Saṅ Hyaṅ Kamahāyānan Mantranaya: Digital Critical Edition

MS:b8namo buddhāya!

0

1

ka: saṅ hyaṅ mahāyāna iki varahakna mami iri kita, mantracaryānayaṁ vidhiṁ, saṅ hyaṅ mantranaya sira mahāyāna mahāmārga ṅaranira, deśayiṣyāmi te MS:a9 samyak, sira teki deśanākna mami varahakna mami ri kita, bhājanas tvaṁ mahānaye, ri kadadinyan kita pātrabhūta yogya varahĕn ri saṅ hyaṅ dharma mantranaya.

2

ka: bhaṭāra hyaṅ buddha saṅ atīta, saṅ maṅabhisaṁbuddha ṅūni riṅ āsītkāla, kadyaṅgān: bhaṭāra vipaśyī, viśvabhū, krakucchanda, kanakamuni, kāśyapa, atītabuddha, ṅaranira kabeh. tathā caivāpy anāgatāḥ, kunaṅ bhaṭāra buddha saṅ anāgata, saṅ abhimukha maṅabhisaṁbuddha, kadyaṅgān: bhaṭāra āryamaitreyādi, samantabhadraparyanta, anāgatabuddha ṅaranira kabeh MS:b9 pratyutpannāś ca ye nāthāḥ, tumamvah bhaṭāra śrī śākyamuni, vartamānabuddha ṅaranira, sira ta pinakahyaṅ buddhanta maṅke, śāsananira ikeṅ tinūt atinta. tiṣṭhanti ca jagaddhitāḥ, tamolah ta sira kumiṅkiṅ hitasukhaniṅ sarvasattva, umaṅĕnaṅĕna kalĕpasanikaṅ rāt kabeh saka riṅ saṅsāra, duvĕg kumirakira paḍamaniṅ mahāpralaya rike bhuvana.

3

ka: sira katiga bhaṭāra hyaṅ buddha ṅaranira, saṅ atītānāgatavartamāna, tan hana mārganira vaneh ar tinambakan ikaṅ kahyaṅbuddhan. jñātvā mantravidhim paraṁ, ikiṅ >mahāyāna mahāmārga ya tinūtakĕnira, pinakamārganira ar ḍataṅ rikana nirvāṇanagara. MS:a10 prāptā sarvajñatā vīraiḥ bodhimūle hy alakṣaṇā, inakni denira gumĕgö ikaṅ mantranaya, ya ta mataṅ yar tĕmvakan kasarvajñān, ya ta hetunirār paṅguhakan ikaṅ kahyaṅbuddhān riṅ bodhimūla.

4

ka: bhaṭāra śrī śākyamuni mataṅ yar tĕmvakann ikaṅ kamāravijayan, sakvehnikanaṅ māravighna alah denira: kleśamāra, skandhamāra, mṛtyumāra, devaputramāra, alah aluyuk ikā kabeh de bhaṭāra hetunirār vĕnaṅ umalahakĕn ikaṅ māra, ābhānubhāva prabhāva saṅ hyaṅ samādhi śakti saṅ hyaṅ mantranaya inabhyāsa.

5

ka: mataṅyan deyanta kuru sarvajñātāptaye, hayva tālaṅalaṅ aṅĕnaṅĕnta rike saṅ hyaṅ mantranaya, pahapagĕh denta gumĕgö saṅ hyaṅ mantranaya, mataṅ yan kapaṅguha ikaṅ kasarvajñatān denta; śṛṇu bhadrāśayaṁ nityaṁ, pahavās denta rumĕṅö iki varavarah mami ri kita, hayva tan yatna vuvus mami. samyak saṅhṛtya kalpanāḥ, karyakan taṅ buddhi savikalpaka, hilaṅakan taṅ ambĕk abhiniveśa, pahenak tāṅĕnaṅĕnta, hayva saṅśaya.

6

ka: saṅ hyaṅ mahāyāna mahāmārga iki pintonakna mami ri kita, pahavās denta maṅrĕṅö, mahāyānamahodayaḥ, MS:a11 yeki havan abĕnĕr tĕka ri svargāpavarga, vĕnaṅ umehakĕnn ikaṅ kamahodayān. mahodaya, ṅa, ikaṅ bāhyādhyātmikasukha, vāhyasukha, ṅa, ikaṅ kaśreṣṭhyan, kasugihan, kapamĕgĕtan, karatun, kacakravartin. ādhyātmikasukha, ṅa, ikeṅ lokottarasukha inak tan pavor duhkha, ajarāmaraṇa, tan katĕkan tuha lara pati, nāṅ anuttara vara samyaksaṁbodhisukha, ikaṅ mokṣasukha, ikā taṅ bāhyasukha mvaṅ ādhyātmikasukha, ya ikā kamahodayan ṅa, anuṅ dinadyakĕnn ikeṅ mahāyāna mahāmārga, yan inabhyāsa. yena yūyaṁ gamiṣyanto, apan ri sĕḍaṅnyan apagĕha denta gumĕgö ikeṅ kamahāyānan; bhaviṣyatha tathāMS:b11gatāḥ, niyata kita tumamvaknaṅ kahyaṅbuddhān. sumākṣātkṛta ikaṅ kalĕpasĕn, ikanaṅ dvayasambhāra, nāṅ jñānasambhāra, puṇyasambhāra kapaṅguha ikā denta. lāvann ikaṅ kasarvalokanamaskṛta kopalambha ikā denta.

7

ka: kadyaṅgāniṅ ākāśa anirmalasvabhāva, alakṣaṇa, avastuka, tan kavĕnaṅ tinuduh, tan agöṅ, tan aḍĕmit, tan hirĕṅ, tan putih, vyāpaka lumrā riṅ daśadeśa, maṅkana lvirnira.

8

ka: nora mahāgambhīra lena saṅka rike saṅ hyaṅ mahāyāna mahāmārga sireki gambhīrātigambhīra: MS:a12 adalĕm sakeṅ adalĕm; apy atarkyaṁ: tan kavĕnaṅ tinarka, salah yan inuha; anāvilaṁ, tar padoṣa; sarvaprapañcarahitaṁ; tan katĕkan deniṅ sarvaprapañca, mvaṅ kleśopakleśa, nāṅ: mada, dambha, lobha, moha, rajah, tamah, tan tama ikā kabeh ri sira, tuhu karikā tan >pakāvak iṅ maṅkana tahāvih, prapañcebhiḥ prapañcitaṁ, āpan ikaṅ rāga-dveṣa-moha, prapañca pinakāvaknira.

9

ka: tan gave tan si magavai, tan si magavai pinakāvaknira. satyadvayaṁ: tamolah makarūpa ikaṅ satyadvaya, ṅa, saṁvṛttisatya, paramārthasatya, anuṅ pinakarūpanira. MS:b12 anāśrayaṁ: tan pāndĕlan tan samvṛttisatya tan paramārthasatya kahananira, idaṁ yānavaraṁ śreṣṭhaṁ, yekā sinaṅguh mahāyāna mahāmārga ṅa, manĕkakĕn irikaṅ svargāpavarga. abhyasyata naye sthitāḥ, ya tikābhyasanta sārisāri mĕneṅ hĕlĕm saṅ hyaṅ mantranaya mahāyāna.

10

ka: vehana kita manahapa vajrodaka. ikaṅ vajrodaka tan vvay samānya, vvai sakeṅ naraka ikā; samayātikramo vahet, mārganiṅ duhkha kapaṅguha, bhraṣṭa MS:a13 sakulagotrabāndhava, ya tat pituhva samaya. kālanyat varavīrya rikeṅ saṅ hyaṅ vajrajñāna, samayarakṣaṇāt siddhye, kunaṅ ri sĕḍaṅnyat prayatna, tan paṅraparapā riṅ samaya, mārganiṅ hayu kasiddhyan kapaṅguha denta siddhaṁ bajrāmṛtodakaṁ, saṅkṣepanya: viṣāmṛta ikeṅ vajrodaka, vvah sahiṅga tinaṅkĕp, pilih sukha pilih duhkha kapaṅguha. yat pramāda kita pamaṅguh duhkha, kunaṅ yat prayatna, avās ikaṅ sukha hayu kasiddhyan kapaṅguha usĕn, ṅūniveh dlāha.

11

ka: hayva kita umaramarahakĕn ika saṅ hyaṅ vajra ghaṇṭā mudrā riṅ vvaṅ adṛṣṭamaṇḍala, tapvan sāmayika rahasyan MS:b13 kubdan atah sira, tan avaravīryākna irikaṅ vvaṅ tapvan kṛtopadeśa, hased vāśraddhavān eva, athavi guyuguyun ta kunaṅ si tan pituhun arthanira, tan āmbĕkta tĕmĕn tumarima brata bhaṭāra, hayva ta maṅkana, yāvat taṅ vvaṅ apahasa ri saṅ hyaṅ mārga, janaḥ saṅganikāsthitaḥ, avās ikaṅ vvaṅ maṅkana, kasaṅsāra sadākāla, mataṅnyan hayva tan tulus adhimukti rike saṅ hyaṅ vajrajñāna, kayatnaknātah saṅ hyaṅ samaya.

12

ka: saṅ hyaṅ samaya ta sira sinaṅguh bhaṭāra vajrasattva; āveśayatu tenaiva bajrajñānam anuttaraṁ, sira teki pinakahṛdayanta maṅke, vajrajñāna ikuṅ pinakaMS:a14hṛdayanta, pahenak tāmbĕkta.

13

ka: bhaṭāra śrī vajrasattva muvah hana ri matanta maṅke, cakṣūdghāṭanatatparaḥ, denira dumliṅakna panonta, mataṅnya pahabuṅah tāmbĕkta, udghāṭayati sarvākṣo bajracakṣur anuttaraṁ, dĕliṅakanta matanta, pahavās ta panonta ri saṅ hyaṅ maṇḍala.

14

ka: vulat i saṅ hyaṅ maṇḍala, śraddhāñ janayathādhunā, gavayakĕn taṅ śṛddha, hayva tan sagorava ri saṅ hyaṅ maṇḍala, kule jāto ’si buddhānāṁ, apan kita MS:b14 buddhakula maṅke, apan bhaṭāra hyaṅ buddha ṅaranta mĕne, sarvamantrair adhiṣṭhitaḥ, tuvi sampun kṛtādhiṣṭhāna iki de saṅ sarvatathāgata, inajyan sinaṅaskāra rikaṅ sarvamantra.

15

ka: aparĕk tekaṅ hayu ri kita, siddhayo gatayaś ca te, samaṅkana ikaṅ kasiddhyan abhimukha ikā kabeh, agya kapaṅguha denta; pālaya samayaṁ siddhye, lĕkas ta umabhyāsa saṅ hyaṅ samaya, marapvan katĕmu ikaṅ kasiddhyan usĕn denta; mantreṣūdyogavān bhava, gavayakan taṅ utsāha ri mantra japa pūjā usĕn, hayva hĕlĕmhĕlĕm, yathānyan kopalambha ikaṅ kasugatin irikeṅ ihajanma ṅūniveh dlāha.

16

kaliṅanya: pahenak tāmbĕkta, huvus hilaṅ ikaṅ ajñānapaṭala ri hatinta, binabadan de bhaṭāra śrī vajradhara śalākair vaidyarājendraiḥ yathālokasya taimiraṁ, kadyaṅgānnikanaṅ vvaṅ lara matan putikĕn, ramun matanya tinamvan ta ya de saṅ vedya cinĕlĕkan matanya, varas tekā matanya hĕniṅ, menak panonya vĕkasan ri hilaṅnikaṅ kavakamalādyupadravanya, maṅkana tekiṅ ajñānapaṭalanta an hilaṅ tutas, tan paśeṣa sampun binaMS:b15badan de bhaṭāra, mataṅyar pahenak ta aṅĕnaṅĕnta, hayva saṅśaya.

17

ka: pahavās denta umulati ikaṅ sarvadharma, tan hana pahinya lāvan māyā riṅ darpaṇa ry avakta vās ākārarūpanikanaṅ māyā riṅ darpaṇa, ndatan kavĕnaṅ ginamĕl, apan tan hana tattvanya; maṅkana tekiṅ sarvabhāva, ṅūniveh janmamānuṣa hetukakarma dumadyakĕn ike, mataṅnya kadi katon mātramātra, kintu tan hana tĕmĕntĕmĕn.

18

ka: pahavās ta denta gumĕgö māyopamani sarvaMS:a16dharma; nissvabhāvān nānāvilān, hayva ta puṅguṅ an nissvabhāva ikiṅ sarvabhāva; kuru satvārtham atulaṁ, gavayakan taṅ kaparārthan usĕn, jāto aurasa tāyināṁ, apan kita maṅke jinorasa ṅaranta: anak bhaṭāra hyaṅ buddha, mataṅnyan hayva ta tan sārāmbĕk ata riṅ kuśalakarma, mvaṅ aṅiṅkiṅ parārtha.

19

ka: pahenak tāṅĕnaṅĕnta, bhaṭāra vajrasattva miṅasthūla sira ri hatinta, bhaṭāra vajrasattva ṅarannira; accāśuddha hy anāvilaḥ, śuddhasvabhāva sira, tan hana rāga, dveṣa, moha ri sira, tuvi ta pinakapradhāna saṅ sarvatathāgata sira, pinakahatinta sira maṅke, mārganiṅ puṇyaMS:b16jñānasambhāra kapaṅguha denta donira hana, hayva ta sandeha.

20

ka: mĕne tamvayanta cakraṁ vartaya tāyināṁ, umindĕrakan dharmacakra bhaṭāra śrī vajradhara rikaṅ sarvasattva; sarvatra pūrya vimalaṁ dharmaśaṅkham anuttaraṁ, kunaṅ deyanta hibĕki lyābi pĕnuhi teki daśadig anantaparyyanta sakalalokadhātu, kapva hibĕkananta dharmaśaṅkha ikā kabeh.

21

ka: hayva kita vicikitsa, nirviśaṅkena cetasā, ikaṅ nissandeha atah ambĕkakanta, PRAKĀŚAYA MAHĀTULAṀ MS:a17 mantracāryyanayam paraṁ, at pintonakna ike, saṅ hyaṅ mantranaya mahāyāna.

22

ka: apan ikaṅ vvaṅ kadi kita huvus kṛtasaṅskāra ri bhaṭāra, gumave pūjā viśeṣa ri bhaṭāra hyaṅ buddha, upakārīti gīyate, ya ikā sinaṅgah sampun maveh upakāra ri bhaṭāra ṅaran ikaṅ vvaṅ maṅkana, te ca vajradharāḥ sarve rakṣanti tava sarvaśaḥ, kopakāran pva sira denta, rĕṇa tāmbĕknira, ya ta mataṅnya yatna rumakṣa kita ri rahina vĕṅi, sakvanta saparanta sagaventa, at kita kinayatnakĕn denira ri vruhnira an sampun kopakāran MS:b17 denta, ya mataṅnya hayva vicikitsa, apan hana bhaṭāra śrī vajrasattva pinakātmarakṣanta sira.

23

ka: nora gavai anuṅ tan kavĕnaṅa gavayanta yadyapin tribhuvanaduṣkara lviraniṅ karma, tan kavĕnaṅa ginave de saṅ hana riṅ svarga, manuṣya, pātāla, ikān maṅkana atiduṣkaranikaṅ karma kavĕnaṅ ikā ya ginave denta; prajñopāyena cetasā, ndan ikaṅ prajñā atah ambĕkakĕnanta, nirviśaṅkaḥ sadā bhūtvā, lāvan tan kahilaṅana atah kita irika nissandehacitta sadākāla; prabhuṅkṣva kāmapañcakam, paribhogan taṅ pañca kāmaguṇa MS:a18 denta, salvirniṅ kaviṣayan hayva pinilihan paribhogan kabeh denta, āpan donni kadi kita sādhaka, ndan hayvatah tan pakāmbĕk ika nissaṅśaya.

24

ka: kadyaṅgān bhaṭāra sikasa boddhisattva mahāsattvā hanāmbĕk tĕmĕn sira gumĕgö i saṅ hyaṅ mantranaya. ambĕk tĕmĕn ṅaranya: kumiṅkiṅa kaparārthān, tan kalepanāna deniṅ kleśa, tan kapalitana deniṅ rāga dveṣa moha.

25

ka: hana vvaṅ dveṣa ri saṅ hyaṅ samaya, melik ri MS:b18 saṅ hyaṅ mantranaya; samayabhraṣṭāḥ ye janāḥ, hana vvaṅ samayabhraṣṭāḥ vih sampun kṛtasamaya, manaḍah upadeśa, apa kunaṅ vaivartika ta ya vĕkasan? kinasampayannya ta saṅ guru, inumpĕtnya sira. māraṇīyāḥ prayatnena, ikaṅ vvaṅ maṅkana nāṅ samayadviṣṭa mvaṅ samayabhraṣṭa kinonakĕn ikā pĕjahana, tan patögvakna de bhaṭāra, buddhaśāsanapālane, yatanyan karakṣā śāsana bhaṭāra hyaṅ buddha, lāvan katvaṅana saṅ hyaṅ samaya, maṅkana phalanyan patyana ikaṅ samayavidveṣādi.

26

ka: pakenak tāmbĕkta harah, sampun praviṣṭamaṇḍala MS:a19 ṅaranta maṅke, tumama ri saṅ hyaṅ paramarahasya. kunaṅ deyanta pahavās vulatta rike saṅ hyaṅ maṇḍala, sarvapāpair vinirmuktaḥ, kita pva sampun tumama ri maṇḍala, vinarah ri lavālavanikaṅ rahasya, mataṅnya hilaṅa sakvehni pāpanta, alilaṅa kadi vinasĕhan, hilaṅ samūlonmūlita, bhavanto ’dyeva śuddhitaḥ. pahenak tāmbĕkta, hayva saṅśaya.

27

ka: kita tan vaivartikā, yānād asmāt mahāsukhāt, saṅka rikeṅ mantranaya, hilahila vvaṅ kadi kita vaivartika ri saṅ hyaṅ mārga, avṛṣyāś cāpy avandyāś ca, kunaṅ MS:b19 ri sĕḍaṅnyat prayatna umabhyāsa saṅ hyaṅ mantra avās ikaṅ hayu kasiddhyan kapaṅguha denta, tan kavĕnaṅ inulahulah deniṅ māra tīrthikādi; ramadhvam akutobhayāḥ, mataṅnya pahenak tāmbĕkta, hayva sigasigun, tulusakĕn pratipattinteri saṅ hyaṅ mantra.

28

ka: prayatna tah kita rumakṣa saṅ hyaṅ samaya, hayva tan eṅĕt i kuṇḍaṅ rahasyanatah sira denta, vruha ta kita rikaṅ yogya varahĕn ri saṅ hyaṅ samaya, hayva ta deny adhika kavvaṅanya, āmbĕknya, ulahnya, maryādanya, kunaṅ pva yan tuhutuhu śṛddhānya, acchedyābhedya ri saṅ hyaṅ mantra, irikā ta kitad varaha ya ri saṅ hyaṅ MS:a20 rahasya; hayva saṅśaya, hayva kundulkundul umarahakĕn ri saṅ hyaṅ samaya rikāṅ adhimuktikasattva, sarvabuddhasamaṁ proktaḥ, āpan sampun kita kṛtānujñāta de saṅ sarvatathāgata, inanumoda de bhaṭāra umintonakna saṅ hyaṅ samaya, ājñāṁ pāraya śāśvatīṁ, kita iko katibān anujñāta bhaṭāra, sumiddhākna sapakon saṅ sarvatathāgata.

29

ka: saṅ hyaṅ bodhicitta tan tiṅgalakna denta; bodhicitta ṅa: yad bajram iti mudrayā, saṅ hyaṅ vajra sira bodhicitta ṅaranira lāvan saṅ hyaṅ mudrā, yasyotpādaikamātreṇa, denikā kāraṇan saṅ hyaṅ vajra lāvan MS:b20 mudrā, buddha eva na saṅśayaḥ, hyaṅ buddha kita dlāha, kasākṣātkṛta ikaṅ kalĕpasĕn denta, ri sĕḍaṅnyat prayatna ri saṅ hyaṅ vajra ghaṇṭā mvaṅ mudrā.

30

ka: tan tulaka saṅ hyaṅ saddharma, na tyājyaś ca kadācana, lāvan tan tiṅgalakna sira, ajñānād atha mohād vā na vai vivṛṇuyās tataḥ, tan dadi vvaṅ kadi kita umivāraṇe saṅ hyaṅ saddharma, saṅka riṅ ajñāna lāvan kamohan, mataṅnyan hayva maṅkana, laraṅan ikaṅ vvaṅ mantranaya mahāyānānuyāyī, umivāraṇa saṅ hyaṅ sūtrānta.

31

MS:a21 ka: paṭavarikāvakta, svakāyanirapekṣataḥ kita, hayva tṛṣṇa riṅ avak, tapobhir nātipīḍayet, hayva pinisakitan riṅ tapa, hayva vineh gumavayakan kavĕnaṅnya, yathāsukhaṁ sukhan dhāryyaṁ, yathāsukhātah lvirantat gavayaknaṅ bodhimārga, sambuddho ’yam anāgataḥ, hayva gyā hyaṅ buddha kita dlāha.

32

ka: saṅ hyaṅ vajra, ghaṇṭā mvaṅ mudrā hayva kari sira denta, sakvanta, saparanta, kuṇḍaṅanta sira, ĀCĀRYO NĀVAMANTAVYAḤ, lāvan ta veh tan gavayaknaṅ gurudrohaka, tan vĕnaṅ ikā vvaṅ avamāna ri ḍaṅ ācārya, mataṅnyan tan kāvamānana sira denta, sarvabuddhaMS:b21samo hy asau, sarvabuddhasama sira, paḍa lāvan bhaṭāra hyaṅ buddha kabeh.

33

ka: apan ikaṅ vvaṅ avajñā, avamāna, masampe guru, sa nityan duḥkham avāpnuyāt, ya ikā mulih riṅ naraka, tibā riṅ kavah saṅ yama, pinakahitipniṅ tāmragomukha; maṅkana pāpaniṅ vvaṅ avamāna maguru.

34

ka: hayva tan prayatna maguru, yadyapi, pracchannavarakalyāṇa, ika gurunta tan katona hayunira guṇanira denta, ikan samaṅkana, nāvamanyet kadācana, MS:a22 tan avamāna ta kita ri sira, āpan mahāpāpa mahāduhkha ikaṅ tan atvaṅ maguru, mataṅnya varaprayatna tah ri kavyāpāra saṅ guru.

35

ka: hayva kaluban kita gumavayakna saṅ hyaṅ samaya, nityaṁ pūjyas tathāgataḥ, lāvan śāśvata kita gumavayaknaṅ tathāgatapūjā, nityañ ca guruvaidheyaṁ, nityaśa kita gumavayakĕn guruśuśrūṣā, umyāpāra saṅ guru, sarvabuddhasamo hy asau, apayapan sarvatathāgatasama saṅ guru ṅaranira, mataṅyan sira pagavayaknanta kaśuśrūṣā

36

MS:b22 ka: apan ikaṅ vvaṅ kadi kita gumavayakĕn ikaṅ guruśuśrūṣā, maveh upahārādi ri ḍaṅ guru, yeka paṅipuk dānasambhāra ri bhaṭāra hyaṅ buddha ṅaranya, taddānāt puṇyasambhāraḥ, ya sambhandhanyan katĕmu ikaṅ puṇyasambhāra, sambhārāt siddhir uttamā, ri kapaṅguhan ikaṅ puṇyasambhāra, ya dumeh rikaṅ kasiddhyan sulabha ri kita, ri prayatnanta rika guruśuśrūṣā.

37

ka: hurip tuvi tinarimakan ri ḍaṅ guru, gumavaya kabyāpāranira donya, adeyaiḥ putradārair vā, āstām ikaṅ anak rabi inarpaṇākĕn ikā kabeh i bharāla guru, dāsaMS:a23bhūtā, hulunanira umyāpāra ri sira pakĕnanya, kim punar vibhavaiś calaiḥ, hayva ta vinuvus ikaṅ dṛvya ṅaranya, kadyāṅganiṅ mās maṇik dodot pirak pinūjākĕnn ikā kabeh i ḍaṅ guru.

38

ka: apann ikaṅ kahyaṅbuddhan atyanta paramadurlabha kĕtekā, yadyapin kalpāsaṅkhyeyakoṭijanma, lāvasaniṅ vvaṅ gumavayaknaṅ kuśalamūla dānapāramitādi sumādhyaṅ kahyaṅbuddhan, ikān maṅkana tan niyata kapaṅguha, saṅka ri durlabhanikaṅ kalĕpasan ṅaranya, MS:b23 buddhatvam udyogavate dadātīhaiva janmani, ikaṅ kahyaṅbuddhan yateka vinehakan de bharāla guru irikeṅ janmanta maṅke, ṅhiṅ hīṅanan i göṅny anugrahanire kita, mataṅnya tan halaṅ tan luṇḍu tan vĕlaṅ vĕlutĕn aṅĕnaṅĕnta an pūjākĕn huripta mvaṅ anak rabinta ri ḍaṅ guru.

39

adya vaḥ saphalañ janma yad asmin supratiṣṭhitaḥ: an pakaśaraṇa saṅ hyaṅ samaya, samāḥ samā hi devānām adya jātāḥ svayaṁbhavaḥ: āpan avak hyaṅ buddha kita maṅke usĕn, karatalavyavasthita, ikaṅ kahyaṅbuddhān ri kita, kāgĕm kamuṣṭi ikaṅ kalĕpasĕn denta.

40

ka: pahenak tāmbĕkta, sampun kṛtābhiṣeka kita de saṅ sarvatathāgata lāvan saṅ sarvatathāgatī; ṅaran ikaṅ abhiṣeka tinarimanta: cakravartyabhiṣeka ṅaranya.

41

ka: avās alahnikaṅ mārakarma denta, praviṣṭāḥ paramam puraṁ, niyata ikā nirvāṇapura katĕkan denta maṅke, prāptam adyaiva buddhatvaṁ, kapaṅguha niyatanikaṅ kamokṣan denta ri janmanta maṅke, bhavadbhir nātra saṅśayaḥ: pahenak tāṅĕnaṅĕnta, hayva saṅśaya.

42

ka: mataṅnya tulusakĕnta śṛddhānta, pahapagĕh ta manahta, makamārga saṅ hyaṅ mantranaya mahāyāna, svasamāyaṁ akṣayasaukhyadaṁ bhajadhvaṁ, atikāsta rumakṣa saṅ hyaṅ samaya, āpan sira vĕnaṅ umehakan ikaṅ anuttarasukha, jagati laghusukheti sarvabuddhapratisamāś śāśvatitāṅ gatā bhavantaḥ, āpan ikeṅ janma manuṣya ṅaranya, akĕḍik sukhanya; yathānyat paṅguhakna kahyaṅbuddhan, paḍā lāvan saṅ sarvatathāgata, mataṅnyan lĕkasa umabhyāsa saṅ hyaṅ samaya, gumavayakna saṅ hyaṅ mantranaya mahāyāna, hayva ta praMS:a25māda kita, kayatnakan tĕmĕntĕmĕn, yathānyan sulabha ikaṅ kasiddhyan kapaṅguha denta.