Pārthāyaṇa, or The Journeying of Pārtha: Digital Critical Edition — after Creese (1998)

tustus ning kalangön anindya paramārtha pinahuwus i tatwa ning kawi

dhyāyī sātmya ri lĕnglĕng ing kamala hadwaya pinatĕh i sāndhi ning hiḍĕp

nyāsan ring kakawin tinap pinakasāntĕn i jurang ing acaṇḍya lung langö

manggĕh lit ning adṛśyatantra madanodaya wĕkas ing acintya niṣkala

āpan yan winidāna kastawan irân pangawaki rĕcĕp ing pasir wukir

byaktâmiśra luput ndatan pahamĕngan mamiṣayani raras hanêng kapö

tāwat yan guru ning tanah tutug ing ākṣara pinakahirĕng hanêng karas

nāhan prastuti ning mangarccana rarab ni suku nira winimba nityasa

mangke ngwang lĕngĕng angdadak tumura warṇnana palupuy anātpadêng langö

ndan dūra n katĕkāna kewala mahângriwĕgi kapana rakwa yan singi

hāmhām de ni kĕtĕr nikang jalada tibra kagagat angalap karas tanah

tan tungkul ri kapingging ing hati cumĕngga raga-ragan angiṣṭi kośala

yan kāngĕn hala ning tuwuh wiphala nistura gati nika tan pangenaka

wet ning duṣkṛta lot mahambalan ibĕk prihati wiraha śoka lampunĕn

lĕnglĕng bhranta pinöm halib taya ta sāmbatĕn amanĕhi tan sih ing widhi

manggā mūra matinggalêng śana wanāśrama ya juga parāna menaka

donya n māntĕna kaśmalanya hana darśśana ta sira sang āryya Phalguṇa

śrī Drupadātmajâpupul i Dharmmatanaya dinunung nirê dalĕm

yângde trāsa manah Dhanañjaya mangiṣṭya layat awanawāśa tan waneh

ngkā n māmwīt ta sirê narendra pakamanggala kamĕna nirân humangkata

eñjing wāhu lumöng bhaṭāra rawi munggu ring udaya madan nṛpātmaja

sāmpun mĕntas angarccana krama mijil ta sira saka rikang purângĕnĕs

tar sah tang warayang laras kawaca yêka ta winawa nira ng warāyudha

jāti kṣatriyadharmma mangkana purih sang ataki-taki wīryya ring prajā

ndah śīghrân lĕpas ing swarājya laku sang nṛpatanaya sinanggrahêng langö

akweh sobha taman-taman katĕmu de nira ri wĕlahan ing purāśrama

kaywanyân pakĕmul-kĕmul hima sawang lumuh alara mame kakingkingan

humbut ning lirang ārjja rumbay amĕḍar sawang angĕsah akung hameri luh

lunghā lampah i sang narendrasuta mangkin umaliwat adoh sakêng sabhā

oruk tingkah ikang kināryyakĕn awarṇna salahasa yadin katoliha

tistis lwīr akĕkĕs-kĕkĕs kalamukan hawuk amuni langönya sungkawa

krām ning wai manisih ya tâbalut apiṇḍa pamatan ing unĕng linurwakĕn

tĕkwan rāmya nikang basantamasa rāmya ri hawan ira rāmya tūt hĕnu

kāryy ânwam hangĕlih-ngĕlih sĕmi nikang kayu kasirir awarṇna koyangan

polahnyân angĕsah sawang pangĕsah ing ruḍita wiphala kungnya de nira

awrā kīrṇna tibêng lĕmah paḍa luñut kusuma nika katon sumamburat

nyagrodhânwam aneka boddhi nika yan paruruhurana len prih ambulu

lumrā ng pakṣy anacar paḍâsira-siran tĕka sumayab aliwran ing tahĕn

mĕnggĕp syungnya na medi-medi sinameni bayan ika marĕk sagocara

ahrit śabda nikang kuwong siniring ing walik alara tinambang ing cucur

prāptêng pora ḍusun-ḍusun hana tĕgal-tĕgal i hiringan ing gunung-gunung

wwang māhwan ya paḍângaring ndan alĕbā patarukan i gagānya tūt gĕgĕr

dudw âmöh susu kapwa mangkana lanā gawayan ika marĕk marêng pura

rîndrapraṣṭha nahan prasiddha pahulanya suruhan i gawenya nityasa

mĕṇḍung wāhu sumār jawuhnya maniram-nirami tarukan ing lurah-lurah

mangkin kentar ado[h] himanya tĕkap ing pawana mahĕli teja ning rawi

bhrantā ng cātaka manglangūt ri surud ing jalada malih i rāmya ning wukir

hetunya n pangamarmmakĕn ri sira kelu salahasa tuminghali ng tawang

tan magyā ta laris nirân krama halintang i tataraban ing wanāntara

kweh katyāgan aneka tang kabuyutan tinĕmu nira katon paḍâhalĕp

lāwan maṇḍala dharmmaśāla kuṭi pājaran arĕja wihāra söh langö

lingsir ning sawitā pirêka lawas ing diwasa tĕka sirêng Saraswatī

singgih nirmmala bañw inuttama pawitra pinakabañu ning wanāśrama

towin śuddha hi maikalanya n apasir-pasir analaga mādrakâḍake

rañjing-rañjing ikâlangö panilukanya n asaji-saji pūrṇna pangkaja

panglinggan ri dalĕmnya tan patatalan marahakĕna gatinya n uttama

āmbĕk sang nṛpaputra harṣaja tuminghali kalĕngĕngan ing mahānadī

mambö rāmya ni posik ing jaladhi posik i bañu nika mosik ombakan

mātrânūb lari ning samīraṇa matangnya kumucak amangun larap-larap

ryyak-ryyaknyân lalitâmijah lwir agirang ta mamapag i sang āryya Phalguṇa

hangsa śweta ya tânĕlat ri tĕngah ing sarayi mahas awarṇna manglĕngĕng

kahyun-hyun tumiling-tiling ri kĕtĕr ing bhramara wijah amanwa-manwakĕn

lwir mājar hĕning ing nadī tiki n inulwala ning anila medy aringgĕkan

denyâsnāna nirāgrahêng wipula pangkaja kahanan ikâpuḍe-puḍe

ngkānê lwāni pasir-pasirnya tamatan dahat adalĕm angāmbĕk-āmbĕki

honyêkang kaga cakrawāka kalawan priya mangalihi mendung-endungan

munggwîng pangkaja lot yathāsuka mapahyunan amiruru bajra keśara

kengĕl pwa ng harawinda marmmara kacūrṇnan i pakĕpĕk ikang wihanggama

aśrī reh ni hiring-hiringnya n ahijo paḍa marĕja bangun linangwakĕn

de ning śewala mĕnggĕp angragĕti pantĕs aniru-niru gātra ning pupur

nāntĕn têki sawang paras-paras ikang wwang ahayu sahajâmangun raras

lwir saptangkura sumrak anglĕlĕh i denya n awangi pakis ĕṇḍah ing bañu

wwantĕn satpada medran angrarah amūrwwa raras i lĕngĕng ing saroruha

darpanyâliwĕran ya monĕng akarang-karang angarĕki kosapêng hṛbuk

hūmrĕng lwir kĕtĕr ing kapat tuwin arūm lalita jaya-jayanya komala

lwir hūngkāra pamūrṣitanya ri narendratanaya rumĕsĕp nirāntara

ngkā rakwân tumĕḍun sirârahup acāmana lumĕkas asūryyasaiwana

māryy ângel sira denya mangkin alilang twas ira tĕlas irân pangarccana

ndah mĕntas tumuluy sakêng bañu tathāpi kajĕnĕkana ring śilātala

harṣânon ri pakungnya yâwing-awingan watu hangingin-ingin mungup-mungup

len tang harṣa nirân mulat ri gati ning pingul amijah i lo nikang bañu

tĕkwan medi lĕkas niki n pangicipir hana gumiwang anambi ring watu

yêkângde kusut ing nadī jaga-jaga ng kuluma milu kawĕs marambĕhan

ngkā n kāgyat tĕkap ing wihangga kumucup karaṇa nika larup* marêng rĕṇĕk

mangkin konang-unang tikang walahar anglĕngĕngi kadi hamiṇḍa ring tawang

singhit pwa ng rawi rukṣa tang kusuma honya ta kasawur i pombak ing bañu

lwir wintang dinĕlö halĕpnya sumarambah anama-nama raśmi ning suji

lwir puṣpāñjali śuddha tulya pasayutnya yan angucapa rakwa ling nira

nyâśokâsana puṣpa bāṇa paḍa lurwa kakiraṇan i tīra ning nadī

kapwâśā magĕyuh langönya katawan smi ta kusuma nikang tahĕn madhu

tan samwas makire manis mala-malar susupana ring akung macangkrama

rāmyânūt ri patinggal ing bhramara māri mangarĕki hinernya yan rurū

rūmnya ngganya parantya ning rimang angarccana madanawilāśa ring jinĕm

honya ng tañjung angambwakĕn kusuma mār mrat angawadi sugandha kānginan

mambw ârūm panĕḍĕng nikang śikari mogha tan akalib aliṇḍungan wungū

tapwan marmma hure ni sāntĕn ika molur acawit ajagêng smarātura

kālanya n ri tiling hyang ārkka makucĕm kalĕngĕngan ika suksĕkâlangö

heman tan hana ning mahas-mahas acangkrama mangucapa rūmnya ring karas

sis denya n wwaya tang mayūra sahajângaring-aring anamar mahas mangö

pantĕs yan kĕkĕsĕnya ring rasa wilāpa kalĕngĕngan ikang Saraswati

manggĕh buddhi nirân mangö mingĕt-ingĕt [r]yy amĕna nira nahan rinūpaka

siddhā ning lumicin mangiṣṭya pawĕkas parama ṛṣi rikāna lakṣyakĕn

wet ning lwā nikanang daśendriya rumĕñcĕm amaribhawa litnya ring tutur

yêkângde hilang ing Śiwasmṛti lĕbur bisama madĕg ikang rajah tamah

ānghing kottaman ing hiḍĕp taki-takin ring anĕmu-nĕmu tatwa ning hurip

byaktâwās kadi cakra ning ratha yadin hulurana lĕwu denya tan padon

āpañ jāti nikang śarīra taya leñ juga dadahakĕn ing yaśâdhikā

yêkī n kenaka ning tuwuh niyata haywa malĕmĕha ring wiṣṭi ning hayu

nāhan wastu ni de nirângangĕn-angĕn tulusa ni pangadeśa sang ṛṣi

lwir bhrantâkuyĕngañ juga* ng hati dhumāraṇa kapatĕha ning daśendriya.

āpan bheda nikang hiḍĕp ya ta maweh sukĕr alĕmĕh i sandhi ning smṛti

hetunya n humĕnĕng samāntaji winodanan i kĕtĕr i śabda ning kuwong

irikā ta muwah lumaku sira ri lingsir ikang diwasa

paran ing twas iniṣṭi nira taya waneh nghing ikang Himawān

ndah amūrwwa ta lampah ira taman angel mahawan palapat

alangö mulat ing manuk angada-hadā ta larinya lĕyĕp

wangi ning wanapuṣpa maluru kasirir ya ta manglĕngĕngi

tan arĕn mangawe twas ira tumalingê kĕtĕr ing bhramara

kahiḍĕp ta pañumbwa nika kadi kĕtĕr ning amūrwwa lulut

araras sinamāntarakĕna ri panawwang ikang mrak arūm

i pasañcayan ing wanakusuma sumār mrik amṛṣṭy arurū

rinarah tĕkap ing hangin umirir angimbuhi raśmi nikā

kadi laywan ikang kusumaśara aneka waneh sumĕlap

i sukĕt-sukĕt ing luru-luruk anamar sinusuk-susukan

nya sudanya latângalaya kapanasan kadi śoka rapuh

katirah lumale sulur ika makuśā bhramitâmlas-arĕp

umingĕl pwa pakis haji nika hajapĕn yan awarṇna humöt

hana rakwa wĕlas-harĕp angulili munggw i parantyan akung

angĕlih sĕmi ning mangunĕng asĕmu lurwa kĕnêng kiraṇa

lwir angel mangĕsah lumayana ri lĕmĕsnya manganti gĕrĕh

akiput kumisik gĕsing ika n angaweśa ri rĕs ning unĕng

ri huyangnya kinolakĕna* pamĕkul ing prabhu sanmata mār

agĕnĕt pwa sukĕtnya puru-puru latāngkura ketnya n arĕs

tuwi sungsang ikânwangi riy alikukunya lumĕnghy angure

sumĕkar ta kayĕnya n umadĕg i jurangnya sugandha mawit

humĕnĕng hana cĕb luput ika dumĕling ri wĕgangnya luput

ndah atīta lawas nṛpatanaya lumakw anusup ring alas

kali durgga jurang giri gahana aneka linakwa nira

tuwi lālana met ^†paran ira wulakan lwah anindya suci

patapan ya ta rakwa panginĕpan irêka tĕhĕr hiniwö^†

anusup ta muwah nṛpatanaya susatya mahâmirati

ikanang wana parwwata juga pakamitra nirân winĕgil

ya ta rakwa mahâsĕgĕ-sĕgĕhi sirâsaji sarwwaphala

hana herttali rāmya ya tika sumĕneha patīrthan ira

tĕka rakwa sirêng Himagiri atisobha sabhānya katon

ndan apiṇḍa kadewatan alĕp ikang ārkka lumöng manisih

kahatur jaladanya sumaput aputih kadi bapra lĕngöng

ahurup lĕyĕp ing gagana juga lĕyĕpnya kunĕng tinahā

sawang mosik tingkah ni para-parah ing parwwata lĕngöng

bangun masyang tang cāmara kumisik osah kapawanan

halah herherĕn lwir ni pakusikan ing pādapa mingĕl

lawan lunglūnganya n lalita mangungang lot mangalaya

ri himbang-himbangnyân wana gahana udyāna juga ya

katampwan krām-krām ning kiraṇa karahanyân panĕpuhi

mamöngpöng sāśry ârumpukana ta sĕkarnyêka dumilah

kadi pwâhyas harṣân tinama-tama de Paṇḍutanaya

wināswās tingkah ning halas ika sawang wāhw atamuyan

pasungsungnya jrah ning kusuma sumĕkar kapwa ya marūm

tahĕn tejârumbut pracala mara sinwamnya hamirah

hatur bāng ning lambe gĕrĕmĕ pasĕnāhanya ri sira

lĕbaknya kweh lwir Nandanawana mahārāmya tan alah

gihānyârcĕp [h]endah prasama mahalĕp warṇna racana

lawan wṛkṣanyâneka hana parijātânwam anĕḍĕng

pralĕmba lwir ning pādapa nika mure lambika mapös

nadīnyânūs lĕnglĕng mwang i tĕla-tĕlā ning parang arĕs

waneh muñcār sangkêng paras analaga lwir tasik anak

ri dunghus-dunghusnya n rucira manaruh rūm ning udadhi

prakīrṇnā ng paṇḍanyâpuḍak anidĕhi ng wungkal alangö

saharṣâmbĕk sang Pārtha makin umanek ring Himagiri

makin kāścaryyânon ri halĕp ika sākṣāt surapada

katungkul-tungkul denya para-parah ing Bhāratapura

lĕbak lungkan-lungkan yy udaya śata tīrthân kalihatan

jurang sūkṣmâtyantêng bisama tuwi kalyañ jaladhara

marok mwang wĕlkah ning walirang angaras yan pangĕmuki

kasöngan teja byakta tiki n atĕmah wangkawa lumöng

pilih sök truh ngganya n lagi kiniwat ing gĕntĕr awarah

prabhā ning wwe sākṣāt ya tiki kahanan nirmmalanadī

pilih Ganggādwārêki winuni ri denyâparimita

tumampang* ta ngwang ling nira tama tiki n mangkat angalih

hawanyâhrit pringgâkarakal i jurangnyâringi-ringi

lĕwĕs denya n mewĕh taya gamana ning wwang tama tĕkā

yatan sang siddhārṣi prawara sira sang bhikṣuka huwus

nahan pamyaktan kottaman ira ta sang Paṇḍūtanaya

ndatan mewĕh prāptân tamakĕna sumadhyā parahita

ḍatĕng sang Pārtha ngkā ri kahanan ikang kalyan asĕnöt

katon pwêkang Ganggāwiwara paramānindya wimala

anūs ri lwang ning gahwara mamulakan wwenya ya mulĕk

apan sākṣāt his ning śaśadhara hurip ning sabhuwana

sĕḍĕng prāpta ngkā sang nṛpatanaya mangkin sapurati

tuminghal ring Ganggâmṛtamaya haturnyêka malilang

apan manggĕh pangdoh ni pangawaśa ning twas salahasa

rikā n masnānâdyus sira tumĕḍun ing tīrthawiwara

ngkā rakwân salila ta sang narāryya Pārtha

lāgy âköm ri wiwara ning nadī pawitra

lyab-lyabnyâtiśaya maweh manah wiśuddha

maswadhyāya japa sirêka yan pamūjā

bwat nārīśwara sinamādhi sūkṣmatatwa

sangkêng āṣṭadala hanêng nadī pratiṣṭha

sūryyâtmā hinawatakĕn ring antarikṣa

līna dhyāna ta mapisan ri windudewa

wwantĕn stry ārjja marĕk i sang narendraputra

raśminyânamar ari ning raras maweh kung

sākṣāt Karttika pangawak nikang kalangwan

lĕnglĕng ning wulan ajapĕn manis-manisnya

byaktâmungwa ri lĕngĕng ing mangö wimūrccha

warṇnâtruh riris alangö patahnya mār mrik

mwang rupnyânĕlĕhi lanâmĕḍar kilatnya

tejā ning muka gumawang makin rinĕngga

ndan sang Pārtha sira tiki n tĕlas masandhyā

kānggĕk citta nira tumonya tan pasangkan

lakṣmī ning Himagiri Jahnawîki tan len

yêkā n śangsaya tumahā ring Indrajāla

hetunya n pangucap arūm paran kitântĕn

prāptêng parwwata ri sĕḍĕngkw atīrthayātra

nāntĕn tan saparan ing anglĕngöng hiḍĕpku

āpan ratna ning ahajöng kitâri rakryan

jañjan lwir* cumataka sambhawê rarasta

śrī ning tāman atawa rūmnya yan winimba

śrīdantâmithuna manisnya ring wajâkrām

handul munggw i gisi-gisinya lot rumangkĕp

endah tang katirah angaśrayê laṭinta

mwang nīlotpala ri matanta rūmnya n unggu

lung hing* jangga wahu lumung wwayê gulūnta

lingkw indung mangunĕng amiṇḍa ring patah rūm

kambang ning priyaka mĕkar yy awakta mambĕt

[h]astângerangi sĕmi ning haśoka lĕnglĕng

ndah mangkā ng wĕtis anusah tikung puḍak mrik

nyū dantâgĕmuh anular ta yêng stanâhrit

nāhan rakwa ling ira Pārtha yan panantwa

wruh tang strînggita ni manah narendraputra

he rakryan lĕwu amanuṣya kabwatanta

prāpta ngke tuwi tak anon waneh juga ngwang

hāh tan popama mara göng nikê kṛtinta

siddhā ning tumama marêng Himâdri durgga

hīnganya n putus ing inuttamâdhikāra

yogya n śāraṇa sang amet kawṛddhyan ing rāt

nā lingnyângupasama towi sārjjawâsih

ndan sang Phalguṇa mamanis wuwus nirâtwang

wīnang dyah sang apa kitâhajöng hana ngke

tājar ngwang duga-duga hāh lĕwĕs mahātku

māskw îndung [h]atawa kitâri sūkṣmadewī

wetnya n konĕng-unĕng anunggw i kāwakanta

sakweh ning kusuma angasrayê rarasta

byaktêki n hana rumagĕt katon paniwya

pintĕñ janma ni lĕngĕng ing kapat mawak rūm

śrī ning sāgara madhu niṣkalâśarīra

singhit pwa ng jaladhi linangwakĕn langönya

lāwan parwwata winawêng langö salah de

rakryan tan wiphala kunĕng hayunta heman

ngke ring durgga gahana towi tungga-tunggal

lwir tan wiśmaya matakut kitêng wanādri

wet ning singha gaja ulângawit lawan mong

mangkā lwir nṛpatanayâmĕpĕr matakwan

ndah mājar duga-duga têka sang sinantwa

rakryan rĕngwakĕna nihan manĕhta māsku

strīkanyā ngaran Ulupuy nghulun pwa yâsih

ndah pūrwwākĕna mara janma ni nghulun strī

śrī Korawya ta karĕngö gahan [h]ulā göng

ndātan len ri sira mahādbhutêng prabhāwa

ring wīryyâpratihata tan samêng triloka

wwantĕn rājya atiśayêng alĕp wiśeṣa

de ning bhāswara maṇi ratna aprameya

lwir kendran hayu nika tan pacāla ring śrī

kabwatnyân hana parijāta kalpawṛkṣa

nā tang swargga tuwi masor hayunya kāsrang

de ning nītala pakĕkĕs nikâdwitīya

[singgih yan damĕl ira Padmayonidewa]*

hetunyâsama-sama wet ny ulih nirâmrih

nā tândĕl nira bhujagādhirāja tuṣṭi

sakweh ning [h]uraga samanta kapwa bhakti

ndah parṇnah nghulun iki nāgarājaputrī

langgöng sāśwata juga nora mātra duhka

sāntĕn-sāntĕn ikang sukôttama huwus kesyan tĕkap ning yayah

yângde wyāpara tar jĕnĕk saka ri göng ning śreṣthi kady âwarĕg

āmbĕk tan winaḍa n mahāngrarah i rūm ning deśa śūnyâsĕnöt

prāpta ngke dumadak manĕmwa ri kitâdewāśrayêng Jahnawī

mogha ngwang kĕna rāga tibra sinarik de ning smarāstrânala

anghing his ni manis-manista taḍahĕñ jampya ny unĕngku n rimang

āpan hyang Rati marmma mangrahatakĕn kingking ning oghângarang

sih rakryan palarĕn warâmṛta kitâtah pāwak ing Manmatha

mwang ndyânung kahalĕp nikang wanawaśânganti ng* sukĕt kāsy-asih

darppângingkis anambi ring watu sumong rukṣâkusut nisprabhā

roṇḍon lurw aluñut ya rakwa kalaśānya ndin panĕmwa ng suka

tan wāktan kĕlut ing śarīra masamun kumrut riniṇḍing lanā

sangkṣĕpanya tuhanku mantuka marêng nāgendrarājyâmriha

bhuktin tang suka bhakti ni nghulun agöng sambeganĕn tânghyanga

nyāta ng nāga kabeh prabhakti tarimanta prārthananyâniwi

bhoga mwang paribhoga yêkana hiwön secchânawung sanggama

nā ling sang Hulupuy sarāga sumahur sang Pārtha somyâmanis

hāh māskw îbu halib pwa denta mangalap ngkānê maṇik ning hati

heman raśmi nikung prahāsana rasanyâmlad waśângde tĕñuh

santoṣâñ juga denta māsku ta kari ng niśśrādha sih ngwang hari

mangke kāla ning anggĕgö pasamayan pangde nirang Nārada

brāhmācāryya ya hetu ning malarasan ngke ring Himādry ânusup

anghing dwādaśa kāla hīngan i lawas ning warṣa herĕn tĕkā

yângde lök yadiyan pangisyana sarāgâmūrwwakĕn sanggama

nāhan têki sahur sang Arjjuna muwah mojar tikang kāminī

ḍū swāmingku salah tikângangĕn-angĕntâmrih [r]yy ujar sang ṛṣi

wruh ngwang don i wuwus nirân gumawaya ng protsāha sambhodhana

singgih śrī Drupadātmajā sira tikânggĕh ning bratantânaḍi

len sangke rasikâparan ta kasalah dentânggĕgö sanggama

tan sangkêng paraḍāra lĕmpunĕn* ujarkw âmūrṣitâmrih rĕṇa

wṛddhyā ning kulawangśa donya pahayunta ng kāmamudrāgama

nāhan bhyāsakĕna prihĕn tĕpĕt ikang dhyāyī tĕkêng śūnyata

mapa kari citta sang nṛpatiputra hinuluran ujarnya met* siwi

humĕnĕb-ĕnĕb ndan āmbĕk ira singgih ujar ika n aminta tanggapĕn

karaṇa nirân pangaywakĕna lingnya hinubhayan apan parêng hayu

apituwi tan pacāla ring arūm taya wipata kunĕng hiḍĕp nira

nda huwus atūt wilāśa nira sotan i manah ing atunggalan hunĕng

angadĕg adan ta rakwa nṛpaputra dinulur ira nāgakanyakā

ri bĕla[h] ikang wasundara nahan ta hawan ira marê[ng] rasātala

tuhun alaris sirâpaduluran suka tinuduh i tingkah ing hĕnū

katĕmu tikāng anâlaya wangun-wangunan ika anopamêng halĕp

racana nikang humah kanaka gopura pagĕr ika kapwa mās maṇik

swang asĕmu tejamaṇḍala parĕmpwan ika paḍa-paḍâmangun hulap

iningĕt-ingĕt hayunya n adhikāra saka ri hayu ning kadewatan

surabhawanâsinang tĕkap ikang dinakara wararatna bhāswara

hiwag ika yan makāntang akucĕm lalu diwasa ri kāla ning kulĕm

kunĕng irikang rasātala ya tângurang-urangi pĕtĕng tĕkêriya

ya juga lanâsinang tĕkap ikang sphaṭika maṇi suteja nityasa

irika narendraputra tinamākĕna tĕkap ira nāgakāminī

asaji halĕp nikāng alaya kañcana pinacira wastw anindita

hana wanitârjja kapwa sinawang maṇik anguray arūm raras nikā

amuhara kung liringnya dinĕlö lĕmĕs ika n aśarīra pādapa

wwaya ta marĕk sumanggraha mangaswakĕna pamapaganya ring tamuy

apĕnĕd awĕtwa-wĕtwan i kapantĕs ika ta magĕsĕng ring inggitā

alĕbu-lĕbū raras ni saḍĕk ing kusuma paḍa minging kinasturi

sinawawa raśmi mangjĕngĕrakĕn pasaji-saji manis tininghalan

hana wangunan gṛhasphaṭika pangkaja madana hatĕpnya mās tatur

arĕja rinĕngga puṣpamaya kapwa maṇimaya lumöng hanêriya

hana ta kunang sumajya pawirāman ika gĕlaran ing smarāstuti

ndan inapi raśmisañcaya jahitnya n asĕmu parahasyan ing wulan

irika ta munggah ing pakasutan sang ahayu kalawan nṛpātmaja

pangawaśa ning paḍa priya matūt wawang aruma[h] ikang raras hati

papupul irân hanêng śayana rāmya paḍa sira makesi ning manis

asĕmu pamiṇḍa ning mĕnur angaywakĕna raras arok lawan gaḍung

hana ta waneh patūt nira hatur salaga marĕk i rāmya ning nadī

niyata juga ng Ratih makalawan Manasija sira karwa ring jinĕm

pawilĕt i sandhi ning gati ciniṇḍya nira tĕlĕng ikang smarāgama

kṣaṇika tatan kapanggila pasungsungan akĕcap irêng pasanggaman

kunĕng i huwus nikang gati tĕkap sang amithuna langö nirêng tilam

wawang alulut sirârddha kaharas maṇik i hati nirân hañar waśi

parĕng umijil sirâśila makālihan ajajar i heng nikang gṛha

hana humaḍang marĕk sapariwāra nira umupacāra sanggraha

ri yawa nikang gṛhasphaṭika parṇnah ira kadi sakêng Smarālaya

paḍa sumĕnāha tang taḍah aneka parama rasa pattya ng enaka

ri tĕlas irânaḍah krama parĕng ta sira maluy umunggahêng jinĕm

bĕtah anawung hunĕng nira hanêng śayana taya kawarśih ing gati

suka-suka sang sĕḍĕng mangayu raśmi saturida hanêng pasanggaman

tuwi pinagantakĕn mahasa lālana madulur anis marêng taman

tan alĕh ahimya-himyan angusir sakalĕngĕngan ikang pajang wulan

sahaja marângrĕrĕb-rĕrĕb akālihana jinĕm apuṣpa pādapa

pangirim-irim nikang masa kapat patĕr amijah angambwakĕn riris

umahas-ahas ta rakwa sira rāmya manĕpĕrakĕn ing tapowana

nguni-nguni ring nadītaṭa marêng jurang amarĕki durgga ning parung

hana wulakan pamenan ira lot aṭika-ṭikan asangwa kung lulut

salawas irângurĕn turida harṣa silih-asih angekacumbana

wruh amiṣayêng rĕsĕp taya kagiṇḍal ira paḍa sarāga tan wiwal

jĕnĕk amulung-mulung madanatantra taya kahala de Dhanañjaya

sinamaya sūkṣma lingga ning akung ndan apagĕṭa miwö ng karāsikan

tangeh lawas irêng rasātala hana

ndatan dwa mawĕkâdhikāra nipuna

inakwan ira wīra ring raṇa hĕlĕm

ya rakwa Irawan ngaranya karĕngö

ndatan malupa sang narendratanaya

prayojana jugêki nitya katutur

ya hetu ning adan humangkata muwah

sinantwa winarah ta sang priya huwus

samangkana sirân lumakwa maliha

ḍatĕng ri Himawān ta rakwa wĕkasan

wisāta manusup sirânginak-inak

aneka ta jurang wukir paranira

kaparah tikāng acala rāmya amanuṣa langönya durggama

giri Nīlaśṛngga karĕngö tuwi gahana sukĕt nikang wukir

apĕluk jurangnya n adalĕm śikara nika kahundul ing parung

kumisik bañunya ya manumbĕr i muka tumĕḍun marêng jurang

alilang hilīnya gumulak mangabarat i tĕlā nikang wukir

susu ning lĕmah kahiḍĕpanya kadi rajata warṇna bhāswara

amijah ḍaranya masibu mwang akĕpĕk angaring marambatan

sakadang matūt ndatan arinya mamarĕngi* patīrtha sang ṛṣi

alalĕh katon para-parah niki n arĕcĕp angungkul-ungkuli

ri hiring-hiringnya patapan mapangajaran i pinggir ing parung

ndah atindu-tindu patatānya sana-sini paḍâgawe langö

wara puṣpadeha dumilah kadi dahana kinuṇḍa tan paḍĕm

araras patinghalan ikang para kili winagĕd raras nikā

kahatur cumāmpaka manisnya sumaji-saji tinghal ing mulat

ri pasiṇḍi-siṇḍi nika pantĕs angayati pakiñcang ing halis

anamar kilang juga liringnya winulatan ikânghĕmū-guyu

i talun-talunya ya ta lālana hamumu* gangan lawañ jamūr

nguniweh lalab paḍa winungkus i jamang ika tan tahêng susu

anusah manis ringa-ringan yan angidung i samīpa ning parung

ahirit sinambangan ikang gagung asahuran ing jurang-jurang

irikang tapowana rarasnya n abuhaya sumajya sang ṛṣi

hana tâmipil kusuma darbbha hinikĕt inamĕrnya ring kukū

sawaneh marêng ghaṭa lumampah angamĕr arĕjâñawuk bañu

dinĕlö manisnya n angĕnoh rumĕngu-rĕngu sawang surâpsarī

anĕḍĕk tikang tasik anak bañu nika n inungang katungkulan

kumucup tang erttali sakêng wiwara niki kawantus ing tĕngah

amangun-mangun hima lumöng kakiraṇan atĕmah kuwung-kuwung

sawaneh katon kapalĕyö kadi bhujaga kumĕṇḍĕng anglayang

sĕmi ning wanāntara lume mĕhah angayam-ayam truh ing nadī

kadi tan puji n marĕk i rūmnya pinakaciri munggu ring gĕlung

ri ḍatĕng narendratanayângdurugakĕna langö ning aśrama

huni ning kuwong lwir angatag mijila hana ta sang Dhanañjaya

rĕsĕp ta sirang āryya Phalguṇa tiki n mulat kāsrĕpan

katon halĕp ikang pradeśa nikanang wukir pājaran

lumūd manah irân rapuh kangĕlihan tĕkap ning rawi

ya kāraṇa nirân tan aśru wĕkasan sawetnyân mangel

hanan laku sumĕngka rāmya lumihat hiring ning langit

linangwakĕn ikang manuk wahu mulih larinyâlangö

tuwi pwa n alalĕh lapat-lapat aḍanta-ḍantânglayang

ya rakwa sumawe raras twas anamar kĕḍap ning wukir

hawan lĕngĕng atuṇḍa-tuṇḍa tĕpi ning jurangnyâdalĕm

ikang sukĕt anambi-nambir asĕnöt latānyân sumong

lumĕnghay adawā katon lung i galingnya munggw ing parung

hanêki n amilĕt ri ampiji waneh tahĕnyâlĕsĕs

larap ni sĕmi ning walik-kaḍĕp i himbang ing pājaran

lawan pisang alas pupus nika mapös hatur kānglihan

sawang layu-layū lumimbay alaris sĕḍĕng kānginan

aganti lawan aṇḍurū ya tan arĕn kĕlabnyângawe

samangkana pamangsul ing kidang awās manisnyân wulat

mulat ḍara-ḍaran [n]ikang wray irikang tahĕn sambrama

sumantĕn anacar ta sarwwaphala honya manghruk parĕng

dudū tang angaring lutungnya yan amangkuk ing pāng jĕnĕk

tangeh yan iniwön samāntara ḍatĕng sirêng aśrama

katon kadi sumanggrahê sira kayunya kumrām kabeh

sĕkarnya wilajêng lĕmah kadi rurū nikang bhūṣaṇa

angutkaṭa sumār nirāntara wanginya lumrā marūm

lalu ng ghaṭita māsa tistis ahawan ta sang hyang rawi

sirĕm-sirĕm i sĕbsĕb ing kiraṇa kālasandhyā huwus

awarṇna cinirup tikang gagana tumrang abhrâmirah

urutnya sumirat-sirat karudhiran panarkêriya

makin kawuwuhan langö racana ning pawitrāśrama

tuwin kinĕmulan kusut ni jaladanya lumrânurun

inaywan i kukus nikang huti pamūja sang paṇḍita

ikang kaluṣa moha śīrṇna tilakanya sākṣāt gĕsöng

mirir wangi nikang pahoman i dalĕmnya mawrā sumār

sugandha saha dhūpa ḍīpa humaras wanginyângasut

samanta jayaghaṇṭa-ghaṇṭi ya tiki n pangungkung parĕng

lawan stawa karĕngw asangghani malap twas angde lĕngöng

manuknya n akule lanā n pakulĕman rikāng aśrama

humung mahurahan kĕcĕknya n amicāra warṇnâkṣara

lĕngöng panamay ing dwirepa karĕngö hanêng srak minging

bangun wruh angawat lalitya pangidungnya somyârĕrĕh

aneka ta tinon [n]arendrasuta rāmya ning pājaran

ya têka magawe kapūhan ira tuṣṭa māntĕn rapuh

mangö mingĕt-ingĕt marāryyan irikang śilâlwâratā

anganty anginĕp ing tapowana nahan tatâmbĕk nira

ndah iwön ta sang ṛṣi kabeh mijil agarawalan panungsunga

tapi-tapy adandan umijil sahana nira hanêng tapowana

ndan apadgaṭâmĕkasakĕn* daluwang ira tĕhĕr ndatan hiner

agirang-girang lumihat ing lituhayu ya tikângjĕngĕr hati

kadunung ta sang nṛpatiputra ta maśila ri pöhan ing tapa

apĕnĕd ri sor nikang aśoka mangisapu ya tâsuhun sĕkar

mututung ta sang ṛṣi tuminghali sira paramênggitâhalĕp

yadiyan mucap Kusumacāpa waling ira mulat mĕngĕn[-mĕngĕn]

tan alah kapūhan ika sang para kili kadi wismṛti ng hiḍĕp

swang anagwa-nagwakĕn unangnya ri mata rasa tan wĕnang hinöt

mawuwus ta sang ṛṣi sabhāgya mami manarukêng tapowana

katĕkān manĕmwa phala ni ngwang amirati ḍatĕng nṛpātmaja

mapa tang prayojana narendratanaya mahas ing wanāntara

kadi tambay ing parama māryya gatarasa mamî wanāśrama

tĕpĕt ing samāhita kunang pinahayu hayu ing tapabrata

takari ng kṛtārtha pangaranya panuluyana denta sanmata

na wuwus watĕk ṛṣi narendrasuta majar i sang mahāyati

atĕrĕh pwa de nira yathārtha nira ḍatĕng atīrtha kāraṇa

riy ulih nirêng nitala yêka ta winarahakĕn tĕkap nira

agirang ta sang ṛṣi rumĕngwa kadi kawuwuhan sukâbungah

wĕkasan ta sang nṛpatiputra dinulur umulih ring aśrama

ri ḍatĕng nirân pinaripoṣita tĕkap ira sang watĕk ṛṣi

hana târggha pādya saha mūlaphala lawan ikang mahoṣadhi

suka sang Dhanañjaya kaweni manah ira tĕkap mahāmuni

iti nā sĕḍĕng nṛpatiputra hana ta sira ring tapowana

pinaran-paran ta sira de para yati malulut marê sira

mahas ing tapowana winūrṣita saparan irê mahāyati

nda aneka de nira maharsuka ri sira watĕk mahājana

pira têki rakwa ri lawas nira n amĕgil i sang mahāyati

kadi tan hanêki dumagê samanah ira parārtha nityasa

irikā sirâmuhun umangkata ri sira sang ugrapaṇḍita

karĕṇan mahāmuni kumolakĕna ta sira sang nṛpātmaja

bapa sang pangöban ing anāśraya parahita dharmma ring prajā

katĕkān manĕmwa suka ring kadi kita guṇawān nghulun tuhan

nyata sang mahājana tamolah ing acala kita prayojana

kita māsihânulusakĕn patayaśa pinakāśrayêng hayu

na wuwus dwijarṣi sira sang nṛpatanaya tĕhĕr umangkata

mahawan halas-halas ikang pangajaran i siluk nikang wukir

irikang nadī sira n atīrtha maharaḍin ikang kasatwikan

malihêng purāntara kunĕng parana nira sinambramêng suka

wwaya têki bhūpati hinuttama suyaśa mahārddhikêng praja

siniwi ng Mayūra wararājya nagara nira sang nareśwara

karĕngö pwa sangjña nira Citradahana tuhu bhūmipālaka

satatâsihêng agati tan wijigi sira n anon nirārthakā

sira ta narendra Citradahanânak anindya hayu

kadi paśarīra ning raras amiṇḍa ri gātra nira

swang awangi gandha ning kusuma tan pagap arddha marĕs

matang ika Citragandha panĕngĕr nira rājasutā

apituwi rakwa buddhi naranātha yayā n masĕkĕl

gati nira tungga-tunggala makesi ni nāla nira

bisama ya tan kagantyana dĕlāha hiḍĕp nṛpati

karaṇa nirân wirangrwang i karākṣakan ing nagara

pangayam-ayam nirang nṛpati mahyun amantwa mĕne

ya ta pinametakĕñ jalu sulakṣana tan kahala

makaphala wangśajā sumilihêng pura len karatun

alah apĕgā ng manah mangĕn-angĕn ryy abhilāśa nira

syapa kari sang mahānipuna wastu wineh atikā

maran aharĕp mahalwakĕna tan baśa yan kawawā

niyata kaduryyaśan ling ira tuccha gatinya tĕmĕn

tan ulaha ning janottama yadin paratêng wipata

hana mara tôpamanya ta kunang yadiyan warangĕn

kusuma sĕḍĕng manohara sumambyakĕn ing bhramara

lĕwu mara denya yogya hañangĕnya warĕg juga ya

ya pangupadṛṣta ning taruṇa moliha tan wibaśa

karaṇa nirâsĕkĕl taya mangenaki buddhi nira

luluy angajap ndatan palalayan twas irâbayangan

nguni-nguni têkanang bala kadi pwa ya niśśaraṇa

taya mara ngūni lingnya sahananya mĕhah malara

tuwi mara kārmma ning dadi ikang rwa tumūt mijila

hala hayu yêka rakwa tinĕmunya lanā manapĕl

paḍa-paḍa tan kasah pwa ya rikang dadi janma kabeh

sudhana kṛpāna len ganal alit taya tan kahana

wwang alupa ring rasâgama anāḍi Śiwasmaraṇa

niyata nikân panĕmwa hiwĕh ing dadi tan lĕpasa

kathamapi sang Mayūrapati satwika lot ginĕgö

panĕmu nirêng inak ruḍita śoka marĕk mangikū

ya tika ginopitêng hṛdaya göng ni kaduhkan ira

ya juga lanā linālana wineh nira tan masukĕr

pasisi wanāntarāśrama nahan ta pamenan ira

bari-bari yêka rakwa pangimūr pwa ri sungsut ira

pira ta kunĕng lawas nira narādhipa rañca makung

tinuduh i singhit ing manah angiṣṭy awasāna nira

pamahayu ning hyang angdani ḍatĕng nira Pārtha mĕne

niyata sirêka mangruwagi sungkawa sang nṛpati

tuwi karĕngö ta rakwa hayu sang wara rājasutā

angĕtĕrakĕn raras ni lĕngĕng ing giri māryy alangö

kalawan ikang wilāpa kadi māntĕna rūmnya larut

karaṇa nirân ḍatĕng kawawa de ni karĕngwan ira

prakaśita yan ḍatĕng prawara Paṇḍusutê nṛpati

sipi kari göng i buddhi naranātha sirâtamuyan

atawa kĕta ng balâmala-malar taya len ri sira

kadi salagâlabĕh ri tĕka ning riris ing jalada

sahaja sawang mahodadhi katonan ikang nagara

gumuru[h] ikang wwang ing pura mijil ya tiki n kĕtĕra

ndan asĕmu candrapūrṇna nṛpaputra sumöng iriya

ya ta karaṇanya sök turida lot kumisik mangĕsah

iningĕt-ingĕt halĕp nira narendrasutâtiśaya

madana basanta komala lawan madhumāsa ḍatĕng

tuwin aniwaryyaśakti lituhayw aguṇêng samara

nṛpasuta kewalâta wiṣaya ny ucapanya wagus

irika ta sang nareśwara marĕk ri narendrasuta

wulat amanis panungsung ira sārjjawa buddhi nira

rumĕsĕp i nāla sang wahu ḍatĕng ta panantwa nira

sipi kari bhāgyamānta mami wet ni ḍatĕngta laki

kadi tṛṇawṛkṣa [rukṣa] makirih ya paḍangkwa huwus

hinilan ikang hudan bisama kungnya mangel angajap

kawadiy uyangnya kāwit asĕwö pwa ya niskaraṇa

amĕnangi sih bhaṭāra Suranātha tahāngkwa kita

kalawan iking kaḍatwan atiśuṣka lĕwĕs wiphala

kadi hana ta swakārmma nika gāryyang atah makucĕm

hana mara ganta ning hayu kapanggiha denya mĕne

kuśala guṇanta mūlya amĕnganya n amuktya hayu

wacana narendra harṣa mawuwus ta narendrasuta

taha mara lingta nātha katuluy pwa mahā manguḍang

parama kasajjananta atiśuddha parārtha wibhuh

sumĕkar i padma ning hati matangnya sumewa haji

irika ta yan pininta nira sang wararājasuta*

taya winihang narāryya ri Mayūra papātra nira

bapa halapĕnta māsku siwinĕnya kitêki baśa

nya pahalawönta têki punagingkwa pakīrtyakĕna

prathama niking Mayūra wararājya rĕngönta harah

prabhu sira sang Prabhākara nahan ta rawitkwa sira

ati malawas r adĕg nira tan ora tanūja haji

lumaku sirâgawe tapa mangiṣṭya anak ya ta don

karuṇa ta sang hyang Ïśwara katon dṛdha sang nṛpati

tĕhĕr anganugrahânaka sawijya atah ri sira

katĕka-tĕkê swaputrakula mangkana haywa waneh

ya tika tinūt ni wīja nira yan hana ring nagara

tĕwĕk nikang wiṣama kabhukty aweh suma

taya ng purākṛta masĕwö wyamohita

nya sanghulun kawĕkas anak warānggana

katon pwa tan tĕhĕr agawe prajânghita

hudāśinanta bapa sinambhawâsiha

ikāng anak jalu ya pininta ni nghulun

yayânaka nghulun inahā gumantyana

pratiṣṭhitêng nagara ya sulkakanyakā

ahan wuwus nira nṛpaputra tan cala

inakwakĕn ryy anaka narendrakanyakā

jalu prasiddha sumilihêryy adĕg nira

samāpta pāyu ning ubhayênalapkĕna

huwus suwārddhana para taṇḍa de haji

paniwya sang nṛpaduhitê sang Arjjuna

saharṣa tang bala rumĕngö ta tan wihang

pajātyan ing maniwi susatya mangkana

wawang dine tikang upakāra ning smara

pasanggrahê sira n anawung hanêng jinĕm

wawang ndatan kahala kabeh paḍânghaḍā

subaddha pūrṇna wali nirâsamêng hayu

ikang wwang ing pura rumĕngö yathāsuka

paḍâmahaywakĕn agawe pamūrṣita

waneh madan hyas ika samênakêng tamuy

ikang kĕtĕg-kĕtĕg araras rinūpakā

hanêki sanggraha gṛha rāmya kottama

ri de nikâparimita wṛnda ring halĕp

anopamêng racana kinanta ning raṇu

sawang Himālaya ri haturnya komala

nahan parantya nira ta sang Dhanañjaya

aneka tang surasa pasajya pāwwata

sĕnāha tang marĕk umiwö hanângawat

sinangkyan ing paḍahi lalitya len kĕtur

surup nikang rawi umulih narādhipa

taya ng kasangśayan ira buddhi sāśwata

sawet ni göng i manah irê Dhanañjaya

panonan ing suka mijilêng mukâbungah

prāpta narendra ring gṛha cumuṇḍuk i kahanan i sang nareśwarī

lāgi sinungsung ing smita ḍatĕng nira tinamakĕn ing wulat marūm

de nira sang narendramahiṣī dadi mawara-warah nareśwara

[r]yy ārtha nikang prayojana mĕne kawarangan ira sang suputrikā

tan winihang tĕkap nṛpawadhū yugala nira narendrakanyakā

mangkana têki sang wwang i dalĕm paḍa gĕrĕmĕ hanâsĕwöh lulut

sang nṛpaputra lingnya sira wastu sawawa pamawê suputrikā

ndā * hawiwākṣitan krama parĕng narapati paratêng suputrikā

tan dwa ḍatĕng ta rakwa naranātha kunĕng iki narendraputrikā

arddha wirangrwang epu rumĕngö samanah ira ta sang narādhipa

prāpta ta sang narendra ri sirâmuhara salahasā n kinölakĕn

luh nira lot pinöm tuhun anungsung i tĕka nira sang narādhipa

marmma manah nikang wwang i dalĕm ri wingit ira sumöng mĕnĕb-mĕnĕb

kweh paricārikânwam angiring paḍa wihikan ing inggitê sira

denya marĕk manimbangi katonan ika n asĕmu pañjrah ing mĕnur

śrī nṛpaputrikâmawa langönya n amungari hatur niśākara

kāla nirân panĕmbah alaris lungayan ira n amādapâlume

ambĕt ikang tĕngah sawawa rosnya pañurigan ing angga tan singi

towin arūm katon kirab i gātra nira tĕkap i teja ning damar

byakta wĕnĕs nikang muka sawang wulan aluru waśângrĕsi ng hati

ngkā n pangucap narādhipa muwah nṛpawaramahisî suputrikā

om rari tan waneh kita lanā pinala-palar apuṇya ri nghulun

rūmta ya kesyananta atawânulusakĕna hajöng suputrikā

nghing kita tāsyasih karaṇa ning tumĕkakĕna marêng nirātmakā

rakryan arêbu māsku takari ng kita rari hinarĕp-harĕp mami

lāmpu n ujarku denta ring apâku lumugasana sihkwa putrikā

wet ni tuwuhta sāmpun anĕḍĕng sapangalapan akārmma tan sali

ndah sira sang Dhanañjaya siwinta sira saphala sambhawê kita

mangkana ling nareśwara kunang nṛpawaraduhitā ndatan sahur

mepu tĕkângadĕh luh ira kāsrĕk i manah ira tan wring olaha

rĕs nira yan lumangghaṇa pakon narapati ri sirâmangun sĕkĕl

hetu nirân mĕhah juga tangeh yan amituhu ri sang yayah bibi

ndah mawuwus narendramahisī tuhan ibu naranātha singgihĕn

tan hana rakwa lena ri kitêbu makalarapan ing twang i nghulun

wandhawawargga puṇyakĕna denta yat anuwuha jalwa putraja

tan malihêng Mayūra ya ta panggajaha nagara sulkakanyakā

toh palalu nda haywa tumahā nṛpati mubura dharmma sang prabhu

prārthana sang masūnwa warabhāryya hana kari hiwĕhnya sūngakĕn

pingging ikang katalyana ri sih ning atanaya mahĕlya duryyaśa

hātnya tatan kĕnênaku ikang hala hayu panĕmunya ring prajā

sāmpun irân ghumoṣita mulih narapati kawĕkas suputrikā

śoka tinuntun ing kaka amogha malumay agĕyuh kakingkingan

prāpta sirêng dalĕm gṛhalatā prihati pamatĕk ing kakanyakan

kewala luh nira drawa makin hinari-hari linālanêng kaka

strī-strī hanêng nagara lĕnglĕng osik angarang linurwan ing unĕng

bhrantâlangö kasarik ing manis nṛpatiputra tibra mangani

mogâhuyang hamuni kungnya moyut amajang śaśāngka ri dalĕm

mangkin tinĕngw an ahawan wulan ḍatĕng irân panūkṣma turida

ānyāt ta moruk angure rikang patiga mūrcchitângrĕs asuma

kingkingnya lāgi tinatānya ring sumanasâlangö dadi ṭikā

denyâmisik-misiki ceṭi kānya lara ning rimang kinĕcapan

yângde tĕñuhnya rumase ng wingitnya ri wilāpa manglĕngĕrakĕn

wwantĕn kalusyan i kisapwan ing kaka huyangnya tibra tan alĕh

bhrantângajap kalawanan raras ri rĕcĕp ing rimang saturida

līlā yadin layata ring pasir tĕhĕr angiṣṭya bhāṣaracana

tañ jrih rinūdha ri panumbĕr ing ryyak arĕṇah tayêng panginĕpan

strī ratna dug singi rarasnya têki n asawang sĕkar sumalaga

śokângarang kapilangö ri sor nikang aśoka mār pinijĕtan

lot winwang ing kaka hamatya-matyani hatur priyambada marĕk

towin wruh anglipurakĕn ta kingking ika tan sahêng nṛpasuta

ndin ngganya yan mĕkara danta ning salaga wiṣṭi rūmnya tan irĕng

ardhâluñut ri taya ning kapat marĕkakĕn ririsnya n amĕḍar

nirdon sĕwönya kadi tan sih ing pawana irṣya medi capala

manggângañut jalada nisturân pinalar ing hunang katanĕhan

toh ndyâwaśāna nika tan waneh wiḍala rūmnya denya kapati

nirwa mrik ing hasana len mĕnūr suraga nāgapuṣpa wilaja

yar tan sinambhawa nikang madhubrata dumohi tan pangarasa

lāwan hyang indu māri raśmi yadyapi tinambang ing cucur akung

rakryan tuhanku kita sang sawargga ri kalangwan ing masa kapat

wruh ngwang ring inggita nikêng wuwusta cumitêng aśoka salaga

sis ta pwa denta mamangun welaskw ibu mulat manista n alume

byaktânusah kusuma wāhu sah saka rikang patah mrik awĕnĕs

hāh dyah nihan manĕ-manĕhta māsku marĕkê narendratanaya

mwang ketakârjja wawanĕnkwa cihna niki panghyang ing katuridan

ndin tan kasanmata katon manista n ajapĕn ring ārṇnawa madhu

byaktā n karĕm kalĕlĕpêng tĕngah ri pangariṣṭa rāga ning akung

tanngeh pwâmbĕk ikang katĕkan unĕng

wet ning rāga wirangwrang anaputi

hetunya n balisah paḍa malara

ringrang bhranta kinölnya kaḍĕḍĕtan

tan mangkā sira sang nṛpaduhitā

kingking tan wruh i rāt nira maputĕk

ceṭī mwang kaka lot angupuk-upuk

wruhnyôjar hamawêng rasa kalangön

mangkin tibra sirân mĕkĕh asĕkĕl

wet ning twas baribin rininga-ringa

tan ryy amban sira tar kĕjĕp angarang

jātī ning yuwatī ya tika hana

pangde sang prabhu motusa ri sira

tambe rakwa mĕne sira warangĕn

ndah yêki n lumare hṛdaya nira

hetunya n sira mohita wĕwĕgĕn

gĕṇḍing mwang padahî yawa karĕngö

rāmyârūm pangawatnya kinidungan

lĕñjĕp ning curing arja pamiḍuḍuk

kapwâsrang sakulĕm hamarimisi

sangsiptan wĕngi sākṣaṇa kalalung

lunghā ng lek sumurup ta sira humöt

ngkā n ping sapta tikang ghaṭita muni

kady anggyākĕn ikang rahina tĕkā

atha sumĕgĕp atingkah salwir ning wali sumaji

krama tumama tikang wwang ngkānêng heng paḍa tumatā

diwasa wimala tumrang hyang wai bhāswara sumirat

nagara cumaraṇâkrām gĕṇḍing ghurṇnita hamijah

nṛpati sira sinewa ngkānêng maṇḍapa ri yawa

makin amuwuhi sobhā ng rājya lwir tasik angĕbĕk

wwang ika supĕnuh angjrah bheda wyāpara mariwö

saragi kumisik asrang rāmya lwir kĕtĕr ing alun

hana ta parĕng agasyak sāmpūrṇnâmangan anginum

sarahina wijah aywan sarwwecchā taya kahala

nda tucapa nṛpaputrī ngkānêng weśma piniḍuḍuk

raras i manis irânrang rūm-rūm ning Ratih inajöng

ri sĕḍĕng ira pinöngpöng de ning sthāpita ri dalĕm

tekap ing angajĕng endah ndan sang dyah makin asuma

sumalahasa sirê twas sang nāthân taya tinahā

karaṇa nira tan arṣêng rūm ning hyas kinĕnakĕna

saphala sira hangantyākĕn śrī ning kapat araras

kunĕng i wingit irângde rūkṣa lwir sĕkar alume

aruṇa tumiling angdoh warṇnânggyākĕna warangĕn

patĕr ahirit arĕs mār himpĕrnyân pangawat akung

irikang alaya lĕnglĕng ngkā rakryan hinariwuwu

apituwi sarĕcĕp ning nyāsanyân linarangakĕn

pamiḍuḍukan irâśrī mār mrat manglĕlĕhakĕna

kaka-kaka tinamêng rūm mĕnggĕp lwir suramahiṣī

lĕwu raras ira sākṣāt hyang ning reka pinahayu

inanupama suputrī ratnânindita ri dalĕm

drawa tatan awalör lyus hyang-hyang ning juruh angajap

ri manis ira n angaṇḍĕh kepwan rūmnya piniturun

rawi sumurup anolih krāmnyânunggw i laṭi nira

jalada sumarawat truh ndan byaktê gĕlungan ira

dadali habayangan mör lwir miśrê rĕngu ning alis

kilat aluru kumiñcang ngkānê jöng nira niyata

ndan amĕwĕhi pamakpak ning manggalya puja-pujan

linĕngĕngakĕna de ning wwang ri jro pamiru-miru

angarangi panameni ng gĕṇḍing mwang curing araras

saji-saji nika mambö posik ning [h]udadhi lĕngöng

atha ri surup ikang wai meghanyâñawĕli lumöng

masa kalima tumanggal ^†tumrang hyang wulan alangö

sawang alara ya medī de sang sūkṣma ning ahajöng

alah aluru manganti ngkānêng rĕm pinisusuran^†

pamatĕh i halĕp ing hyas de sang wwang marĕk i sira

lwir angirangi langö ning sandhyâmwīt i raras ira

nguni-nguni sarĕcĕp ning bhāṣa mwang rasa palupuy

hana ri manis irângde kingking ta pwa kinĕcapan

awicarita suputrī ndah warṇnan nṛpatanaya

kinĕ[na]kĕna tĕkap ning pūjāsambhara hiniwö

tĕkap ira sang atingkah mangke pwa n pawarang ira

krama tumuluy umantuk warṇnan de ning amaranga

irika ta sira kālih munggah ring jinĕm alangö

widhi ning amayu yêkā n rāmyâwās ri lulut ira

asĕmu lĕngĕng angicchā yan kesyan karas arĕṇik

sang ahayu sira sākṣāt rĕsrĕs ning riris alangö

ri sĕḍĕng ira n umunggah ndan sang śrī nṛpaduhitā

sumar i hāti nirôsah tibrâśā tinamakĕna

tuhun awĕdi sawet ning kingking wāhu tinarima

tan anginaki ring āmbĕk tan panghrĕt prih inuluran

papupul ira piniṇḍa ryy āmbĕk ning mulat araras

pupus arĕja ya têkā pamyaktê nṛpaduhitā

nṛpasuta sira himpĕr janggâñjrah luluy angaras

na wuwus ika paḍônĕng rĕñcĕm twasnya lĕngĕrana

mangke pwâmiṣayêng langönya tĕkap ing wulan manĕpuhi

abhrâwā gumawang wangun-wangunan ing ^†gṛhâparimita

lāwan söng ni wuwungnya kañcana rinĕngga ning maṇimaya

krām ning lek mawĕnĕs kasĕnwan i sĕnö nikâkara-kara^†

mambö nyāsan ikang smarāśrama halĕp nikang jamaṇikā

lwir digdhāha rinantagêng aruṇa ta pwa himpĕr angalih

tĕkwan yan hadukūla mālini paturwan ing gṛhalatā

ambö ning mukawāśa gopita minging mwang utkaṭa sumār

sāmpun rakwa ciniṇḍya ring śayana sang narendratanaya

ngkā sang dyah tinamêng kisapwan ira śoka mār mabayangan

tan pendah bhramarângamĕr salaga yan tininggal i dalĕm

mangkin lwir taḍahharṣa matta marĕk ing niśākara lĕngöng

sang lĕnglĕng sira mangkin āngrĕs angĕsah wirangwrang awĕnĕs

māmbĕt yan kinayuh tĕngah nira tiki n humingsĕr atulak

kingking lot sumaput ndatan pahamĕngan tĕñuh manah ira

luh ngkānêng mata angdadak madhu tikĕl ny alis nira mayat

mangkin [h]eñjuh amātyakĕn kĕtĕ-kĕtĕg ta sang nṛpasuta

singgih yan sira pāwak ing madhu lawan gula drawa rinok

wwang tūs ning patĕr ing kapat malapi kingking ing katuridan

pöh ning rāsika de ning ojar asirat-sirat manis ira

dyah sang katwang i lĕnglĕng ing hasana kĕmbang ing sanagara

dentângdadya paran kunĕng karaṇa ning raras rumimanga

harṣa pwêka lawan hunĕng karika dadya ratna winagĕd

tungtung ning hangarang sakêng Smara siniddhikāra ta kita

sambandhanya manis-manista pinakadya hing wwang araras

tāsyāsih ring angölwakĕn hṛdaya pangdan ing Manasija

nityângde twas akung nimitta ning umulw amet ngwang i kita

mangke pwa n katĕkān mangatpada rarasta ring pakasutan

nāhan ling nira sang minanwakĕn irân minge saha tangis

kady âlūma lĕmĕs nikang pangawak āsmu sinwam angĕsah

bwat pangrājaśa sang narendratanaya śru sangśaya nira

ardhângintay ameta rakwa ri lukar ni puṇḍutan ira

om rakryan mapa wiṣṭi ni ngwang amĕlas-harĕp cinapalan

yadyan prangprangĕn ing halis kapana denya māliha langö

nohan yan curikĕnta ring wulat arūm sadenya cacahĕn

donkw îndung hamalar sihanta ring unĕng mĕne n tinarima

sang śrī ning twas akung kangelan anukĕr lumĕnghay anangis

tan sārân panĕpak yayâpalisa lunghid ing naka nira

kokih tang tali-taly amogha cucul ing tĕngah mrik alaris

lwir mātyênayatan sirânglalu ri rĕs nirân rinabhaṣa

manggĕh citta narendraputra magirang makin tan awĕling

göng-göngĕn sira tan kamāsihĕn i pamrat ing smara sĕsök

tĕmpunyê wĕkasan tatan dwa rumujak marê sang araras

sāntĕn trāsa kalandĕṣêng jaja sayatnya māngrĕs arisi

sāmpunya n kawawa gupe wimūrccha sang dyah

himpĕr pādapa mawĕnĕs hañar kalahrwan

mĕnggah mār mawungu marêng dagan manguṇḍĕng

siñjang mriknya karudhiran mĕlĕs sujinya

yângde twas nira n agilâmahaywakĕn ken

wet ning rĕs nira tumahêng ulah kapingrwan

tan sobhâta sira mijil sakêng jinĕm mrik

ndah mogârĕngu tumiling ri jöng nirâmwas

kāgyat tang kaka ri wijil nirân sinungsung

māskw indung rari palalun laranta māsku

tan pendah hañar anginang pĕḍĕs ri lambe

byaktanyân ahĕli rĕsĕp gatinya sowah

hetunya n mulih anĕku ta[ma]n* masowe

lingnyângaswakĕna rahup ri sang suputrī

sang sinwī rumaras arĕs katon ring āmbĕk

mañjing ring kṣaṇa hinatĕr sirê kamantyan

ndan sang kawĕkas i rūm ning jinĕm araras twas nira makin eñjuh

de ning mulat arĕjângras manis ira himpĕr sarasija lindi

his ning kapat alangö lwir nira tiki n ojar mangĕtĕri ng āmbĕk

mambö madhukara medĕm ring asana mār mrik [h]atalĕ-talĕh rūm

dyah sang maṇik ing akung munggw i tĕlĕng ing onĕng hĕla-hĕla rāgī

darpângrimangi rikang twas lungid i halistângani hati rĕñcĕm

ndin tan pĕjaha linurwan tĕkap i matantâmiṣayani kingking

denyângrahatiy ^†unĕng rūmta pinakasāntĕn satata tumanggöng

ndan yan pĕjaha kakantâtĕmaha sipat rup kawadi lawan ken^†

rāmyân pangalĕpi rūm ning wulat añĕñĕr mwang marĕk i kapö mrik

yan ring jinĕm angaras ring susu rumagĕt mwang tĕngah arĕjâkrām

rakryan mapa suka ni ngwang tinarima de ning mangarĕki raśmi

ling sang nṛpasuta cumbw ângari-hari mār mrat rasa nika lĕnglĕng

śṛnggāra malapi rĕs ngwang kĕna turida prih malara katurwan

oruk nṛpaduhitângunngun asĕmu sĕbsĕb ning aruṇa mātis

tapwan lumihati rūm ni[ng] liring ing akung lwir juruh angañut prih

akweh raras ira manglālanakĕna kingking nira nṛpaputrī

harṣângarĕki sirân anghulunana tĕkwan hangayati sāntĕn

anghing pamatĕh ikang cumbana tĕpĕt ing dhyāna samaya pinrih

yêkā n kadi lĕyĕp ing lod juruh inaras ring jaladhara rāgī

i kapingrwa nikang gati nṛpaduhitânglih alah mawĕnĕs

manis ing muka molĕm aluru kadi candra sĕḍĕng makucĕm

tuwi kembuhan ing damar anuluhi mogha tĕkângrahati

nṛpaputra makin pamasa-masa sawet ning unĕng tan arĕn

ndan ikāng anawing paḍa ta kapilangö kakĕnan turida

rumĕngö ri kĕtĕr nira n angudang-udang sahajângrarasi

sira sang rwa tiḍĕm paḍa maharip angel manawung salulut

rasa tan huningêng ulĕs ira saha ken kawĕkas dinaga

tan iwön pwa panidra nira ri mari ning gati ring śayana

krama meh tĕka tang rahina tuwin arūm sirir ing pawana

anawan wangi ning śri-gaḍing asana puṣpa lawan kamuning

lĕngĕng ing parahasyan asĕmu pawirāman aweh twas akung

araras muni kokila nika panguhuhnya malon karĕngö

mwang ikang mrak anguwwang alalĕ[h] irikang gupurânglangĕngi

kĕtĕr ing bhramarê kuwung ika kadi cumbwa wayuh mangamĕr

kajĕnĕknya winungwan ing asana lawan puḍak ārjja minging

sang hyang ārkka sumĕnö wahu tumrang

warṇna raśmi ning amöm smita rāgī

māwa tang kiraṇa bhāswara lumrā

megha dhūmra sumirat-sirat abhrā

ceṭikā paḍa sĕnāha patingkah

ring surambyan umaḍang paḍa ceṣṭa

sopacāra ḍamu yêka wawanya

kapwa mĕñcuh atisomya saharṣa

kunĕng sang karwâpöm lagi karahinan luhya saharas

makin kagyat wāhw ânglilira* lukar ing ken pinahayu

mijil sangkêng jro pāmrĕman ata sirân tinghal apĕḍay

akarwan-karwan lagy aḍamu pinapak ning kaka-kaka

parĕng mĕntas ngkānê tataraban ikang weśma mapupul

yathālīlâsaṇḍing patiti-titihan pangkwan aśila

wināswās dewī-dewa halĕp ira sangkêng surapada

marĕk pwêkang gundik ri sira matatâmaṇḍaga ri sor

ndatan manggĕh ngganya n mapupul i surambyan gati nira

wawang monĕk de ning manis ira sang angde katalĕhan

kalurwan tinghal pintĕn angatagakĕn mañjing i dalĕm

maluy munggah ngkānêng śayana sira rāmyâwuḍa-wuḍa

tuwin [h]endah lwir ning pamiḍuḍuk ira n karwa hiniwö

arūm kady âmakpak panguda-ngudang ing gĕṇḍing alangö

lawan [h]ambö ning [h]utkaṭa jĕnu waneh gulgula mirir*

ya tâmungwākĕn rāga nira rasa tan peda saharas

tabĕh ping pat ryy ābhā nira mijila sangkêng gṛha parĕng

sĕnāha pwêkang sarwwa surasa huwus pūrṇna humaḍang

karaṇḍan kapwâtingkah atiśaya denyâlawa-lawā

gupit mwang nṛttârūm panaḍah ira sarwweccha tinĕkān

kasinghyan bwat ning Kāma Ratih inajöng ring pakasutan

ndatan giṇḍal de ning silih-asih atūt solura langö

rĕsĕp lwir duh ni wwah sĕrĕh arĕja lāwan waja singi

samāptângde tuṣṭī sumĕkar i panon ing bapa-bibi

byakta huwus amatĕh līlā citta narapati

mangkin apulih inak wwang ring rājya sapurati

wṛddhi wawang umaluy krām ning wīryya sanagara

nora sumukĕri ng āmbĕk nirwighna sama-sama

tan hucapa ta lawas ning lek sang rwa silih-asih

nora kawiwal irâtūt sakrandana ri dalĕm

kapwa paḍa mangĕne twas ning nāla gāti [ni]ra

tulya mangunĕng umangkĕp mwang jangga silih-asih

mangkin anupama sih sang nāthân panĕkakĕna

de nira nṛpatiputrâweh sobha manah ira

mogha tĕlĕb alulut sang Pārthâta juga lanā

towi sumĕkar ing āmbĕk ning wargga bala hita

prāpta pangĕtĕr ikang rĕtw âkon mahas alangö

sang nṛpatanaya hāmhām ny āmbĕk nira rumĕngö

hetu nira ta madan mangdon mangraraha langö

tīrtha wimala nahan bhyāṣan ling nira n atutur

sāmpun inanumata n winwīt sang kalulut ira

mukya sira naranātha mwang śrī waramahiṣī

ndah [h]atita sakatambe mangkat nṛpatanaya

rabdha bala haji milwā mangkat paḍa marĕpat

rāmyârūm wangi ning taman kapawanan hūng ning mayūrâlangö

ngkā tâdan nṛpaputra mangkat alaris ring rājyadhāny ân laku

lunghā ng ratri katon tikang saḍawatā kalrān rarab ning rĕmĕng

byaktâpiṇḍa maṇik sumār sumarasah tang bun pĕnuh ring tĕgal

meh tumrang rawi rîndradeśa sumirat lumrê lurah ning wukir

kumrām tang wanawṛkṣa kapwa mahalĕp sinwamnya mabhrâraras

harṣân pangjra[h] ikang cakora ri lurahnyâsrang laki-stry ângaring

mangkā ng kokila kārkaśān uni hatur sambega ning parwwata

wāhw âron amĕrĕh-mĕrĕh gati nikang wṛkṣâkirih katrangan

rāmyâlung sĕmi ning latā wila-wila mwang tang sungutnyâsalit

ekĕl ning katirah mure ya ta rumangkĕp ring tahĕn kañcana

holnyângol huray ing wanañjari hatur monĕng pangaywan lulut

tūt tĕmbing ni gĕgĕr-gĕgĕr patarukanyâśrī kasĕnwan rawi

mĕṇḍuh ta pwa pucang gaḍingnya manĕḍĕng nyuhnyârĕjâtuntunan

ngkānê himbang ikang gagānya n alangö kalyan pisang ring jurang

hāryyanyâgĕlar ing lĕmah wahu rurū mambö tikĕl ning tanah

tandur-tanduran arja tĕkwan ahijo wāhw âkiris kābunan

jahli mwang hwi hilus payanggu manĕḍĕng cungnyâtatâtūt galĕng

len tang munggw i lĕbak-lĕbaknya tan adoh sāśrī lĕmahnyâraḍin

warṇnākāra saḍak gaḍing wahu mungup srak ning talĕsnyâmĕḍar

anglīlā pupus ing lirang winulatan sākṣāt panĕpy ângligā

kady āsā makuśêng lĕmah kapilangö jangganya lum yângajap

lwir sāntĕñ juga kesisan [n]dan agĕmuh lĕnglĕng nikang nyū-gaḍing

pintĕn ngganya titir malap raras ing oghânis humungsyâlangö

ramyā ng cangkilung ing jurang sinamay ing pingnya n humuny ânaḍeng

erangnyân angĕlik swaranya n apĕyĕh monĕng manganti ng* rangin

höh-höh panglari ning samīra kĕtĕr ing pring wungwang angde langö

lāwan pakṣi kĕtur manohara karĕngwa lwīr amungwâraras

lunghā ta laku nira huwus makin katĕmu tang sakamatan alangö

wwantĕn lura-lurah alĕbā n inambah ira tūt halas-alas arĕnĕb

aśrī pagaga-gagan aneka tanduran ikâta pinuyu-puyuran

heman ya wipula hinatīta mogha mangaluṣya sumarik atalu

koñjuk cara-cara nika pinggi-pinggir i hĕnū nira tĕgal araḍin

munggw î suku-suku nikanang gĕgĕr paḍa mangungkuli tarukan ikā

trang ning dinakara karaṇanya kapwa paḍa wāspada tuwin angungang

ngkānê para-parah ika sūkṣma miñcuk i luwuknya hana kaluwutan

kubwanya n amarĕk i rĕṇĕs-rĕṇĕs lwir anular-nular i pangajaran

sugyan ya magigu ri panas hyang ārkka palapatnya kadi kadahaka

lāgy âjaga-jaga ri kadhūrttan ing wray awĕgig ya malapa tanĕman

mwang sūkarawana kadurus mahângrabhaṣa cūra paḍa guragaḍa

nyū-danta majaja-jajar arja suṇḍay amarantya riy unur angaway

rāmyân paḍa ḍara-ḍaran anglangūt sabha-sabhā nikang angapi langö

ndan wyarttha pajap-ajap anambi ring wut angawandha tĕhĕr anguruṭut

tan pāntara pamĕḍi-mĕḍinya kārkaśa kupiknya lalu tan inapa

honya ng gagarangan asuhun-suhun kusuma pākṣa manulari langö

ndan wismṛti juga ri haturnya tan pawangi mātra kadi tan akumöd

cĕnggânaru-naruh i raras nikāng asana ring kapat inalihakĕn

denyânasa-nasar ing arūm apan pisaningūn ri ya magaway unĕng

kamwāgan amĕḍar i wanginya yângĕmukakĕn pupulutan arusit

manggâjĕmur angawatakĕn kasinya kadi moddha kuṭila kuhira

bāng ning pilapilu pamarĕngga honya suka panggil umawit i jurang

mwang singgugu sumaji sĕkarnya rurw apasah asmu suma mangalaśā

jrah ning wunga tali kadi cāla-cāla ya puji n hiwag angani hati

dūra n pangawadi wiparīta rehnya n akurang-kurang ulah atĕngö

lwir bhranta manigi-nigi maṇḍalīka sinawenya mariris umingĕl

langguk ya tan amiṣaya rāga meṣi pangalimbang ika kajaruhan

nāhan racana ni lĕngĕng ing katinghalan i lampah ira nṛpasuta

akweh para tapa tumurun yathākrama cumuntĕn i sira lumari

maswāgata duga-duga somya mawwata mahoṣadhi phala surasa

tuṣṭênabhimata dĕmakan tĕkap nṛpatiputra tatan upir-upir

kweh porajana tan ucapĕñ jurunya pinirêka paḍa-paḍa marĕk

sāmpūrṇna pahula nika bhoga honya phalamūla duwĕgan amanis

twak len kilang sahana-hanê kuwunya hinatĕrnya taya puji-pujin

līlā nṛpatisuta ri denya mangkana hanâhyun ira n anginĕpā

tambe kamĕna nira muwah [h]umangkata marâwana mahas alangö

sanyāsa diwasa sumurup tikang rawi matang nira madan akulĕm

ngkānêng kuśala cinaturanggabhṛtya paḍa tan palĕ-palĕh akĕmit

towin hina[ri]wuwu tĕkap nikang para duwan marĕk atata-tatā

ri tĕlas ikang kulĕm nṛpatiputra lumaku muwah angrarah langö

i silu-siluk nikāng acala rāmya kahawan ira pinggir ing parung

alapat arūm karĕngwan i taluktak ika lĕngĕng aganti ring jurang

pakĕcap ing erttalinya tan awās tuna-tuna karĕngö maweh langö

lura-lurah anglunang ri pĕluk ing wukir alas-alasanya tūt hiring

alalĕh i sornya kampira putih jalada nika katon ñamut-ñamut

hana tumĕḍun maliṇḍungan apiṇḍa tura-turah ikang wĕngi n hilang

kumĕḍap ikang walik-kaḍĕp aganti kadi matag amukṣa tan hiner

atha kumĕñar hyang ārkka mabingar kadi muka ning akung hanêng jinĕm

apalarasan tusāra nika ring tṛṇa hangada-hadânusup-nusup

alilang awās hanâmpu tapa munggw i patarukan i lambwan ing wukir

asĕmu ḍarâputih lumarap ārjja kasuluhan ikang diwākara

bala nira rāmya tūt ri lĕbak ing gĕgĕr ataratayan kasamburat

mwang ikang alumba-lumba sawaneh tang aruruku ring agra lor kidul

amija-mijah mamet ri lĕngĕng ing giriwana pinaran paḍâgirang

tuwi karĕngö pratidhwani ning anggrit angidĕri paḍâtri ghūrṇnita

nṛpasuta harṣa yan tumurun ing ratha lumaku mahas mapet langö

manusupa ring wanāntara ya kawruhana niyata ling nirê hati

tuhun alaris tayângdulura kewala sira juga tan hana wruha

kalalu layat nirân lĕpas adoh ndan anĕbu-nĕbu sangśayâlangö

kunĕng iki sang nṛpātmaja kalangwan i racana nikang wanângaḍang

kiniwat ikang mahantĕn angungang sinama jamur i dunghus ing trĕbis

ya ta kahanan narendrasuta lālana tumiling i rāmya ning tĕtö*

hana ta parabnya mātra palupuynya rininga-ringa lāgi tan lutur

patapan añar katon ri tĕpi ning jurang arĕcĕp angungkul-ungkuli

kunĕng iki sang tamolah i dalĕmnya kasutapan ira ndatan hinop

linawanan ing tapī pili-pilih pamurung ing [ang]usir jayendriya

titir anganam rarasnya kinirenya lumĕngĕri samādhi sang ṛṣi

lwah amalahar [h]amānuṣa katonan ika kadi pangipyan ing langö

ya juga katungku-tungkulan ing agra kadi ta panganak nikang pasir

kunĕng i sarenya rāmya hana ring palipiran acawit śilātala

pilih awarah pĕnĕdnya tanahĕn pangudarana gurit kawiśwara

ikang i tĕngahnya manda tan awās karang iki n amaranti ring bañu

ya ta dinĕlö ndatan cala pakömnya yan inupuk-upuk kasĕmburan

sinahaja komalânidĕhi pāṇḍan ika paran i sanghub ing limut

hana ta puḍaknya kengis anguḍoḍa kadi pitĕngĕn ing mahas mangö

iningĕt-ingĕt ring inggita langönya pawulatan ikang nadītaṭa

luluy angalap ri lĕnglĕng ing apālapan angusira rāmya ning parab

wwaya ta manuknya kīnnara lawan dali-dali tĕka mampirêriya

hana kapukĕt rikang wwad ing aket tĕlas asibu pijĕr parĕng miḍĕm

cangak ataramtam ing bañu waneh mangadĕg-adĕg apakṣa bhikṣukā

angikĕt-ikĕt wilāśa pakaleśya nika n anulingi lyang ing wĕlut

kapacĕ[h] ikang maningṭing akĕcĕk salaki-bini milag parĕng mĕsat

humĕnĕng ikang mayūra tan ari ñ jĕnĕk angigĕl angantya ring bañu

nṛpaputra makin sira harṣa mulat

irikang walahar mahĕning wimala

ya matangnya masö ta sirân parahup

tumĕḍun ri dalĕm ning anindyanadī

waramudra wiśeṣa kināryya tĕhĕr

ri bhaṭāra sahasrarawi n pajapa

saha kūṭarahasyasamādhi nira

dudug ing paramārtha acintyamaya

sĕḍĕng prawara Phalguṇâjapa manöb tĕḍuh nirmmala

ndatan dwa hana ta grahâhugah agöng matunggwêng nadī

ya hetu nika tan hana ngwang umarêrikâlah kumöl

mĕne pwa hana gandha sang prawara Pārtha kongas marūm

wawang pwa mamangun galaknya maganas sawetnyâlapa

lanêngut-ingutĕn hatinya ya umöng wibhukty âlawas

katon ya ḍumĕpang hanêng bañu mangang sihungnyâsalit

karal-karal ikê mukanya kadi Rāhu rodrâdbhuta

mulat nṛpatiputra tan wighani niścayâtah sira

hiner nira ḍatĕngnya tan dwa maparö harĕp mangdĕmak

samangkana parĕng masö ta masĕlur patangkĕp nira

makin mapulingan paḍângiringi cidra tapwan marĕs

sawet ni patarung nirâpan agĕlis manginte sikĕp

kadi pwa n udula ng nadī bañu niki n katūb miṇḍuhur

hanan lwir inayun ya motĕr i tĕngah latĕknyân wutah

sawang tinawu de nirân silih-usī saroṣângdumuk

jĕmūr maputĕran silih-gyat awilĕt bĕtah tan mangel

wicitra tuwi nirbhayân ginurumung ndatan kātrĕsan

malĕs ta manikĕp tuwi pwa kinawil rinuṇḍĕk rinok

hanan parĕng akañjaran laga nirân marangkĕp muwah

tangeh prang ira saprahāra ta masor lĕkas ning graha

kacidra sinikĕp ndatan dwa pinutĕr ya kady âhangan

pinanduk irikang śilāgra kapisan wĕhangnyânanā

cĕngĕlnya ya tikĕl ndatan pabiṣa de nirang Phalguṇa

ri sāmpun ika māti tan dwa winawêrikang bhūtala

mulat kapĕnĕtan ta sang nṛpatiputra rehnyân pĕjah

bangun paniluman hiḍĕp nira rikân panon apsarī

ya rakwa n awatāra ning wuhaya māti sākṣāt hayu

rĕrĕb kusuma tan pĕgat ya tumibê narendrātmaja

ikang bhramara medran ānghrĕng akarang-karang ring sĕkar

nahan mara pamūrṣitanya ya rurū ri sang Phalguṇa

ya kāraṇa narendraputra karĕṇan matakwan sira

krama mawara-warah tikang surastrī

surawanitā ngwang iki n manĕhta sākṣāt

hulunan ira Dhanādhipa pratīta

nghulun iki nāma si Sarwwadā ndatan len

papat ahayu sanak mami n surastrī

adulur atūt ngwang ameta rāmya secchā

katĕka ring Alakāwatī pradeśa

ya ta taman ing Hamarāwatī surāmya

wwaya ta sira mahārṣi siddhayogī

gumawayakĕn tapa tan samêng triloka

smaraṇa nira nahan winighna dengku

kadi pangatag ning anĕmwa pāpakārmma

gĕlĕng ira ta manāpa kong asampay

graha tĕmahamwa kaṭungka ghātakêng rāt

na wuwus ira samāntarântasūkṣma

kami kawĕkas wulangun saśokabuddhi

krama lumaku mamet nadī wisāta

tĕka ring Awindya muwah sirân kapangguh

mami parĕng umusap ri jöng nirânghyang

ri wĕlas irâta maweha ng antaśāpa

prakṛti nira parārtha śantacitta

karuṇa sinambah inambwakĕn kabhaktin

manganumata anugrahântaśāpa

waluya ning angdadi śuddha ning kajanman

palalun iki dĕlāha rakwa tĕmbe

hana ta ya Pārtha ngaranya Paṇḍuputra

hanan* ikana ḍatĕng mahas mara ngke

rasika sumĕngkakĕnê kitân muwah hyang

ri tĕlas i pangucap nirêka lunghā

kami wĕkasan manusup mamet pradeśa

kalalu tĕka rikêng nadī Swabhadra

tĕhĕr atĕmah wuhayêka rodrakārmma

pira kari lawas ing yuga wyamoha

alapa wibhukti tatan wri rāt mahūnghāng

mṛga uraga asing ḍatĕng minum wwe

niyata pĕjah parilĕnkwa śīrṇna bhakṣan

karaṇa nika tatan panoñ juga ngwang

kami katakutnya kabeh musuhnya ri ngke

makin alapa halib pwa duhkapāpa

pangawaśa ning [h]ati bhangga kaśmala bwat

kunĕng iki ri ḍatĕngta labdhacitta

kita tiki sopana ning maluy surastrī

aparimita hutangku tan pahīngan

kita ta sumĕngkakĕn ing [h]aweci pāpa

kṣamakĕna yadiyan kĕnoh rasanya

tuluyi usönta kadangku hilwakĕnta

apan iki kawĕkas mamukti duhka

paḍa ta matunggalan ing nadī ya tângher

nā ling nikang surawadhū ri sang āryya Pārtha

ndātan wihang nṛpatiputra hinop asantwa

yêkā n lum[am]pah adulur tikanang surastrī

tĕkwan mānyāt laris nira tan parāryyan

prāptêng nadī kahanan ing graha durgga rāmya

sāmpun sinĕngkakĕn irêka kabeh umĕntas

saprīti kapwa umuwah matĕmah surastrī

mangkin mangañjali ri sang wara Paṇḍuputra

he āryya Pārtha kita sādhu parārtha ring rāt

rakryan prasiddha śaraṇangkwa pawitra sākṣāt

singgih bhaṭāra Naradewa kitâśarīra

anghing guṇanta sumĕnö mibĕk ing triloka

ndah mangka ôjar ika harṣa narendraputra

heh apsarī kita kapān aku bhagnacitta

anghing [swa]dharmma nira sajjana sambhawêng rāt

nāhan tinūtku n umaropaṇakĕn laranta

tan sangka ring rajata kañcana ratna bhoga

donku n [h]umĕntasakĕnê kita duhkakāla

bwat sang kṣinatriya tatan dadi nisturêng rāt

kīrtyâdi kewala ginĕgwa nahan sinadhyā

nāhan wuwus prawara Pārtha sahôpapattya

lwir kodanan tĕkap ing āmrĕta tang surastrī

denyâdhikāra panĕmunya waraprasāddha

tan wruh pwa yâmuhakanêng yaśa merutulya

atyanta bhāra kuśalanta tĕlas kabhukti

ndātan pamātra walĕsangkwa amogha nirdon

nirwighna māsku kṛtakṛtya jayārtha mangko

manggĕh pangöban ing anāśraya bhūmipāla

akweh pangastuti nikê nṛpaputra Pārtha

ndâtīta sāmpun amuhun ya ri sang Kirīṭi

lunghā parĕng kṣaṇa mĕsat ya ring antarikṣa

ring swarggaloka dunungĕnya tatan wiwākṣan

sang Pārtha kāri siwuhĕn sira mār katṛṣṇan

lamlam luluy kamadĕlön sira yan tumĕnghā

cĕb ngĕr manah nira rumengwa gĕrĕh ya māsrĕt

ngkānê du kilyan anamar swara ning surastrī

tangheh pangūha nira mogha tiling hyang ārkka

mangkin sirâsĕpi ri tīra nikang saraswan

rĕsrĕsnya kewala maśabda lumer ya medran

panglinggan ing sarayi śuddha śinuddha lingnya

ndah warnaṇĕn bala nirân tĕka yêka magyā

kapwâruhun-ruhunan amrih anūt ri wuntat

harṣâgirang hana ta rĕsnya tiki n silih wor

denya n ḍĕngö gati ni wṛtta nirêng surastrī

tatkāla sang nṛpatiputra humer hana ngkā

ndan sang mahāmuni ring aśrama têki wāktan

sakweh nirâtapa ri deśa nikang Swabhadra

kapwângrĕngö ri hilang ing bhaya ning patīrthan

yêkā n satuṣṭa magirang mari de nirârĕs

ngkā prĕgya mangkata kabeh paratê sang āryya

cuṇḍuk ta sang prawara Pārtha sĕḍĕng marāryyan

ryy ākāra ning lituhajöng ya maweh kapūhan

atwang sang Arjjuna ḍatĕng nira sang para rṣi

ngkāna n sirâśila sasomya paḍâtiśanta

mojar pararṣi tija bhāgya ḍatĕngta mangko

ngke ring Swabhadra umah ārjja ri sang tapaswī

ndan lingku de nṛpatiputra marêng wanādri

siddhyânu bhāra pinakāśraya ning masadhyā

pangde bhaṭāra niyatêki jayanta ring rāt

byaktā n kṛtārtha ri hiḍĕp mami pamrihanta

nā ling nirang rĕṣi narendrasutârjjawôjar

opwan hanêky anumanā mpu rikêng kadi ngwang

panggil wĕnang dadaha ing mangusir śubhārtha

icchānta mantasana kārmma nikang triloka

nā ling nira krama ḍatĕng tikanang pamṭjā

pādyādi cāmana hanārgghya waneh sĕrĕh wwah

lāwan mahoṣadhi dudū ng phalamūla pattya

winwat nikang tapi-tapī paḍa sopacāra

kāścaryya wāhu lumihat ri sang āryya Pārtha

sis hyang Manobhawa sirêki nihan mara ngke

sadhyā dumona mĕnĕm angrarahêng kalangwan

irṣyâmunah brata samādhi nahan ta lingnya

ngkā sang watĕk tapa parĕng ta sirân pangajñe

sang Pārtha tan dwa hiniwö sira de pararṣi

sāmpun sirêkana pinūja makin sutṛpti

ndah ring samāntara mahārṣi muwah ta mojar

He sang nṛpātmaja kitâdhika śāraṇangkwa

sakweh nirang muni sagotra kabeh rinākṣa

āpa* ndatan hana waneh pakapuṇya jāti

sangkê panonku ri kitâñ jaya siddhakāryya

ndan mātra têki pitĕngĕn ngwang iki n rĕngönta

yāwat sukābhyudaya tāwat iwĕhnya bhuktin

wit ning janapriya adṛśya matangnya langgĕng

nāhan pradhāna pinakāsya kadharmmamūrttyan*

anghing prihĕn tĕmĕn i sandhi nikêng śarīra

ekātwa mukya sarapungnya ginöng tar olah

maryyāda yukti hamĕngānya nahan winṛddhi

nāhan ta hetu nikanang ripu tan tumampĕk

yapwan triloka riy awakta tatan prabheda

nirdwaiṣa de ning anurāga lawan kaśāntan

sakweh nikang ripu ya tan tumamê yawê jro

sarwweccha nirbhaya kitêka sakāma-kāma

nā lwir nikang samaya winyakṛtâtiyukti

ngkā sang Dhanañjaya sirêka manādhukāra

towin saniścaya yinogya tĕmĕn rasanya

sangsipta mangkana pagoṣṭi nira byatītan

prāpta ng kulĕm ndan anginĕp prawarâryya Pārtha

ngkānêng tapowana ginocara sang tapaswī

rāmyâsyakāraṇa samṛddhya nikang patīrthan

de ning prabhāwa nṛpaputra sumiddhikāra

henak ta sang nṛpatiputra hanêng paranti

ring sthāna maṇḍapa manojña wiśuddha mārsik

simpar ya tônggwan ira rakwa muwah pinūjā

ndan sang watĕk yati kabeh tuturung wisāta

ardhâlangö lĕngĕng ing aśrama śūnya rāmya

de ning niśākara rumĕngga pajangnya molĕm

tulya praḍīpa suluh ing patapan katejan

mār gandha ning mayang arūm rumĕsĕp ta subnya

angras raras pangĕsah ing sara ḍanta kerir

kumbang mahângisĕk-isĕk ri kuwungnya māsrĕt

ngel kungnya ring wĕngi hanāḍin aśoka tañjung

darpâmangun rĕsĕp i citta narendraputra

akweh pwa gocara nirang ṛṣi kapwa tuṣṭa

lāwan narendrasuta Phalguṇa rāmya sātūt

tingkah nikang surawadhū ya winahwa-wāhwan

ndātan kathākĕna ikang wĕngi tan dwa lunghā

eñjing ta sang nṛpatiputra mulih saka ngkā

tan warṇnanĕn ta sira ring wanamārga ngūni

prāptêng Mayūrapura rāmya sirân sinungsung

strī rājya harṣa sahananya rikang kaḍatwan

riy ulih nira ndan alawas pwa pakurĕn ira rāmya ring dalĕm

pūrṇna sanagara kagöngan inak

kawawê sutṛpta haji de sang Arjjuna

ri patūt nirâmithuna sanggama lulut ira tan kathākĕna

mānak aniru lituhayw aguṇa

wara Wabhruwāhana tināma sang yayah

irikā n kināryya winiśeṣa wali nira aneka de haji

tuṣṭa manĕmu maṇik ing jaladhi

iwa mangkanêki suka sang nareśwara

sira tan waneh ri hati ning sanagara karuhun wwang ing dalĕm

nghing sira juga ling ikā n siwinĕn

hinarĕp-harĕp pinakarākṣakêng prajā

kalaranya ngūni ya hiwön kadi kalara nikang tṛṇāngkura

rūkṣa malar i titis ing jalada

kasarambahañ jawuh awās hurip muwah

kadi tan pacāla sakapunpunan ira katĕkêng ḍusun-ḍusun

kapwa rahayu ya ta māryy asungöb

abungah lwir oliha śaśāngka bhāskara

adawā n matêki suka ning sanagara yadiyan winarṇana

sang nṛpatanaya gumanty ajarĕn

atutur sirê wacana sang ṛṣiśwara

apitowi sāmpun aparö sawĕlas ika tahun ya meh gĕnĕp

hetu nira tiki muwah tumihang

ndan ikang kadhīran i manah nirâpagĕh

sira sang priyā nira kinol inari-hari tĕkap nṛpātmaja

towi winara[h] ikang aywa tinūt

nda hĕlĕm sirân maluy umandangê sira

waraputrikā wruh i manah ni kalulut ira tan kasangśaya

śāsana nira paramārtha tĕpĕt

alĕmĕh yadi n kajahatêng warāngganā

ya ta hetu ning twas ira tan magigu saphala rājaputrikā

ndan ling ira pisaningūn mahala

yadiyan makon mulahakĕn kaniṣṭikān

irikā Dhanañjaya marĕk tĕhĕr amuhun i sang nareśwara

tan winaḍa sira tĕkap nṛpati

tuhu sādhu satya satirun sirêng sarāt

sangsiptan ri tĕlas nirâmuhun umangkat atĕhĕr alaris tĕkê yawa

tan maglis dahatĕn ta lampah ira tūt hawan anginak-inak pijĕr mangö

rāmyânon langĕ ning pradeśa kadi tan bĕsur asayut asanggrahê sira

hetunya n hacawit-cawit ndan amalar winulatan angungang ya tângaḍang

pinggir-pinggir ikang hawan paḍa katon sumaji-saji langönya yan liring

nyāsanya n kamatĕnggĕngĕn lwir inatīta paḍa kahĕnĕkañ jugângadĕg

lwir tan ryy amban alök mirah ni kayu teja nika cala mĕhah linalwakĕn

osik pringnya maringgungan [n]dan agĕyuh ri panawat ing angin ya moṇḍuhan

wanwâtyanta halĕpnya söh sabha-sabhā wruh anukani patingkah ing hĕnū

manghāt-hāt ya tiki n panungsung i langönya tinĕmu nira yan lumampaha

honyêki n walaharnya nirmmala ri hengnya kumulilingi tīra ning lĕbuh

wwangnyângangswa marêng pabañwan ika len tang aruruku katon paḍâhalĕp

nāntĕn ngganya pilih-pilih tinawung ing gati hinuḍaran ing kadang-kadang

līlā bhāwa nikêniring saha tabang-tabang araras arūm kinangsyakĕn

aśrī denya marumpukan kusuma sāhyas awahĕl apĕnĕd bhinūṣaṇan

pintĕn yan panĕkar yathâcingang anon ri halĕp ira sĕḍĕng halintanga

mangkā tingkah ikāng awan paḍa katon kalĕngĕngan ika de nṛpātmaja

kweh sĕñjang majajar-jajar tuwin apañcuran atalaga kapwa nirmmala

kalyan pangkaja wāhwa maikala sawang muka ning ahayu karwaban manis

raśminya n lagi kāmukan ri wĕrĕh ing bañu hasĕmu kase sumār marūm

tambak-tambak ikârjja ^†kapwa minahā wangunan ika sulakṣaṇâhayu

mangkā bapra nikêng gaḍuh bhinaṭa miśra mapacira minerw agopura^†

sarwwecchā n pangawe smi ning bhujagapuṣpa malaris anamar girahyasĕn

duṣṭā ning pawanâsring edi karaṇanya n akusa-kasikan lumimbaya

kady âbhūṣaṇa raśmi ning jring awĕlas-harĕp arĕja sawang wulang tatur

añjrah tang wara padmarāga niyata wruh angawakĕna jong jugâraras

kumbangnyâlarasan yayâkalib añumbana rumabhaṣa māryya koluyan

lwir tan pātma tinampik ing pawana nistura mawarah i raśmi ning mĕnur

tingkah ning rawa rāmya tĕkwan amĕwĕh-mĕwĕhi lĕngĕng iki n winarṇana

kady aptyâkilayū n langönya ri laris nṛpatanaya tĕkângalimbanga

kongang rūm ni sare-sarenya hana pāṇḍan asaniga puḍaknya tūt sisi

pañjrah ning śatapatra mĕmbang abungah mara hangaway ikang madhubrata

ngkānê tīra nikânĕḍĕng suraga rājasa paḍa kadi kambang ing jinĕm

honya ng cāmpaka kāpnĕtan wiphala danta nika turung inudwadêng mangö

kāryy ânglampwa hunĕngnya wet ni taya ning kawi humañang i kungnya sĕmpalĕn

manggā māty anapih kalangwan angañut kusuma nika lĕwas tibêng bañu

tanngeh tingkah ikāng awan mara hiḍĕp nṛpatanaya yadi n dawākĕna

mangkin śighra layat laris nira atīta ri lawas ira sambya manglĕngöng

tan dwêkī n kawawêrikang jaladhitīra tinĕmu nira rāmya kāhasan

alwā lwir ni bañunya śuddha kadi miśra wĕkas ika lawan langit lĕyĕp

tĕpi-tĕpi ning lod hamuhara lĕnglĕng

i silu-siluknyârĕja tuwi rāmya

hana ta ya sunghe bañu nika māhning

sawang akirim ring jaladhi langönya

manuk angurambat ri tĕpi madhāsya

hana maputih lālana ri ya lumrā

prawala kumĕṇḍĕng kumilip atuntun

asĕmu mĕnur lwir pangisi jugâwrā

kadi lukar ing ken pata-patahanya

wijah angaring tang himi-himi rāmya

sahaja rajangnyâgarawalan osyan

makukud umaṇḍĕm ri surud ikang [r]yyak

hana ta karangnyân rucira kasātan

gĕtĕm angisis munggw iriya sumanglök

aruñu-ruñu krangnya paḍa kasangsang

mrakata kasenwān ing aruṇa raśmi

hurang angaring [ng]kā ri hujung ika kweh

ya ta katakut ning wihaga tinonton

hana ta ya mengin sumayab umingsor

kamaga manambĕr mawĕdi layat mūr

hiwak umĕsat kweh paḍa ta ya kombul

ya tika masimban mĕlĕtuk aliwran

hana ta pĕsut mwang balanak awantah

makapalĕsat pwa ng maḍĕmit inambah

ri tĕka nikang ryyak gumulung umaṇḍĕm

kadi ta ya binwang timi ya ta kentar

makasarakat pwa ng hagĕr-agĕr awrā

swang anuji lungsir mangalĕpi pangka

gumĕlĕk ikang maikala ya kawantus

wawang atĕmah sānghub amawa wṛṣṭi

tĕhĕr amangun wangkawa ya katejan

anarawatâwrā kadi guruwiṇḍa

hana ta rĕmis krang bahuwidha lumrā

kalawan ikang hāryyan angalaśâkrām

ri surud ikāng urmmi kumisik asrang

makakĕrĕcĕk lot majĕmur ing aśmā

suku-suku ning parwwata paḍa rāmya

ya tika lumañjam ring udadhigarbha

wwaya ta gihānyâsama-sama majro

makapalĕyö tang dadali parĕng mör

hana tiki nūṣâtiśaya lĕyĕpnya

ri tĕngah ikāng ārṇnawa wahu kongang

ri gati nikêndah ya juga manunggul

para-paran ing rĕm hanuruni rāmya

baṇawa kumĕṇḍĕng lumari layarnya

angulap-ulap lwirnya kadi manambay

amarahakĕn śrī ya ta winawanya

yan ahiliran śrī nika pahawṛddhin

ikang amayang söh manĕnga[h] asangkya

hanan awĕlah tuṇḍan ika tumimbang

lagi kabalik yêka malara kedĕr

tĕkap ing iwak kadbhuta giri tulya

jaladhi gĕrĕhnyân kumĕtĕr awantö

kadi mangawe kawy angapi kalangwan

lalita lumimbak kadi ta ya mosik

agirang anungsung nṛpasuta Pārtha

rāmya nikang sakatinghalan i laku nirê tĕpi ning hudadhi

tĕkwan ikang masa tunggang acala diwasanya ya tânglĕngĕngi

towi wĕlĕk ni kukus ning amadĕk i samīpa nikang wulusan

mukṣa paroknya ri sānghub ing udadhi hatur sapadĕlwan unĕng

mwang pasawah-sawahanya hana pakapasan tinalun-talunan

lwir tan apujya langönya sumaji-saji rāmya ni tambak ika

kīrṇna panungsung ikang pasung asira-siran tan aganty amĕsat

kāryya midĕng ta widĕngnya pakiwĕng-iwĕng ing wwad ikang piḍaḍa

mangkana kuntul ikâmulih adulur arantayan ing gagana

kapwa mamet kahananya n akulĕman apan paḍa moruk atis

wāhu sirĕm-sirĕm ing kiraṇa tĕkap i sĕbsĕb ikang jaladhi

tĕkwan ikang braja yêka cumaraṇa urutnya sawang sumirat

ndah ri siluk-siluk ing pasir acala madoh hana mātra lumöng

krām-krām ikang balĕman wahu makapuratuk suminângaraman

lwir balut ing liring olĕm anahĕli rapuh kawawêng śayana

swang mawarah hana wanwa pakulĕman i saṇḍing ikang pasisi

kāla surup nikang ārkka kayu nika katon gumĕgĕs ya matis

lāgy amilungsungi rĕm nikang udadhi ya rakwa hatur masuma

aṣṭami kṛṣṇa tĕngah wĕngi umĕtu tikang wulan angdadari

lāmpah irêka muwah pira ta lawas irâsring anganty anginĕp

ring Prabhaṣa lwa[h] anindya parama ya tinĕmwa narendrasuta

kyāti pawitra ya tâmṛtamaya śuci śuddha hilīnya magöng

yêka patīrthan ikang Yadunagara tanora waneh karĕngö

hetu nikī n adhikāra śaśadhara upāla manṛṣṭya jagat

ngkā prawarâryya Dhanañjaya mari ta sirân pahawan pasisi

rāmya matūt tĕpi ning Prabhaṣa juga sirêka mangulwan atah

mogha makung lumihat sakalĕngĕngan iki n milanga ng twas angel

lot asĕgĕh ri halintang ira nṛpatiputra mahā sumĕpĕr

singgih anindya patingkah i racana nikang lwa[h] apūrwwa lengöng

söh kusumâluru haywan* ing angusuma kāryya hanê ryyak ikā

mwang jĕnu kumkuma miśra satata karaṇanya ya nitya marūm

wwang ri dalĕm nagara pratidina umahas ya wijah mapuḍe

byakta karang bhujaganya apĕnĕd anamar karang ing jaladhi

honya tikī n asawang dwiraḍa kinasut ing wwad ikânulale

yêka paran-paran ing mahas angapi langö umañut turida

lot pamawāna nikâhañang adulur anis malihêng pasisi

arcĕp i tĕmbing ikêng sana-sini tuwi pāṇḍan ikā n panĕḍĕng

rāmya katon manguḍoḍa puḍak ika waneh ta mungup sumĕkar

yan rinarah tĕkap ing bhramara kajaruhan ri hṛbuknya minging

lwir gati ning parawan lumaru-laru yathāsuka mangrabhaṣa

tan huningan nṛpaputra sira nṛpati Kṛṣṇa gumanty ajarĕn

ndah rumĕngö hana sang nṛpasuta wara Pārtha saharṣa sira

śīghra n umundanga Paṇḍutanaya wara Sāmbha kinon lumari

mwang Yaduwīra sahaśwa gaja ratha surākṣa tumūt mangiring

ngkā ri ḍatĕng nira Sāmbha marĕk angayubhāgya ri Paṇḍusuta

ling nira toh paratêng nagara sira narendra makon ḍatĕnga

sis ta girang nira Kṛṣṇa atawa Baladewa kagöngan inak

kintu muwah sira sang Yadukula mabungah rumĕngö ri kita

ndah wwaya têki sirang nṛpati rikang Araiwatakâgragiri

bwat Hari kīrti pangutsawa diwasa niki n paripūja haji

tan kawĕkas sira sang Yadukula mangĕnākĕna hotrawidhi

yêku kalotakĕnanta ri hatur ira yan taya ring nagara

nā ling sang prawarâryya Sāmbha ri sirâdara taya winihang Dhanañjaya

ndah mangkat sira karwa munggah irikang ratha Yadukula kapwa mangdulur

līlâtah tuwi darśśanīya pakatonan ing angiringakĕn paḍâhalĕp

mangkā ng parwwata nāma Raiwata ya rakwa paran ira sang āryya Phalguṇa

warṇnan posik ikang wwang ing sanagarâsĕmu salaga turung kagĕntĕran

mangke wāhu rumengwa yan tĕka narendratanaya kadi dūta ning kapat

strī-strī ratna hanêng dalĕm paḍa sumöng turida nika pinöm wawang mĕkar

tan wring dāya kataṇḍĕgan tĕkap i kungnya paḍa rĕngĕ-rĕngön kĕnêng hunĕng

akweh sang makire sumanggraha manisnya n abuhaya ri sang hañar ḍatĕng

dudw îkâguñĕpan ya tângucap-ucap sira winisikakĕn ya tan humung

āngrĕs kelu sawang linad twas iki de ni kawuwusan irâmangun lulut

nghing ganyêsi nikang gĕlung lamakananya tĕka pinamahugya sanmatan

wwantĕn bhranta managwa-nagwakĕna raśmi nika sira minuṣṭi ring hiḍĕp

lĕnglĕngnyân pangajap priyambada nirân pangalapi lara kungnya mohita

agyâmbĕknya tikī n umaṇḍĕma langönya pangudanakĕn* ing matâmanis

manggâlampwa kaninya ring jaja yathāsuka bhaṣama yadi n pakolihĕn

tanngeh warṇnana buddhi ning wwang i dalĕm paḍa malara kĕnêng raras hati

sang Pārthâta ḍatĕng ri nātha Harimūrtti papupulan i sang watĕk Yadu

mukya śrī Baladewa kapwa marĕpat sahana nira ri mādhya ning sabhā

sobhā sthāna supūrṇna de ni halĕp ing para Yadu kadi dewatākrama

yêkā n śrī nṛpa Kṛṣṇa garjjita manah nira tĕkap i ḍatĕng sang Arjjuna

ngkā n sanyāsa sinungsung ing smita manohara wacana nirâmangun rĕsĕp

antĕnku n tan i rāt hiḍĕp mami manĕmwakĕna kasuyaśanta digjaya

ngkê paryyangka kitâri māsku tariman hana humawitakĕn tayê kita

manghat-hāt ngwang i māsku tĕkwan alawas nghulun angapi gatinta māmriha

an munggw ing Himawān tamolah atibhāgya katĕkana mĕne n samāgama

pangde ning widhi haywa wismṛti hiwĕh sang anĕmu suka tan kabañcana

ngke ring Dwārawatī pangantya ta kitâmutusa samaya ning mulih muwah

nāhan śabda narāryya Kṛṣṇa sira sang nṛpasuta mararĕm ri jöng nira

om om sājña narendra pĕh nikang anugraha saphala namo’stu kośala

nāhan ling nira sang Halāyudha gumanti ri sira n angucap sagorawa

toh rakryan [n]da matêki sang Yadu kabeh kita sahaja lanênarĕp-harĕp

yêking kāryya kināryya sang Yadu kitâri wĕkas ika dumeh sulakṣaṇa

ndah yêki n pangaropaṇanta sarabhāra ni kapagĕha ning jagaddhita

anghing mangkana siddhayātra pangaranya larapan ing umantukêng sabhā

manggĕh ngwang tumutêryy ulihta bapa tan kari ta sira narāryya Keśawa

sāmpun mangkana de narendra Baladewa tinulusakĕn ing watĕk Yadu

ndān āmbĕk nira sang minangkana sawang kumuda mĕkar inaswan ing rĕrĕb

singgih lingta sinambhawânulusakĕn kṛtawara ri patik nareśwara

sākṣāt ambalan ing manĕmwa guṇa tan wiphala juga ng angaśrayê kita

henak rakwa patūt ni sang Yadu kabeh taya kawiwal irê sang Arjjuna

ndah sāmpun tinamuy-tamuy ta sira sang nṛpatanaya samenakê sira

tangheh warṇnana ring samāntara surup tikang aruṇa ḍatĕng tabĕh wwalu

söng ning megha rinaṇḍi ning kiraṇa warṇna cinaraṇa ginantyan ing kulĕm

mantuk sang nṛpa Kṛṣṇa tar sah i narendratanaya malulut nareśwara

songgwan buddhi nirârĕsĕp ndan atĕhĕr mangalihi parahasyan ing kuwu

sangsiptan gati ning paḍôpasama sang Yadukula katĕkê Dhanañjaya

sānghub mwang bañu ning samudra ya ta rakwa kahiḍĕpan ira ndatan pahī

byātītan sira sang nareśwara kunĕng tucapa gati nikang wwang ing dalĕm

lwīr edī ri hunangnya ta pwa masa panglwang amaribini tingkah ing kulĕm

wintangnyân pangalih tinĕngwakĕn awarṇna cala-cala nikang liring minge

wör ning hangsa lamuk-lamuk pilih akarwan ahañanga marêng ghaṭâlangö

kāryy âśā lara ning madhubrata kararwan inalapan anganti ring gihā

āpan tan mĕkar ing saroruha dumadyakĕna hala lakunya medĕman

sāmbat ning taḍaharṣa śoka taya ning śaśi lumawad i kungnya ring kulĕm

oruk trāsa sawet nikang nawami kṛṣṇa tan amĕḍar i tambwang ing wulan

tĕkwan mandra patĕrnya himpĕr angatag kalĕngĕngan ika tan sahêng kapö

amwat gandha sirir nikang pawana warṇna jaruman ing angantya mangkata

tan dwâwās pajang ing wulan suminang angdadari madĕg i śṛngga ning wukir

lwir harṣân pangungang sawet ni raras ing wwang ahawu-hawu rāmya ring dalĕm

aśrī rehnya parĕng marumpukan aśoka sumanasa wijah mabhūṣaṇa

eñjuhnyân pagunĕm-gunĕm ri pajang ing śaśi hana manganām kukūr gĕlung

lāgy âpet kalangön wilāśa ni pagoṣṭi nika tĕhĕr alunglungan lulut

de ning kung rasa tan kalib juga manisnya katalĕhan anon niśākara

rūm ning strī winagĕd ring inggita mangambwakĕna turida rāga ning kawi

pantĕs yan mapĕnĕd tayângiwagakĕn raras i panalukatnya ring kidung

sotanyân winicakṣaṇêng nagara mĕnggĕp amuwuhi manis kinangsyakĕn

tapwan marmma ri panggarutnya n angalih madhujaladhi langönya mombakan

strī-stry ângendahakĕn rarasnya n apangus paḍa tinama tĕlas jayêng langö

anglĕñjĕp ta lĕkasnya manggupit angīrakĕna ri rĕcĕp ing swarāwatī

sengĕrnyân pangalap gula drawa lawan madhu kasingi sakêng wuluh rĕmĕk

kady âmiśra ri tambwang ing śaśi ri denya n agamĕl awaśâmirangrwangi

wwantĕn rāmya magoṣṭi kapwa paḍa mesi turida mamanis ginocara

wet ning twasnya kaḍanghanan tĕkap ikang Manasija pamawanya koṭuka

kingkingnyâlayanan waneh majamahan rasa kakawin umunggu ring puḍak

tibrângrĕs hadamar wulan pangucaranya ya kamuni unĕngnya mūrcchita

ndan sang wyāpaka sūkṣma ning raras arūm śrī ning ṭikângiṇḍarat

antĕn pwânggĕh irê narendra Baladewânopamêng kadyahan

singgih yan karĕngö hajöng nira Subhadrā sang maṇik ning purī

sang sākṣāt ñĕñĕr ing gula drawa maluy pwângaṭpadê rūm nira

rāmyâpan hamajang śaśāngka nguniweh strī ratna mungggw ing purī

wah rūmrūm wihikan masiṇḍyan agamĕl sākṣāt surastry âraras

nghing dewī sira tan waneh panikĕlanyêng gīta pattyânulus

denyâgasyak arūm sawang pasir anak kontw ing barat ning kapat

tan samwas raras ing wwang adyah i dalĕm singgih putus ning manis

anghing raśmi nirang narendraduhitā tan popamânunggali

lwir tuñjung sumĕkar manohara lumöng sangkê kĕñar ning śaśi

aśrī de nira n ahyas arja dinĕlö lwir mukṣa-mukṣêng langö

ndah ping pat ri tabĕhnya rakwa sĕḍĕng ing strī-stry ârjja rāmyâwijah

nghing dewī sira harṣa wet ni pagamĕlnyângde harip ning mata

hetunya ñ jinĕm arja lāgi tinatā sor ning wungū mrik sumār

raśminya n winahĕl smi ning kayu manis lumrā minging mwang mĕnur

ngkā n pāmrĕm nṛpaputrikâsĕmu raras rūm ning Ratih ring tilām

lolyânidra rināmyan ing kalĕngĕngan yêkā n panūkṣmê hati

len tang pādapa kady añāmara mirir lwirnya n miguh kānginan

angringring karahan hanêng wiwara tang kumbang ndatan krākaśa

lāwan posik ikang garantung alangö tan pāntarânrang patĕr

rāmyârūm swara ning gupit sapangawat ning strī lalityâraras

kady âmakpak anurwa-nurwakĕna rakryan yan panidrâlangö

tan pendah wali ning rara dyah anawung śṛnggāra munggw ing jinĕm

kalĕngĕngan ika ñĕpñĕp ngkānê kwan paḍa rumĕsĕp

tuwi kĕtĕr i kusuh ning tūbanya n lagi karĕngö

palu daluwang ikânggyat śabdanyâmuhara lĕngöng

pali-palin ika masring sugyan motus ahañanga

gĕrĕh umuni magupyan lwir kaptyâmisiki kapö

kadi hamaji kucup ning puṣpângjrah sĕkar ing unĕng

hangani hati lulut kung mār mrat tang mayang amĕḍar

asana kasirir angras mrik gandhanya kapawanan

sahana nika langönya n lālityângĕtĕri hati

karaṇa nira tan āmrĕm sang Pārthâmbĕk ira lĕngöng

kĕsĕh ing anila sūbnyân mangde srĕp tĕka ring awak

walik umuni rinĕngwan sāmbatnyâmuhara pacĕh

krama rahina tĕlas ning ratri lwir pinisalinan

ri mĕkar ing asananyê tunghā ning patapan arūm

hyang aruṇa gumulak ring wwe ning lod wahu humidĕr

kiraṇa mawa ya tumrang diknyâbhrā kadi sinĕpang

manuk angaji rikang pang rāmyâsrang parĕng amijah

bhramara humung aliwran munggw ing srak wayuh angaras

irika n awas irâdyus sang Paṇḍwatmaja maraḍin

kamĕna nira mangādhisthānâditya japawidhi

ulaha nira sang amrih kastutyan tan alang-alang

tuhagaṇa tikung āmbĕk bhakti ng hyang ginawayakĕn

kimuta ta sira sang śrī Kṛṣṇânggöng japa karatun

taya wiluma masadhyā līlâhyas makin ahalĕp

nda i tĕlas ira kālih sāmpūrṇnârahup ajapa

krama umĕtu tan imbā ngkānêng gopura tumihang

wĕḍihan ira ya kumrām lwir wālārka cumaraṇa

dinakara sira sākṣāt karwê tungtung ing udaya

Yadukula tĕlas arppāt sāmanta krama sumaji

Haladhara sira sāmpun sahyâbhūṣaṇa dumilah

aparimita sirâwās singhākāra sabhinaya

prasama tĕlas adandan sang Wṛṣṇy-Āndaka maḍĕḍö

krama lumaku tumanduk ngkānêng kośala wĕkasan

prasama tĕlas atingkah rāmyâlĕp taya kahala

dhwaja kumĕlab ahoccâlīlâneka marakata

layu-layu ya ta molah mwang paṭṭāka kagurilap

Yadubala wija[h] ewör ngkānêng maṇḍala wĕki sök

ikang angawat asangkyâkweh tang nārttaki manaḍeng

tĕhĕr amĕpĕk i kulwan wetan lor kidul anguhuh

murawa paḍa humung mwang gĕṇḍing roñji masahuran

makin atiśaya osik kweh ning Wṛṣṇi Yadukula

jalanidhi kusumâñjrah sobhâhyasnya winulatan

nguni-nguni tikanang strī-strī ratnâmuhara halĕp

paja-paja karikilnyân polah ning halis alungid

makin asinang tikang kuśala koparĕnggan i samūha ning Yadu kabeh

amanuṣa rehnya tulya suraloka kapwa winiśeṣa kārcanan ikā

apan adukūla söh saha manitra kairatila mulyawastra tinatā

asĕmu siniddhikāra pinakolur-olur ika cawli warṇna dumilah

sta[wa] jaya ghaṇta-ghaṇti kadi panghrĕng ing bhramara medran ing sĕkar arūm

ya tika linangwakĕn ri panguhuh ni śangka nika sinrang ing gubar awū

ḍwijawara kapwa mārddhawa parĕng mangunyakĕna mantra sasphuṭatara

makaphala haywa ning nagara nirwiruddha hilang ing durātmaka kabeh

ri huwus ikârcana [pwa] wĕkasan mamuṣpa ta narāryya ring widhigṛha

lawan ika sang watĕk Yadu kabeh mamuṣpa Puruṣottamâstu kinĕñĕp

sumilih ikang yaśôttama warādi kañcana ya rakwa song nira kunang

ri sira wasundhara pratita hetu ning subhagakārmma sang narapati

wĕkasan ikang walikrama gumanti yêka ta dināhan adbhuta dahat

wija-wijah aśrama-śrama ta sang watĕk Yadu parĕng tumandang ahalĕp

tĕkap ing amiṇḍa-miṇḍa paḍa paṇḍitêng rangin abhindhiwāla paraśu

makabharaṇang katon larap ikang rasuk ri pasĕlurnya mangkin ahulap

hana ta mapaṇḍĕngan tama silih-silih dĕha palaywan arddha wihikan

parĕng apajĕg tĕkâruh-aruhān apan tinahu bhāwakanya ring ayun

kahalĕp iki n supatra lumarap siping-siping ikā* karahnya kumilat

gumuruh ikang gubar paḍahi lot amuntarang awĕh lĕkasnya rabhaṣa

ikang awĕrö tumandang ahalĕp sabhūṣaṇa nikârasuk mangaraman

paḍa kumĕñar wijangnya tĕkap ing ḍaḍarnya sawaneh bapangnya kumilat

paḍa ta rumampayak tar uningêng ulah kawĕlikan kidungnya n akikat

ikanang aminta sungsungana ring larih ya mari lajjitângaca-kacak

ikang angungang wwang adyah ana tânak ing kryan inucap hajöng panagara

kapacĕh anon matangnya n atukup ri lambay ika tan wĕnang puji-puji

makin araras patĕmwan i liringnya de ni kĕcap ing guyunya n amanis

kadi pasamūhan ing madhu tinĕngwakĕn ri pamĕḍarnya wahwa samirah

awicaritan gatinya ri tiling hyang ārkka tadanāntarân sinapihan

ginaway ikang mahotsawa ri mādhya ning yaṭana de nirang Yadu kabeh

paḍa humaḍang tikang surasa sesi ning wukir alas lawañ jalanidhi

wijah anaḍah sirêkana rināmyan ing paḍahi de ning anglawa-lawā

narapati Kṛṣṇa Pārtha Baladewa sang nṛpatiy Ugrasena manitah

karaṇa nikâsmu guntur atulumbu tulya giri pāṇa mātsya surasa

lawan upabhoga sāsing inarĕp-harĕp ya tinĕke* tĕkap narapati

makin awĕrö kabehnya tuwi kāmbahan drawina sindu māstawa marūm

nā lwir ning pūja winyākṛti tĕkap ira sang wīra Wṛṣṇy âdimukya

sangsiptan rakwa sāmpun panaḍah ira kabeh prīti de śrī narāryya

kintu pwa ng Wṛṣṇi bhṛtya prasama-sama huwus pūrṇna ring pāṇa bhukti

mangkin rāmyâwijah ring guwug ika sawaneh lālanâguywa-guywan

tistis ning wai kamantyan irika ta Baladewângrarah langwa-langwan

mangkā śrī Kṛṣṇa munggw ī wuri nira n ahawan sangka ring rājyadhāni

^†sering sang Pārtha ring śrī narapati mahawan syandanâkarwa-karwan

byaktêki n Waiṣṇawa mwang Madana hatur irêng rūpa^† karwâniwaryya

tĕkwan sang wīra Wṛṣṇy-Āndaka makin apadudwan [h]amet* rāmya secchā

honyâmet-met mareng pājaran angapi langö tīra ning lwah parang grong

bheda pwâmet marêng śūnya wana pangalusanyângungang sāgara jro

len têkâburwa-burwan wijah akĕla-kĕlan bhukti tang laryya-laryyan

mangkin lĕnglĕng pamangkat* nṛpawaraduhitā sang hatur citra molah

sāśrī munggw ing rathârĕngga kanaka sakala hyang-hyang ing Karttikêng rūm

anglīlā lwir sakêng sūkṣma umĕtu mangalih rāmya ning kendriyângras

sangkĕp tang wīra munggw ī sana-sini kaharan pādarākṣâlĕp ahyang

wwang sangkêng jro kaḍatwan kadi salaga mĕkar harṣa cittanya sobha

gundik mwang ceṭikâsrang wija-wijah angalap pangjrah ing puṣpa sālas

akweh tang dampa hemâruku-ruku sawaneh nīlawarṇnâpajöng mās

yêkângkĕn satpadângdon sĕkar amiru-miru truh-truh ing ciṇḍagâwra

warṇnânghrĕt lunglunganyângingin-ingin angawör citta ning wwang lumakwa

lāwan hododnya māpĕs wahu mulur angure lwir lume lolya manglih

sanggākāśâraras lwir kamasihĕn amĕkul mañjarinyârjja rāgī

tĕkwan lunggahnya rumbe rumĕmu saḍawatānyêka mambö manambang

abhrā tang karṇnikārânĕḍĕng asĕmu tajug kañcanâmūrwwa raśmi

humbut ning hanwam olah cala-cala rumawe lwir tan aswī gaḍung mrik

mogha swang yan miguh menĕh i pangayuh ikang lunglungan [-]* rumambat

rāmyâpwe pwa ng cakikyar makĕpĕ-kĕpĕk i sor strīnya tar sah kinuṇḍang

mangkā tang kaywa-kaywan ḍara-ḍaran angĕsah de nikang mārutâlon

molih truh ning kapat ngganya wijah atamuyan rūm ning onĕng ya masyang

poh mwang manggiṣṭa wunglwan waḍara wuni paḍāly âcawit kapwa mĕṇḍuh

kahyun-hyun pwa ng sakī kapwa mamupu phala ning wwah-wwahan tūt awan kweh

menmen kapwâlangö rāmya kĕtĕ-kĕtĕg iki n kendahān ton kalangwan

denyâpingkas paḍâpet raras angalĕpakĕn kabwatanyârṣa tibra

kengis ros ning wĕtisnyâsĕmu gaḍing anamar ketakī kesisan ken

pantĕs denyângĕūĕk rāga turida ning akung kāṇḍĕhan śīrṇna denya

nya ng kĕmbang ning wanânrang pura racana lĕngöng puṣpitābyūha kīrṇna

strī-strī lwir kāmikāwīra rumabhaṣa parĕng kewala syūh inaswan

sākṣāt singhêng raṇa lwir madhukara manurung darpa tan seng ṣĕkar mrik

hetunya n kelu śīrna ng kusumita hañangĕnya n sinĕmpal tan amwas

akweh denyâkire raśmi sahaja pinĕnĕd rūm nikâlakwa-lakwan

sarwwecchâśoka sinwam pakamadana nikârumpukan sāri sumrak

śrīḍanta mwang wungū bhūṣaṇa nika n asawit mwang kalungnyârjja mahyas

kāsĕngkānyê hajöng tulya sakadang ing akung de nikâpet manisnya

śrī Kṛṣṇa Pārthâta sirêki warṇnanĕn

matūt gĕgĕr lampah irân yathāsuka

himbang ri sor byakta langönya kongkulan

katon mawit rāmya niki n tininghalan

wwainyârjja muñcar kumiriñcing ing jurang

waneh pwa tūsnyânalagâmangun langö

sāśrī pwa lumbunya nahan kasĕmburan

byaktêki* kalyan maṇi ratna sök riya

len tang wiśuddhâmalabar sakêng wukir

katon hilīnya sphuṭa mangduk i[ng] parung

ngkānêrikang grong gumuruh sawang patĕr

anrang* gubar gĕṇḍing ikang mahotsawa

towin siratnya n mahĕning larap-larap

ya têka lumrā sumawur kasamburat

tulyâñjalinya n mararĕm panungsunga

tĕbĕng mamūjā ya ta rakwa ling nira

anghing narāryyârjuna harṣa yan wulat

tĕkap nikang parwwata kady asanggraha

mrāknyân panguwwang ri hunur nikang gĕgĕr

waneh kamānak ya parĕng silih-sahur

kumbang lalityângarang ing sĕkar marūm

atūt hawan somya karĕngwa de nira

denyângisĕp sāntĕn awarṇna bhikṣuka

mangaswakĕn stotra ri sang rwa yar ḍatĕng

lāwan kĕtĕr ning camaranya kānginan

tan aśru minggut ya ta kady ameñjuha

mandrâpĕpö pwa ng puputĕr manambangi

sinangkyan ing pakṣi kĕturnya suswara

lung hing wĕlas-hyun ya marūm arumpwana

lawan ikāng aṇḍiwa moda tan kasah

munggw ing tahĕn kapwa sumong rumambaya

rinamwan ing śewala warṇna māsiha

tĕkwan hure ning prabhu sanmatān hana

latānya lumrânawĕng i[ng] sukĕt-sukĕt

kahyun-hyun añjrah ta wuninya yan ratĕng

wruhnya* n pamārppat lungid ing wajâhirĕng

tingkah nikang Rewata parwatâhayu

nahan winarṇnākĕn irang Janardhana

ngkā têki kasthitya bhaṭāra Keśawa

pangöban ing Dwārawatī ya tan waneh

nāhan ta don sang Yadu Wṛṣṇi nityasa

amṛddhyakĕn pūja sabhakty amūrṣita

amrih rika swārtha umaywakĕn prajā

pakāśrayan hetu nirâñ jayêng hayu

nāhan ta ling Kṛṣṇa ri sang Dhanañjaya

ya tâmangun gĕng i manah nṛpātmaja

mangkin sirômangkata harṣa de nikā

atūt siluk ning palapat jurang-jurang

āhöt ^†hĕnunyârddha tĕtĕl wuluh nikā

tinampik ing māruta manda moṇḍuhan

len tang kalusyan^† minahângisis tĕngah

sawang lumĕnghay hangĕsah katiṇḍihan

sĕngkanya lungkān umiring rupit-rupit

gĕsing pĕtungnya n mapipit paḍângadĕg

kengis lumis kapwa matanya tar miḍĕm

lawan [h]abungnyân agatĕl paḍâmranga

tangheh wiwākṣan [r]yy aliwat nirêng sukĕt

makin kacuṇḍuk kalangönya de nira

ngkāna n tinĕnghânilumañ jugêng hayu

pacangkraman rāmya langönya n uttama

wwang ri jro nagarâlangö paḍa katon raras ika kadi wimba ning tulis

rāmyânĕmpala puṣpa pādapa hangendahi hayu nika kapwa komala

lwir hintĕn liningir patinghalan ikânglĕngĕng amija-mijah macangkrama

utpatti ng kalangön ayunya n aśarīra wahu mijil i pañjrah ing sĕkar

kīrṇnêkāng ahajöng manisnya sakadang mwang asana wahu wanwa ring nadī

len mahyas hangilo rikang wway amatĕh gĕlung ika winahan susup-susup

dudw īka n panguḍoḍa tapwan ahuyang swang angiwagi kucup ning erttali

kahyun-hyun hamĕḍar pwa ros ni pangawaknya hana hanuji kangsya ning Smara

strī-stry ârjâsĕmu citra molah amanis pamatan ika ri denya yan liring

darpâweh lara rāga tan cala patahnya makiris anamar ghaṇâhirĕng

ambĕt ning pangawaknya tĕkwan akarah kalung asana lawan wĕlas-harĕp

himpĕr Manmatha sṛṣṭi-sañcaya hayunya kinĕḍapan i rāga ning mangö

len tang tibra lĕngöng mulat ri*lĕyĕp ing jaladhi hayu nikânggagat lulut

pangde ning kalangön rarasnya tan i rāt rasa maluya hajöngnya ring ṭika

tan sengĕh kahuwan tĕngahnya ri pangol ni tali-tali nikā n dadak lukar

kengis mātra sawang gaḍing saphala panghurusakĕna* rikang jayendriya

wwanten rūmnya wagĕd cumāmpaka kapantĕs ika linarang ing Manobhawa

denyâmangku puḍak waśângisisakĕn wĕtis ika kadi hetu ning jawuh

raśminyân panulis ṭikânak-anakanya hinuḍaran ikêng nakâlungid

sarwwecchâsidĕhêng karang tĕhĕr anungkuli kalĕngĕngan ing wway ing jurang

ānyāt ta[ng] sumarêng śilā śayana raśmi nika n inapi mūrtti ning puḍak

rūm ning pādapa len mĕnur tila-tilamnya jĕnĕk i lĕyĕp ing langit lĕngöng

gātranyânwam awarṇna sinwam ing aśoka sinawawa tĕngahnya n angligā

byaktâlūma yadin linakṣyakĕna ring śayana tĕkap ikang smarātura

gundik rāmya mawā langönya mawilāśa sumalaga lĕwas raras nikā

hāmhāmnyân pangusir manis paḍa rumūpaka raras angĕnoh kinonĕngan

harṣanya n pamabak-mabak kusuma sinwam apĕnĕd awahĕl-wahĕl wungū

lindinya n hamĕrĕh-mĕrĕh sama-samângrahatakĕna gĕsĕngnya molaha

lwir tan warśih apet kalangwan agalar-galar asana minging lawan mĕnur

tañjung mwang priyakârjja mĕmbang inangitnya sinahaja pakö nikang gĕlung

rupnyânwam tarawarṣa roma saha nopura hinadu manis lung ing gaḍung

sumrak rūm ni wijangnya tĕkwan akase hṛbuk arĕja tĕkêng payodhara

akweh ngganya pamiṇḍa ning raras ikang wwang ahayu yadiyan kathākĕna

nistanya n taya pangharusnya ri manis ni hayu nira sang angdiri ng dalĕm

simbantĕn maṇik ing purī marĕki warṇna nira wiphala rūm nikâkalib

hīnganya n sira sāri ning [ha]hayu* sūkṣma ni kalĕngĕngan ing tasik madhu

ānyāt têki parantyan ing kalĕngĕngan kadi haniringi rāmya ning tulis

anglīlā pinahat karang tuwi rĕcĕp niki jinamaṇikêng wĕlas-harĕp

honya ng jangga mure marêng lirang apiṇḍa lalayan ika rāmya tūt sisi

molur kenggutan ing samīraṇa wanginya n angasĕpi sumār nirāntara

nāhan parṇnah irân rĕsĕp lumihat ing kaka paḍa tinamêng gitâlangö

mangkin lwir prathimângarang hayu nirân hana hamarĕkakĕn puḍak minging

ndāñ jātī nira tapwa rañca sira kewala puji-puji ratna ning purī

warṇnākāra nikang madhu drawa katon yan angucapa sirâparan kunĕng

singgih yan sira hatwik ing raras arūm maṇik ing ahayu jīwa ning sarāt

bhrantā ng satpada ring puḍak milu lĕlĕh tan awĕling angaras ri jöng nira

anggöng tan makalib salah ng iḍĕp anon ri sĕḍĕng ira hanêng karang liman

hyang-hyang ning kalangön waling ning umulat kṣaṇa maluya marêng nirātmaka

ndin tan bhagna larut raras ni wiji ning sumanasa kalawan puḍak sumār

yadyastun racanêng pralāpita kapāna wĕnanga ning amarwanê sira

māntĕn denya ya ta n pupug lungid ikang tanah ing angapi tibra tan padon

lit-lit ning karas ārjja hĕntya tamatan palaca-laca hirĕngnya de nira

byakta syūha langö nikang pasir arĕs winaḍal i lĕwu tan panoliha

lāwan parwwata śīrṇna tan wani gumāp tĕkap ira kadi māryya lĕnglĕnga

mogâsep lĕngĕng ing tawang yan ika wastwakĕna niyata nirwa kingkinga

śrī ning tāman amukṣa raśmi nika yadyapi mamangun aśoka tan tĕpĕt

ngkā sang Pārtha sira ḍatĕng tumūt ri Kṛṣṇa

harṣâmbĕk nira mulat ing wanādri rāmya

ndan sang Phalguṇa sira mogha tibra lĕnglĕng

munggw ing twas nṛpaduhitā maweh prapañca

nā marmā nṛpatanayâtañê narendra

yêko sang hinucap anindyarājaputrī

lakṣmī ning raras ahajöng tikung Subhadrā

putri śrī nṛpa Basudewa ratnakanyā

singgih tan papaḍa sirêng jagat samasta

ndya ngwang rāsika tan akūnga denya mūrccha

anghing rūm nika taya len paran ya rāgī

mās ratnôttama tar iwĕh wĕlinya yogya

mangkā ling nira sumahur narāryya Kṛṣṇa

om singgih ya tika nahan walingta rakryan

yêky ântĕnkwa tuwi rare sĕḍĕng sukanyā

wastw êwĕh karaṇa nikân wineh atĕmwa

anghing prārthana gawayĕn swayambarâtah

yan sahyāharaṇa kunĕng ndatan wanehan

yan wwantĕn ta sira mahāprawīra śakti

wāny ângambila tan arĕs ri sanmukangku

sugyanyângawaśakĕnê tuwuh ny aringku

mwang tañ jrih tumahĕna wīra Wṛṣṇiwangśa

ndah nāhan ling ira Janardhanâtĕrĕh bwat

kady ânggĕng mawĕngis i citta Paṇḍuputra

sang Pārthâta sira sudhīra tan hanâwri

sakwehnya n wĕnang umawit syuhĕnkwa śīrṇna

nāhan ling nira tumuluy madĕg sirôjar

ndātañ jrih ri Yadu kabeh wawang ta mangsö

sāglisnya n hinalapakĕn narendraputrī

kumyus mūrcchita wiparīta yan pinangkwa

munggah ring ratha pinĕkul gupe sirârĕs

byaktêki n winawan irâhañang wisāta

ndah mangkā ng Yadubala kapwa dīnacitta

sakwehnyâlara mabunĕk ndatan tinanggĕl

āśābhūta mangĕn-angĕn [r]yy awaknya nirdon

denya n tuccha lalu kumöl dumehnya lunghā

sangsiptan lwir narāryyârjjuna tucapa tikang Wṛṣṇi n kapalajöng

prāptânambah marê śrī Haladhara mawarah reh Pārtha ri sira

yêkā n sakrodha sang bhūpati wawang angadĕg tang mānawibhawa

muntab söng ning wulat kady alatu-latu sakê bāng ning muka nira

ndah śīghrângambuṣâtyanta tĕkap i pamanas ning krodha kumutug

dhik hāh Pārthâtiḍuṣṭâdhama niyata katon śīrṇnanya pususĕn

nāhan ling sang narendra krama madĕg angalap śaktyāyudha magöng

mangkin kady anyuha ng rāt mwang amalika tasik Rudrâgni sakala

sakweh ning rājaputra pramuka haji parĕng sakrodha sumĕgut

tĕkwan kapwâtirodrâgarawalan angadĕg lwir singha masiga

Pradyumna mwang Gadā Satyaka Niśaṭha waneh Sāmbhâśru maganas

kapwâtyantêng mahāśakti tuwi kalilip ing singhākṛti sira

mwang têkang Wṛṣṇi rotângjuru sahana niki n kakyāti nipuna

towin śūrâniwaryyêng raṇa jaya kinawih manggĕh kṛtayaśa

tāwak* yan daitya len rākṣasa kapana ya tan sāñcurṇa yan asö

mangke n ^†krodhânggakārânggĕtĕm aruh-aruhan wetnyârddha magĕlĕng

lwir syūha ng Rewatâwrĕg kĕnas ika tĕkap ing śangkâtri tinulup

gĕntĕr^† ning bheri lāwan kala-kala kumisik yêkā n muni parĕng

lāwan pārgung nikang sāmaja kuda gumuruh panghriknya n anguhuh

nānāwarṇnâsulam tĕngran ika katulajĕg sarwwâstra lumarap

sangkĕp sakweh nikang yodhagaṇa bala pĕnuh lwir tan patagihan

āmbĕknyânggöng kaśūran makin angipak-ipak tulyârṇnawa pasang

manggĕh sāmpun hinajñan sajuru-juru dumon Pārtha prih usirĕn

nā hetunya n paḍâgyā guragaḍa maharĕp hāmhām tan atakut

göng-göngĕn krūra mākrak kagiri-giri katon têkang Yadu kabeh

kewalyâmātyana ng Pārtha ling ika rarahĕn rohĕn tan inaris

kapwânambut laras mwang palaga nika kabeh sakwehnya tumihang

garwwanya n kapwa tulyântaka sahana niki n magyângala-hala

wāgyūt [t]ang wīra mangkat saha bala lumurug ryy ângkat Haladhara

kapwârāmpak gumĕntĕr kakĕrĕtug asĕlur denya n silih ayun

cuṇḍuk śrī Kṛṣṇa tapwan haruhara ya tiki n cittanya n atĕgĕg

yêkângde gadgada śrī Haladhara lumihat de sang narapati

ngkā rakwân śīghra mangsö ta sira mujarakĕn ^†śrī Kṛṣṇa tumuluy

āyay hantĕn ndya donta prih umĕnĕng i lĕkas ning Pārtha wipata

nir tang sānak pwa yânggĕhnya taya ng ingĕt-ingĕt^† ḍo haywa tinahā

wyartthân sāmpun pinūjâpratihata rahajöng sāmpūrṇna hiniwö

yêki n sampaynya yak ton lĕwĕs angapa karih denyângapuyana

dhik dhūrttâpa kramânggöng kuhaka juga tikī nirśānta magĕlĕh

sis tan wring twang humöt ring smṛti wĕnang awamānântĕnta hinañang

göng mūrka crol ya têkā niradara katuluy denyângdĕha hulu

nāhan tôjar nirâpyak irika ta sumahur śrī Kṛṣṇa ri sira

ḍū sojar śrī narāryyâtiśaya mara hiḍĕp sang nātha tan ade

jātī ngwang wīra bhūpālaka saphala jayā lumrêng tribhuwana

göng ning śaktinta sākṣāt jalanidhi winuwus atyanta madalĕm

nda nihan paramārtha tūtananta

purih ing paṇḍita ring jagat guṇajña

taya lamban amet wiweka yukti

tar iwĕh ring maganal halit kaweśa

wwaya tang hari len sahāya tonton

ya lanâmiṇḍa paḍâtisūkṣma kālih

pamihang nikanang hajöng gatinya

ya tikā hetu nikang hayu n kadadya

kita ta prabhu ring jagat wiśuddha

ikanang durnaya tan hanêka mātra

kadi bahni mahojwala prakāśa

hilang ing sarwwa kalĕngka donta nitya

amṛtâtmaka tulya ring halangghya

umañut wyāpara ning kaluṣya citta

tuwuh ing yaśa dharmma śuddhadeha

kita ta śreṣṭhi rikā kabeh byawasta

iti marmma niki n humodana swī

takari ng hīna hangalpa buddhi nātha

si Dhanañjaya lingta yar masampe

katuluy twangnya magöng nahan hiḍĕpku

nya dĕlön prabhu yogya lingnya sādhu

yan ikang strījana wĕlyan ing [h]apeṇi

mwang ikang maṇi ratna kañcanâdi

ya tan oli n paśujāti kāṣṭa hīna

ndi ta sang minahā n tinonta ring rāt

agĕlĕm dumwal anak nira n sukanyā

kinayogya kĕta ng swayambarâtah

tan ahāt rakwa sirêng adharmma ring rāt

nda mĕne apa tan kināryya ri ngke

ikanang kārmma wiśeṣa dharmma yukti

ya ta hetu Dhanañjayâprawṛtti

wara sahyāharaṇa ndatan ya hīna

nya katon pangaḍānya wīra śakti

ya pinintonakĕnâniwaryya deha

ri wĕnangnya malap rikeng* Subhadrā

takarih parcaya de nikang kaśaktin

yan swīnĕn pwa ya de nareśwara hade hiḍĕpku wiphala

āpan byakta katoñ jayārtha nika ring swayambara dangū

yadyastun hana têki ganta nika yan prihĕn kawĕnanga

tā ngwang śakti wĕnang mamangpanga guṇanya mon Surapati

an sāmpun karĕngö pratāpa naranātha digjaya kita

yapwan sora kitêng parakrama tĕkapnya kerang-iranga

sangkṣepanya hanêki rakwa kalĕhĕngnya tak magalaka

tūtĕn tan n apalenan ing yaśa tinunggal ing parahita

nyā tang deya hitāwaśāṇa gĕlarĕn tĕkap sang ahulun

tapwan piṇḍah akon umundanga rikang Dhanañjaya usön

toh pūjān warangĕn śramākĕna huwus nda haywa wiluma

donyâtūta lawan sa-Paṇḍawa pasānakanta rahajöng

anghing manggĕh i buddhi ni ngwang apa tan waneh ngaran ikā

hetunya n tan akūnga ring wimukatângatīta hĕnĕnga

nāhan ling nira Kṛṣṇa nora winihang tĕkap Yadu kabeh

tulyâg[n]y ângabaran galak nira kawarṣan āmrĕta haji

somya śrī Baladewa de nira narāryya Kṛṣṇa sakarĕng

ngkā n maṇḍĕg wĕkasan kabeh sumalah ing warâstra palaga

tan dwâdan tumuluy humundanga ta sang narendratanaya

gĕṇḍing rāmya lĕngöng swaranya makapangharĕp laku nira

mangkat sang para rājaputra saha bhṛtya kapwa mahalĕp

hopĕn pasrang ikang karaṇḍan ira söh tikang gaja ratha

lwir tūban kumusuh grĕbĕg ni laku ning wwang ākrĕp angiring

sahyâbhūṣaṇa warṇna puṣpa wana komalâlaku-laku

lāwan tĕngran aneka warṇna madulur halĕp winulatan

abhrâpiṇḍa kuwung-kuwung manurun ing sĕkar sumalaga

lāmpah ning ratha len liman kuda sawang karangnya n alangö

lungkanyântara ning lumāmpah aḍarat matambĕh ariwĕg

tan warṇnan ta sirêng hawan nṛpatiputra Pārtha wuwusĕn

ngkā n pangrĕgrĕg angolakĕn sang ahajöng sirêpu tan arĕn

mangkin tan humĕnĕng sirârddha sumawe ri sang Yadu kabeh

lwir mātyângĕsah ing kisapwan ira tan wri rāt kaḍĕḍĕtan

hetunya n hinimūr sawet ni raras ing priyambada sira

māskw indung palalunta māsku kapana n waluy kita mĕne

heman rūmta yadin hangiṣṭya luputanta ring karatala

lwâmbĕk têbu huwus purākṛta kabhukti denta kawawa

mangke byakta panĕmwa ni nghulun i māsku ratnaduhitā

yogyân rūmta silunglungangkwa musirêng kasinghan ayaśa

manggĕh prārthana ni nghulun rĕbutĕn ing lawan tan awĕḍi

hīnganya n kinaniścayangkwa mapagê kabehnya ḍatĕnga

kas ning bāhu nahan ta tinghalana śulka ring kadi kita

tan mithyâku kitâta sakṣya ri kaśūran i nghulun ibu

mangkā śabda narāryya Pārtha saha marmmarâñulu-ñuluh

anghing drĕs nikang aśrupāta panulak sang onĕk angĕsah

akweh de nira n amrahāsana ri sang prapañca malara

ngkāna n rakwa ḍatĕng watĕk Yadu kinon umiñjĕmi sira

anghilyākĕna sopakāra sawilāśa ning mamapaga

kapwâwwat ri girang nirân ḍatĕng amūrṣitê nṛpasuta

t āntuk māsku ri sang nareśwara nihan pakon ira huwus

mwang dewī sira karwa keringa t ulih parêng pura mĕne

āpan tuṣṭa dahat manah sang ahulun humundanga kita

tan pendah hati* ning lirang winilĕt ing gaḍung juga sira

nā ling sang para rājaputra suka sang narendratanaya

lunghā ng ārkka samāntarân laku nirân umantuk iniring

munggw ing ḍampa wulung sĕsök laku ning angrakĕt ndan ahalĕp

lwir nārīśwara sārdhadeha manurun hanopama sira

ndan sang śrī naranātha Kṛṣṇa ri yawā lawan Haladhara

mangkā ng strī haji kapwa rāmya sumĕneha meh tĕka nira

māwâwās ri sĕnö nikang sulu[h] aneka piṇḍa rahina

lwir mājar suka ning sarājya kisik ing garantung araras

ndah ngkā prāpta Dhanañjaya mwang iki sang narendraduhitā

ngkā rakwân pangusap ri jöng nira narāryya kālih papupul

tĕkwan māri wiwal narendra Baladewa harṣa masĕgĕh

siddhā ning paramārtha sang nṛpati Kṛṣṇa nora kahala

sāmpun mangkat adūta sang nṛpati mantukêng purasabhā

ngkanê jöng Basudewa nātha mawarah ri tingkahan ira

byātītan ri lakunya sang prawara Phalguṇâta waluyan

rāmyârūm papupul nirêng kuwu lawan watĕk Yadu kabeh

mangkin söh awuwuh wiśeṣa pangiwö nirê nṛpasuta

salwir ning [h]upabhoga ṣadrasa huwus dine pwa ya hana

ndātan pis ta tĕkap narendra Harimūrtti sapriya tuwi

āpañ jāti nira n kṛtajña kajanapriyañ juga lanā

byātītan ri sĕḍĕng ni sang prawara Paṇḍuputra hiniwö

lunghā pwa ng wĕngikāla sākṣaṇa pakĕg nikang sanagara

mĕntas ring wĕkasan tĕkā ng rahina kapwa sāmpun awungu

ngkā n mantuk sira sang narāryya dinulur nikang Yadukula

sang Pārtha pwa sirêniring mwang ika sang narendraduhitā

ngkā ring Dwārawatī sirâstu pinapak tĕkap sang ahulun

nya ng pāṇigraha kāryya manggala wiwāha kārmma gawayĕn

āpan ya pranidhāna sang nṛpati Kṛṣṇa yan pangucapa

ḍatĕng ta sira sang watĕk Yadu hanêng nagara lagi sinungsung ing wwang angungang

manahnya paḍa kāñaran mulat i sang nṛpatanaya sirâdhikāra karĕngö

ya hetu niki kapwa māprĕgi sawet ning abhinawa wawang marāmpak i yawa

rare matuha len ulañjar angaḍang hana lilu tumakul ya milwa mijila

paḍâgarawalan parĕng kapalayū hanan anguhuh arĕpnya tan karuhuna

silih sĕḍĕk arok waneh tang apipit-pipit aruh-aruhan tayêng lĕbuh agöng

alah ya nirupekṣa ring hyas asulung-sulung arĕbut anon ri sang nṛpasuta

dudū tang amahaywa kenya umijil ya katĕrag alayū ndatan dwa kawudan

atīta ri ḍatĕng Dhanañjaya lawan narapati madulur cumuṇḍuk i dalĕm

yathākrama sirângusap lĕmah i jöng narapati Basudewa len nṛpawadhū

katanggama sirê Dhanañjaya apan lituhayu tuwi śūra śakti guṇawān

lawan sawawa molihê prabhusutā hiḍĕp ira taya len pasānakan ira

nihan ling ira he wĕkangku kita Pārtha kunang iki ujarku māsku ri kita

prasiddha kita śāraṇangkwa taya len wwaya tiki Harimūrtty Akarṣaṇa tuwi

pahaywakĕna têki māsku kinatunggalakĕna bapa tan dagêng manah anūt

apan sakura nora bheda ngaran ing kadi kita sasawīja haywa malupa

wuwus nṛpati sārjjawâmṛta haturnya manginaki sang angrĕngö rasa nikā

tuwin saphala wṛddhabhūpati huwus kṛtasamaya ri sandhi ning parahita

sirang winuwusan mangañjali umastwakĕna hayu ni wākya sang narapati

mahânginakakĕn rĕsĕp ri manah ing bala gaṇa rumĕngö saharṣa mamuji

ri huwus nirângucap-ucap krama tinuduh ikang balâdhikā

tumitah tikang pamiḍuḍuk pasaji-saji nikang smarāgama

ri hatur narendraduhitā tiki n inayu lawan Dhanañjaya

śubhakāla rakwa sakatambaya ta sira ciniṇḍya de haji

ya [ta] hetu sang Yadu kabeh pĕnuh acatura munggu ring sabhā

mwang ikang balakrama hanêng nagara sajuru-jurw atingkaha

humiwö ri kāryya naranātha hasaniga kabeh mapadgata

tuwi sāmprayukta winidāna tĕkap iki n anindya ring halĕp

nda huwus dināhan umaḍang sahana-hana nikang walikrama

kawawê pratāpa nira sang nṛpati parama Wiṣṇu kottama

nguniweh wangun-wangunan ing gṛha ri yawa tĕkê dalĕm purī

paripūrṇna kapwa atisobha paḍa-paḍa minūlya hinyasan

asinang pwa maṇḍapa nikâhalĕp inululan ārjja bhūṣaṇa

sawawê tihangnya pinakokiran iki n apadudwan ing tulis

tuwi wangśapatra lumarap palipiran i pagĕrnya bhāswara

tinulis-tulis ri maya ning tuwu-tuwuhan ikā sawang rakĕt

katĕkê wuwungnya n apĕnĕd prawala cinaturangga wiḍruma

pinapat hiwak tinaming ing jamaṇika paciranya tūt sisi

tinatā tikang kanaka jangga marakata lumĕnghay ing tĕtö

amirah tikang cawĕni simbar ika sinuji lungsir ujwala

tuwi ghūrṇnitêng nagara warṇna pamarabal ikang payonidhi

swara ning mṛdangga nguniweh paḍahi haji parĕng magĕnturan

ulah ing mahotsawa kināryya tĕkap ira ta sang watĕk Yadu

kamĕnā nirângarĕpakĕn pawarang ira sang āryya Phalguṇa

sirang Ugrasena tĕlas arppat i yawa nguniweh watĕk ratu

karuhun narāryya Harimūrtti makajuru lawan Halāyudha

irikā narendrasuta Pārtha hinariwuwu rāmya ring sabhā

awuwuh [h]alĕp nira sawang Surapati hinucap ndatan waneh

wwaya têki rāmya pawirāman ing atanu hinuttamêng prabhu

Smarasṛṣṭhi hīra wangunanya rĕcĕp ing angajap linangwakĕn

kumĕñar hatĕpnya n abhirū śinaśarudhira wimba ning mirah

maya ning wulan langi-langitnya sinuji kinalacyan ing cucur

nya ta laryya-laryyan ika ring pamanisan i surambyan ing gṛha

lĕngĕng ing Taladhwaja piniṇḍa winĕḍarakĕn ing labuh kapat

ginĕlar ta kalpataru puṣpa pakaśaca ri rĕngga ning jinĕm

mrik ikang hasĕp lĕlĕh aweh turida minging arūm nirāntara

irikā ta rakwa pinapak nṛpawaraduhitā gi*

............rāgama huwus hinĕnakĕna kabeh sumanggraha

abhiwāda manggala pangarccana nira ri harĕp nareśwara

nda[h] aneka mukya kinĕnākĕna pangucara ning walikrama

araras tikang paḍahi panghariwuwu nira rāmya len gupit

ulah ing hanindya tadanāntara pinisalin ing wĕngi n tĕkā

ndan ahĕly awās tĕkap ikang damar asĕmu samūha ning rawi

tan iwön masāmpunan ikang pamiḍuḍukan irân mapahyunan

riy ulih nirângalih i ḍampa kadi salaga karwaban riris

panameni gĕṇḍing araras ri laku nira lalitya komala

kĕtĕb ing lumakwa kadi Karttika siniring i śabda ning patĕr

munggah ring gṛha ratna nīla pinakonggwan ira tinawung ing samāgama

mār mrat rūmnya sinaptagopita paragyan ika minging arūm kinumkuman

mrik ning karpura gandha ning jĕnu-jĕnunya makatilaka ning pasanggaman

byaktâmungwa ri lĕnglĕng ing manah akung lumaya-laya gatinya n anglare

ngkā sang Pārtha sirâtiharṣa mangisapwakĕn i sira narendraputrikā

tĕkwan sūkṣma pangumpĕt ing Manasijânguyangi hati nirân kĕnêng hunĕng

oyut wetnya hinöt kunĕng [r]yy ulih i sang wwang amarang i sirân hanêng jinĕm

mangkin lwir sĕmi ning gaḍung paḍa ni kung nira n amilĕt i teja ning wulan

sang hyang-hyang ning akung prapañca rumaras mingay agigu mĕhah minanwakĕn

śīghrângluh sumarambah ing mata nirân kadi maluy atĕmah madhudrawa

polah ning tikĕl ing halis nira tiki n mayat arĕngu kinol nṛpātmaja

rĕmpū twas nira mepu lāgi kinisapwakĕn alara kawĕs winodanan

yêkângde siwuhĕn ta sang nṛpatiputra ruminga-ringa marmma pet siwi

kepwan bhranta sawet ni kung nira n angol tĕngah alaris amatya-matyakĕn

wet ning harṣa nirân kĕdö kalawanan twas ira karaṇa ning harĕp-harĕp

lāgy âwah manis ing priyambada pañumbwa nira tĕmahan ing karāsikan

rakryan sang kinĕñĕp ri nāla ning unang sang inapi paśarīra ning Ratih

sūkṣmângdadya sakêng nirātmaka ri lĕnglĕng ing angajap i sandhi ning langö

pāwak ning madhu sang hyang ing kusuma lakṣmi ning asana maṇik ning angdyahi

śrī ning Karttika mūrtti ning prathima ratna kari kita madadya putrikā

mangke pwâri katon pralabdha hiḍĕp i ngwang angisapu marĕk marê kita

sang tan sah [h]inajap kunĕng karaṇa ning ḍatĕng i kita mĕne n pamangkwakĕn

sang sākṣāt maṇik ing hiḍĕp pinakahĕmbanan i tĕlĕng ing anggĕgö smara

donkwâlābha ri siddha ning bhaṣama sātmaka katĕkan amuktya sanmata

epū ngwang mapa kāla ning pinuwakan wulat anahĕli kungnya tan lutur

ndak ton kingking ikâmĕgĕng turida yadyapi kaluputan ing priyambada

byaktā n māntĕna jīwitanya n apuput pati kasarik i ratna ning purī

manggĕh prastuti ning rarasta pakamuṣṭi ning angarang angel kĕnêng riris

nāhan cumbwa narendraputra mamanis lwir angĕtĕri hilik suputrikā

mambö satpada matta mangrĕngih i pangjrah ing asana minging turung mĕkar

pet-pet harṣa manambyakĕn wuwus arūm tĕhĕr angarĕki kĕdw angolakĕn

eñjuh yan pangalap kasor lĕkas irângiling-ilingi mahānggagap tĕngah

ndan śrī nṛpawaraduhitā minge ri manis ing wuwus angari-hari

tapwan gĕrĕmĕ ri rĕcĕp ing prahāsana narendratanaya mangamĕr

ardhâgigu winisikakĕn humingsĕr anangis tiki n inarĕkana

mogâkiput awĕḍi yadin kacidra padu ning tapih iningĕtakĕn

tĕkwan rĕngu-rĕngu ni liring nirârĕja ñĕñĕrnya hamiṣani ng akung

lāwan tikĕl i halis irângani twas amangun lĕlĕh ing angamĕra

lāwan panulak ira kadi pwa sinwam ing aśoka kasirir ing angin

himpĕr sarasija kinudang nikang bhramara matta cala-cala nira

āmbĕk nṛpasuta katalĕh kĕnêng manis i rūm nṛpawaraduhitā

mangkin raga-ragan angamĕr sirângusapi gātra lagi palĕ-palĕh

lāwan tangan ira tumamêng tĕngah marĕk i puṇḍutan inarĕpakĕn

sanyāsa manguwahi ri kapriyambadan irângucap amahi langö

rakryan sang inapi maṇik ing kalangwan anusah twas ing alara makung

dentângrahatakĕna manis-manista lĕwu denya sumusuk i hati

sa[ng] nitya cumarik i langöngku lot makaparantya ning añulu-ñuluh

himpĕr śaśadhara juga tan panīsi kucup ing salaga kapanasan

sang kady asana kusuma rūmta munggw i wahĕl ing patah arĕja minging

rāmyângingin-ingin amangun hunĕng juga rarasta bisama kinĕmit

ngwang satpada lalita mangel angölwakĕna rāga turida malawas

tañ jrih mangarĕki suka mātya yan huwus acihna hamungari gĕlung

hāh ndin koluyan ing langö ngwang iki denya mucapakĕna sotan ing rimang

dūran yan hana mātra kampirakĕnêng kĕtĕ-kĕtĕg ika n amriyambada

simbantĕn ngwang atön ri denya n amĕkul tĕngah ahuyang aminta sanmata

wālingnya n kakĕnan karāsikan inambwakĕna kalara ning kĕnêng hunĕng

lāwan toh pangamāknya lĕnglĕng inaweśa kapuritĕn i pangdan ing smara

bhrantajñāna kapĕñcir ing jariji len wĕtis anuji hunĕngnya mohita

epū twasnya karĕngrĕngan kasarik ing gĕlung alara kĕnêng matâmanis

tan wring rāt kapana n ginocara pameny amapaka rika lingnya lampunĕn

nā ling śrī nṛpaputrikâlara sinewa lagi winuwusan nṛpātmaja

māskw indung tarimanta pamrih ing amangkwakĕn i kita hamanghya-manghyakĕn

yadyastun hinilanta ring smita tĕhĕr cacahakĕn ta yêng nakâlungid

mon mātyāku sapadya yan kalawanan bhaṣama ning angusir Smarālaya

sangsiptanya dĕlönta sotan ing akung tiki n amarĕkakĕn priyambada

sāhityân pangajap sihanta pamawan lara turida minuṣṭi tan bĕsur

māntĕn tan katĕkān prayojana marambatan ing ahayu ratnakanyakā

anghing ganya hinūrnya tan maliha kerang i manah ika tan sinanmatan

ling ira narendraputra sira sang narendraduhitângĕsah kaparihan

gupay anukĕr sirâtulak i pangrĕmih nira ta sang narendratanaya

wiphala pupug tikang kuku nahan pamādhaka nirâla[h] arddha kabalik

yaya tan awĕh lĕkas nṛpatiputra mangkin atalĕh-talĕh mangarĕki

nṛpaduhitâti kepwan atahĕr ndatan pajamuga ng twas epw angĕsĕsan

tuhu nikanang tangis nira ya têki rakwa pangawör nirê nṛpasuta

kalalu ya tan hiniṣṭi panĕpak nirâlah alisuh ndatan pangupama

nṛpasuta mangkin anghudanakĕn prahāsana nira lwir ārṇnawa madhu

dyah [h]iṣṭangkw ibu puṇya denta pamatanta tan arĕngu minge tuminghala

heman têbu rirista tan panguningêng alara turida kokalan lulut

tan luh tan pangĕsah lawan prihati hetu ning akalib asewa tan lining

hīnganya n kapana n wiwal ngwang iki n amrih anĕkĕn awilāśa ning marĕk

kenaknyân ḍawuhĕn manista ta kari ng sinawawa ring akung ndatan cala

āpan wyarttha rĕngihta hetu ning angel cala-cala ring apa n kasinggihan

singgih yan panĕpak jajângayatakĕn kuku bisama hamöm wajâmirah

nistanya n pinalalwakĕn* ḍatĕng i māsku patayaśa ni panghyang i nghulun

nāhan byakta ni kung sang Arjjuna madadyana wacana hanorakĕñ juruh

kĕdw āmbĕk nira tan kumölakĕn unĕng rinĕngihan ira lot sinikwakĕn

ndan sang śrī nṛpaputrikâgĕyuh alök lalu wiphala tangis nirâtulak

tan wring dāya sirân kinewala makin linurung i palĕkas nṛpātmaja

byātītan panukĕr narendraduhitângĕlih alara kacidra ring gati

sah ning siñjang irân minging ndan amĕḍar tĕngah añuriga rosnya komala

mangkin twas nira sang Dhanañjaya girahyasĕn i pangawat ing smarê sira

lwir kumbang wahu kāñaran tĕkap i rūm-rūm ing asana baśânĕsĕp madhu

ri huwus ira pinurwânglih lume śrī suputrī

nṛpatanaya manambut mār mrata twas nirônĕng

sang ahayu sira sākṣāt raśmi ning padma rukṣa

cinulu-culuh ing ojar de nirângrĕs manguṇḍĕng

nṛpasuta sira mangkin tibra de śrī suputrī

kawuwuhan i kĕñar ning ḍīpa molĕm ndatan krām

makin asĕmu tulis mās de nirânglih tar olah

nṛpasuta tatan aśrw ângol amangkwângajum ken

kunĕng iki nṛpaputrī śoka moruk lumungsur

tuwin agila tĕkap ning siñjang amlĕs karāhan

krama umijil inĕmban sang priyâsih tan imbā

kamĕna nira sinocan ring surambyan cumuntĕn

kaka-kaka nira tan doh kapwa sāmpun sĕnāha

humĕnakĕn aḍamu wruh rînggitājñân patingkah

paḍa-paḍa winagĕd ring lālanâtyanta pattya

awicarita sinocan dewi tar sah makarwan

huwus aḍamu ta kālih sang sĕḍĕng wāhw apanggih

pinuyu-puyur iniryyan-hiryyan ing ceṭikâsih

rari palalun ing āmbĕk kölakĕn duhka mātra

apan iki lara rakryan ndan ya malwī lulut twas

kusuma sarasija mrik mwang mĕnūr nāgapuṣpa

mapa kari pangadeśanya ndatan len ya yogya

winiru-wiru tĕkap ning kumbang onĕng wiśīrṇna

taham ibu panahāngkwê māsku nāhan patĕmwa

maluya rari usön ring weśma tântuk haram dyah

ahĕla-hĕla sang onĕng mogha hāmhām sirângher

nahan ujar ika maswī ndan hanêrang suputrī

krama hinamĕr umantuk ring jinĕm mrik [h]umunggah

riy ulih ira suputrī ryy ânta ning weśma rāmya

nṛpasuta sira mangkin harṣa yêkângisapwan

angupuk-upuk amāswās nā ng mukâlurwa molĕm

tĕhĕr angaras awantö rūm ning ojar sawang truh

sang sākṣāt kadang ing wulan sang apatĕr turida sang ariris-riris langö

sang nityângdani kingking i ngwang asĕwö hunang athawa lulutkw asinwama

marmângol i raras-rarasta sahajâmwatakĕna sĕkar ing karāsikan

tan wring rāt ri sukangkwa yan kalawanan pawilĕtana ri tatwa ning gati

mangke pwêki dĕlön harebu sipi bhāgya ning angajĕng (ng)acatwa cumbana

rūmtêndung pinakāntya jīwita silunglung ing anĕmu sayodya ring prĕman

manggĕh nitya sinandhi ring mata tamolah angañuta ri kingking i nghulun

ndan yan mātya manĕhta sātmya ri manista ḍawuhĕn irikang tasik madhu

iti nā ta lālana nirânglipurakĕn i narendraputrikā

araras mananghulu maweh sĕpah arĕja mahânĕsĕp laṭi

tĕhĕr angririh-ririhi roma nira tama hamatya-matyani

amasang-masang ndatan alĕh mayat i gĕmuh ikang payodhara

ahirit sinambangan irêng kakawin asĕmu mombakan langö

sinĕlan-sĕlān ri rĕsĕp ing mangarĕki pipi rāmya meñjuha

ri pamāhwa-māhwan i manis ni culu-culuh irâmriyambada

anusah mayang wahu mĕkar ndan amanĕhi rinĕngwa-rĕngwakĕn

papupul nṛpātmaja lawan nṛpawaraduhitā hanêng jinĕm

mangunĕng mĕnur paḍa nira n katirah angaras ing wĕlas-harĕp

alangö hatur lĕngĕng ikang gaḍung awilĕt arok wanañjari

nda nahan patūt nira tiki n prasama-sama tinunggal ing langö

nṛpaputra rāmya ri dalĕm śayana kumawaśê* karāsikan

sakulĕm sirârddha tan arip lalu pangamĕr irê suputrikā

karĕngö prahāsana nirêka tĕkap ing anawing lawan rĕngih

saha nopurâsring atakis marahakĕna panandhi ning gati

kalalu ng wĕngi tan dwa rahina mawa teja ning ārkka lumöng

irikā ta ḍatĕng kraban ira sahananya huwus marĕpat

paḍa tânupamâparimita kadi sangka ring Indrapada

winiśeṣa tĕkap narapati Harimūrtti makon tumatā

wara saptakumārika tuwi mṛganābhi sugandha sumār

ya mamungwa langĕnya ri sira sang amūrwwa hanêng śayana

mwang ikāng asĕp angrahagi sahaja subnya tĕkânglĕngĕngi

amapag raras ing cawĕni jamaṇikanya minging tan arĕn

gupit ārjja lawan kidung ika hanameni parĕng hangawat

kahiḍĕp lĕngĕng ing madhumasa ri haturnya sawang bhramara

swang angimbuhi raśmi tan ari pasajinya n amung salulut

angaweśa ri rĕs nira n anawung unĕng sagawenya marūm

ndah awās ira sang rwa tumama ri surambyan ira n ^†majajar

krama sāmpun asoca mangĕnakĕna bhūṣaṇa pahyas ira

anawung halĕp ing sarasija sinawang madhu rūpa nira

sinara n hana^† ning kaka-kaka sararasnya n amaṇḍaga sök

wĕkasan wwaya tâmwang ira tinuha ring pura somya tuwi

winiweka sulakṣaṇa mangarahakĕn ri sirân mijila

irikā sira sang rwa tumuluy angadĕg mijilêng pasabhān

paripūrṇna ta sang Yadukula hiniwö manaḍah ri yawa

adawā n mara tingkah ira kunĕng i lingsir ikang diwasa

umulih sira sang rwa mangalihi hanêng gṛha rāmya sira

anamar lĕngĕng ing hasana kusuma rakwa lawan bhramara

angamĕr juga mangrĕbu-rĕbu mangudang rahat ing salulut

ndan arĕn rĕngu sang nṛpawaraduhitâsih irân pasĕwö

ri sawet ni manis nṛpasuta malapi twas irân masuma

kadi marmma nikang gaḍing amarĕkakĕn rarab ing jalada

rumĕsĕp sumusuk lulut ira mapisan ri narendrasuta

nṛpaputra samangkana papupul irêka mahâmirati

ri kaśaktan i kung nira pinahayu de nira ring śayana

luru ning liring oma nira pasagi laipana suswa tĕnĕng

pangamĕr pinakārcana putus i sanidhya nirân saharas

sumilih tikanang surasa ya ta bhinukti nirân sumaji

mwang ikāng upabhoga ataca paribhoga taya ng kahala

wara sarwwa wiśeṣa hinabhimata de nira kapwa hana

apan uttama wīryya haji sakala pāwak ing āṣṭaguṇa

ndah yan mangkana papupul nirâtirāmya

tan warsih samanah irâhurup lulut kung

lunghā ng lek ata malawas [h]ulah nirâtūt

solur harṣa ta masĕwö hunĕng nirâbwat

sangsiptan patĕmu nira ndatan wiwākṣan

prāptā ng dwādaśa tikanang tahun linakwan

de sang Phalguṇa matutur sirê samangkā

an sang kāri mapa kunĕng mĕne n kawuntat

jātī ning dadi tamatan wĕnang wiyoga

tṛṣṇâgöng ya ta marumah malit rikang twas

yêkângde lara baribin kaweśa denya

moghā n wismṛti ya pawehnya bhāwacakra

ngkā rakwân pangadĕhakĕn ri buddhi Pārtha

hetunya n mawara-warah sirê sang antĕn

māskw indung kita rari jīwitangkwa sākṣāt

kingkingkw îbu pahalilang ta māryya śoka

mangke pwâḍṛdha manamantarêng swacitta

göng ning bhakti ning ayayah lawan kakâsih

sangkā yan [h]ati malawas sirân tinambang

ndah kāngĕn mapa ta wĕkas nirêng kaḍatwan

nghing rakryan panuluya bhakti ni nghulun dyah

sihtângālihana umilwa ring swadeśa

rîndrapraṣṭha pahalawön humer kitântĕn

kesyan tang manah anulus swadharmma rakryan

ndah yêki n patayaśa sanghulun harêbu

prah-prahkw âniwi ri lĕbū ni jöng narendra

tan len māskw ibu dulurangkwa satyabhakti

ngkā rakryan pamahayu seccha Dharmmaputra

nā ling sang nṛpatanayângamĕr manantwa

ngkā dewī sira sumahur wuwus nirâsrĕt

swāmi wruhku bapa hiḍĕpta sādhu yogya

ndi ngwang tan tumuta purih nikang maniwya

anghing mohita tumukĕl larangkwa monĕng

ngkānêng raiṇa muwah i sang nariśwarâgöng

kintu pwa ng sanak angawe hunĕng ya manghrĕt

lud tapwan mamalĕs asih waśânglare twas

bhaktingkw î bapa bibi ta pwa tan wiwākṣan

sākṣāt parwwata Himawān lawan Sumeru

sih-sihkw î kita yadiyan hiwön winarṇna

sākṣāt sāgara paramâdhikāra ring lwā

tan warṇnan pangucap-ucap nirâta kālih

sāmpun māyu pasamayan narendraputra

ratry âmrĕm ta sira sarāmya ning jinĕm mrik

tamtam twas nira manawung hunĕng sarāga

eñjing sang nṛpaputra karwa kalulut nira mawungu mijil sakêng jinĕm

ndah yêkā n tumuluy marêng makara rāmya sira tiki parĕng macāmana

ngkā n mĕntas sira kālih ing bañu silih tusapi muka paḍĕmwan ing mata

^†lāgy âhyas tumatā patah mrik anĕcĕk-nĕcĕki sira narendraputrikā

sāmpun maywan atūt parĕng mijil^† atuntunan angalihi de nirân laku

mambö Manmatha sang hyang ing śayana munggw i pamatan ira len wajâmanis

ngkānê tumpyaṭak ing surambyan irikā sira parĕng aśilâtitih pupū

hyang ning rāsika rakwa ling ning umulat ri pangisapu nirân maweh sĕpah

yak mātyāku mapêki rāmya nika yapwan umaluya marêng madhubrata

eñjuh tan sah amuktya rūmta yan adadya ring asana minging hanêng taman

lĕnglĕngku n yadiyan kawantus irikang gaḍing angani linañcaran madhu

swarggā n mātya sinambyakĕñ juga lamun tĕlas aciri sukangkw añumbana

nāhan de nira Pārtha mojar amanis sinamakĕna pamiṇḍa ning kilang

harṣâtön angĕluk-hĕluk jariji aṣṭa nira tĕhĕr ajambatan tĕngah

janggângol laris ing pupus gaḍing ulah nira lalita suminghitêng kapö

nghing dewī mingay angrĕngih lagi lumĕnghay inarĕkan i sang nṛpātmaja

tan warṇnan sawilāśa sang rwa wĕkasan sira mijil adulur marê dalĕm

ngkānê jöng nira sang narendra Basudewa hana sira lawan Halāyudha

mwang sang śrī naranātha Keśawa ḍatĕng nṛpasuta nguniweh suputrikā

kapwâṇamya ri jöng narādhipa katanggama ta sira ri sang Dhanañjaya

sĕmbah sang nṛpaputra sajña naranātha huningan iki panghyang i nghulun

amwīt mantuka têkihĕn manĕ-manĕhta narapati* humusap ri jöng haji

manggĕh tan hiḍĕpan kṛtaghna makalis humilangakĕna puṇya sang prabhu

kady âdharmma ri denya sis bisama sang kaluputana sakêng prabandhana

sāmpunya n pamuhun Dhanañjaya kinolakĕna sira tĕkap nareśwara

bhoh rakryan wihikan nghulun bapa manahta taya cala gatinya don mami

yadyastun kawĕkas kitân tĕhĕr aparwakĕna nagara bhūmi punpunan

mwang têkang wara rājayogya sahanêng nagara kita mamuktya rumpwana

manggĕh pwântusakĕnta māsku mulatêng kawiguṇan ing anātha kāsyasih

haywêwĕh winuruk nda haywa pinalĕh tan alalisa ri sihta nistura

prihtêndung nyata dharmma ning kadi kitâniwi lawan ayayah pahaywana

mwang penâgraja yêka kawruhana sih nira katuturakĕn giṇâraray

ndah mangkā pitutur nirâmṛta hiḍĕp nṛpatanaya tĕhĕr kṛtāñjali

ngkā śrī Kṛṣṇa sirâwuwus tumuturê sira muliha sawet nirâlulut

mangkā śrī Baladewa nora kawĕkas manah ira tumutê nṛpātmaja

nghing manggĕh tak asung narendrasuta ling nira niyata hĕlĕm sirânglawad

byātītan lwir nira n angucap-ucap

lunghā ng dūtâmawa wacana haji

ri śrī Dharmātmaja yugala nira

rājyêndrapraṣṭha ya ta paran ikā

ryy ângkat ning bhṛtya haji tan ucapĕn

tingkah sang Pārtha ta sira waluyan

mantuk ri sthāna nira ta ri dalĕm

akweh tang Wṛṣṇikula lumawada

enak pāwwat niki marĕk i sira

kapwângluh denya paḍa kamasihĕn

jātī tṛṣṇângawaśa manaputi

kāngĕn sihnyê nṛpawaraduhitā

ndan dewy āmbĕk nira pinitangisan

mogângluh nāla nira kawĕlasĕn

glānângaṇḍĕh sira mayat apasah

tan wring kwān ring kṣaṇa sira n asĕkĕl

wwang ring rājya parĕng madandan umiwö wyāpāra munggw ing dalĕm

ewör denya samângarĕp madadakan kapwâsipĕt wruh kabeh

tan wāktan tikanang tumūt mara ring Indrapraṣṭha magyā parĕng

somah kapwa humung gatinya sakulĕm mwang hyas tinūnyê hati

wiwākṣan ring heñjing śubhadiwasa tang deśa wimala

lumampah Pārtha mwang kalulut ira māmwīt sira huwus

parĕng munggah munggw ing ratha sira n akarwan winulatan

tĕlas rabdha mwang Dāruki lari nira n rāmya mahalĕp

samāpta pwêkang Wṛṣṇi bala pamarākṣê laku nira

wawang lunghā sangkêng nagara lari ning syandana huwus

manah ning kāryy āśā paḍa kamadĕlön lot hali-halin

mangö monĕng cittanya kadi tĕhĕr ānglimbangângiring

ndan akweh kingkingnya nda tucapa ta sang Paṇḍutanaya

makin mintar lampah nira atita tang wanwa kalakun

sakāmbah rāmyâsring ta manginĕpa samby âmĕng-amĕnga

liniśyan[-liśyan] manglalaha lumipur kung sang araras

aneka lwir ning deśa tinĕmu nira n kapwa ya mawit

sĕnāhâwwat pawwatnya tuhu sira yan śreṣṭhi guṇamān*

yayā tan swang-swang de nira n amalĕs ing tuṣṭa dĕmakan

paḍâsrah ryy āmbĕknya praṇamadara mangkwêng nṛpasuta

asowe yadyan warṇnana lawas irân lampah anginĕp

ḍatĕng rîndrapraṣṭhâta sira pinapag ning wwang i dalĕm

makādi [ng] Kuntī Paṇḍusuta karuhun Dharmmatanaya

hatur tejândhākāra manahan ikang wwang sanagara

wawang śrī Kuntī harṣa sira n amĕkul Pārthamahiṣī

sawet ning göng ny āmbĕk nira gĕrĕmĕ de sang wahu ḍatĕng

sahôjar māskw indungku bapa ling irângrĕs kawĕtu luh

ya rakwânlĕs ngkānê gĕlungan ira sang karwa mararĕm

kunang sang śrī Dharmātmaja sira tikin n arddha magirang

lawan Bhīma mwang wīra Nakula sang antĕn paḍa suka

tumon Pārthâpan wāhu maluy apupul digjaya tuwi

makolih hyang-hyang ning Yadu nagara sākṣāt kṛtayaśa

tangeh lwir ning tuṣṭi nrĕpati sakaḍatwan yan ujarĕn

parĕng mantuk ri jro kalima sira sang Paṇḍutanaya

makêring Kuntī tan kari sang ahajöng Pārthawanitā

tĕkap dewī Kṛṣṇâmwangi sira tĕlas marmma malulut

apūrwwa lwir ning pūja paḍa sumĕnehâta ri sira

śinantyan de sang brāhmaṇa nagara wiprâdi kuśala

pĕnuh pwêkang pānotsawa sahana ning manggala kabeh

samanta strī kryan-kryan ta manguyut-uyut harṣa maniwi

samangkā ryy ântuk Phalguṇa makin agöng tang kasuyaśan

makin swastā ng rājyādhika pinahajöng tan pawaraṇa

śubhikṣa pwa ng warṇnāśrama sahana ning pora mapulih

pratāpa śrī Dharmātmaja parama diwyâmayungi rāt