṅidəpakən ṅhulun, ri vacana saṅ naranata. ṅhurun mavarah tiṅkah ikaṅ puspa, nora agroda tan kajəṅ sakti, sədah pitulikur apvan, vadahi ṅ saṅkva liṅganya rukma. pucai sotya mirah, sekar ura nika kañcana mvaṅ salaka luru. palva den atipis guntiṅ ika, vijanya mirah sahana nika. ana pva sasar-sasaranta atapa, satiba-tibanta kinamulan iṅ rat, mvaṅ kinatoṅan iṅ buvana jagat, makaṅuni paranusa baktya, pranate ri kita’. amintuhu pva saṅ naranata, ri pavarah saṅ mahamuni. saksana motus ta sira, mandandani puspa mvaṅ səkar ura, vija. makaṅuni tikaṅ a-
[Folio 31v] yunan. sampun sama dinandan pəpək atah. tan ilaṅ takvanakna, isi nikaṅ ratna dukara:dri, makadi ikaṅ papajaṅan sampun pva yadinandya-nandya. antyanta laṅən ika. saṅ prabu sampun malih sira adivasraya, kalih sira paramesvara. sampun malih saṅkəp ikaṅ saji-saji, konaṅ-unaṅ tiniṅalan. marək ta maharaja erlaṅgya eṅ saṅ mahamuni baradah, ṅkana ṅ papajaṅan. tan sipi-sipi laləh nika, kumutug kukus iṅ asəp-asəp, mvaṅ dupa dipa, aməpəki tikaṅ buvanantara, koṅas təkeṅ akasa. rsigana sahana nikaṅ laṅit, kagyat umuṅas ikaṅ dupa dipa, sama nonton sakeṅ gagana:ntara, makadi umuji ulahira maharaja erlaṅgya, kadi milva añjənəṅ ya mastvakən tiṅkahira. umvaṅ ikaṅ tabəh-tabəhan, lyan rəgaṅ saṅka gənda-gəndiṅ parəṅ umuni. pəreret mvaṅ suruny agəndaṅ goṅ abaruṅ tan
[Folio 32r] paparuṅvan. maṅandika pva saṅ jativara, ‘e para ṅke kita saṅ prabu. maṅkveki nora ṅhulun aṅomani mare kita təkeṅoṅ sədəpi basaja, iṅkaneṅ jga niṅhulun paliṅgya ṅka, ṅoṅ sədəpinya kita jatiniṅrat puspatanta’. sumambah pva saṅ prabu kalih pramesvarinira, riṅ saṅ yogîsvara baradah. iṅiṅsar ikaṅ puspa eṅ saṅku, dinasaran pastan kañcana, keṅsar piṅ tikga ikaṅ puspa. tan dva sinədəpan ta saṅ prabu, kalih pramesvarinira dya saṅ mahajivatma. ry uvusira saha:ṅaskara, təhər vinarah-varah ta sira lvir iṅ saṅ hyaṅ darma, lvir iṅ dumadi mvaṅ rasan iṅ tan pva daden vəkas iṅ alit aguṅ. təlas pva denira mavarah. ya tika anumuhut riṅ niti yogya, rahayva nikaṅ lampah, linakvakənira. ikaṅ atapeṅ rajya, mvaṅ atapeṅ girivana, lan tiṅkeṅ catur asrama vinarahakənira. lvirnya, agrahastana, avanapastra, abhiksukana,
[Folio 32v] brahmacarina. artanya, agrəhastana ṅaranya, vikv araby anak-anak aputu. vanapastra ṅaranya, ikaṅ adukuh təṅah iṅ alas gaṅ, vana ṅaran iṅ alas, patra ṅaran iṅ gogodoṅan mvaṅ sukət. mary amaṅan yaṅ tan olihnya aṅrəṅgut sukət godoṅ kanaṅ dukuhnya. matya uripa, tan kencak pva ya sakeṅ sana. ikaṅ biksuka ṅaranya, ikaṅ mahapandita mukti, vənaṅ mamtyani, vənaṅ adrəbya kavula sakalvira, mvaṅ sakavoṅan iṅ vvaṅ makahuluna, mapatni manjajamaha, tan sikaranən de saṅ prabu, apan uvus liṅgyanya maṅkana. brahmacari, ya pva ṅaranya. ia caturbeda lvirnya, ana suklabramacari, ana tan trəsnabramacari ana savalabramacari, ana bramacari təmən. suklabramacari ṅaranya, anakiṅ aləbu guntuṅ duriṅ vruh rasa niṅ səkul ulam, mvaṅ rasa niṅ sala-
[Folio 33r] ki sapatni duruṅ vruh. ajar-ajar saṅkat alit. yeka suklabramacarya ṅaranya. ikaṅ tan trəsna brahmacari, daṅu budy ambək baṅga kuhaka, ya tika maṅguh varah ayu, mvaṅ rasa sakəcap rvaṅ kəcap, tur karasa:tah denya. təhər atiṅgal kadadin, mvaṅ atmaja, patni, tan pakarana, anuly ajar-ajar. yeka tan trəsna brahmacari ṅaranya. savala brahmacari pva ṅaranya, havana:tukar təka svamiya, katitihan pva ya meraṅ makaṅuni yan iṅadu deniṅ tuhan, tan paṅənoh meraṅ, pva ya, anuly aṅajar-ajar. savalabrahmacari ika. ikaṅ brahmacari təmən pva ṅaranya, sarupa-rupa niṅ saṅ viku, yan pratyaksa vruheṅ rasa kabeh, mvaṅ vruh pasuk vətu niṅ buvana jagat. uṅgvan, makadi yan uvus pinutusakən aṅaji. təlas iṅ darma:tah. yeka brahmacari təmən pva ṅaranya. ika ta catur asrama ṅaranya. liṅgihira saṅ ma-
[Folio 33v] hapandita sovaṅ-sovaṅ. teṅətakna hayva malupa, kalavan kita:naku saṅ prabu, tapanteṅ rajya. avay kita tan umiriṅ tiṅkah ikaṅ daṅu, ayva:na:ṅuraṅy aṅlintaṅa sita sitanteṅ buvana. kaṅ ana ṅ kuna den ana samaṅke, ikaṅ noreṅ kuna dn nora maṅke, ikaṅ katama katəmu juga den umaksih, denta umiriṅ. avay ta kita tan pagaman-gamanta vəksa, riṅ vadvanteka:tah. ana pva ikaṅ devasasana, rajasasana, rajaniti, rajakapa-kapa, manusasana, sivasasana, rəsisasana, adigama. ika ta jənəṅakna denta, enak pva pamuktyanteṅ sarat manyakravati. kiteṅ bumi javadvipa ṅke, tapi təkeṅ nusantara kavasa. inak ta ta:mbek nikaṅ sarat kabeh denta, makadi sira uvus vatak saṅ hyaṅ darma, vruh kraman iṅ pati kalavan mahurip, vus vruheṅ svarga nara-
[Folio 34r] ka. vaspadeṅ kahulihanta, vruh kita pasuk vətu niṅ buvana kabeh, mvaṅ ugər-ugər iṅ sarat. tan ana kasandeyanteṅ buvana, eṅət-eṅət denta pvavarah ṅhulun saṅ prabu, avay malupa’. mvatur pva saṅ nata, eṅ saṅ munîndra, ‘atəda tanuja ləbu talampakanira saṅ jativara, ri pitutur saṅ yogîsvara’. təlas pva inuhutakən de saṅ munivara, antyante sih saṅ satvika, eṅ ranan saṅ vascita, yaya:pinandaman, deniṅ liṅ saṅ darma:tma. ry uvus pva mahaṅkana luvaran karya saṅ bramila. ya tika sinivinira ta saṅ srama:neṅ rika, pinupundutan ta sira tadah. tan ilaṅ takvanakna, sesi nikaṅ ratna dukara:dri, ana ṅke, saṅ naranata kalih binaji aṅyapeṅ sira, tan liṅən ikaṅ ugi yan pipiṅitan, mvaṅ papando ravoṅira, sami
[Folio 34v] tumut sama aṅayap ana ṅka. suka gumuyva-guyvan, kata-kinatakən denira. vus andalu dumunuṅ sireṅ yasa danta, uṅvanira:mregil saṅ mahamuni. ěñjiṅ amvita sireṅ sunvanira. mvandika pva sira saṅ mahavaksa, eṅ saṅ prabu, ‘karsa:mvitramanta:naku, aki prabu, ṅhulun umantuk eṅ asrama’. mvatur pva saṅ agani, ‘siṅgih pukulun ləbu talampakanira atoliheṅ ṅ asrama, maṅkya:tmaja saṅ mahamuni, lagya:ṅatura ri jaṅ saṅ jativara’. mvajarta muvah saṅ nata, n umutuseṅ apatih, mvaṅ ken kanuruhan, umiriṅeṅ saṅ mahasanta mul mareṅ asramanira. samy adandan syandana liman asva. inaturan ta saṅ yogîsvara de saṅ prabu, yatra limaṅ kəti, tayan sekət paṅadəg, hema lyan navaratna sarva makveh, mvaṅ kavula juru savah satus, pamahat satus, kəbo lyan sapi pagave ma-
[Folio 35r] kveh, kahatureṅ saṅ jivatma, maṅliṅ pva saṅ mahamuni, ‘atarima ṅhulun ry atur-aturta saṅ prabu. ana pavəkas iṅ ṅhulun muvah e ri kita. avay tan vilaseṅ kasya:sih, makadi srupa-rupa niṅ pandita nista:di avay kita tan mule’. atur sambah ta saṅ nateṅ mahamuni, təhər umusapi jaṅ ləbu kaṅ ana ṅ talampakanira saṅ yogi baradah, ənahakənireṅ vunvunan de saṅ nata, kalih pramîsvaranira. maṅliṅ pva sira muvah saṅ jativara, ‘lah kantuna anakiṅhulun sama rahajaṅ kita, ayva tan meṅət sapavarah iṅhulun. rahineṅ kuləm atyateni’. saksana sah laku saṅ yogîsvara, muggveṅ sakata sira, iniriṅ deniṅ rakryan apatih, mvaṅ kanuruhan, tuməṅguṅ. tan katakneṅ avan sira. mveṅgal ta laku saṅ rəsi. tan liṅən ikaṅ tanayan tani sakambah de nira, sami kagavokan iṅ saṅ munîndra, i reha ṅ sakti tan p-
[Folio 35v] pama. sigra dataṅ pva sira ṅ asrama eṅ səmasana ṅka. tan dva:mvit maṅastuti ṅ jaṅ nira ken apatih, mvaṅ kanuruhan tuməṅguṅ. sama:tolih sireṅ kadatvan. tan varnanan ken apatih mvaṅ ken kanuruhan tuməṅguṅ, sampun kesah pva ya sakeṅ asrama. saṅ yogîsvara ta sira liṅən, sinuṅsuṅ ta sira deniṅ putrinira, maṅaran vedavati. pinapag ta sireṅ gvapura, pareṅ suka:jñana sira saṅ yogîsvara mvaṅ vəkanira. saksanômantukeṅ daləm iṅ asrama, pareṅ sira. tan liṅən pva saṅ jivatma, uvus ana ṅa asramanira. vacananan solahira sri narendra, anan ṅ nagaranira. suka virya krəta manahira, inak pva kaṅ rat kabeh ri paṅadəganira. vit eveh tan ana. kunaṅ ṅhavan. ika ṅgvanika:hrit, pambvegalan, paṅəntalan. iṅənahan pva ya vvaṅ dinadyakən desa, hənu ikaṅ katəgalan, savat alasnya lor kidul, mvaṅ vetan kilyan, kaṅkəran
[Folio 36r] nikaṅ vvaṅ lumivat avan. ya tika kinvanira mananemi groda, mvaṅ vudy, ambulu, jinajar-jajarnira, dady ahëb ikaṅ vvaṅ lumivat avan. tan liṅən pva vvaṅ nusantara:tah, samy ahidəp maṅavuleṅ saṅ naranata. sabraṅ, malayu, palembaṅ, jambi, malaka, siṅapura, petani, pahaṅ, siyam, cəmpa, cina, koci, kəliṅ, tatar, pego, eṅ kədah, kutavariṅin, kate, baṅka, sunda, madura, kaṅayan, makasar, seran, goran, pandan, peleke, moloko, bolo, dompom bima, timur, sasak, sambava. samaṅka kveh ikaṅ nusantara, kaṅ asrah upəti marəkeṅ saṅ prabu. sira saṅ apuspata jatiniṅrat, maharaja erlaṅgya:biseka. ikaṅ para brahmana, buhjaṅga, siro para rəsi, samy aṅliṅgihi sasananira soviṅ-sovaṅ, ana ṅ nagara mvaṅ riṅ asramanira. inak pva kabeh
[Folio 36v] təkan iṅ tanayan tani. landuh ikaṅ udan, dadi ikaṅ tahun, amurah taṅ sarva tinadah. ikaṅ vadvanira samy atata, anut iṅ tiṅkah ikaṅ daṅu. ana ta putranira kalih siki, sama:nvam apəkik iṅ rupa. sira ta jaga:dəgakna prabu, aṅhiṅ lagi kepvan naya saṅ prabu prənahira:ṅadəg. mahyun adəgakna ṅ nusantara sasiki, sasiki malər maṅadəgeṅ javadipa. lagya sandeya:jñna saṅ nata. apa karanika maṅka? i rehnika putra:nvam tan vruheṅ reh. manavi kiraṅ dana avasana tan pavadva ika riṅ vəkasan, marma niṅ tan sinuṅ maṅadəga sira:doh. aṅhiṅ kapti ni saṅ naranat, jumənəṅeṅ bantən sasiki, mvaṅ iṅ java sasiki. apan balîka maparək, sama lavan maksiheṅ javadipa. dady amijil ta saṅ prabu tinaṅkil deniṅ vadva:tah atəṅeṅ, tan dva mvandika ta saṅ bupati, akramiṅ mantrinira kabeh, iṅ ken apatih, tuməṅguṅ,raṅga,
[Folio 37r] kanuruhan, mvaṅ riṅ mantryanira:tah. makadi ṅ para brahmana buhjaṅga rəsi. mvajar ta sri naresvara, ‘kaptya niṅhulun apatih ana kita, mantryaniṅhulun kabeh, mvaṅ kanuruhan samadaya. ana sira brahmana buhjaṅga rəsi. ṅhulun jaga:dəgakna ratu putraniṅhulun, iṅ bali sasiki, mvaṅ i java sasiki. aṅapa denta rumasa? ṅhulun mvalih lagyakən amarək maraheṅ buhcitra səmasana tumarieṅ ləbu talampakanira saṅ yogîsvara, suda:rsa niṅ ṅhulun’. umvatur ta ken apatih, mvaṅ para mantryanira:tah, makadi saṅ mahadvija, samy aniṅgihakən tumurut, yan matur-atur mariṅ eṅ saṅ yogîsvarara. mvandika pva saṅ prabu muvah, motuseṅ kanuruhan umarəkeṅ asrama. amvit aṅanjalya ken kanuruhan ri jaṅ saṅ naranata. sakasana lumampah ta sira ken kanuruhan, muṅgveṅ syanda-
[Folio 37v] na. ləpas ta lampahnikeṅ kanuruhan, dinulur deniṅ naranya:tah. sigra dataṅ pva yeṅ asrama. tumurun ta ken kanuruhan sakeṅ sakata. umañjiṅ ta sireṅ gvapura, paṅgih ta saṅ mahasanta sədaṅ sineva deniṅ sisya nira:tah. sarama siranapeṅ kanuruhan, ‘om-om bahagya kita laki ken kanuruhan. apeki karyanteṅhulun mareṅ asrama?’ umvatur ta ken kanuruhan, ‘pun kanuruhan iṅutus de ranak ləbu talampakanira pukulun, kinen tumariheṅ saṅ yogîsvara, deniṅ putranira:nak, ləbu talampakanira kalih siki, mahyun adəgakna ike nateṅ bantən sasiki, ratv iṅ java sasiki. mahaṅkana patary ry anak, lən sasiki, ratv iṅ java sasiki. mahaṅkana patary ry anak, lən sasiki, ratv iṅ java sasiki. mahaṅkana patary ry anak, ləbu talampakanira ri jaṅ saṅ munîndra. sandikanira saṅ pascita rəke tinut de ranak saṅ dyaya’. maṅliṅ ta saṅ vicaksana, ‘kaliṅanika maṅka karsa a saṅ prabu, tan kavasa ika yaṅ maṅkana, apan ikaṅ bali, tuhu tan ana ratunya:ṅadəg maṅkəg maṅke. aṅhiṅ ta ana sira saṅ yogîsvara, umuṅgv iṅkanaṅ asrameṅ silayukti desa, kaprənah tuva de niṅhulun. antyanta deniṅ kasakti sira, mahabara sira tan popama. ika ta manava sira tan suka, apan tan sipi-sipi kasaktyanira. sira saṅ mahamuni kuturan puspatanira. mghulun maraheṅ bantən dihin, umarəkeṅ saṅ mahamuni eṅ sukti, anəda anugrahanira saṅ munîndra. kita pva ken kanuruhan pamulih juga marîndra. kita pva ken kanuruhan pamulih juga mareṅ nagara, aturakna ṅ saṅ prabu sapakata niṅhulune ri kita. yan dataṅ ṅhulun sakeṅ bantən, annuli mami mareṅ nagara, amarəkeṅ anakiṅhulun, umuhutakna ṅ solih iṅhulun, datan sakeṅ bantən’. amvit aṅañjalya pva ken kanuruhan ri jaṅ saṅ yogîsvara, mvantuk ta sireṅ nagara. kesah ta sira sakeṅ asra-
[Folio 38v] ma. tan katakna ṅhavan, sigra dataṅ pva yeṅ nagara, maturiṅ saṅ bupati, sapavəkasira saṅ yogîsvara. tan liṅîsvara. tan liṅən ta ken kanuruhan, uvus umatureṅ saṅ naranata. vacana saṅ mahamuni baradah, mavəkas-vəkas ta sireṅ putrinira, manama vedavati, ‘e putriniṅhulun vedavati,avay ta kita:ge ləpas duhun, herən mami dataṅ sakeṅ bantən, kalavan duruṅ uvus lagi karyaniṅhulun, hələm kita pareṅ kalavan ṅhulun’. amisiṅgih pva ya saṅ putri, ry andika saṅ yogîsvara. tan dva mahas ta saṅ mahasanta baradah mara eṅ bantən viprayanira, dataṅ eṅ asrama ṅ sukti. kunaṅ desa kaṅ kahavan de nira sakiṅ asramən viprayanira, dataṅ eṅ asrama ṅ sukti. kunaṅ desa kaṅ kahavan de nira sakiṅ asrameṅ səmasana ṅ ləmah tulis, ri ṅkana ṅ vatulambi, riṅ saṅkan, banasara, riṅ japana, pandavan, bubur mirah, kaperiṅ deseṅ campaluk, kandikavari, riṅ kuti, koti. irika ta sira:mrəgil sakuləm. eñjiṅ lumampah pva sira,
[Folio 39r] kaduṅkap taṅ kapuluṅan, riṅ makara muṅkur, bayalaṅu, ujuṅalaṅ, davəvihan, pabayəman, riṅ tirah, riṅ vunut, taləpa, veṅ putih, mvaṅ iṅ geṅgoṅ, gahan, pajarakan, lesan, səkaravi, riṅ gadi. miṅgar maṅalvar saṅ mahamuni laku kalintaṅ desa ṅ momoroṅ, ujuṅ vidara, riṅ varu-varu, daləman. ləmah mirah, tarapas, banyulaṅu, gunuṅ patavuran, saṅ hyaṅ dvaralagudi, pabukuran, alaṅ-alaṅ dava, patukaṅan, turayan, karasikan, balavan, hijin, belaran, andilan. tan liṅən desa kaṅ kahavan de nira. sigra dataṅ ta sireṅ sagara rupək. saṅ jativara baradah maṅantyakən vvaṅ manambaṅi pva sira, dumadak asəpi vvaṅ manambaṅi, tan ana kadirya de saṅ mahamuni. dady ana ta rvan ikaṅ kalañcaṅ, ṅkanaṅ kikisik ya tika kambaṅ-kambaṅakna ṅ samudra, titihana de saṅ mahamuni baradah.
[Folio 39v] təka:ṅadəg ta sireṅ rvan iṅ kalañcaṅ, lumampah ta sireṅ sagara rvan ikaṅ kalañcaṅ. maṅetan laku saṅ yogîsvara, anujv iṅ aran ikaṅ kapurañcak. iṅkana ta saṅ yogîsvara sira tumurun, sakeṅ rvan ikaṅ kalancaṅ. təhər saṅidakna rvan ikaṅ kalañcaṅ dya saṅ mahamuni. lumampah ta sira mareṅ srameṅ silayukti. tan liṅən pva sireṅ hənu. sigra dataṅ ta sireṅ yuktidesa. aliṅgih ta sireṅkanaṅ yasa patamvan, suvya tan ana sumurŏpena riṅ sira. apa ta kanananika maṅka, i rehira mpu yogîsvara kuturan sədəṅ sira nama yoga. masove tan umijil pva sira, sakeṅ daləm asrama, jənək umulahakən yoganira. saranta abilala saṅ mahasanta baradah, sira maṅantyakən iṅkanaṅ patamvan. ya teka maṅən-aṅən tvaya sira, vaṅen gulu saṅ maha kuturan ikaṅ vve, laṅge juga kumukuh, tan mobah sira maṅulahakən yoga
[Folio 40r] tatan vikara. iṅaṅən-aṅən vah ta səmut gatəl, kumambaṅ ana ṅ tvaya aṅrəbut aṅəbəki kanta, saṅ jativara mpu ṅ kuturan, maksih juga de nirayvaga patiti granasika, tumuṅgal ikaṅ jnana visesa. dvadi suvyanika ilaṅ asat ikaṅ tvaya, muvah ilaṅ ikaṅ səmut gatəl, kadi ṅusap parəṅ lavan ilaṅ iṅ tvayadi. uvus vruh ta sira yan adataṅan sira saṅ apaliṅgih ṅkanaṅ suty asrama, palibayanira sakeṅ buhcitra, aṅhiṅ ta sira lagy api tan vruh. avasana masove umedal pva sira mareṅ patamvan, saṅ yogîsvara mpu ṅ kutursan, tumurvan alus ta siro mpu baradah sakeṅ salîsvara mpu ṅ kutursan, tumurvan alus ta siro mpu baradah sakeṅ sal, binagyakən ta sira de rakanira, ‘om-om bahagya laki pantən baya niṅhulun, apveki karyanteṅhulun diṅarya sədataṅke? lah palibya sama liṅgya ṅke. malama kita tan təmv eṅhulun kadi unaṅ-unag pva si rakanira’. təhər manambah ta saṅ sri baradah anuly aliṅgih. aturirəṅ sri mpu ṅ kuturan.
[Folio 40v] liṅ niro mpu baradah, ‘asuruda sira rantənira ri pambagenira saṅ yogîsvara, muvah sadya pantənbaya saṅ mahamuni marəkeṅ saṅ jativara, paibayanira mahyun anəda sukanira saṅ yogîsvara, deniṅ sisya niṅ pantənbayanira pukulun. ratv i java biseka maharaja erlaṅgya, apuspata jatiniṅrat. maputra pva ya kalih siki, punika ta pukulun, jageṅadəṅakəna rikaṅ bali sasiki, sasiki maləra anaṅ javadipa. enak tumuli bali mvaṅ java tumuṅgal. mahaṅkana vipraya niṅ ləbu talampakanira’. tan dva mvandika ta sri yogîsvara mpu ṅ kuturan, ‘e kaliṅanye maṅka pva kahyunta paraṅke robaya. tan paveh ṅhulun yan maṅkana. ṅhulun tan vruh rika madəgakna ratva ṅke bali, ya rika:pan ana jagəki makavaniha, kaprənah putu den iṅhulun, yeka jaga:dəgakən mami ratv i bali’. aṅliṅ pva sri yogîsvara mpu baradah muvah, “pukulun umatur.
[Folio 41r] juge ni mvalih palibayanira aṅ jativara. yan siṅgih dede ri jaṅ ləbu talampakanira, deniṅ ikaṅ nusantara:ntah ta pukulun. ikeṅ bumy aguṅ-aguṅ, sama:hedəp umareṅ javadipa, sama:srah upəti kabeh. avacana pva siro mpu kuturan, ‘eniskarana ikaṅ nusantara katah, asrah upəti edəo mareṅ java kabeh, yan iṅkeneṅ bali tatan paveh ṅhulun. yan ṅka, suka ṅhulun yan lurugen sabumekna, lah sahantuk-antuk i ṅhulun kasyeki, yan ṅhulun uvus paratra samana ta sakahyunira ratu java areha ikeṅ bali’. ye tika sovusira ruməṅa:tah siro mpu baradah, sahandikanira siro mpu kuturan, yan tan olih siro papalampah, sukani rakanira. tan dva tumurun siro mpu baradah ahuli mətu iṅ jaba niṅ asrama. ya tike təhər maṅənaken lindu pva sira. tan sipi-sipi geṅ ikaṅ lindu dataṅ, vrəksa səmpal pati parapal,
[Folio 41v] lyan taṅ rəbah. vaṅ kaṅ ana ṅka tepi nikaṅ vve, tibeṅ nadi kalələp tvaya. patani vesva akveh rəbah. tan dva kagyat ta vvaṅ sanagareṅ bantən, makvan paṅalasan maraheṅ silayukti asrama, tumakvan tiṅkeṅ lindu yan alayu kahajarnya. tan liṅən pva yeṅ avan, sigra dataṅ kaṅ utusan riṅ silayukti, atur ikeṅ utusan riṅ siro mpu ṅ kuturan, pukulun saṅ yogîsvara, punapa rəkya:jaripun punaṅ lindu, diṅarya dataṅ antyantē saṅət guṅ ikaṅ lindu, riṅ daṅu tan ana yan maṅka. təhər mvandika saṅ yogîsvara mpu ṅ kuturan, ‘e avay kita sandeya, pada apagəha juga kiteṅ nagara. ana titi niṅhulun sakeṅ javadipa, ambañcana eṅ mami. yeka maṅənakən lindu’. savus ika vinarah taṅ utusan de saṅ yogîsvara, saksana:mvit aṅañjalya ikaṅ utusan sakiṅ kadatvan ni bali.
[Folio 42r] tan liṅən lakunyeṅ havan, sigra dataṅ pva yeṅ nagareṅ bantən, umatur datəṅeṅ para mantryaguṅ. tan vacanaturnya. liṅən siro mpu baradah, anulya kesah ta sira sakeṅ asrameṅ silayukti desa. sigra prapta pva sireṅ kapurañcak. saksana pinetnira ta rvan ikeṅ kalañcaṅ, kambaṅakna ṅ er, titihana ikaṅ rvan, ya tika kalələp patra nikaṅ kaləvih. akarana pva sira muvah, tumitih iṅkanaṅ rvan ikaṅ kalañcaṅ muvah. kalələp juga tar van ikaṅ kalañcaṅ muvah. sandeya ta sira rikaṅ deyanira, saṅ yogîsvara baradah. maṅliṅ pvasiry aṅganira, ‘boh umapa karana ni ṅhulun kayveki, kaya tan dataṅ eṅ javadipa muvah rasa ny ajñanamami’. dvadi umati-atya pva sireṅ daləm raga. ya tika maeṅət pva sira kady ana umuhuta, ‘e duruṅ amvit pvaṅkulun
[Folio 42v] riṅ ṅuni, ri jaṅ saṅ yogîsvara ṅ sukti. lah lamakani ṅhulun malvi amvit eṅ sira’. lampah ta saṅ yogîsvara baradah malvi amvit, dataṅeṅ saṅ yogîsvara mpu ṅ kuturan. sigra prapta pva sireṅ asrama paṅgih sri mahamuni ṅ sukti desa. sumambah taṅ saṅ sri baradah amvit, ‘pukulun saṅ apaliṅgih, amvit pantəbanbaya ləbu talampakanira saṅ jativara’. maṅliṅ ta sira saṅ yogîsvara sukti, ‘lah pamaṅkat kita:ntəniṅhulun? robaya lumastari ya’. saksana kesah pva siro mpu baradah sakeṅ asrama. ləpas ta lampahira sigra prapteṅ kapurañcak. tumitih pva sireṅ rvan ikaṅ kaləvih, enak ta de nira n umilag aṅulvan. sigra dataṅ pva sireṅ sagara rupək, mantas ta sira ṅkana, saṅ yogîsvara mpu baradah. tan liṅən pva sireṅ hənu lampah saṅ mahamuni ambramaga.
[Folio 43r] sigra dataṅ ta sireṅ nagareṅ daha, paṅgih ta sira:tmajanira saṅ maharaja erlaṅgya sədaṅ tinaṅkil. atəṅəṅ tiṅkeṅ panaṅkilan. mantry aguṅ patih amaṅkubumi mvaṅ raṅga kanuruhan, makadi saṅ mahadvija brahmana bujaṅga rəsi, samana sira sama anaṅkil. tan dva dataṅ pva sira saṅ yogîsvara mpu baradah mahavan gagana. kagyat yan maṅadəg ta sireṅ madya niṅ pahman. təhər pinəkul ta haryinira saṅ jivatma de maharaja erlaṅgya, iṅusap talampakan jaṅ saṅ mahamuni, iṅənahakna ṅ vuvunanira, mvaṅ dinilat de saṅ prabu. masama ta saṅ munîsvara, ‘om,aduh patikmami kita laki saṅ prabu, tan pantuk dn mami sakeṅ bantən. tan suka sira saṅ asrama ṅ silayukti desa, yan putra saṅ prabu madëgeṅ bantən sasiki. ubəndu dahat sira tan pva veh. anak pranah putu jageṅadəg-
[Folio 43v] aken ratu, maṅkveṅarseki yan samanireṅhulun. ṅhulun meh tan dataṅeṅ javadvipa ṅke, tumitih mami rikeṅ rvan iṅ kalañcaṅ kalələp’. maṅliṅ pva saṅ prabu təhər anabaheṅ jəṅ saṅ vaṅsecita, umatureṅ katvaṅira, ‘pukulun sampun patikudu ləbu talampakanira yan maṅka, apan tan sipi-sipi kasaktyanira, sira saṅ yogîsvareṅ bantən. yan kudvakna ta pukulun avasana amigrahana:ṅga. punaṅ eriki java jugeka pinarva’. mvajar ta saṅ nibrata, ‘om, iya ika vuvusta pranuṅhulun saṅ pati, arananeṅ jaṅgala kadiri. avay ta masove, dandani tumuli, mumpuṅ ṅhulun lagyana ṅke. ṅhulun umantukeṅ dunuṅan duhun’. ya tika iṅiriṅakən ta sira saṅ jivatma mantukeṅ dunuṅan, de saṅ bupalaka, maraheṅ raṅkaṅ danta. irika ta siro mpu iṅaturan tadah, saṅ naranata. tan kavacana ta saṅ mahamuni baradah.
[Folio 44r] vacikanən saṅ naradipa, umijil pva sri muvah, motuseṅ para mantry, apatih, raṅga, kanuruhan, magavya pusadi kalih siki, kalavan magavya taratag, ṅgvan iṅ aṅastrenana ṅ putranira. dira:dəgakən again kalih, makaṅunîkaṅ papajaṅan. antyante laləhnika, ikaṅ saka iṅuləsan palisir. tan varnan ikaṅ navaratna kañcana gurmya sumənə kabina-bina, konaṅ-unaṅ varnanya. tan liṅən ikaṅ uñcal-uñcal, kombala bubuntutan amarapadu, ana pətak mvaṅ nila rarahuvan, aulap-ulap luṅsir sveta kuməlab sinilir iṅ maruta lvir kuvuṅ-kuvuṅ, lvir ombak iṅ banyu. ikaṅ pusadîṅadəgakən purva tuṅgal, sasiki ana ṅ pascima. tan vacana ikaṅ paraguru loka, saṅ brahmana, buhjaṅga, saṅ rəsi, sama:cumada sira:tah, jugeka:ṅastvakna ṅ paṅastren. saṅ putra mvalih sampunira saha busana mijil pva sira kalih
[Folio 44v] sama umuṅgah sira ṅkanaṅ papajaṅan, ayunira pinasilih ana ṅka, ambənəpi sahisi nikaṅ lavan adri. tan ilaṅ takvanakna, sama vinastvakən ta sira deniṅ sira para guruloka, brahmana, buhjaṅga, rəsi atah, de nikaṅ samy aṅadəgakən ratu kalih. humvaṅ svara nikeṅ tabəh-tabəhan, goṅ, gəndiṅ, pəreret abaruṅ mvaṅ gəndaṅ, surunya. tan hopən ikaṅ saṅka gənta-gənti pareṅ humuṅ, tan paparuṅvan yaya amliṅi karna. ry uvusira sama iṅastren, iṅastvakən de saṅ mahasanta. sami muṅguh ta sireṅ siṅasananira sovaṅ-sovaṅ, mantyanta aləpira tiniṅalan. ikaṅ muṅgveṅ siṅasana vetan, iṅaranan saṅ prabu jaṅgala. ikaṅ muṅgveṅ siṅasana kulvan, iṅarana saṅ prabu kadiri. mataṅnyan n iṅaranan rat viṅ jaṅgala kadiri katəkan iṅ maṅke. ri sampun iṅ mahaṅkana, sami magavya
[Folio 45r] ya kadaton ta sira, atiṅkah kalaṅanira sovaṅ-sovaṅ, uvus patəh pva iṅaranan jaṅgala kadiri. dvadi mahaṅkana samvenak ta sira sanak, kadi satuṅgal tan ana asor luhur, de nira sama:ṅadəg ratu. lana pva deniṅ buktya mvaṅ tanayan tani, mvaṅ naranira:tah. pinaratri de saṅ maharaja erlaṅgya, samenak de nira mrabvani, ya tikaṅ vəkasan umidəpakən pisuna niṅ nitinira. saṅ nateṅ kadiri dady abaṅun yuda, lurugən si rakanira saṅ nateṅ jaṅgala, dera saṅ nateṅ kadiri. tan dvadan pva sira vajendra, lumurugeṅ jaṅgala. ruməṅa ta sira saṅ nateṅ jaṅgala, yan sira linurug dya saṅ nateṅ kadintən. manaṅkil ta sireṅ braramanira, matur ta sireṅ saṅ prabu tuva. nəhər aturira, ‘bra bapa-
[Folio 45v] ji patik aji matureṅ paduka batara, patik aji linurug, de ranak patik aji, eṅ kadintən’. mvajar ta saṅ prabu erlaṅgya, ‘ih aṅapeki kaliṅanya maṅkana. avay ta kitage lumavan. ṅhulun lagy akon mareṅ kadiri, pamulih juga kiteṅ jaṅgala duhun’. amvit pva saṅ nateṅ jaṅgala mantuk, sigra prapteṅ jaṅgala sira sampun. tan dva mintar totusanira saṅ prabu tuva mareṅ kadintən, sumayuteṅ saṅ nateṅ kadiri, sumapiheṅ yudanira. tan iṅidəp pva ya de saṅ nateṅ kadintən, lumurug jugeki ugranira mareṅ jaṅgala. asraṅ ta svara nikeṅ tabəh-tabəhan, pəreret, surun, gəndaṅ, goṅ gəndiṅ, humuṅ, abarṅ tan paparuṅvan, avor lan paṅrik iṅ asva, liman, mvaṅ krəbət niṅ tuṅ-
[Folio 46r] gul, lampah niṅ udana umiku səsək syuhpənuh, lvir jalanidy aṅalih. sira saṅ eṅ jaṅgala mvalih sampun sira adan rəksa, amapageṅ vajendranira saṅ nateṅ kadiri. səsək supənuh kveh niṅ vadvanira, umuṅ svara nikeṅ tabəh-tabəhan, deniṅ sañjata n umilag kadi guntur vuhu dataṅ. ikaṅ cucuk sama sampun apagut, ramya:ṅloṅi linvaṅan. tan samaneka, vacikanən saṅ prabu erlaṅgya, evəh de nira rumaseṅ tvas, i rehira tatan kedəp. tan dva umatur ta sireṅ saṅ yogîsvara, makvan sumapiheṅ yuda. saksana lumampah ta saṅ mahasanta, jumujugeṅ nateṅ kadintən sigra dataṅ pva sureṅkana, paṅgih ta saṅ nateṅ kadiri sədaṅ aluṅgv iṅ patani, tinaṅkil pv nideniṅ vadvanira:tah. umulat pva sira yan saṅ yogîsvara dataṅ,
[Folio 46v] tumurun ta saṅ nateṅ kadiri sakeṅ salə, təhər atur sambah eṅ jaṅ saṅ munîsvara, sumapeṅ saṅ krəta mambagyakən. tan dva mvandika pva saṅ nibrata, ‘asuruda ṅhulun ri pambagenta nata putu. dvaniṅ ṅhulun para ṅke, sumapiheṅ yudanta. ṅhulun rumiriha amarva ampiyan ikiṅ java dipa ṅke. idəpən ṅhulun putu, yan saṅ nata tan pahidəpa sareh niṅhulun, dan tibanya kita upata, yan kita arəbuteṅ sanakta muvah’. mvajar ta saṅ nateṅ kadintən, ‘punapa ta pukulun raputu ləbu talampakanira saṅ mahamuni, tan adəpa sy andikanira saṅ mahasatvika?’ maṅliṅ pva saṅ vascita, ‘kiteki putu prabu, kamayaṅan si yan uvus edəp kita savuvus iṅhulun. lah pakari kita ṅke putu. ṅhulun maṅkateṅ jaṅgala, sumapiheṅ yudanira ki putu nateṅ jaṅgala.
[Folio 47r] ṅhulun manibakna upata, eṅ saṅ nata ṅ jaṅgala’. saksana lumampah kesah ta saṅ mahamuni baradah, mareṅ jaṅgala viprayanira. tan dva nieṅ havan laku saṅ nibrata, sigra pva dataṅ sireṅ bramileṅ jaṅgala, paṅgih ta sira tinaṅkil deniṅ vadvaniratah. umulat pva sira yan saṅ yogîsvara dataṅ, tumurun ta saṅ nateṅ jaṅgala sakeṅ paliṅgihanira, təhər aṅaturakən sambah paṅabakti, ri jaṅ saṅ vascita. maṅliṅ ta saṅ bupati jaṅgala,“bahagya saṅ munîsvara. punapa sadya ləbu talampakanira, mataṅnya dataṅeṅ raputunira, sama:liṅgih ta pukulun saṅ munîndra?’ saksana:liṅgih ta sira saṅ yogîsvara, kalih yan sira putunira. mavacana saṅ vicaksana, ‘sadya mami mareṅ putu niṅ pukulun saṅ prabu, ṅhulun sumapiheṅ yudanta. iṅuni ṅhulun sakeṅ antənteṅ kadintən, sumapiheṅ yudanike. ṅhulun amurvha upətinta eṅ javadipa ṅkene təkaniṅ ta)-
[Folio 47v] nayan tani kabeh, lyan kaṅ kahatureṅ ramanta anakiṅhulun. ṅhulun maṅkya umatureṅ ri kita masanak, nimita niṅ tan ana rəbatənira. idəpən ṅhulun putu. sama kiteki dak tibani supata yan kita bəlah muvah hələm. avay ta kita aki putu edəpan iṅ vadul-vadulan pisuna. avay tan pagaman-gamanta vəksa, kita saṅ nata’. umatur pva saṅ nateṅ jaṅgala ri jaṅ saṅ mahamuni, ‘punapeki pukulun putunira ləbu talampakanira, tan umidəpa riṅ andikanira saṅ munîsvara, apan umuhutakən riṅ rahajəṅ dahat saṅ jivatma?’ sampunika mahaṅkana, ya tika sama:ṅundurakən nara vadvanira sovaṅ-sovaṅ, saṅ nateṅ kadiri mvaṅ saṅ nateṅ jaṅgala. ya ta dinum ikaṅ tanayan tani kabeh dya saṅ munîsvara, mvaṅ desa-desa, sameliṅ iṅ ampyanira soviṅ-sovaṅ, mvaṅ sama sinuṅan ma-
[Folio 48r] nusasana, makadi rajapurana, pinaka paṅənan ikaṅ tanayan tani, nimita niṅ tancu maroko ikaṅ ampyanya. sama krəta pva sira kabeh kadi nara sasiki muvah, nateṅ jaṅgala mvaṅ nateṅ kadiri, patəh asukan-sukan anaṅ nagaranira. uvus pva sira patəh kalih deniṅ panidikaranira saṅ munîndra, ya tika mantuk ta saṅ yogîsvara, mareṅ nagaranira bagavan sri erlaṅgya. paṅgih ta saṅ prabu sədaṅ tinaṅkil, umulat pva saṅ nata yan saṅ yogîsvara dataṅ. tumurun ta sira sakeṅ salə, mvaṅ luṅsur basahan, təhər umusapi jaṅ saṅ munîsvara ləbu enahakna ṅ vunvunan. mavacana ta saṅ munîndra, ‘uvus ulun aku sumapiheṅ yuda ny anakta, mvaṅ adum ampyanika sovaṅ-sovaṅ, pada eliṅa tanayanta nika tan səlaṅ coroko. makadîṅoṅ tibani upata, yan silih corokana hampiyan. samamintuhu ta putranta.
[Folio 48v] kady anaku maṅke pva ni kaptin iṅhulun, pranaja niṅ ken apatih, patih eṅ jaṅgala. tosiniṅ ken kanuruhanira, apatih eṅ kadiri. iku ta den ayva:na:rəbuta, den arata pva ya denya:ṅgagadiṅ, sama dan tibanyôpata. mataṅnyan ṅhulun mavuvus mahaṅkana, i reha nikaṅ apatih mvaṅ ken kanuruhanira, samahyun asurud ayuva. sama mil viṅ jaṅ anakiṅhulun saṅ prabu, tumaki-taki saṅ hyaṅ darma’. umvatur pva saṅ nateṅ katvaṅira, ‘om, siṅgih dahat pukulun sama saṅ yogîsvara, maṅke pva pukulun pun apatih mvaṅ pun kanuruhan, mahyun umikuva lampah saṅ satvika, sumurud ayuva tumaki-teki eṅ saṅ hyaṅ darma, amalampah nugraheṅ ṅuyah arəṅan. kunaṅ kapti niṅ ləbu talampakanira maṅgyaha madya. ikaṅ sasantən pataṅ ivu, kaṅ kahatureṅ jaṅ saṅ mahamuni’. maṅliṅ pva saṅ nibrata, ‘e ya dahat
[Folio 49r] kaptineki ken apatih mvaṅ ken kanuruhan, dene mahyun tumuta ri salampah anakiṅhulun saṅ prabu, ri duka nastapanta. e lah dandani avay sove. ṅhulun mahyun umantukeṅ asrama’. saksana dinandanan sasari, mvaṅ puspa dupa dipa damar. sama saṅkep tekaṅ saji-saji, sesi nikaṅ lavana:dri. tan dva umuncarakna mantra:ksara pva sira, umvaṅ tikaṅ ginda-gindi saṅka. ya ta sinədəpan ta sira ken apatih kalavan ken kanuruhan. ry uvusira sinədəpan pva ya kalih, vinarah-varah ta sireṅ saṅ hyaṅ darma mvaṅ niti rahayu. təlas tiṅkeṅ pasuk vətu niṅ sarat, mvaṅ ikaṅ sakatvan. sovs niṅ karya ken apatih mvaṅ kanuruhan magavya:yu. maṅliṅ ta saṅ yogîsvara riṅ saṅ naradipa, ‘e anaku saṅ bupati, ayuna:mvit ramanta umoliheṅ srama. varah-varah denta ken apatih mvaṅ ken kanuruhan’. atur sambahta saṅ nateṅ katvaganira,
[Folio 49v] sarvy usap ləbu kaṅ anaṅ talampakan aryi saṅ mahaprajña, enahakna ṅ vunvunan de saṅ nata erlaṅgya. saksanômilag pva saṅ ksali, kunaṅ saṅ apatih mvaṅ ken kanuruhan, mahyun umikuheṅ jaṅ saṅ biksuka. tan sinuṅ dya saṅ santatma, sama:ṅaturakən sambah paṅabakti ta sira, sarva musap talampakan iṅ pada saṅ yati. kesah ta sira sakeṅ nagara, enak pva laku saṅ satya:ṅlila-lila:ṅga. tan liṅən pva sireṅ avan, sigra dataṅ ta sireṅ asramanira rikanaṅ buh citra səmasana ṅka. paṅgih ta putrinira sədaṅ amahjəṅ gəluṅ lukar. tan dva kagyat mvajar ta saṅ vedavati, ‘e ləbu talampakanira kapveṅ ni sira dataṅ’. təhər tumurun alus mvaṅ luṅsur ken saṅ vedavati, atur sambah aməkul jaṅ saṅ vatma. mvandika ta saṅ krəpanu, ‘dataṅ ṅhulun ibu, malama ṅhulun umahyun mantukeṅ asrama, duruṅ uvus juge
[Folio 50r] ni karya niṅhulun. maṅke pva uvus karya niṅhulun, mataṅnyan mami mantukeṅ asrama’. mvajar ta saṅ vedavati muvah, “pukulun saṅ jativara, iṅ kapan punika ta pukulun ləbu talampakanira maktaha? kady agya təmən ranak saṅ jivatma tumutureṅ ibuniṅhulun. maṅliṅ pva saṅ satvika, ‘kaliṅanye kita:tmajaniṅhulun ibu, agya kita:hyun ləpasa. lah maṅkya juga ṅhulun lagy avəkaseṅ si vəksirsa’. kagyat dataṅ asidəkuṅ maṅastuti si vəksirsa kalavan pun mahisavadana. nəhər aturnyeṅ saṅ munîndra, “ləbu talampakanira pukulunne ṅgya:yun moktaha, pun vəksirsa mvaṅ mahisavadana mahyun pukulun tumuta ləpas. maṅliṅ ta saṅ jivatma, ‘tan kavasa kita vəksirsa, mahisavadana, parəṅa lavan ṅhulun. manih tri varsa n ekas pva surupanta, pade kitapaṅgiheṅhulun hələm, pakari juge kita ṅke’.
[Folio 50v] ry uvusira kantən maṅliṅ, saksana moktah saṅ pranopandya, parəṅ kalih putrinira saṅ vedavati, moksa namu-namu mur ilaṅ pva sira. ri sampunira moktah saṅ djaya baradah, sama mur ta sira, suka tan pabalik duhkə. tan tumoliheṅ deha muvah. sovus tan ana niṅ liṅ siro mpu baradah, ya teṅ asraməṅ səmasana, iṅaran pva iṅ murare ṅaran, katəkan iṅ maṅke. tan gostinənyeka. dvaninən putrnira, kaṅ kantun anaṅ ləmah tulis, siro mpu yajñasvara puspata. sira ta maṅalap atah sesa nikaṅ asrameṅ səmasana ṅka, mvaṅ savayo kabeh, lyan lipyakara:tah, makadi hema mvaṅ navaratna, pari dəmi kalavan nara kabeh, mvaṅ kəbo sapi. ika ta inalap nira dera mpu yajñasvara, vinavanireṅ ləmah tulis. ikaṅ kinantunakən, kaṅ jaga saṅune si vəksirsa mvaṅ si mahisavadana, atuṅ-
[Folio 51r] gv asrameṅ səmasana ṅka. mataṅnyan asrameṅ uvih citra pinakapaṅaskaran, apan tus-tusanira saṅ yogîsvara baradah. kabuhjaṅgan dibya:di aṅet. tus tumus kaṅ eṅ rupit, sisya de saṅ mahamuni baradah, mataṅyan ikaṅ iṅ rupit, pinakapaṅaskaran muvah, katəkan iṅ maṅke. //o// iti katatvanira sira sri mpu baradah, duk aneṅ səmasaneṅ ləmah tulis. samapta təlas sinurat riṅ səmadri camara, umahyun aṅilen aṅuṅkuli vve aruṅ, ana guva ṅka. isaka . masa titi, amacapmika, suklapaksa, kadasi, varasapta, su vepañca, ma, astavara, sri, sadvara, vu, trivara, dva, navara, gi, caturvara, la, kulavu niṅ kavi vuku, pratiti, sadayatana. samaṅke kahuvusan iṅ saṅ
[Folio 51v] hyaṅ lipyakara sinurat. santosakna de saṅ sudy aṅgaṅsala niṅ aksara, durlikita kiraṅ ləvih. apuranən pya sarviprah tiṅkeṅ ubraya sastra, deniṅ anvan paksa kumavruh tuməduneṅ tatva, idəpən anəlaṅ tan pantuk. //o// om sri sarasvati sidi rastu rastu astu //o// om dirgayusa saṅ anyurat karuhun saṅ madrəbyakən pustaka rastu sidi //o//

verification and adaptation of I Made Suastika’s edition by Arlo Griffiths