R̥ṣiśāsana or ‘Ordinance for the Sages’

kaliṅanya, sira bhaṭāra tambeyanira mintonakən āvaknirar paṅanti riṅ rāt, sira ta mūlaniṅ sinaṅguh prabhu riṅ loka madhyapada, mahārāja manu ṅaranira, sira maveh anugraha suśāstra śaivaśāśana ṅaranya, mapakna kaiśvaryānanira ḍaṅ ācārya śaiva, ri tiṅkah saṅ bhujaṅga nityaśāṅutsāha gumavayakən pūjā samādhi riṅ ahorātri, rahina vəṅi tan paṅinak-inak saṅ bhujaṅga mrārthanākən ri svasthāniṅ rat, ṅuniveh ri hayva taṇḍa rakryan makādi ri hajəṅa saṅ prabhu, laṅgəṅanira sinivi riṅ kabhujaṅgan, mvaṅ gavayakna taṅ trikāya paramārtha ṅaranya, ulah, śīla, śabda, lāvan āmbək.

nihanta karakṣaniṅ śīla ṅaranya, maitrī paraduhkha ṅaranya viyoga, sukha karuṇa, tuṣṭi sukha muditā, parasukhaduhkha upekṣā, kamupekṣan,

gumavayakən kahayvaknaniṅ para kaliṅanikā, maitrī ṅaranika, paraduhkha viyoga ṅaranya, alarāmbəknira tumon duhkhaniṅ len, karuṇā ṅaranikā, paratuṣṭi ṅaranya, enak ambəknira tumon sukhaniṅ len, muditā ṅaranikā,

kaliṅanya, hayva tan mātmā samodana, kadi sihta ry avakta, maṅkana ta sihanta riṅ len, mvaṅ gavayakna taṅ tutur, tapa, japa, samādhi, mantra, aviparīta, apan tapasvinā, śamarūpam saṅ viku, sama samādhinira, rūpam pinakarūpanira, pinakabratanira, prajābandhu ta sira, masih riṅ sarvajanma, ṅuniveh kahayvaknaniṅ rāt kabeh, dadyaniṅ tahun, laṇḍuṅaniṅ udan, karuhun kadīrghāyuṣakna śrī mahārāja, sakulavarganira, putrapautrāṅśanira, nahan karakṣaniṅ bhuvana de saṅ paṇḍita,

mataṅnyan hana rājaśāsana, inajarakən rahyaṅta i məḍaṅ, ampu saṅ siddhapaṇḍita, lvirnya, hana dharmaśāsana, hana rājaśāsana, hana devaśāsana, hana r̥ṣiśāsana, //

dharmaśāsana ṅaranya, śāsananiṅ patih, vahuta, kalaṅ, gusti, vinəkas, tuha banva, baṇigrāma, baṇigrāmi, juru baṇigrāmi, puhavaṅ, dharmaśāsana ṅaranya //

rājaśāsana ṅaranya, śāsana saṅ prabhu, sirāmrayatna irikaṅ yuddha, sārasamuccaya, manu-hāgama-mānava, atītānāgata-vartamāna, rājaśāsana ṅaranika //

devaśāsana ṅaranya, śāśana saṅ saugata, māheśvara, mahābrāhmaṇa, salvirniṅ samayi, putraka, sādhaka, pitāmaha, bhaṭāra parameśvara , salvir ḍaṅ hyaṅ saliṅsiṅan, vulusan, tigaṅ rāt, raja, jambi, air bulaṅ, air asih, maṅulihi, taji, kamūlan, parhyaṅan, devaśāsana ṅaranikā //

r̥ṣiśāsana ṅaranya, śāsana saṅ paṇḍita, yogīśvara, svatantra, adr̥vya lpas, tan kəna riṅ rājasva, deniṅ śāsana saṅ prabhu ikā, apan saṅ paṇḍita pramāṇa irikaṅ patapan, sira vaśa-vaśitva ry alasnya, gunuṅ kəṇḍəṅnya, ṅkā ta deśa saṅ paṇḍita, tan ulah-ulahən ta saṅ paṇḍita, deniṅ rāt kabeh, karuhun saṅ prabhu, ya tatan kəneṅ rājaśāsana ṅaranya,

brāhmaṇa, kṣatriya, vaiśya, śūdra, sira ta sinaṅguh caturjanma ṅaranya, acaṅkrama pva sira riṅ patapan, ry asthāna saṅ paṇḍita, tan parabyāpārātaḥ sira, salvirniṅ tinanəmnira riṅ patapanira, kadyaṅganiṅ pucaṅ sərəh, nyū, tal, hano, pisaṅ, talə̄s, uvi, təbu, saprakāra, ṅuniveh taṅ bañak, itik, ayam, manuk iṅ kuruṅan, vəḍus, saA:3vpi, kbo, saprakāra riṅ patapanira, tan parabyāpārahata sira, salvirniṅ kavvaṅanira, taṇḍa rakryan, paməgət, mantri, hulun haji, tan parabyāpāra tapva i sira,

muvah vənaṅ sirāpaṭāraṇa kuniṅ, asurāga kuniṅ , apayuṅ joṅ kuniṅ, saprakāra, arəgaṅa, acuriṅa, muvah yadyapin sira katəkana pati riṅ patapan, salviraniṅ kavvaṅanira, lvirnya, taṇḍa rakryan, paməgət, hulun aji, mantri, rājaputra, rājaputrī, ṅuniveh taṅ sarvajanma, mambaṅ, havaṅ, *parasi, uñjəman, *karṣa, *juhut, *bahijən, tumutuṅ janma *savūk-savūk, *hiṇḍavan, mumuhan, sulap, timur, marivuṅ, pujut, jəṅgi, boṇḍan, aluṅ, kəmir, kəḍi, valyan, saprakāraniṅ janmanya, katəkana pati riṅ patapan, savinavanya muvah ri hananiṅ grāma, kaniṣṭhamadhyamottama, umuṅsir i həbnira riṅ patapan, lvirnya, A:4rapaṇḍe vsi, apaṇḍe mās, salviraniṅ apaṇḍe, ṅuniveh samagrig asambevara, avalijāvukiran, adagaṅ amalantən,

vnaṅ sirāhuluna pujut, boṇḍan, kəmir, salviraniṅ sakeṅ sabraṅ, ṅuniveh añjamaha rare kavula tan sikaranən, saṅ maṅanti riṅ patapan, ṅuniveh sabhūṣaṇānira, omaha pañca-bale, anusuna palaṅka binubut, ajoṅ kuniṅ, hapayuṅ putih pinagut lavan vuluṅ, apattharaṇa vuluṅ kuniṅ, tan prativādhaka saṅ prabhu irikā, maṅkana rasa pavəkas saṅ siddha mahāpuruṣa //

kelu ləpasikā, saṅ paṇḍita pramāṇa irikā, tan byāpāra hata ikaṅ rāt kabeh, karuhun saṅ prabhu, ya tatan kəna riṅ rājaśāsana ṅaranya, apan saṅ paṇḍita vəkasniṅ janma, sirāgave paraniṅ kaniṣṭhamadhyamottama, luməpasakna pāpanikaṅ sarvajanma, tumut taṅ maṅilala dr̥vya haji, vulu-vulu magəṅ aḍmit, paṅuraṅ, kriṅ, paranakan, *para prah, vadihaty akudur, sakveh saṅ makəmit vatəs, tan tama riṅ saṅ paṇḍita, limus galuh, paṅaruhan, maniga, vuṅkal tajəm, manimpiki, vuṅkal umalaṅ, makmitan sipat vilut, paṅunəṅan, suṅgiṅ, rakadut, sukun, ma rvaṁ tuhan, avita, ma ka 1, aṅuñjal rvaṅ viji, avita, ma ka 1, apadāti rvaṅ siki, avita, ma sū 15, amutər rvaṅ lumpaṅ, avita, ma sū 15,

kapva tika kabeh , tan knana paṅgaṅsal, mvaṅ paṅdva mās, apan pamahayva kapūjān, mvaṅ dr̥vya hyaṅ paknanya de mpuṅkv iṅ kaśaivan, *yathanyan svasthaṅ bhūvana, karuhun kasvasthadīrghāyurārogyan saṅ prabhu, sakulasantānanira, maṅkana don saṅ hyaṅ ājñā haji śaivāśāsana, inanugrahakən i sirāmpu riṅ kaśaiA:5rvan, katəguhakna mpuṅku *yathanyan paripūrṇa pāduka śrī mahārāja,

muvah ri vnaṅan mpuṅku riṅ kaśaivan marabya ḍayaṅ, bikaṅ, havaṅ, mambaṅ, jəṅgi, ri sḍəṅanyan tikla vsinya, ṅuniveh boṇḍan, *klente, meñco, tarahan, kliṅ, paraśi, tañjuṅpura, buvun, pujut, ityevamādi, salvirniṅ sarvajanma, pakahulunən denira mpuṅku riṅ kaśaivan, tan pakanimittaṅ vīja, ndan yan bhasmāṅkura sira, tan sikaran ta sira, de saṅ paməgat air haji , mvaṅ samgat huñjəman,

vnaṅa ta sira masapy āləmbu sādhananira sumiddhakən kapūjān, vnaṅa ta sirādvala ulihnirānanəm-nanəm, kunaṅ yan mati kaṅ ləmbu, saṅaskāran rumuhun, kaməna pəṇḍəmən, kadəgana denira paḍa bhujaṅga rva lavan təlu, mvaṅ rāma ri paṅasthānanira, tan sikaranən ta sira de samgat air haji, mvaṅ samgat huñjəA:5vman,

muvah ri vnaṅanirāmūjākna karuṅ, ulā sava, asu sör, baḍavaṅ, burvan mati riṅ ālas alapənira, mvaṅ taluvah, vəḍus padu, tan sikaran ta sira de samgat sinagiha, ṅuniveh samgat salvit paṅasthānan saṅ hyaṅ kapūjān,

mvaṅ tan kna riṅ vulu-vulu magəṅ aḍəmit, sakeṅ pāduka śrī mahārāja, lvirnya, miśra, para miśra, paṅuraṅ, kriṅ, manimpiki, paranakan, limus galuh, təpuṅ kavuṅ, limbaṅ kavah, maṅhuri, sinagiha, pavəlaṅ-vəlaṅ, palamak, paṅgare, pamaṇikan, *pavakarma, pabərəkis, kala pituṅ, pakalaṅkaṅ, salyut, taṅkil, trəpan, avur, paṅaruhan, tapa haji, air haji, vatu tajəm, suṅka, dhūra, malandaṅ, ləca, aləb-ələb, vidu maṅiduṅ, taṅhiran, samar paḍəm, sakvehniṅ maṅilāla dr̥vya haji vulu-vulu magə̄ṅ aḍəmit, saprakāra kabeA:6rh ya tika tan tāma ri sira mpuṅku riṅ kaśaivan, tka riṅ mpuṅku riṅ *panaivāsikan , sira ta kinonakən kayatnākna, de pāduka śrī mahārāja, saṅka ri gə̄ṅnyāmbək śrī mahārāja, ikā təguhakna saṅ hyaṅ śaivaśāsana, an prasiddha rudradāsa śrī mahārāja,

ri səḍaṅnyan hana, havaṅ, mambaṅ, ḍayaṅ, bikaṅ, jəṅgi, parasi, kliṅ, meñco, pujut, *klente, boṇḍan, tarahan tañjuṅpura, baṇyāga, kəḍi, valyan, hulun haji, siṅgah, mabr̥si, vatək ri jro, avuluṅ-vuluṅ, baṇigrāma baṇigrāmi, səḍaṅanyan paṅhinəpa riṅ kabhujaṅgan, katkana ta ya lara, matya ta ya ṅkā riṅ kabhujaṅgan, salah matya kunaṅ, tan sikaran ata mpuṅku saṅ paṅinəpan,

maṅkanaṅ kayu laraṅan, kady aṅgāniṅ *pəyəh, naṅka, jati, kāṣṭha, *puntaja, kayu ləmah, *maṅhris, vulyan, mvaṅ sakveA:6vhniṅ kayu riṅ vatəs, pahomana, paṅktya, samiddha , sapakənanya denira mpuṅku, riṅ kamaheśvaran, tan sikaran ata sira de samgat manimpiki, mvaṅ samgat makudur,

mvaṅ riṅ sadr̥vyanira mpuṅkv iṅ kaśaivan, tka mpuṅku saṅ tamolah riṅ panaivāsikan, saprakārani dr̥vyānira, makādi dr̥vyā hyaṅ, ahalən deniṅ duṣṭa, an halapən, tan təbusən sakatəmvanya, denira mpu riṅ kaśaivan, apan kunaṅ-kunaṅ atūt gunuṅ tatvaniṅ dr̥vyāniṅ kadi sira viku ,

muvah yan hana sukha-duhkha, mpuṅku riṅ kaśaivan tan kna riṅ lūdan tūtan, maṇḍi-halādi, sakvehnya kabeh, tan tamā ri sira mpuṅku riṅ kaśaivan, apan dr̥vyāmadr̥vyā sira, ajinya nihan

nahan ta saṅ hyaṅ āgama, marahakən yan deva-dr̥vyā svadr̥vyānira, mataṅnyan tan gəma-gəmahatah kumənakən dr̥vyāniṅ kadi sira,

nihan ta deyaniṅ rāma ri paṅasthānanira mpuṅku riṅ kaśaivan, ri səḍaṅanyan hana svakāryānira magə̄ṅ aḍmit, tan vidhinən āta sira svakāryānira, tan pintanātah sira salvirniṅ taḍah, salīlānira tah , apan bhujaṅga sira, mvaṅ tan knatah sira riṅ turun-turun sarakut sagəm, sakupaṅ sātak, padəg-adəg, lakva-lakvan, tuṇḍan, durugan, hayvan, mvaṅ valagara, arabya-halakyānaknira, alapən āṅalapa, alapənn anaknira deniṅ vāhyā, mvaṅ anaknira tapvān adīkṣā kunaṅ, arabya anaknira vāhyā, tan knana ta sira deniṅ rāma, mvaṅ tan knana laṅkah avu, arabyā vulañjar raṇḍa kunaṅ, yan pəjah lakinya, kaniṣṭhamadhyamottama, jalunya pjah, apan śauca tattvanira mpuṅku riṅ kaśaivan, maṅkana liṅ saṅ hyaṅ śaivaśāsana, katguhakna mpuṅku riṅ kaśaivan ri kramanira, yathānyan paripūrṇa sira,

samaṅkana yan hana viku pjah anapatya, ana pva dr̥vyānira salviranya, mvaṅ saṅgvananira saṅ viku pəjah anapatya, yan riṅ grāma, riṅ sīma, riṅ pəkən, thāni sumbul kunaṅ, kakalaṅan, kamūlan, kalagyān, parhyaṅan, kuṭi patapan, ṅuniveh yan hana gurukulavāsi, sira saṅ guru atah pramāṇa, umalapa dr̥vyā saṅ viku pəjah anapatya, tan salah paranātah mvaṅ tan parabyāpāra de taṇḍa rakryan makabehan, mvaṅ nāyaka, partaya, apiṅhe, mavaju, punta, rāma, vinəkas, gusti, paṅjurvan, hulu vrāsA:8r, atur tali, ser, pakənanya, pūjākna i saṅ hyaṅ śivāgni, mvaṅ ri kevyənika saṅ viku pəjah anapatya, maṅkana pakənanikaṅ dr̥vyā denira saṅ guru, tan alapənira juga,

kunaṅ yan tan hana saṅ guru, guruputra, jyeṣṭhaputra, ḍəṅən sanak, ṅuniveh svavarganira riṅ dharma, umalapa sadr̥vyānira, umarpaṇākəna ya ri bhaṭāri, mvaṅ ri saṅ hyaṅ śivāgni, lāvan māveha tarpaṇa ri saṅ viku pəjah anapatya, tan salah parana mvaṅ tan alapən juga, ajinya nihan:

nāhan tāji bvat saṅ hyaṅ mataṅga, nihan ajinya ri saṅ hyaṅ vāthula

maṅkana liṅ saṅ hyaṅ āgama, sira ta kinonakən śrī mahārāja kayatnakna mpuṅku riṅ kaśaivan makabehan, təka ri mpuṅku tamolah riṅ panaivāsikan, saṅkā ri gə̄ṅny ārəmbha mahārāja manu ri mpuṅku riṅ kaśaivan,

kunaṅ pva deya mpuṅku, hayva tan atutur i sabratanira sovaṅ-sovaṅ, mvaṅ kārya-cāranira, agələm ata sirāmūjā ri bhaṭāra sāri-sāri, *sāttvikāṅuṅsi gurūpadeśa, tan gavayakna *grāmyakarma, tan ananiṅ analavaha, kevalya saṅ hyaṅ kabhujaṅgan juga gəgə̄nənira, yathānyan mapagəha suśāstranirā ry avaknira,

muvah piṅsorny ājñā śrī mahārāja, ri sḍaṅ ampuṅku ri kaśaivan, gumavayakən ikā pūjā-bali-karma, ṅuniveh ikaṅ yajñahoma, ghr̥tatilāhuti , divārātri riṅ rahina vəṅi, makaphala laṇḍuṅaniṅ hudan, dādyaniṅ tahun, svasthāniṅ rāt, karuhun jaya-dirghāyur-ārogyā pāduka śrī mahārāja sakula-santānanira, muvah sampun meṅət pāduka śrī mahārāja an parasparopasarpaṇa, kramanira mvaṅ saṅ viku,

nāhan ta gatinyan mapagəh kasuśāstran saṅ viku mvaṅ mpuṅku riṅ kaśaivan makabehan, mvaṅ kadeyakna saṅ ser, riṅ səḍaṅ ampuṅku ri kaśaivan, makāvə̄r iṅ kāryāhayu, riṅ upadeśa, ṅuniveh ri svadeśanira, kadyaṅgāniṅ vimāna, *paliddha, maṇḍi-maṇḍi, bvat hyaṅ, brisadi, *tiləm-tiləm, A:9v salvirniṅ gave magə̄ṅ, umah-umahan, aləhakna sarvavarṇa , tan svīkāraṇātah deniṅ *paṅunəṅan, mvaṅ saməgat suṅgiṅ, apan saṅ mūlakāryātah pintana *lvir-lvir, hayva mpuṅku saṅ pinakaviku pinintan *lvir-lvir, apan gave i jəro ṅaranikā, maṅkanā deyanika saṅ citrakāra, səḍaṅ ampuṅku riṅ kaśaivan, pātrakāsihana gavaya vimāna, paliddha, paṅhavvan, palaṅka, salvirniṅ ... hyaṅ r̥ṣiśāsana, katəguhakna de saṅ aneṅ āśramanira sovaṅ-sovaṅ, ṅuniveh katəmvaniṅ strī laraṅan, tan dayan ata saṅ r̥ṣi, siṅ mara riṅ patapan, kadyaṅganiṅ caturjanma, brāhmaṇa, kṣatriya, vaiśya, śūdra, macaṅkramāta riṅ patapan, amava sabhūṣaṇanya , sakavava ri patapan atah, pramāṇa sabhūṣaṇanya, kavāva riṅ patapan, tan kilalanən de saṅ ratu, tan kavāva riṅ rāma, tan ucapən deniṅ śūdra, ṅuniveh sabanva uṅgvānira, salinaraṅan saṅ prabhu, salviranya, sakāvakanya, sarūpanya, tan kəna riṅ rājaśikṣa, ṅuniveh patih vahuta, nayaka, partaya, rāma, tan pratyupakaraṇātah, i sira mpu riṅ patapan, ṅuniveh ikaṅ sāmānya-janma kabeh, sakāṅkus deniṅ sayavadvīpamaṇḍala,

tan paṅavun-avuna, tan panisik-nisika, tan muṅil-muṅila, tan panahi-tikusa, tan paguṇa-doṣa sirāmpu ri patapan, tan kəna sira riṅ ivak hyaṅ, apan ya sakahananira juga, kṣetra svatantra, tan paṅekadeśa kavənaṅnira, tan pahiṅan kaliṅanya yan iṅ paradeśa sakabalanya-balanya, sakasīmanya-sīmanya, sakadharmanya-dharmanya, nitya laṅgəṅa juga kavənaṅnira mpu riṅ patapan, apan uvus kr̥tānugrahanira denira rahyaṅta saṅ apūrbvacakra riṅ mḍaṅ, tlas karuhun ikaṅ saṅaskāranira ri saṅ hyaṅ śivopakaraṇa, brata, tapa, samādhi, i kaləpasaniṅ pāpanikaṅ sarva-janma mānuṣa kabeh,

kunaṅ yan hana humambaha ikaṅ *kinohutakənira rahyaṅta kaṇḍyavan, vaA:10vstu laṅghyana ri ājñā pāduka rahyaṅta ika, salviraniṅ jagat-upadrava təmahanya.

indah ta kita kamuṅ hyaṅ pañcamahābhūta, kuśika, garga, metri, kuruṣya, pātañjala, sikəp bvaṅakən iṅ ākāśa, səmpal sulambitakən sarvasandhiny avaknya, riṅ bhūta kabeh, yan pareṅ alas dmakən iṅ macan, sahutən iṅ ulā magə̄ṅ, paṅanən deniṅ rākṣasa, yan mariṅ təgal sambərən iṅ gəlap tan pahudan, sahutən iṅ ḍəṅən, paṅanən deniṅ vvil si pamuṅvan, yan mariṅ tasik labuhakneṅ samudra, yan mareṅ lvah labuhakən iṅ ravuhan, alapən de hyaṅ daləm air, cakəpən iṅ vuhaya, saṅhapən iṅ tuviran, yan iṅ havan hanaṇḍuṅa ruyuṅ āvuk, praṅən iṅ abət , patyana deniṅ amūk, *śaṅkuhən iṅ curik, yan lumaku riṅ vṅi tvəkən iṅ maliṅ, sahutən deniṅ ulā biṣa,

saparananyānəmva pāpa, sapolahnyānəmva duhkha, anəmva sarva-roga, busuṅa, vuḍuga, tan pānaka, bisuha, tuliha, lumpuha, piṅsaptavimba pātaka, piṅsaptāṅjanma amaṅgiha roga sadakāla, təka riṅ atra-paratra, tan panəmuhenak janmanya, maṅkana tinəmunikaṅ vvaṅ laṅghanāṅruddhā ājñā pāduka rahyaṅta saṅ pūrbvacakra riṅ məḍaṅ, yan caturjanma aṅruddhā dharma, astu ləburāvu təmahanya.