The Sārasamuccaya or ‘Essential Anthology’ by Vararuci

bhagavān vararuci mupulakən sāra-sāra saṅ hyaṅ aṣṭādaśaparva, gave bhagavān byāsa, mataṅnyan panamaskāra sira i bhagavān byāsa, liṅnira:

hana sira maharṣi, tan hana kapiṅgiṅnira, kinatvaṅan iṅ triloka, rumantasakən pətəṅniṅ ajñānaniṅ sarvabhāva, anak saṅ satyavatī, patəmvan lavan bhagavān parāśara, prasūta ri tṅahnikaṅ kr̥ṣṇadvīpa, bhagavān byāsa ṅaranira, sira ta səmbahən, kamnaniṅ hulun mujarakna sāraniṅ gavenira aji.

nahan kottamanira, kady aṅganiṅ tasik lavan gunuṅ himavān, an kalyan mās maṇik sarvamūlya, maṅkana ta sakvehnikiṅ aji bhāratakathā ginavenira, an tasakan iṅ uttamarasa makādi rahasyajñāna.

kunəṅ kottaman saṅ hyaṅ bhāratakathā, ri denyan sira nitya pinakopajīvana saṅ kavivara, kady aṅgan saṅ prabhu sujanmān pinakopajīvananiṅ vadva aṅusir vibhava.

apayāpan ikiṅ aji bhāratakathā, saṅkaniṅ buddhi saṅ kavi, kady aṅganiṅ triloka an vijil saṅke pañcamahābhūta.

tātan hana aji riṅ bhuvana, tan pakāśraya ikiṅ byāsavasana, kady aṅganiṅ śarīra tan hana, ya tan pakāśrayaṅ āhāra.

lavan vaneh kottamanira, yan hana sira tlas ruməṅə̄ rasaniki saṅ hyaṅ aji, pisaniṅu juga sira ahyuna ruməṅva kathāntara, tka riṅ gīta veṇu vīṇādi, kady aṅganiṅ vvaṅ ruməṅə̄ suśabdaniṅ kuvoṅ, huvus ruməsəp ri hati laṅə̄niṅ svaranya, amaṅun harṣaniṅ citta, tan hana gantānira kahyuna ruməṅva rəsniṅ śabdaniṅ gagak.

maṅkana liṅ bhagavān vararucin panamaskāra riṅ bhagavān byāsa, nəhər luməkas ta sira mujarakən sāraniṅ bhāratakathā, ikiṅ inaranan sārasamuccaya, sāra ṅaraniṅ viśeṣa, samuccaya papupulnya, nahan mataṅnyan sārasamuccaya ṅaranikiṅ saṅ hyaṅ aji, daməl bhagavān vararuci.

nihan pinəkət bhagavān vaiśampāyana iṅ mahārāja janamejaya, i kālanira cumaritākən ikaṅ bhāratakathā, ya tiki vitaniṅ sārasamuccaya.

anaku kamuṅ janamejaya, salvirniṅ vara-varah, yāvat makapadārthaṅ caturvarga, sāvatāranya, sakopanyāsanya, hana juga ya ṅke, saṅkṣepanya, ikaṅ hana ṅke, ya ika hana iṅ len saṅkeriki, ikaṅ tan hana ṅke, tan hana ika riṅ len saṅkeriki.

ri sakvehniṅ sarvabhūta, ikiṅ janma vvaṅ juga vənaṅ gumavayakən ikaṅ śubhāśubhakarma, kunəṅ inəntasakəna riṅ śubhakarma juga ikaṅ aśubhakarma, phalaniṅ dadi vvaṅ.

mataṅyan hayva juga vvaṅ manastāpa, an tan paribhava, si dadi vvaṅ ta pva kagə̄ṅakna ri ambək, apayapan paramadurlabha ikiṅ si janma mānuṣa ṅaranya, yadyapi caṇḍālayoni tuvi.

apan ikiṅ dadi vvaṅ, uttama juga ya, nimittaniṅ maṅkana, vənaṅ vi ya tumuluṅ avaknya saṅkeṅ saṅsāra, makasādhanaṅ śubhakarma, hiṅaniṅ kottamaniṅ dadi vvaṅ ika.

hana pva vvaṅ tan gavayakən ikaṅ śubhakarma, tambaniṅ narakaloka kāṅkən lara, pjah pva ya, vvaṅ alara mara riṅ deśa katunan tamba ta ṅaranika, rūpaniṅ tan katəmu ikaṅ enak kolahanya.

paramārthanya, pəṅpə̄ṅən ta pva katəmvanikiṅ si dadi vvaṅ, durlabha vi ya ta, sākṣāt haṇḍaniṅ mara riṅ svarga ika, sanimittaniṅ tan tibā muvah ta pva daməlakəna.

apan ikiṅ janma maṅke, pagavayan śubhāśubhakarma juga ya, ikaṅ ri pəna pabhuktyan karmaphala ika, kaliṅanya, ikaṅ śubhāśubhakarma maṅke, ri pəna ika an kabhukti phalanya, ri pəgatni kabhuktyanya, maṅjanma ta ya muvah, tumūta vāsanāniṅ karmaphala, vāsanā ṅaraniṅ saṅskāra, turahniṅ ambə mātra, ya tinūtniṅ paribhāṣā, svargacyuta, narakacyuta, kunaṅ ikaṅ śubhāśubhakarma ri pəna, tan paphala ika, mataṅnyan maṅke juga pəṅpə̄ṅa śubhāśubhakarma.

ikiṅ taṅ janma vvaṅ, kṣaṇikasvabhāva ta ya, tan pahi lavan kəḍapniṅ kilat, durlabha tovi, mataṅnyan pə̄ṅakəna ya ri kagavayanniṅ dharmasādhana, sakāraṇaniṅ manāśanaṅ saṅsāra, svargaphala kunaṅ.

hana pva tuməmuṅ dadi vvaṅ, vimukha riṅ dharmasādhana, jənək riṅ arthakāma ārah, lobhāmbəknya, ya ika kabañcana ṅaranya.

ikaṅ maṅgih si dadi vvaṅ, prasiddha vənaṅ riṅ dharmasādhāna, tātan əntas saṅke saṅsāra, kabañcana ta ṅaranika.

nihan mata kami maṅke, manavai, maṅuvuh, mapitutur, liṅmami, ikaṅ artha, kāma, malamakən dharma juga ṅulaha, hayva palaṅpaṅ lavan dharma maṅkana liṅmami, ndātan hana juga aṅrəṅə̄ ri haturnyan evəh saṅ makolah dharmasādhana, apa kunaṅ hetunya.

yan paramārthanya, yan arthakāma sādhyan, dharma juga ləkasakəna rumuhun, niyata katəmvaniṅ arthakāma mne, tan paramārtha vi katəmvaniṅ arthakāma, deniṅ anasar sakeṅ dharma.

kunaṅ saṅ paṇḍita, saṅ dhārmika juga, inastutinira, inaləmnira, an sira prasiddha anəmu sukha, tan paṅaləm sugih, kāmī, apan tan tuhu sukha, ri hananiṅ ahaṅkārājñāna, ri səḍəṅniṅ dhanakāma vyavahāra.

ikaṅ dharma ṅaranya, hənuniṅ mara riṅ svarga ika, kadi gatiniṅ parahu, an hənuniṅ baṇyāgan əntas iṅ tasik.

ikaṅ kayatnan ri kagavayaniṅ kāma, artha, mvaṅ mokṣa, dadi ika tan paphala, kunaṅ ikaṅ kayatnan riṅ dharmasādhana, niyata maphala ika, yadyapin aṅən-aṅənan juga, maphala atika.

kadi krama saṅ hyaṅ āditya, an vijil, humilaṅakən ptəṅniṅ rāt, maṅkana tikaṅ vvaṅ mulahakən iṅ dharma, an hilaṅakən salviriṅ pāpa.

salviraniṅ vvaṅ kaniṣṭhamadhyamottama tuvi, yāvat gave hayu kajnəkni hatinya, niyata siddhaniṅ sasinādhyanya.

mvaṅ kottaman ikaṅ dharma, prasiddha saṅkaniṅ hitāvasāna, irikaṅ mulahakən ya, mvaṅ pinakāśraya saṅ paṇḍita, saṅkṣepanya, dharma mantasakən ikaṅ triloka.

hana pva vvaṅ tan liṅgar apagəh buddhinya, ar tūtakən kadamlaniṅ dharmasādhana, ya ika vvaṅ bhāgyamanta liṅ saṅ paṇḍita, tan kalarākna deniṅ kadaṅ-mitranya, yadyan manāśakānapa-napa maṅatīta jīvita tuvi.

kunaṅ paramārthanya, kady aṅganiṅ vvai maṅəna təbu, tan ikaṅ təbu juga kānugrahan denika, milu təkaniṅ tr̥ṇalatādi, saparək ikaṅ təbu milu kānugrahan, maṅkana taṅ vvaṅ makapravr̥ttiṅ dharma, artha, kāma, yaśa kasambi denika.

kunaṅ ikaṅ vvaṅ gumavay ikaṅ śubhakarma, janmanyan saṅke riṅ svargga dlāha, lituhayu maguṇa, sujanma, sugih, mavīrya, phalaniṅ śubhakarmāvasāna tinəmunya.

lavan ta vaneh, riṅ hələt, riṅ alas, riṅ priṅga, riṅ laya, salvirniṅ duhkhahetu, ri papraṅan kunəṅ, tar təka juga ikaṅ bhaya, ri saṅ dhārmika, apan ikaṅ śubhakarma rumakṣa sira.

lavan ta vaneh, ikaṅ strīratna anakbi rahayu, saṅsaṅan riṅ sinaṇḍaṅ, vruh ri saṅinakana riṅ jalu-jalu, lavan umah rahayu, makādi prāsādapr̥ṣṭha, upalakṣaṇa riṅ bhogopabhoga, mvaṅ anarghya vastrābharaṇādi, dr̥bya saṅ puṇyakārī ika kabeh.

apan ikaṅ balakośavāhana, tuməkākən avaknya juga ya ri saṅ puṇyakarma, kadi kramaniṅ maṇḍūka, an parākəna avaknya riṅ sumur, mvaṅ ikaṅ manuk, an təkākəna avaknya riṅ talaga.

mataṅnya deyanika saṅ meṅət, apagəh kadi tan kəneṅ pāti, lviraniran paṅarjana jñāna, artha, kunaṅ yan paṅarjana dharma, kadi katona rumaṅgut mastakanira, ta pva ikaṅ mr̥tyu denira, ahosanā palayvana juga sira.

yan vruha kətikaṅ vvaṅ an nirantarāṅinte manuṅgaṅ ri mastakanya ikaṅ mr̥tyu, yaya tan hyunanya maṅana tuvi, ṅūni-ṅūni kagavayaniṅ adharma.

mataṅnya deyaniṅ vvaṅ, pəṅpə̄ṅan ikaṅ kayauvanan, paṇḍəṅniṅ avak, sādhanākna ri kārjananiṅ dharma, artha, jñāna, kunaṅ apan tan paḍa kaśaktiniṅ atuha lavan rarai, dr̥ṣṭānta nahan yaṅ alalaṅ atuha, tlas ruməpa, marin alaṇḍəp ika.

lavan ta vaneh, ikaṅ upaśaman, rarai kətikaṅ sinaṅgah upaśama, apan jātiṅ upaśama, yan katəkān tuha, ri kṣayaniṅ dhātu ṅke riṅ śarīra, nāṅ vāta, pitta, śleṣma.

nihan parikramaniṅ dadi, kayauvanan, aṅgəh inantiniṅ kararayan, ikaṅ kayauvanan, si tuha, aṅgəh inantinika, katəmu pva si tuha, haneṅ kisapvaniṅ mr̥tyu ta ṅaranika, aparan tikaṅ aṅgəh inantinya, ṅhiṅ si pāti juga, mataṅnyan usə̄nakəna kagavayaniṅ dharmapravr̥tti.

apan saṅ hyaṅ mr̥tyu ṅaranira, sarvavyādhi pinakasārathinira, nimittaniṅ hurip kṣaya, kṣaya pvaṅ hurip, təka taṅ pāti, mataṅnya hayva pramāda, usə̄nakəna jugaṅ śubhakarma, tumuntunakəna kita riṅ paran.

mataṅnya pəṅpə̄ṅan vənaṅ ta, maṅken rarai ta pva kitan ləkasakəna agave dharmasādhana, apan anitya ikiṅ hurip, syapa kāri vruha ri təkaniṅ pāti, syapa maṅvruhana ri təkaniṅ pātinya vih.

apanikaṅ kadaṅ-varga rakva, riṅ tunvan hiṅan ikan paṅatərakən, kunaṅ ikaṅ tumūt, sahāyanikaṅ dadi hyaṅ riṅ paran, gavenya śubhāśubha juga, mataṅnyan prihəna tikiṅ gave hayu, sahāyanta anuntunakəna ri pə̄na dlāha.

lavan tattvanikaṅ kadaṅ ṅaranya, ri pātinta, kāri tikaṅ śarīra tan pamūlya, makāntaṅ timpalakəna, tan hana pahinya lavan varta viṅka, ya ta sinuṅkəman iṅ kadaṅta, irikaṅ sādhana, i vəkasan luṅhā tika malakaṅ, mataṅnyan prihən tikaṅ dharmasādhana, sahāyanta tuməkākəna kita riṅ bhukti muktipada.

ṅhiṅ dharma kəta sākṣāt hayu, sākṣāt vibhava ṅaranya, ṅhiṅ ləbaniṅ manah, klānta riṅ panas tis, kta prasiddha tamba, prāyaścitta, pamaḍəm lara ṅaranya, ṅhiṅ samyagjñāna tuturta, ajinta, vruh ta riṅ tattva, paramārtha inak-ambək ṅaranya, ṅhiṅ ahiṅsā si tan pamāti-māti, si tan hana kakrodha, byaktaniṅ sukha ṅaranya.

yan tuṅgala kəta saṅ hyaṅ āgama, tan saṅśaya ṅvaṅ irikaṅ sinaṅgah hayu, svargāpavargaphala, akveh mara sira, kapva dudū pakṣanira sovaṅ-sovaṅ, hetuniṅ vulaṅun, tan aṅgah riṅ aṅgəhakəna, hana riṅ guhāgahvara, sira saṅ hyaṅ hayu.

mataṅnya bapa, hayva juga masampai riṅ vvaṅ matuha, lot atañāminta vinarah, riṅ kadi sira ta pva kita, apan ikaṅ dharma ṅaranya, paḍa lavan ulā, ri kapva tan kinaniścayan larinira, dadyan saka lor, dadyan saka kidul marikaṅ ulā.

nyaṅ ujarakəna sakarəṅ, śruti ṅaranya saṅ hyaṅ caturveda, saṅ hyaṅ dharmaśāstra, smr̥ti ṅaranira, saṅ hyaṅ śruti, lavan saṅ hyaṅ smr̥ti, sira juga pramāṇākəna, tūtakəna vara-varahnira, riṅ asiṅ prayojana, yāvat maṅkana paripūrṇa haləp saṅ hyaṅ dharmapravr̥tti.

apan saṅ hyaṅ veda ṅaranira, sira saṅkaniṅ caturvarṇa, sira tumiṅkah utpattinya, təka ri ācāranya, sovaṅ-sovaṅ, maṅkanaṅ rāt, maṅkanaṅ caturāśrama, caturāśrama ṅaran saṅ brahmacārī, gr̥hastha, vānaprastha, bhikṣuka, vastu huvus dadi, vastu səḍəṅ hana, vastu yāṅkən dadya kunəṅ, ika ta kabeh, saṅ hyaṅ veda saṅkanika.

ndān saṅ hyaṅ veda, paripūrṇākəna sira, makasādhana saṅ hyaṅ itihāsa, saṅ hyaṅ purāṇa, apan atakut, saṅ hyaṅ veda riṅ akəḍik ajinya, liṅnira, kamuṅ hyaṅ, hayva tiki umarā ri kami, liṅnira maṅkana rakva atakut.

kunaṅ keṅətakəna, sāsiṅ kājar de saṅ hyaṅ śruti, dharma ṅaranika, sakājar de saṅ hyaṅ smr̥ti kunəṅ, dharma ta ṅaranika, śiṣṭācāra kunəṅ, ācāranika saṅ śiṣṭa, dharma ta ṅaranika, śiṣṭa ṅaran saṅ satyavādī, saṅ āpta, saṅ patīrthan, saṅ panaḍahan upadeśa, saṅkṣepa ika katiga, dharma ṅaranira.

kunaṅ deyanta, hana ya pravr̥tti, kapuhara deniṅ kāya, vāk, manah, ndātan panukhe ya ri kita, magave duhkha puhara hr̥droga, yatika tan ulahakənanta riṅ len, hayva tan harimbavā, ika gatinta maṅkana, yatika saṅkṣepaniṅ dharma ṅaranya, vyartha kadaməlaniṅ dharma yan maṅkana, līlāntat gavayakəna ya.

kunaṅ sarvadāya, ika saṅ śiṣṭa, saṅ āpta, satyavādī, jitendriya ta sira, satyālaris duga-duga, niyata pasaṇḍan dharma solahnira, pravr̥ttinira, yatika tūtakənanta, katūtan ika, yatika dharmapravr̥tti ṅaranya.

kunəṅ saṅ hyaṅ dharma, mahas midər iṅ sahana, ndātan hana umaku sira, tan hanenakunira, tan sāpa juga si lavanikaṅ nahan-nahan, tātan pahi lavan anakniṅ strī lañji, ikaṅ tan kina vruhan bavanya, rūpaniṅ tan hana umaku yānak, tan hana inakunya bapa, ri vetnyan durlabha ikaṅ vvaṅ mulahakəna dharma kaliṅanika.

mataṅnyat rəṅə̄ sarvadāya, paramārthaniṅ sinaṅgah dharma, tləs rinṅə̄nta cupvanantā ta ri hati, ikaṅ kadi liṅmami ṅūni vih, sāsiṅ tan kahyun yāvakta, yatika tan ulahakənanta riṅ len.

kunaṅ ikaṅ vvaṅ pisaniṅun daməlakənaṅ dharmasādhana, hapa-hapaniṅ pari, vūkaniṅ antiga paḍanika, rūpaniṅ hana tan papakəna.

apan purihnikaṅ pr̥thagjana, tan dharma, tan kāma, kasiddha denya, ṅhiṅ mātya donyan ahurip, doniṅ pātinya, ṅhiṅ janma muvah, ika taṅ pr̥thagjana maṅkana kramanya, tan hana pātinya iḍəpnika, tahā pih, tan hana pahinya lavan dukut, riṅ kapva pāti doniṅ janmanya, janma doniṅ pātinya.

mvaṅ ikaṅ vvaṅ nindā riṅ dharmapravr̥tti, deniṅ puṅgunya, jənək ta ya riṅ adharmapravr̥tti, ikaṅ manūt-nūt iriya tuvi, niyata pamaṅguhanya lara.

kunaṅ lvirnikaṅ mūdha, jənək riṅ adharma, antasnya sakeṅ niraya, maṅjanma ta ya tiryak-prāṇī, meṣa-mahiṣādi, bvatniṅ janmanya jəmah, maṅjanma ta ya riṅ nīca, kasakitan ta ya kinuñciṅ iṅ lara prihatin, tan təmuṅ sukha.

mataṅnyan nihan juga ṅulaha, hana ya mās tan kavənaṅ rinampas, tan kavənaṅ inahal, tumūti pātinta, ikaṅ mās maṅkana kramanya, yatika prihən arjananta.

yadyapin atyanta daridra kəta ṅvaṅ, mahuripa ta deniṅ tasyan, yan laṅgəṅ apagəh riṅ dharmapravr̥tti, hiḍəpən ta sugih jugāvakta, apan aṅhiṅ dharmapravr̥tti, mās maṇik saṅ sādhu ṅaranira, yatika prihən arjanan, yatika liṅmami mās maṇik tan kəna riṅ corabhayādi.

lavan liṅmami, ika saṅ kevala tumuṅkulanaṅ dharmapravr̥tti, tātan panəmva upajīvananira, apa mataṅnya tar polih aṅasag, gaṅan, vvai, lvirniṅ sulabha təkvanan i harakanira.

nihan keṅət, akveh mara sāmsam riṅ alas, maṅkana ikaṅ lvah riṅ alas, nirmalādaləm aho bañunya, kunaṅ suluhan ta saṅ hyaṅ niśākara, tātan padon kārjananiṅ vibhava, sugyan kālakṣepa.

nihan taṅ ulaha, ri duvəganyan harohara hosana ṅvaṅ, i kagavayaniṅ dharmasādhana, sambina tikaṅ arthārjana riṅ antara saṅka pisan, kadi kramaniṅ ləmbu sḍəṅ mesi hanuṅan valakaṅnya, midər amatək riṅ savah, sinambinya aṅjaṅgut dukut, saparək kaparah ri lakunya, dadi ya tuṣṭa.

lavan ta vaneh, atyanta riṅ gahana kəta saṅ hyaṅ dharma ṅaranira, paramasūkṣma, tan pahi lavan tapakniṅ ivak riṅ vvai, ndān pinet juga sira de saṅ paṇḍita, kə̄lan upaśamā pagvan, kotsāhan.

kāṇḍani caturvarṇa yājarakna sakarəṅ:

brāhmaṇa ādiniṅ varṇa, tumūt kṣatriya, tumūt vaiśya, ika saṅ varṇa tiga, kapva dvijāti sira, dvijāti ṅaraniṅ piṅrva maṅjanma, apan ri sḍəṅniran brahmacārī gurukulavāsī, kinənan sira dīkṣābratasaṅskāra, kapiṅrvaniṅ janmanira tika, ri huvusnira kr̥tasaṅskāra, nahan mataṅnyan kapva dvijāti sira katiga, kunaṅ ikaṅ śūdra kapātniṅ varṇa, ekajāti saṅ kadi rasika, tan dadi kinənan bratasaṅskāra, tātan brahmacārī, maṅkana kāṇḍanikaṅ varṇa an pāt, ya ika caturvarṇa ṅaranya, tan hana kalimaniṅ varṇa ṅaranya.

nyā dharma saṅ brāhmaṇa, maṅajya, mayajñā, maveh dānapuṇya, magələma atīrtha, amarahana, vikvaniṅ ayajñā, manaṅgapa dāna.

nyaṅ brata saṅ brāhmaṇa, rva-vlas kvehnya, pratyekanya, dharma, satya, tapa, dama, vimatsaritva, hrīh, titikṣā, anasūyā, yajña, dāna, dhr̥ti, kṣamā, nahan, pratyekanyan rva-vlas, dharma, satya, pagvanya, tapa ṅaranya śarīrasaṅśoṣaṇa, kapanasaniṅ śarīra, piharan, kuraṅana viṣaya, dama ṅaranya upaśama deniṅ tuturnya, vimatsaritva ṅarani hayva īrṣyā, hrīh ṅaraniṅ iraṅ, vruha riṅ iraṅ vih, titikṣā ṅaraniṅ hayva gə̄ṅ krodha, anasūyā ṅaraniṅ hayva doṣagrāhī, yajña magləm amūjā, dāna, maveha dānapuṇya, dhr̥ti ṅaraniṅ manēb āhniṅ, kṣamā ṅaraniṅ kə̄lan, nahan brata saṅ brāhmaṇa.

kunəṅ ulaha saṅ kṣatriya, umajya saṅ hyaṅ veda, nitya agnihotrā, magavayaṅ yajña, rumakṣaṅ rāt, huniṅa riṅ vadva, tka riṅ kulagotra, maveha dāna, yapvan maṅkana, svargapada antukanira dlāha.

nihan ulaha saṅ vaiśya, maṅajya sira ri saṅ brāhmaṇa, ri saṅ kṣatriya kunəṅ, mvaṅ maveha dāna ri təkaniṅ dānakāla, riṅ śubhadivasa, dum-dumananira ta sakvehniṅ mamarāśraya ri sira, magələma amūjā riṅ saṅ hyaṅ tryagni, saṅ hyaṅ tryagni ṅaranira saṅ hyaṅ apuy tiga, pratyekanira, āhavanīya, gārhaspatya, citāgni, āhavanīya ṅaranira apuyniṅ asuruhan, rumatəṅ i pinaṅan, gārhaspatya ṅaranira apuyniṅ vinaraṅ, apan agni sākṣikā kramaniṅ vinaraṅ i kālaniṅ vivāha, citāgni ṅaranira apuyniṅ manunu śava, nahan ta saṅ hyaṅ tryagni ṅaranira, sira ta pūjān de saṅ vaiśya, ulahnira ika maṅkana, ya tuməkākən sira riṅ svarga dlāha.

yapvan ulahaniṅ śūdra, bhaktya sumevā ri saṅ brāhmaṇa, ri saṅ kṣatriya, riṅ vaiśya, yathākrama juga, parituṣṭa saṅ təlun sinevakanya, hilaṅ ta pāpanya, siddha sakāryanya.

hana pva maṅke kramanya, ratu vədi-vədi, brāhmaṇa sarvabhakṣa, vaiśya nirutsāha riṅ krayavikrayādikarma, śūdra aləməh sevaka riṅ saṅ trivarṇa, paṇḍita duśśīla, sujanma anasar riṅ maryādānya, brāhmaṇa tan satya, strī duṣṭa duśśīlā.

vaneh, vānaprasthādi, sāvakaniṅ mataki-taki kamokṣan, tātan hilaṅ rāganya, masuruhan maphala ry avaknya, svārtha kevala vih, inahakən patīrthana, panəmvana vara-varah, ndān mūrkha, tan panolih sukhāvasāna, kaḍatvan tan paratu, gr̥hastha tan māsih riṅ anak, tan huniṅa riṅ rāt kunəṅ, samaṅkana lvirniṅ kavəlas-arəp, niyata vi panəmvanya hala.

nyāṅ ulah pasādhāraṇan saṅ caturvarṇa, ārjava, si duga-duga bənər, ānr̥śaṅsya, tan nr̥śaṅsya, nr̥śaṅsya ṅaraniṅ ātmasukhapara, tan harimbavā ri laraniṅ len, yāvat mamuhara sukha ry avaknya, yatika nr̥śaṅsa ṅaranya, gatiniṅ tan maṅkana, ānr̥śaṅsya ṅaranika, dama, tumaṅguhana avaknya, indriyanigraha, humrəta indriya, nahan taṅ pravr̥tti pāt, pasādhāraṇan saṅ caturvarṇa, liṅ bhaṭāra manu.

nihan təmən-təmən iṅ yogya kavaśākna, ahiṅsā, satya, si tan kira-kira kahalanniṅ sarvaprāṇī, si klana, si tan palə-paləh, saṅ makadr̥bya ika kabeh, sira prasiddhaniṅ sukha ṅaranira.

apan yāvat si tan r̥ju, saṇḍānikaṅ pravr̥tti, niyata mr̥tyupada ika, tan paṅdadyakən kaləpasən, kunaṅ yan ārjava pagvan ikaṅ pravr̥tti, niyata brahmapada ika, mukti phala vih, maṅkana sarvadāyaniṅ hiḍəp, tan padon ikaṅ ujar adavā, ika ta pva vatvaniṅ hiḍəp.

kunaṅ ikaṅ si tan nr̥śaṅsya, ya ika mukhyaniṅ dharma, yapvan si klan, prasiddhaniṅ kaśaktin ika, ika vruh ta amavāvakta, meṅəta ri savavanya, ṅuniveh vruh ta riṅ ātmatattva, ya ika paramārtha rahasyajñāna ṅaranya, kunaṅ vastuniṅ brata ṅaranya, si satya juga.

nihan halaniṅ nr̥śaṅsa, tan kinonəṅan juga yan hana riṅ rāt, deniṅ vvaṅ adhama tuvi, tan kinahyunan ika, kadi kramanikaṅ vvaṅ sumiṅgahi rvi, sumur māti, apuy kunəṅ, maṅkana tikaṅ sarvajanan tumiṅhalakən ikaṅ vvaṅ nr̥śaṅsa.

nihan kottamaniṅ dama, dama ṅaraniṅ kopaśaman, makahetu meṅət, vruhta mituturi manahta, yatika ləvih saṅkeṅ dāna, ikaṅ dāna ṅaranya, kīrtti lavan uccapada, phalanika, ndān sor ika deniṅ dama, apan ika saṅ dātā, dadi sira tan pakadr̥byaṅ dama, kataman krodhādi, kunaṅ saṅ makadr̥byaṅ dama, niyatanya tan vipatha sira apan atutur, mataṅnyan ləvih taṅ dama saṅkeṅ dāna.

lavan ta vaneh, tan ikaṅ atələs vinasəhan śarīranya, kətikaṅ madyus ṅaranya, kunaṅ ikaṅ prasiddhādyus ṅaranya, ika saṅ makadr̥byaṅ dama juga, saṅ sinaṅgah dānta, si tikādyus liṅ saṅ paṇḍita, śuci riṅ vāhyābhyantara.

nihan ta lakṣaṇaniṅ dānta, tar ləñōk, tan agiraṅ yan anəmu sukha, tan prihatin an katəkan duhkha, enak ta vruhnira riṅ tattva, vənaṅ ta sira tumaṅguh i manahnira apan pakadr̥byaṅ dama, sira ta dānta ṅaranira.

nyaṅ pājara vaneh, indriya ikaṅ sinaṅgah svarganaraka, kramanya, yan kavaśa kahrətanya, ya ika sākṣāt svarga ṅaranya, yapvan tan kavaśa kahrətanya, sākṣāt naraka ika.

phalaniṅ kahrətaniṅ indriya, nihan, kadīrghāyuṣan, ulah rahayu, pagəhniṅ yoga, kaśaktin, yaśa, dharma, artha, yatika katəmu ri kavaśaniṅ indriya.

hana karmapatha ṅaranya, kahrətaniṅ indriya, sapuluh kvehnya, ulahakəna, kramanya, pravr̥ttyaniṅ manah sakarəṅ, tlu kvehnya, ulahaniṅ vāk, pāt, pravr̥ttyaniṅ kāya, tlu, piṇḍa sapuluh, pravr̥ttyaniṅ kāya, vāk, manah, keṅət.

pravr̥ttyaniṅ manah rumuhun ajarakəna, tlu kvehnya, pratyekanya, si tan eṅin adəṅkya ri dr̥byaniṅ len, si tan krodha, riṅ sarvasattva, si mamituhva ri hananiṅ karmaphala, nahan taṅ tiga ulahaniṅ manah, kahrətaniṅ indriya ika.

nyaṅ tan pravr̥ttyaniṅ vāk, pāt kvehnya, pratyekanya, ujar ahala, ujar aprəgas, ujar piśuna, ujar mithyā, nahan taṅ pāt siṅgahananiṅ vāk, tan ujarakna, tan aṅən-aṅənan, kojaranya.

nihan yaṅ tan ulahakəna, sy amāti-māti maṅahal-ahal, si paradāra, nahan taṅ təlu tan ulahakəna riṅ asiṅ riṅ parihāsa, riṅ āpatkāla, ri paṅipyan tuvi siṅgahana jugeka.

apan ikaṅ kinatahvan ikaṅ vvaṅ, kolahanya, kāṅən-aṅənanya, kocapanya, ya juga bvat umalap ikaṅ vvaṅ, jnək katahvan irika vih, mataṅnyan ikaṅ hayu atika ṅabhyāsan, riṅ kāya, vāk, manah.

huvusnyan, durlabha ikaṅ saguṇa, riṅ kāya, vāk, manah, hana pva māṅkana, sira vəkasniṅ durlabha, tan māṅkanya juga siran pinakevəh.

kunaṅ saṅkṣepanya, manah nimittaniṅ niścayajñāna, dadi pvaṅ niścayajñāna, luməkas taṅ ojar, lumkas taṅ mapravr̥tti, mataṅnyan manah ṅaranika pradhānan maṅkana.

apan ikaṅ manah ṅaranya, ya ika vitniṅ indriya, mapravr̥tti ta ya riṅ śubhāśubhakarma, mataṅnyan ikaṅ manah juga prihən kahrətanya sakarəṅ.

nihan ta kramanikaṅ manah, bhrānta luṅhā svabhāvanya, akveh inaṅən-aṅanya, dadi prārthana, dadi saṅśaya, pinakāvaknya, hana pva vvaṅ ikaṅ vənaṅ humrət manah, sira tika maṅgah amaṅgih sukha, maṅke riṅ paraloka vaneh.

lavan tattvanikiṅ manah, nyaṅ mata vuvusənta, naṅ mulat riṅ sarvavastu, manah juga sahāyaniṅ mata nikān vulat, kunaṅ yan vyākula manahnya, tan ilu sumahāyeṅ mata, mulata tovi irikaṅ vastu, tan katon juga ya denika, apan manah ikaṅ vavarəṅə̄ ṅaranya, hiṅanyan pradhānaṅ manah kaliṅanika.

nihan mara keṅətanta, hana ya avayavaniṅ strī, tan yogya vuvusən pradeśanya, rinahasya vih, mvaṅ hana ta kani atləs haṅuruvak, ika taṅ rinahasyanyaṅ strī, lavan ikaṅ kani, ndya pahinika, yan iṅət-iṅətən, ndān kabañcana jugaṅ vvaṅ denika, sumaṅgah ya dudū, makahetu vikalpaniṅ manah, hiṅanyan manah ikaṅ pradhāna ṅaranya.

lavan vaneh, hana ya mukhāsava ṅaranya, madya, matahapan, tutuk asilih, maṅkana rakva kvamanika saṅ kāmī mvaṅ kāminī, yan dələ̄un, tan hana bhedanya lavan ilu, ya mukhāsava, ndān yan ilu paṅaraniṅ vvaṅ, elik ajəjəb ya, yapvan mukhāsava paṅaranya, harṣa ya, takarin umañcana avaknya, makasādhana ṅaran karikaṅ vvaṅ, an maṅkana, ikaṅ ṅaran gavenikaṅ vvaṅ ika, hiṅanyan aglis ikaṅ manah kaliṅanika.

tonən vaneh, tuṅgala tuvi ikaṅ vastu, dudū juga āgrahaniṅ savvaṅ-savvaṅ irika, vyaktinya, nāṅ susuniṅ ibu, dudū āptinikaṅ anak, an monəṅiṅ ibu, lavan āptinikaṅ bapa, hiṅanyan manah magave bheda.

nyaṅ dr̥ṣṭānta vaneh, nahan saṅ bhikṣuka brata parivrājaka, nahan yaṅ kāmuka, vvaṅ gə̄ṅ rāga sakta riṅ strī, nahan taṅ śr̥gāla, ika ta katiga, ya ta mulat iṅ strī, rahayu sasiki kapva dudū hāptinika katiga, vaṅke liṅ saṅ parivrājaka, apan eṅət riṅ anityatattva, liṅnikaṅ kāmuka strī, tka sih iki, kunaṅ liṅnikaṅ śr̥gāla, vastu surasa bhakṣya iki, arah vetnyan vikalpaniṅ manah tinūtniṅ vastubheda.

lavan vaneh, eṅət juga kita, an śuddhiniṅ manah, nikaṅ vvaṅ tinūtniṅ pravr̥ttinya, riṅ asiṅ vastu, vyaktinya, nahan yaṅ bapa humarək i strīnya, muvah hinarəkanya ta anaknya, ndān dudū juga āptinyan ikānarəki ika kalih, āptinyan kapva harṣāndəlanya, hiṅanyan, manah kāraṇa riṅ kriyābheda.

hana ta maṅke kramanya, eṅin ri dr̥byaniṅ len, madəṅki ri sukhanya, ikaṅ vvaṅ maṅkana, yatika pisaniṅun, təmvaṅ sukha maṅke, riṅ paraloka tuvi, mataṅnyan aryakna ika, de saṅ mahyun laṅgəṅ anəmvaṅ sukha.

nyāyeki kadeyāknaniṅ vvaṅ, ikaṅ buddhi māsih riṅ sarvaprāṇī, yatika pagəhakna, hayva ta dəṅki, havya ta iṅin, hayva ta humayam-ayam ikaṅ vastu tan hana, vastu tan yukti kunəṅ, hayva ika inaṅən-aṅən.

mataṅnya hrətən talyana, pagəhakna ta pva ikaṅ pañcendriya, lavan manah, hayva vineh mambahaṅ hinila-hila, vastu inupət, vastu durlabha, vastu tan panukheriṅ avasāna kunəṅ.

ikaṅ vvaṅ īrṣyā ri paḍanya janma tumon māsnya, rūpanya, vīryanya, kasujanmanya, sukhanya, kasubhaganya, kāləmanya, ya ta amuhara īrṣyā iriya, ikaṅ vvaṅ maṅkana kramanya, yatika prasiddhaniṅ saṅsāra ṅaranya, karakət laranya tan patamban.

nihan taṅ keṅət, ikiṅ sarvabhāva tka riṅ martyaloka, saṅ kṣamāvān makanu ika, kṣamāvān ṅaranira, saṅ klan upaśama, ika riṅ paraloka tuvi, hanunira tika apayāpan maṅke inastuti, pinūjā tinakvaṅan, sira deniṅ rāt, riṅ paraloka, uccapada katəmu denira.

saṅkṣepanya, kṣamā ikaṅ paramārthaniṅ pinakadr̥bya, pinakamās-maṇiknika saṅ vənaṅ lumage śaktiniṅ indriya, nora luməvihana haləpnya, aṅhiṅ ya vəkasniṅ pathya, pathya ṅaraniṅ pathādānapetah, tan panasar saṅke mārga yukti, maṅgah sādhana asiṅ parana, tan apilih riṅ kāla.

apan ya tan hana saṅ kṣamāvān, saṅ kṣamāvān ṅaranira, tan pahi lavan saṅ hyaṅ pr̥thivī, riṅ kapva klan, an maṅkana, tan hana niyataniṅ pamitran, krodhātmaka avakiṅ sarvabhāva, kapva tātukar niyatanya.

hana pva sira vənaṅ maniṅgalakən krodha, makasādhanaṅ kṣamā, kadi kramaniṅ ulān tiṅgalakən limuṅsuṅanya, ri kapva tan valuyakna muvah, ika saṅ maṅkana sira tika mahābuddhi ṅaranira, maṅgah sinaṅgah vvaṅ.

katuhvan, apan yadyapi vnaṅa ikaṅ vvaṅ ri musuhnya, tan kavadhan pātyana śatrunya, asiṅ kakrodhanya, sadavāni huripnya tah yan tūtakna gləṅnya tuvi, yaya juga tan həntyani musuhnika, kunəṅ prasiddhaniṅ tan pamusuh, saṅ vənaṅ humrət krodhanira juga.

nyaṅ saṅ kiriman, hana ya ininum saṅ paṇḍita, maṅdani panas amuhara ṅəlu, tan lara iki pih, maṅilaṅakən yaśāpuhara pāpa tapva ya, tan ininum iki deniṅ sāmānyajana, saṅ uttamapuruṣa juga sira vənaṅ minum, sira tuhun śakti kaliṅanya, krodha ika maṅkana kramanya, yatika inumənta, kavaśāknanta sāktinya, rapvan, tmuṅ kopaśaman.

apayapan ikaṅ vvaṅ opaśama, tan pahi lavan avaknya ta pva ikaṅ sarvabhāva liṅnya arah harimbava, tātan paṅḍaṇḍa, tan kataman krodha, ya ika vyaktiniṅ sarvasukha, apan maṅken tmuṅ sukha, riṅ paraloka sukha tah tinmunya.

kunaṅ ikaṅ vvaṅ aṅgə̄ṅ tukar, sadākālāduhkha ika saparanya, solahnya, riṅ paturvan tuvi, makanimitta, tan aṅgəhni hatinya, kadi kramaniṅ aturu riṅ umah mesi sarpa.

samaṅke mara tan enak turunya, pratyekanya, vvaṅ alara, vvaṅ atakut, vvaṅ hana kagləṅnya, vvaṅ umaṅən-aṅən sakāryanya, vvaṅ sarāga kunaṅ.

saṅkṣepanya, ləvih ikaṅ vvaṅ maṅavaśākna krodha, saṅke kinavaśākniṅ krodha, mon pakaləvih juga anugrahaṇa vīryādi tuvi, maṅkana ikaṅ klan, ləvih ika saṅkeṅ tan klan, yadyapin maṅkana kaləvihnya, maṅkana mānuṣajanma, ləvih jugeka saṅkeṅ tan mānuṣa, mon ləvih riṅ bhogopabhogādi, maṅkana saṅ paṇḍita, ləvih sira saṅkeṅ tan paṇḍita, yadyapin samr̥dhya riṅ dhanadhānyādi.

apan ikaṅ vvaṅ kakavaśā deniṅ krodhanya, salvirniṅ pinūjākənya, sāvakaniṅ pavehnya dāna, salvirniṅ tapanya, salvirniṅ hinomakənya, ika ta kabeh bhaṭāra yama sira umalap phalanika, tan paphala iriya, tvas ṅhel, mataṅnyat kavaśākna taṅ krodha.

nihan taṅ kayatnākna, ikaṅ tapa rakṣan, makasādhana kapaḍəmaniṅ krodha ika, kunəṅ hyaṅ śrī, paḍəmniṅ īrṣyā paṅrakṣa ri sira, kunəṅ saṅ hyaṅ aji, paḍəmniṅ ahaṅkāra mvaṅ avamāna paṅrakṣa ri sira, yapvan karakṣanyāvakta, si tan pramāda sādhana irika.

lavan ta vaneh, ikiṅ krodha sinaṅgah mr̥tyu ṅaranya, maṅkana ikiṅ tr̥ṣṇā, ya ika lvah vaitariṇī ṅaranya, atyanta bībhatsa, durgama tovi, atyanta riṅ tīs, atyanta riṅ panas vvainya, ikiṅ tr̥ṣṇā ta vastuniṅ vaitariṇī ṅaranya, kunəṅ saṅ hyaṅ aji, saṅ hyaṅ rahasyajñāna, sira ləmbu mamətvakən sakahyun, kunaṅ ikaṅ kasantoṣan, ya ika nandanavana ṅaranya, taman riṅ indraloka, ikaṅ nandanavana ṅaranya, atyanta ri konaṅ-unaṅ.

kunaṅ ikaṅ vvaṅ kakavaśā deniṅ krodhanya, niyata gumave ulah pāpa, makāntaṅ vənaṅ amātyani guru, vənaṅ ta ya tumiraskāra saṅ sādhu, tumke sira paruṣavacana.

lavan lvirniṅ kakavaśā deniṅ krodha, tan vruh juga ya ri salah-knaniṅ ujar, tātan vruh ya riṅ ulah laraṅan, lavan adharma, vənaṅ umujarakən ikaṅ tan yukti vuvusakna.

paramārthanikaṅ krodha ṅaranya, musuh ṅke riṅ śarīra juga ya, hana pva sira tumiṅgalakən ikaṅ krodha, sira ta kinatvaṅan, inaləm, pinūjā an haneṅ rāt.

riṅ maṅke taṅ krodha prihan tmən kahrətanya, lvirnya, riṅ devatā, riṅ saṅ prabhu, riṅ saṅ brāhmaṇa, riṅ rare kunaṅ, ikaṅ sḍəṅ muṇḍu, riṅ vvaṅ atuha kunaṅ, irikaṁ tlas lilu, vvaṅ alara kunaṅ, i samaṅkana ikaṅ krodha prihən tmən kahrətanya.

lavan vaneh, ika saṅ klan riṅ panas-tīs, riṅ kasiddhaniṅ dharma, artha, klan ta sira ri hala-hayuniṅ ujar, katəmu ta paḍəmniṅ krodha denira, makanimitta kadhīranira, kākarṣaṇa ikaṅ loka denira.

nihan ta prakāraniṅ aryakna, lvirnya, si tan pamituhu ri hananiṅ paraloka, lavan phalaniṅ śubhāśubhakarma, kanindān saṅ hyaṅ veda, kanindāniṅ devatā, īrṣyā, si pūjyan māvak, si ahaṅkāra, krodha, panas-bhāra, rəṅə̄-rəṅə̄n, samaṅkanaṅ aryakna, dohakna saṅkeṅ manah.

yadyapin saṅśayā ktaṅ vvaṅ ri hananiṅ paraloka, mvaṅ phalaniṅ śubhāśubhakarma, tathāpin maṅkana, aryakna juga ikaṅ aśubhakarma, liṅ saṅ hyaṅ āgama, siṅgahana ikaṅ karma senuhutakən saṅ paṇḍita, ləñoka pva rakva saṅ paṇḍita, advā saṅ hyaṅ āgama, ri hananiṅ svarganaraka, tan paphala ikaṅ śubhāśubhakarma, tan hana tah kocivaniṅ umituhu varah saṅ paṇḍita, sumiṅgahanaṅ aśubhapravr̥tti liṅ saṅ hyaṅ āgama, apagəh pva saṅ hyaṅ āgama, niyata maphalaniṅ śubhāśubhakarma, ndah hilaṅ nāstikāvas, kakləman ya riṅ niraya.

tan pratyakṣa kta paṅavruh saṅ paṇḍita ri hananiṅ paraloka, svarganaraka, kunəṅ apan apagəh saṅ hyaṅ āgama pinramāṇāknira, mataṅnyan pratyakṣa lvirniṅ vruhnira.

lavan ta vaneh, yan tan pramāṇākna varah saṅ hyaṅ veda, tan pituhun varah saṅ hyaṅ dharmaśāstra kunəṅ, mvaṅ tan tūtakna pakṣa saṅ hyaṅ āgama, niyata hilaṅniṅ ātma, punarbhāva valuy-valuy riṅ saṅsāra.

hana mara vvaṅ nāstika, tan pamituhu ri hananiṅ śubhāśubhakarmaphala, umambah ikaṅ senuhutakən saṅ hyaṅ āgama, yadyapin asəgəha ya ri kita tuvi, dohana juga ya, hayva kita təṅən iriya, apan tan hana pahinya lavan aṅin adrəs ri piṅgiriṅ lvah, rūpaniṅ basa manūb anibākəna, hanan kadi ləbu mələk rūpaniṅ niyata malit anamāla.

apan ikaṅ vvaṅ nāstika, vvaṅ niṣtriya kunaṅ, niṣkriya ṅaraniṅ vvaṅ tan paniddhākən trivarga, vvaṅ tan pamisiṅgih rasa saṅ hyaṅ āgama, vara-varaḥ saṅ guru kunəṅ, vvaṅ hiṅsaka pravr̥tti kunəṅ, vvaṅ durācāra kunəṅ, ika ta vvaṅ maṅkana kramanya, ya ika māti ṅaranya.

nihan ta krama nikaṅ nāstika, kevalāvaknya juga iniṅunya, yatna ri vrəddhyaniṅ rah dagiṅnya, dāsiṅ pravr̥tti maphala maṅke linkasakanya, kunaṅ ikaṅ pravr̥tti maphala svarggāvavargga dlāha, aturu ya irika, tan vava rəṅəh vih.

kunaṅ liṅmami, rva ikaṅ ulah nimittaniṅ vvaṅ inastuti, lvirnya, ikaṅ pisaniṅu mujarannaṅ paruṣavacana, ikaṅ pisaniṅu kumirakiraṅ ulah tanyukti kunaṅ, samaṅkana ikaṅ vvaṅ pinūjin haneṅ rāt.

ika taṅ ujarakəna, rahayva ta ya, hayva ta vinistārākən, hayva hyun-hyun kavarjana aṅucap, apan ikaṅ ujar yan jambat, hanaṅ harṣa, hana ilik pinuharanya, tan rahayu ta ṅaranika.

apan ikaṅ ujar yan rahayu, rahayu ta kojaranya, tan tuṅgal ikaṅ sukha kapuhara denya, yadyapin rahayu tovi, yatan rahayu kojaranya, irikaṅ umujarakənya tuvi, pvan pamuhara lara.

ikaṅ ujar ahal tan pahi lavan hru, soṅkabnya sakatəmpuhan denya juga alara, rəsəp ri hati, tātan kneṅ paṅan turu ri rahina vəṅi ikaṅ vvaṅ denya, mataṅnyat tan inujarakən ika de saṅ dhīra puruṣa, saṅa ahniṅ mānəb manahnira.

nihan ta denyāṅlare, rəsəp riṅ prāṇa, susuk ri hati, təkeṅ tahulan, mataṅnyan aryakəna ika de saṅ dhārmika.

apan ikaṅ alas, binabad pinaharadin, tumuvuh niyatanika pūrṇa muvah, kunaṅ ikaṅ manah linaraniṅ ujar alarāhala, tan tuvuh ika, kaliṅanya, tan panuvuhakən buddhiṅ ujar ahala.

nyaṅ inilagakən, hana vvaṅ vikāra, kuraṅ ləvih avayavanya, tan vruh maṅaji kunaṅ, vvaṅ durbhāga, durbala inupət kunaṅ, vvaṅ ahala, vvaṅ tan pamās, vvaṅ mūḍha, vvaṅ vədi-vədi kunaṅ, yatika tan tiraskārān tanuyan, pāvakniṅ pāruṣya aṅujar maṅkana.

mataṅnyan maṅke saṅ mahāpaṅḍita, saṅ makabrataṅ kasatyan, tan paṅuman-uman, tan pagavai paiśunya, tan paṅupat, ṅuniveh tan mr̥ṣāvāda, yatna juga sira amihəri ujarnira, rumakṣa halaniṅ len.

kunaṅ ikaṅ vvaṅ maṅke kramanya, yan ri harəp yan paṅaləm, aṅupət yan ri vuri, ya ika crol ṅaranya, n haneṅ rāt, dūran təmvaṅ hayu riṅ ihatra paratra.

mataṅnyat tan ujarakəna juga kopətan iṅ len, tan rəṅən, tukupanaṅ taliṅa, mūra kunəṅ.

ikaṅ vvaṅ nāstika tuvi, atakut juga ya riṅ vvaṅ mithya, vvaṅ gə̄ṅ krodha, katuhvan apa tan pahi mvaṅ sarpa ikaṅ vvaṅ maṅkana, hayva ta vinuvus saṅ dhārmika.

tan madoh marikaṅ viṣa, mvaṅ amr̥ta, ṅke riṅ śarīra kahananya, kramanya, yan apuṅguṅ ikaṅ vvaṅ jənək riṅ adharma, viṣa katəmu denya, yapvan atəguh riṅ kasatyan, mapagəh riṅ dharma, katəmuṅ amṛta.

nihan ta kottaman iṅ kasatyan, nāṅ yajña, nāṅ dāna, nāṅ brata, kapva vənaṅ ika maṅəntasakən, sor tika deniṅ kasatyan, riṅ kapva aṅəntasakən.

yan riṅ janma mānuṣa, brāhmaṇa sira ləvih, kunəṅ yan riṅ teja, saṅ hyaṅ āditya sira ləvih, yan riṅ avayava, nāṅ pāṇipādādi, hulu ikaṅ viśeṣa, yapvan riṅ dharma, ṅhiṅ kasatyan viśeṣa.

hana ta vvaṅ ujar makaphala laraniṅ para, umakusāra siddhaniṅ kāryaniṅ para kunaṅ, ndān mithyā ya, ikaṅ vvaṅ maṅkana kramanya, tan atakut riṅ naraka ika, ta kārin pagavayakən avaknya kapāpan ṅaranika, apan ikaṅ para prasiddhaniṅ mukti kapāpanya, saṅkṣepanika, tan ujarakənaṅ ujar maṅkana.

kunəṅ lvir iṅujarakəna nihan, satya ta ya, hayva ta ya makāvak hiṅsā, hayva makāvak upət, hitāvasāna ta ya, hayva ta pāruṣya, hayva kasəlatan gləṅ, hayva nr̥śaṅsa, hayva paiśunya, maṅkana lvirniṅ tan yogya ujarakəna.

nihan lakṣaṇaniṅ satya, hana ya tinañan tātan pavuni, mājar ta ya, yathābhūta, torasi ikaṅ sakavruḥnya, pravr̥ttinya ikaṅ maṅkana, yatika lakṣaṇaniṅ kasatyan.

kunəṅ paramārthanya nihan, tan ikaṅ ujar advā kətikaṅ mithyā ṅaranya, tan ikaṅ si tuhu satya ṅaranya, kunəṅ prasiddhanya, mon mithyā ikaṅ ujar, təhər maṅde hita juga, magave sukhāvasāna riṅ sarvabhāva, ya satya ṅaranika, mon yathābhūta tovi, yan tan paṅde sukhāvasāna riṅ sarvabhāva, ya satya ṅaranika, mon yathābhūta tovi, yatan paṅde sukhāvasāna riṅ sarvabhūta, mithyā ṅaranika.

mataṅnyan prihən tikaṅ bhūtahita, hayva tan māsih riṅ sarvaprāṇī, apan ikaṅ prāṇa ṅaranya, ya ika nimittaniṅ kapagəhan ikaṅ caturvarga, nāṅ dharma, artha, kāma, mokṣa, hana pva maṅilaṅakən prāṇa, ndya ta tan hilaṅ denika, maṅkana ikaṅ rumakṣa riṅ bhūtahita, ya ta mamagəhakən caturvarga ṅaranya, abhūtahita ṅaranikaṅ tan karakṣa denya.

apan ikaṅ vvaṅ nahat ri huripnya, apa nimitta nikan paṅhilaṅakən prāṇaniṅ len, ika tātan harimbavā kəta ya, ikaṅ sanukhanaryavaknya, ya ta aṅen-aṅenənya, riṅ len.

lavan ya vaneh, ikaṅ śarīra ṅaranya, anitya pinakasvabhāvanya, tan lanā, apan ri pātinya, tan pamūlya ya, mastakanya tuvi linaṅkahaniṅ śr̥gāla, an maṅkana tattvanya, aparan ta rakva ya, iṅuni makasādhanaṅ parapīḍā, ndya ta yogyanika.

nihan marāvasthānikiṅ śarīra, pilih hulər, pilih havu, pilih purīṣa təmahanya, an maṅkana, rakṣanta rakva ya iṅun, makasādhanaṅ parapīḍā, apa ta nimittanya.

saṅkṣepanya, bhūtahita tikaṅ ulaha, apan ikaṅ vvaṅ lumaku, aluṅguh, ataṅhi, maturu kunəṅ, ndātan pakaphalaṅ bhūtahita, tan hana pahiniṅ pravr̥ttinya lavan ulah iṅ paśu.

nihan pājara sakarəṅ nāṅ kidaṅ, sakatuṅgal denika mānak, kunaṅ ikaṅ śr̥gāla, mānak ika sakapitu nəm, kaliṅanika, riṅ nəm pitu, tan ahurip ika kabeh, apan ikaṅ amaṅan, upalakṣaṇa riṅ makārya riṅ hala, ya ika kagə̄ṅaniṅ vighka, kunaṅ ikaṅ pinaṅan, salvirniṅ kinārya riṅ hala, taha ika.

hana mara vvaṅ maṅke kramanya, tapvan pagave parikleśa riṅ prāṇī, tan paṅapusi, tan pamāti, kevala sānukana riṅ prāṇī tapva ginavenya, ya ika sinaṅgah amaṅgih paramasukha ṅaranya.

kunəṅ phalanya nihan, ikaṅ vvaṅ tan pamāti-mātin, haneṅ rāt, senaṅən-aṅənya, sapinaranya, sakahyunya yatika sulabha katəmu denya, tanulihnya kasakitan.

kaliṅanya, yan kalituhayvan sādhyanta, paripūrṇa marya vikāra kunəṅ, kadīrghāyuṣan kunəṅ, athavā kaprajñān, kaśūran, kaśaktin, tutur laṅgəṅ kunəṅ, ikaṅ hiṅsāpravr̥tti hayva ginavayakən.

lavan vaneh, ikaṅ vvaṅ umehakəniṅ abhaya, abhaya ṅaranya, tayaniṅ vədi, ya ta vinehakənya riṅ sarvabhāva, vetniṅ gə̄ṅnyāsihnya, sinuval riṅ abhaya ika, deniṅ sarvabhāva, riṅ ihatra paratra.