Pārthāyaṇa, or The Journeying of Pārtha: Digital Critical Edition — after Creese (1998)

tustusniṅ kalaṅə̄n anindya paramārtha pinahuvus i tatvaniṅ kavi

dhyāyī sātmya ri ləṅləṅiṅ kamala hadvaya pinatəh i sāndhiniṅ hiḍəp

nyāsan riṅ kakavin tinap pinakasāntən i juraṅiṅ acaṇḍya luṅ laṅə̄

maṅgəh litniṅ adr̥śyatantra madanodaya vəkasiṅ acintya niṣkala

āpan yan vinidāna kastavan irān paṅavaki rəcəpiṅ pasir vukir

byaktāmiśra luput ndatan pahaməṅan mamiṣayani raras haneṅ kapə̄

tāvat yan guruniṅ tanah tutugiṅ ākṣara pinakahirəṅ haneṅ karas

nāhan prastutiniṅ maṅarccana rarab ni sukunira vinimba nityasa

maṅke ṅvaṅ ləṅəṅ aṅdadak tumura varṇana palupuy anātpadeṅ laṅə̄

ndan dūran katəkāna kevala mahāṅrivəgi kapana rakva yan siṅi

hāmhām de ni kətər nikaṅ jalada tibra kagagat aṅalap karas tanah

tan tuṅkul ri kapiṅgiṅiṅ hati cuməṅga raga-ragan aṅiṣṭi kośala

yan kāṅən halaniṅ tuvuh viphala nistura gati nika tan paṅenaka

vetniṅ duṣkr̥ta lot mahambalan ibək prihati viraha śoka lampunən

ləṅləṅ bhranta pinə̄m halib taya ta sāmbatən amanəhi tan sihiṅ vidhi

maṅgā mūra matiṅgaleṅ śana vanāśrama ya juga parāna menaka

donyan māntəna kaśmalanya hana darśśana ta sira saṅ āryya phalguṇa

śrī drupadātmajāpupul i dharmmatanaya dinunuṅ nire daləm

yāṅde trāsa manah dhanañjaya maṅiṣṭya layat avanavāśa tan vaneh

ṅkān māmvīt ta sire narendra pakamaṅgala kaməna nirān humaṅkata

eñjiṅ vāhu lumə̄ṅ bhaṭāra ravi muṅgu riṅ udaya madan nr̥pātmaja

sāmpun məntas aṅarccana krama mijil ta sira saka rikaṅ purāṅənəs

tar sah taṅ varayaṅ laras kavaca yeka ta vinavanira ṅ varāyudha

jāti kṣatriyadharmma maṅkana purih saṅ ataki-taki vīryya riṅ prajā

ndah śīghrān ləpasiṅ svarājya laku saṅ nr̥patanaya sinaṅgraheṅ laṅə̄

akveh sobha taman-taman katəmu denira ri vəlahaniṅ purāśrama

kayvanyān pakəmul-kəmul hima savaṅ lumuh alara mame kakiṅkiṅan

humbutniṅ liraṅ ārjja rumbay aməḍar savaṅ aṅəsah akuṅ hameri luh

luṅhā lampah i saṅ narendrasuta maṅkin umalivat adoh sakeṅ sabhā

oruk tiṅkah ikaṅ kināryyakən avarṇa salahasa yadin katoliha

tistis lvīr akəkəs-kəkəs kalamukan havuk amuni laṅə̄nya suṅkava

krāmniṅ vai manisih ya tābalut apiṇḍa pamataniṅ unəṅ linurvakən

təkvan rāmya nikaṅ basantamasa rāmya ri havanira rāmya tūt hənu

kāryy ānvam haṅəlih-ṅəlih səmi nikaṅ kayu kasirir avarṇa koyaṅan

polahnyān aṅəsah savaṅ paṅəsahiṅ ruḍita viphala kuṅnya de nira

avrā kīrṇa tibeṅ ləmah paḍa luñut kusuma nika katon sumamburat

nyagrodhānvam aneka boddhi nika yan paruruhurana len prih ambulu

lumrā ṅ pakṣy anacar paḍāsira-siran təka sumayab alivraniṅ tahən

məṅgəp syuṅnya na medi-medi sinameni bayan ika marək sagocara

ahrit śabda nikaṅ kuvoṅ siniriṅiṅ valik alara tinambaṅiṅ cucur

prāpteṅ pora ḍusun-ḍusun hana təgal-təgal i hiriṅaniṅ gunuṅ-gunuṅ

vvaṅ māhvan ya paḍāṅariṅ ndan aləbā patarukan i gagānya tūt gəgər

dudv āmə̄h susu kapva maṅkana lanā gavayan ika marək mareṅ pura

rīndrapraṣṭha nahan prasiddha pahulanya suruhan i gavenya nityasa

məṇḍuṅ vāhu sumār javuhnya maniram-nirami tarukaniṅ lurah-lurah

maṅkin kentar ado[h] himanya təkapiṅ pavana mahəli tejaniṅ ravi

bhrantā ṅ cātaka maṅlaṅūt ri surudiṅ jalada malih i rāmyaniṅ vukir

hetunyan paṅamarmmakən ri sira kelu salahasa tumiṅhali ṅ tavaṅ

tan magyā ta laris nirān krama halintaṅ i tatarabaniṅ vanāntara

kveh katyāgan aneka taṅ kabuyutan tinəmunira katon paḍāhaləp

lāvan maṇḍala dharmmaśāla kuṭi pājaran arəja vihāra sə̄h laṅə̄

liṅsirniṅ savitā pireka lavasiṅ divasa təka sireṅ sarasvatī

siṅgih nirmmala bañv inuttama pavitra pinakabañuniṅ vanāśrama

tovin śuddha hi maikalanyan apasir-pasir analaga mādrakāḍake

rañjiṅ-rañjiṅ ikālaṅə̄ panilukanyan asaji-saji pūrṇa paṅkaja

paṅliṅgan ri daləmnya tan patatalan marahakəna gatinyan uttama

āmbək saṅ nr̥paputra harṣaja tumiṅhali kaləṅəṅaniṅ mahānadī

mambə̄ rāmya ni posikiṅ jaladhi posik i bañu nika mosik ombakan

mātrānūb lariniṅ samīraṇa mataṅnya kumucak amaṅun larap-larap

ryyak-ryyaknyān lalitāmijah lvir agiraṅ ta mamapag i saṅ āryya phalguṇa

haṅsa śveta ya tānəlat ri təṅahiṅ sarayi mahas avarṇa maṅləṅəṅ

kahyun-hyun tumiliṅ-tiliṅ ri kətəriṅ bhramara vijah amanva-manvakən

lvir mājar həniṅiṅ nadī tikin inulvalaniṅ anila medy ariṅgəkan

denyāsnāna nirāgraheṅ vipula paṅkaja kahanan ikāpuḍe-puḍe

ṅkāne lvāni pasir-pasirnya tamatan dahat adaləm aṅāmbək-āmbəki

honyekaṅ kaga cakravāka kalavan priya maṅalihi menduṅ-enduṅan

muṅgvīṅ paṅkaja lot yathāsuka mapahyunan amiruru bajra keśara

keṅəl pva ṅ haravinda marmmara kacūrṇan i pakəpək ikaṅ vihaṅgama

aśrī reh ni hiriṅ-hiriṅnyan ahijo paḍa marəja baṅun linaṅvakən

deniṅ śevala məṅgəp aṅragəti pantəs aniru-niru gātraniṅ pupur

nāntən teki savaṅ paras-paras ikaṅ vvaṅ ahayu sahajāmaṅun raras

lvir saptaṅkura sumrak aṅlələh i denyan avaṅi pakis əṇḍahiṅ bañu

vvantən satpada medran aṅrarah amūrvva raras i ləṅəṅiṅ saroruha

darpanyālivəran ya monəṅ akaraṅ-karaṅ aṅarəki kosapeṅ hr̥buk

hūmrəṅ lvir kətəriṅ kapat tuvin arūm lalita jaya-jayanya komala

lvir hūṅkāra pamūrṣitanya ri narendratanaya ruməsəp nirāntara

ṅkā rakvān tuməḍun sirārahup acāmana luməkas asūryyasaivana

māryy āṅel sira denya maṅkin alilaṅ tvasira təlas irān paṅarccana

ndah məntas tumuluy sakeṅ bañu tathāpi kajənəkana riṅ śilātala

harṣānon ri pakuṅnya yāviṅ-aviṅan vatu haṅiṅin-iṅin muṅup-muṅup

len taṅ harṣa nirān mulat ri gatiniṅ piṅul amijah i lo nikaṅ bañu

təkvan medi ləkas nikin paṅicipir hana gumivaṅ anambi riṅ vatu

yekāṅde kusutiṅ nadī jaga-jaga ṅ kuluma milu kavəs marambəhan

ṅkān kāgyat təkapiṅ vihaṅga kumucup karaṇa nika larup* mareṅ rəṇək

maṅkin konaṅ-unaṅ tikaṅ valahar aṅləṅəṅi kadi hamiṇḍa riṅ tavaṅ

siṅhit pva ṅ ravi rukṣa taṅ kusuma honya ta kasavur i pombakiṅ bañu

lvir vintaṅ dinələ̄ haləpnya sumarambah anama-nama raśminiṅ suji

lvir puṣpāñjali śuddha tulya pasayutnya yan aṅucapa rakva liṅ nira

nyāśokāsana puṣpa bāṇa paḍa lurva kakiraṇan i tīraniṅ nadī

kapvāśā magəyuh laṅə̄nya katavan smi ta kusuma nikaṅ tahən madhu

tan samvas makire manis mala-malar susupana riṅ akuṅ macaṅkrama

rāmyānūt ri patiṅgaliṅ bhramara māri maṅarəki hinernya yan rurū

rūmnya ṅganya parantyaniṅ rimaṅ aṅarccana madanavilāśa riṅ jinəm

honya ṅ tañjuṅ aṅambvakən kusuma mār mrat aṅavadi sugandha kāṅinan

mambv ārūm panəḍəṅ nikaṅ śikari mogha tan akalib aliṇḍuṅan vuṅū

tapvan marmma hure ni sāntən ika molur acavit ajageṅ smarātura

kālanyan ri tiliṅ hyaṅ ārkka makucəm kaləṅəṅan ika suksəkālaṅə̄

heman tan hananiṅ mahas-mahas acaṅkrama maṅucapa rūmnya riṅ karas

sis denyan vvaya taṅ mayūra sahajāṅariṅ-ariṅ anamar mahas maṅə̄

pantəs yan kəkəsənya riṅ rasa vilāpa kaləṅəṅan ikaṅ sarasvati

maṅgəh buddhi nirān maṅə̄ miṅət-iṅət [r]yy amənanira nahan rinūpaka

siddhāniṅ lumicin maṅiṣṭya pavəkas parama r̥ṣi rikāna lakṣyakən

vetniṅ lvā nikanaṅ daśendriya ruməñcəm amaribhava litnya riṅ tutur

yekāṅde hilaṅiṅ Śivasmr̥ti ləbur bisama madəg ikaṅ rajah tamah

āṅhiṅ kottamaniṅ hiḍəp taki-takin riṅ anəmu-nəmu tatvaniṅ hurip

byaktāvās kadi cakraniṅ ratha yadin hulurana ləvu denya tan padon

āpañ jāti nikaṅ śarīra taya leñ juga dadahakəniṅ yaśādhikā

yekīn kenakaniṅ tuvuh niyata hayva maləməha riṅ viṣṭiniṅ hayu

nāhan vastu ni de nirāṅaṅən-aṅən tulusa ni paṅadeśa saṅ r̥ṣi

lvir bhrantākuyəṅañ juga* ṅ hati dhumāraṇa kapatəhaniṅ daśendriya.

āpan bheda nikaṅ hiḍəp ya ta maveh sukər aləməh i sandhiniṅ smr̥ti

hetunyan humənəṅ samāntaji vinodanan i kətər i śabdaniṅ kuvoṅ

irikā ta muvah lumaku sira ri liṅsir ikaṅ divasa

paraniṅ tvas iniṣṭinira taya vaneh ṅhiṅ ikaṅ himavān

ndah amūrvva ta lampahira taman aṅel mahavan palapat

alaṅə̄ mulatiṅ manuk aṅada-hadā ta larinya ləyəp

vaṅiniṅ vanapuṣpa maluru kasirir ya ta maṅləṅəṅi

tan arən maṅave tvasira tumaliṅe kətəriṅ bhramara

kahiḍəp ta pañumbva nika kadi kətərniṅ amūrvva lulut

araras sinamāntarakəna ri panavvaṅ ikaṅ mrak arūm

i pasañcayaniṅ vanakusuma sumār mrik amr̥ṣṭy arurū

rinarah təkapiṅ haṅin umirir aṅimbuhi raśmi nikā

kadi layvan ikaṅ kusumaśara aneka vaneh suməlap

i sukət-sukətiṅ luru-luruk anamar sinusuk-susukan

nya sudanya latāṅalaya kapanasan kadi śoka rapuh

katirah lumale sulur ika makuśā bhramitāmlas-arəp

umiṅəl pva pakis haji nika hajapən yan avarṇa humə̄t

hana rakva vəlas-harəp aṅulili muṅgv i parantyan akuṅ

aṅəlih səminiṅ maṅunəṅ asəmu lurva kəneṅ kiraṇa

lvir aṅel maṅəsah lumayana ri ləməsnya maṅanti gərəh

akiput kumisik gəsiṅ ikan aṅaveśa ri rəsniṅ unəṅ

ri huyaṅnya kinolakəna* paməkuliṅ prabhu sanmata mār

agənət pva sukətnya puru-puru latāṅkura ketnyan arəs

tuvi suṅsaṅ ikānvaṅi riy alikukunya luməṅhy aṅure

suməkar ta kayənyan umadəg i juraṅnya sugandha mavit

humənəṅ hana cəb luput ika duməliṅ ri vəgaṅnya luput

ndah atīta lavas nr̥patanaya lumakv anusup riṅ alas

kali durgga juraṅ giri gahana aneka linakva nira

tuvi lālana met ^†paranira vulakan lvah anindya suci

patapan ya ta rakva paṅinəpan ireka təhər hinivə̄^†

anusup ta muvah nr̥patanaya susatya mahāmirati

ikanaṅ vana parvvata juga pakamitra nirān vinəgil

ya ta rakva mahāsəgə-səgəhi sirāsaji sarvvaphala

hana herttali rāmya ya tika suməneha patīrthan ira

təka rakva sireṅ himagiri atisobha sabhānya katon

ndan apiṇḍa kadevatan aləp ikaṅ ārkka lumə̄ṅ manisih

kahatur jaladanya sumaput aputih kadi bapra ləṅə̄ṅ

ahurup ləyəpiṅ gagana juga ləyəpnya kunəṅ tinahā

savaṅ mosik tiṅkah ni para-parahiṅ parvvata ləṅə̄ṅ

baṅun masyaṅ taṅ cāmara kumisik osah kapavanan

halah herherən lvir ni pakusikaniṅ pādapa miṅəl

lavan luṅlūṅanyan lalita maṅuṅaṅ lot maṅalaya

ri himbaṅ-himbaṅnyān vana gahana udyāna juga ya

katampvan krām-krāmniṅ kiraṇa karahanyān panəpuhi

mamə̄ṅpə̄ṅ sāśry ārumpukana ta səkarnyeka dumilah

kadi pvāhyas harṣān tinama-tama de paṇḍutanaya

vināsvās tiṅkahniṅ halas ika savaṅ vāhv atamuyan

pasuṅsuṅnya jrahniṅ kusuma suməkar kapva ya marūm

tahən tejārumbut pracala mara sinvamnya hamirah

hatur bāṅniṅ lambe gərəmə pasənāhanya ri sira

ləbaknya kveh lvir nandanavana mahārāmya tan alah

gihānyārcəp [h]endah prasama mahaləp varṇa racana

lavan vr̥kṣanyāneka hana parijātānvam anəḍəṅ

praləmba lvirniṅ pādapa nika mure lambika mapə̄s

nadīnyānūs ləṅləṅ mvaṅ i təla-təlāniṅ paraṅ arəs

vaneh muñcār saṅkeṅ paras analaga lvir tasik anak

ri duṅhus-duṅhusnyan rucira manaruh rūmniṅ udadhi

prakīrṇā ṅ paṇḍanyāpuḍak anidəhi ṅ vuṅkal alaṅə̄

saharṣāmbək saṅ pārtha makin umanek riṅ himagiri

makin kāścaryyānon ri haləp ika sākṣāt surapada

katuṅkul-tuṅkul denya para-parahiṅ bhāratapura

ləbak luṅkan-luṅkan yy udaya śata tīrthān kalihatan

juraṅ sūkṣmātyanteṅ bisama tuvi kalyañ jaladhara

marok mvaṅ vəlkahniṅ valiraṅ aṅaras yan paṅəmuki

kasə̄ṅan teja byakta tikin atəmah vaṅkava lumə̄ṅ

pilih sə̄k truh ṅganyan lagi kinivatiṅ gəntər avarah

prabhāniṅ vve sākṣāt ya tiki kahanan nirmmalanadī

pilih gaṅgādvāreki vinuni ri denyāparimita

tumampaṅ* ta ṅvaṅ liṅnira tama tikin maṅkat aṅalih

havanyāhrit priṅgākarakal i juraṅnyāriṅi-riṅi

ləvəs denyan mevəh taya gamananiṅ vvaṅ tama təkā

yatan saṅ siddhārṣi pravara sira saṅ bhikṣuka huvus

nahan pamyaktan kottamanira ta saṅ paṇḍūtanaya

ndatan mevəh prāptān tamakəna sumadhyā parahita

ḍatəṅ saṅ pārtha ṅkā ri kahanan ikaṅ kalyan asənə̄t

katon pvekaṅ gaṅgāvivara paramānindya vimala

anūs ri lvaṅniṅ gahvara mamulakan vvenya ya mulək

apan sākṣāt hisniṅ śaśadhara huripniṅ sabhuvana

səḍəṅ prāpta ṅkā saṅ nr̥patanaya maṅkin sapurati

tumiṅhal riṅ gaṅgāmr̥tamaya haturnyeka malilaṅ

apan maṅgəh paṅdoh ni paṅavaśaniṅ tvas salahasa

rikān masnānādyus sira tuməḍuniṅ tīrthavivara

ṅkā rakvān salila ta saṅ narāryya pārtha

lāgy ākə̄m ri vivaraniṅ nadī pavitra

lyab-lyabnyātiśaya maveh manah viśuddha

masvadhyāya japa sireka yan pamūjā

bvat nārīśvara sinamādhi sūkṣmatatva

saṅkeṅ āṣṭadala haneṅ nadī pratiṣṭha

sūryyātmā hinavatakən riṅ antarikṣa

līna dhyāna ta mapisan ri vindudeva

vvantən stry ārjja marək i saṅ narendraputra

raśminyānamar ariniṅ raras maveh kuṅ

sākṣāt karttika paṅavak nikaṅ kalaṅvan

ləṅləṅniṅ vulan ajapən manis-manisnya

byaktāmuṅva ri ləṅəṅiṅ maṅə̄ vimūrccha

varṇātruh riris alaṅə̄ patahnya mār mrik

mvaṅ rupnyānələhi lanāməḍar kilatnya

tejāniṅ muka gumavaṅ makin rinəṅga

ndan saṅ pārtha sira tikin təlas masandhyā

kāṅgək cittanira tumonya tan pasaṅkan

lakṣmīniṅ himagiri jahnavīki tan len

yekān śaṅsaya tumahā riṅ indrajāla

hetunyan paṅucap arūm paran kitāntən

prāpteṅ parvvata ri səḍəṅkv atīrthayātra

nāntən tan saparaniṅ aṅləṅə̄ṅ hiḍəpku

āpan ratnaniṅ ahajə̄ṅ kitāri rakryan

jañjan lvir* cumataka sambhave rarasta

śrīniṅ tāman atava rūmnya yan vinimba

śrīdantāmithuna manisnya riṅ vajākrām

handul muṅgv i gisi-gisinya lot rumaṅkəp

endah taṅ katirah aṅaśraye laṭinta

mvaṅ nīlotpala ri matanta rūmnyan uṅgu

luṅ hiṅ* jaṅga vahu lumuṅ vvaye gulūnta

liṅkv induṅ maṅunəṅ amiṇḍa riṅ patah rūm

kambaṅniṅ priyaka məkar yy avakta mambət

[h]astāṅeraṅi səminiṅ haśoka ləṅləṅ

ndah maṅkā ṅ vətis anusah tikuṅ puḍak mrik

nyū dantāgəmuh anular ta yeṅ stanāhrit

nāhan rakva liṅira pārtha yan panantva

vruh taṅ strīṅgita ni manah narendraputra

he rakryan ləvu amanuṣya kabvatanta

prāpta ṅke tuvi tak anon vaneh juga ṅvaṅ

hāh tan popama mara gə̄ṅ nike kr̥tinta

siddhāniṅ tumama mareṅ himādri durgga

hīṅanyan putusiṅ inuttamādhikāra

yogyan śāraṇa saṅ amet kavr̥ddhyaniṅ rāt

nā liṅnyāṅupasama tovi sārjjavāsih

ndan saṅ phalguṇa mamanis vuvus nirātvaṅ

vīnaṅ dyah saṅ apa kitāhajə̄ṅ hana ṅke

tājar ṅvaṅ duga-duga hāh ləvəs mahātku

māskv īnduṅ [h]atava kitāri sūkṣmadevī

vetnyan konəṅ-unəṅ anuṅgv i kāvakanta

sakvehniṅ kusuma aṅasraye rarasta

byaktekin hana rumagət katon panivya

pintəñ janma ni ləṅəṅiṅ kapat mavak rūm

śrīniṅ sāgara madhu niṣkalāśarīra

siṅhit pva ṅ jaladhi linaṅvakən laṅə̄nya

lāvan parvvata vinaveṅ laṅə̄ salah de

rakryan tan viphala kunəṅ hayunta heman

ṅke riṅ durgga gahana tovi tuṅga-tuṅgal

lvir tan viśmaya matakut kiteṅ vanādri

vetniṅ siṅha gaja ulāṅavit lavan moṅ

maṅkā lvir nr̥patanayāməpər matakvan

ndah mājar duga-duga teka saṅ sinantva

rakryan rəṅvakəna nihan manəhta māsku

strīkanyā ṅaran ulupuy ṅhulun pva yāsih

ndah pūrvvākəna mara janma ni ṅhulun strī

śrī koravya ta karəṅə̄ gahan [h]ulā gə̄ṅ

ndātan len ri sira mahādbhuteṅ prabhāva

riṅ vīryyāpratihata tan sameṅ triloka

vvantən rājya atiśayeṅ aləp viśeṣa

deniṅ bhāsvara maṇi ratna aprameya

lvir kendran hayu nika tan pacāla riṅ śrī

kabvatnyān hana parijāta kalpavr̥kṣa

nā taṅ svargga tuvi masor hayunya kāsraṅ

deniṅ nītala pakəkəs nikādvitīya

[siṅgih yan daməlira padmayonideva]*

hetunyāsama-sama vet ny ulih nirāmrih

nā tāndəlnira bhujagādhirāja tuṣṭi

sakvehniṅ [h]uraga samanta kapva bhakti

ndah parṇah ṅhulun iki nāgarājaputrī

laṅgə̄ṅ sāśvata juga nora mātra duhka

sāntən-sāntən ikaṅ sukôttama huvus kesyan təkapniṅ yayah

yāṅde vyāpara tar jənək saka ri gə̄ṅniṅ śreṣthi kady āvarəg

āmbək tan vinaḍan mahāṅrarah i rūmniṅ deśa śūnyāsənə̄t

prāpta ṅke dumadak manəmva ri kitādevāśrayeṅ jahnavī

mogha ṅvaṅ kəna rāga tibra sinarik deniṅ smarāstrānala

aṅhiṅ his ni manis-manista taḍahəñ jampya ny unəṅkun rimaṅ

āpan hyaṅ rati marmma maṅrahatakən kiṅkiṅniṅ oghāṅaraṅ

sih rakryan palarən varāmr̥ta kitātah pāvakiṅ manmatha

mvaṅ ndyānuṅ kahaləp nikaṅ vanavaśāṅanti ṅ* sukət kāsy-asih

darppāṅiṅkis anambi riṅ vatu sumoṅ rukṣākusut nisprabhā

roṇḍon lurv aluñut ya rakva kalaśānya ndin panəmva ṅ suka

tan vāktan kəlutiṅ śarīra masamun kumrut riniṇḍiṅ lanā

saṅkṣəpanya tuhanku mantuka mareṅ nāgendrarājyāmriha

bhuktin taṅ suka bhakti ni ṅhulun agə̄ṅ sambeganən tāṅhyaṅa

nyāta ṅ nāga kabeh prabhakti tarimanta prārthananyānivi

bhoga mvaṅ paribhoga yekana hivə̄n secchānavuṅ saṅgama

nā liṅ saṅ hulupuy sarāga sumahur saṅ pārtha somyāmanis

hāh māskv ību halib pva denta maṅalap ṅkāne maṇikniṅ hati

heman raśmi nikuṅ prahāsana rasanyāmlad vaśāṅde təñuh

santoṣāñ juga denta māsku ta kari ṅ niśśrādha sih ṅvaṅ hari

maṅke kālaniṅ aṅgəgə̄ pasamayan paṅde niraṅ nārada

brāhmācāryya ya hetuniṅ malarasan ṅke riṅ himādry ānusup

aṅhiṅ dvādaśa kāla hīṅan i lavasniṅ varṣa herən təkā

yāṅde lə̄k yadiyan paṅisyana sarāgāmūrvvakən saṅgama

nāhan teki sahur saṅ arjjuna muvah mojar tikaṅ kāminī

ḍū svāmiṅku salah tikāṅaṅən-aṅəntāmrih [r]yy ujar saṅ r̥ṣi

vruh ṅvaṅ don i vuvus nirān gumavaya ṅ protsāha sambhodhana

siṅgih śrī drupadātmajā sira tikāṅgəhniṅ bratantānaḍi

len saṅke rasikāparan ta kasalah dentāṅgəgə̄ saṅgama

tan saṅkeṅ paraḍāra ləmpunən* ujarkv āmūrṣitāmrih rəṇa

vr̥ddhyāniṅ kulavaṅśa donya pahayunta ṅ kāmamudrāgama

nāhan bhyāsakəna prihən təpət ikaṅ dhyāyī təkeṅ śūnyata

mapa kari citta saṅ nr̥patiputra hinuluran ujarnya met* sivi

humənəb-ənəb ndan āmbəkira siṅgih ujar ikan aminta taṅgapən

karaṇa nirān paṅayvakəna liṅnya hinubhayan apan pareṅ hayu

apituvi tan pacāla riṅ arūm taya vipata kunəṅ hiḍəp nira

nda huvus atūt vilāśanira sotan i manahiṅ atuṅgalan hunəṅ

aṅadəg adan ta rakva nr̥paputra dinulurira nāgakanyakā

ri bəla[h] ikaṅ vasundara nahan ta havanira mare[ṅ] rasātala

tuhun alaris sirāpaduluran suka tinuduh i tiṅkahiṅ hənū

katəmu tikāṅ anālaya vaṅun-vaṅunan ika anopameṅ haləp

racana nikaṅ humah kanaka gopura pagər ika kapva mās maṇik

svaṅ asəmu tejamaṇḍala parəmpvan ika paḍa-paḍāmaṅun hulap

iniṅət-iṅət hayunyan adhikāra saka ri hayuniṅ kadevatan

surabhavanāsinaṅ təkap ikaṅ dinakara vararatna bhāsvara

hivag ika yan makāntaṅ akucəm lalu divasa ri kālaniṅ kuləm

kunəṅ irikaṅ rasātala ya tāṅuraṅ-uraṅi pətəṅ təkeriya

ya juga lanāsinaṅ təkap ikaṅ sphaṭika maṇi suteja nityasa

irika narendraputra tinamākəna təkapira nāgakāminī

asaji haləp nikāṅ alaya kañcana pinacira vastv anindita

hana vanitārjja kapva sinavaṅ maṇik aṅuray arūm raras nikā

amuhara kuṅ liriṅnya dinələ̄ ləməs ikan aśarīra pādapa

vvaya ta marək sumaṅgraha maṅasvakəna pamapaganya riṅ tamuy

apənəd avətva-vətvan i kapantəs ika ta magəsəṅ riṅ iṅgitā

aləbu-ləbū raras ni saḍəkiṅ kusuma paḍa miṅiṅ kinasturi

sinavava raśmi maṅjəṅərakən pasaji-saji manis tiniṅhalan

hana vaṅunan gr̥hasphaṭika paṅkaja madana hatəpnya mās tatur

arəja rinəṅga puṣpamaya kapva maṇimaya lumə̄ṅ haneriya

hana ta kunaṅ sumajya pavirāman ika gəlaraniṅ smarāstuti

ndan inapi raśmisañcaya jahitnyan asəmu parahasyaniṅ vulan

irika ta muṅgahiṅ pakasutan saṅ ahayu kalavan nr̥pātmaja

paṅavaśaniṅ paḍa priya matūt vavaṅ aruma[h] ikaṅ raras hati

papupul irān haneṅ śayana rāmya paḍa sira makesiniṅ manis

asəmu pamiṇḍaniṅ mənur aṅayvakəna raras arok lavan gaḍuṅ

hana ta vaneh patūtnira hatur salaga marək i rāmyaniṅ nadī

niyata juga ṅ ratih makalavan manasija sira karva riṅ jinəm

pavilət i sandhiniṅ gati ciniṇḍyanira tələṅ ikaṅ smarāgama

kṣaṇika tatan kapaṅgila pasuṅsuṅan akəcap ireṅ pasaṅgaman

kunəṅ i huvus nikaṅ gati təkap saṅ amithuna laṅə̄ nireṅ tilam

vavaṅ alulut sirārddha kaharas maṇik i hati nirān hañar vaśi

parəṅ umijil sirāśila makālihan ajajar i heṅ nikaṅ gr̥ha

hana humaḍaṅ marək saparivāranira umupacāra saṅgraha

ri yava nikaṅ gr̥hasphaṭika parṇahira kadi sakeṅ smarālaya

paḍa sumənāha taṅ taḍah aneka parama rasa pattya ṅ enaka

ri təlas irānaḍah krama parəṅ ta sira maluy umuṅgaheṅ jinəm

bətah anavuṅ hunəṅnira haneṅ śayana taya kavarśihiṅ gati

suka-suka saṅ səḍəṅ maṅayu raśmi saturida haneṅ pasaṅgaman

tuvi pinagantakən mahasa lālana madulur anis mareṅ taman

tan aləh ahimya-himyan aṅusir sakaləṅəṅan ikaṅ pajaṅ vulan

sahaja marāṅrərəb-rərəb akālihana jinəm apuṣpa pādapa

paṅirim-irim nikaṅ masa kapat patər amijah aṅambvakən riris

umahas-ahas ta rakva sira rāmya manəpərakəniṅ tapovana

ṅuni-ṅuni riṅ nadītaṭa mareṅ juraṅ amarəki durgganiṅ paruṅ

hana vulakan pamenanira lot aṭika-ṭikan asaṅva kuṅ lulut

salavas irāṅurən turida harṣa silih-asih aṅekacumbana

vruh amiṣayeṅ rəsəp taya kagiṇḍalira paḍa sarāga tan vival

jənək amuluṅ-muluṅ madanatantra taya kahala de dhanañjaya

sinamaya sūkṣma liṅganiṅ akuṅ ndan apagəṭa mivə̄ ṅ karāsikan

taṅeh lavas ireṅ rasātala hana

ndatan dva mavəkādhikāra nipuna

inakvanira vīra riṅ raṇa hələm

ya rakva iravan ṅaranya karəṅə̄

ndatan malupa saṅ narendratanaya

prayojana jugeki nitya katutur

ya hetuniṅ adan humaṅkata muvah

sinantva vinarah ta saṅ priya huvus

samaṅkana sirān lumakva maliha

ḍatəṅ ri himavān ta rakva vəkasan

visāta manusup sirāṅinak-inak

aneka ta juraṅ vukir paranira

kaparah tikāṅ acala rāmya amanuṣa laṅə̄nya durggama

giri nīlaśr̥ṅga karəṅə̄ tuvi gahana sukət nikaṅ vukir

apəluk juraṅnyan adaləm śikara nika kahunduliṅ paruṅ

kumisik bañunya ya manumbər i muka tuməḍun mareṅ juraṅ

alilaṅ hilīnya gumulak maṅabarat i təlā nikaṅ vukir

susuniṅ ləmah kahiḍəpanya kadi rajata varṇa bhāsvara

amijah ḍaranya masibu mvaṅ akəpək aṅariṅ marambatan

sakadaṅ matūt ndatan arinya mamarəṅi* patīrtha saṅ r̥ṣi

alaləh katon para-parah nikin arəcəp aṅuṅkul-uṅkuli

ri hiriṅ-hiriṅnya patapan mapaṅajaran i piṅgiriṅ paruṅ

ndah atindu-tindu patatānya sana-sini paḍāgave laṅə̄

vara puṣpadeha dumilah kadi dahana kinuṇḍa tan paḍəm

araras patiṅhalan ikaṅ para kili vinagəd raras nikā

kahatur cumāmpaka manisnya sumaji-saji tiṅhaliṅ mulat

ri pasiṇḍi-siṇḍi nika pantəs aṅayati pakiñcaṅiṅ halis

anamar kilaṅ juga liriṅnya vinulatan ikāṅhəmū-guyu

i talun-talunya ya ta lālana hamumu* gaṅan lavañ jamūr

ṅuniveh lalab paḍa vinuṅkus i jamaṅ ika tan taheṅ susu

anusah manis riṅa-riṅan yan aṅiduṅ i samīpaniṅ paruṅ

ahirit sinambaṅan ikaṅ gaguṅ asahuraniṅ juraṅ-juraṅ

irikaṅ tapovana rarasnyan abuhaya sumajya saṅ r̥ṣi

hana tāmipil kusuma darbbha hinikət inamərnya riṅ kukū

savaneh mareṅ ghaṭa lumampah aṅamər arəjāñavuk bañu

dinələ̄ manisnyan aṅənoh ruməṅu-rəṅu savaṅ surāpsarī

anəḍək tikaṅ tasik anak bañu nikan inuṅaṅ katuṅkulan

kumucup taṅ erttali sakeṅ vivara niki kavantusiṅ təṅah

amaṅun-maṅun hima lumə̄ṅ kakiraṇan atəmah kuvuṅ-kuvuṅ

savaneh katon kapaləyə̄ kadi bhujaga kuməṇḍəṅ aṅlayaṅ

səminiṅ vanāntara lume məhah aṅayam-ayam truhiṅ nadī

kadi tan pujin marək i rūmnya pinakaciri muṅgu riṅ gəluṅ

ri ḍatəṅ narendratanayāṅdurugakəna laṅə̄niṅ aśrama

huniniṅ kuvoṅ lvir aṅatag mijila hana ta saṅ dhanañjaya

rəsəp ta siraṅ āryya phalguṇa tikin mulat kāsrəpan

katon haləp ikaṅ pradeśa nikanaṅ vukir pājaran

lumūd manah irān rapuh kaṅəlihan təkapniṅ ravi

ya kāraṇa nirān tan aśru vəkasan savetnyān maṅel

hanan laku suməṅka rāmya lumihat hiriṅniṅ laṅit

linaṅvakən ikaṅ manuk vahu mulih larinyālaṅə̄

tuvi pvan alaləh lapat-lapat aḍanta-ḍantāṅlayaṅ

ya rakva sumave raras tvas anamar kəḍapniṅ vukir

havan ləṅəṅ atuṇḍa-tuṇḍa təpiniṅ juraṅnyādaləm

ikaṅ sukət anambi-nambir asənə̄t latānyān sumoṅ

luməṅhay adavā katon luṅ i galiṅnya muṅgviṅ paruṅ

hanekin amilət ri ampiji vaneh tahənyāləsəs

larap ni səminiṅ valik-kaḍəp i himbaṅiṅ pājaran

lavan pisaṅ alas pupus nika mapə̄s hatur kāṅlihan

savaṅ layu-layū lumimbay alaris səḍəṅ kāṅinan

aganti lavan aṇḍurū ya tan arən kəlabnyāṅave

samaṅkana pamaṅsuliṅ kidaṅ avās manisnyān vulat

mulat ḍara-ḍaran [n]ikaṅ vray irikaṅ tahən sambrama

sumantən anacar ta sarvvaphala honya maṅhruk parəṅ

dudū taṅ aṅariṅ lutuṅnya yan amaṅkukiṅ pāṅ jənək

taṅeh yan inivə̄n samāntara ḍatəṅ sireṅ aśrama

katon kadi sumaṅgrahe sira kayunya kumrām kabeh

səkarnya vilajeṅ ləmah kadi rurū nikaṅ bhūṣaṇa

aṅutkaṭa sumār nirāntara vaṅinya lumrā marūm

lalu ṅ ghaṭita māsa tistis ahavan ta saṅ hyaṅ ravi

sirəm-sirəm i səbsəbiṅ kiraṇa kālasandhyā huvus

avarṇa cinirup tikaṅ gagana tumraṅ abhrāmirah

urutnya sumirat-sirat karudhiran panarkeriya

makin kavuvuhan laṅə̄ racananiṅ pavitrāśrama

tuvin kinəmulan kusut ni jaladanya lumrānurun

inayvan i kukus nikaṅ huti pamūja saṅ paṇḍita

ikaṅ kaluṣa moha śīrṇa tilakanya sākṣāt gəsə̄ṅ

mirir vaṅi nikaṅ pahoman i daləmnya mavrā sumār

sugandha saha dhūpa ḍīpa humaras vaṅinyāṅasut

samanta jayaghaṇṭa-ghaṇṭi ya tikin paṅuṅkuṅ parəṅ

lavan stava karəṅv asaṅghani malap tvas aṅde ləṅə̄ṅ

manuknyan akule lanān pakuləman rikāṅ aśrama

humuṅ mahurahan kəcəknyan amicāra varṇākṣara

ləṅə̄ṅ panamayiṅ dvirepa karəṅə̄ haneṅ srak miṅiṅ

baṅun vruh aṅavat lalitya paṅiduṅnya somyārərəh

aneka ta tinon [n]arendrasuta rāmyaniṅ pājaran

ya teka magave kapūhanira tuṣṭa māntən rapuh

maṅə̄ miṅət-iṅət marāryyan irikaṅ śilālvāratā

aṅanty aṅinəpiṅ tapovana nahan tatāmbək nira

ndah ivə̄n ta saṅ r̥ṣi kabeh mijil agaravalan panuṅsuṅa

tapi-tapy adandan umijil sahananira haneṅ tapovana

ndan apadgaṭāməkasakən* daluvaṅira təhər ndatan hiner

agiraṅ-giraṅ lumihatiṅ lituhayu ya tikāṅjəṅər hati

kadunuṅ ta saṅ nr̥patiputra ta maśila ri pə̄haniṅ tapa

apənəd ri sor nikaṅ aśoka maṅisapu ya tāsuhun səkar

mututuṅ ta saṅ r̥ṣi tumiṅhali sira parameṅgitāhaləp

yadiyan mucap kusumacāpa valiṅira mulat məṅən[-məṅən]

tan alah kapūhan ika saṅ para kili kadi vismr̥ti ṅ hiḍəp

svaṅ anagva-nagvakən unaṅnya ri mata rasa tan vənaṅ hinə̄t

mavuvus ta saṅ r̥ṣi sabhāgya mami manarukeṅ tapovana

katəkān manəmva phala ni ṅvaṅ amirati ḍatəṅ nr̥pātmaja

mapa taṅ prayojana narendratanaya mahasiṅ vanāntara

kadi tambayiṅ parama māryya gatarasa mamī vanāśrama

təpətiṅ samāhita kunaṅ pinahayu hayuiṅ tapabrata

takari ṅ kr̥tārtha paṅaranya panuluyana denta sanmata

na vuvus vatək r̥ṣi narendrasuta majar i saṅ mahāyati

atərəh pva denira yathārthanira ḍatəṅ atīrtha kāraṇa

riy ulih nireṅ nitala yeka ta vinarahakən təkap nira

agiraṅ ta saṅ r̥ṣi ruməṅva kadi kavuvuhan sukābuṅah

vəkasan ta saṅ nr̥patiputra dinulur umulih riṅ aśrama

ri ḍatəṅ nirān pinaripoṣita təkapira saṅ vatək r̥ṣi

hana tārggha pādya saha mūlaphala lavan ikaṅ mahoṣadhi

suka saṅ dhanañjaya kaveni manahira təkap mahāmuni

iti nā səḍəṅ nr̥patiputra hana ta sira riṅ tapovana

pinaran-paran ta sira de para yati malulut mare sira

mahasiṅ tapovana vinūrṣita saparan ire mahāyati

nda aneka denira maharsuka ri sira vatək mahājana

pira teki rakva ri lavasniran aməgil i saṅ mahāyati

kadi tan haneki dumage samanahira parārtha nityasa

irikā sirāmuhun umaṅkata ri sira saṅ ugrapaṇḍita

karəṇan mahāmuni kumolakəna ta sira saṅ nr̥pātmaja

bapa saṅ paṅə̄baniṅ anāśraya parahita dharmma riṅ prajā

katəkān manəmva suka riṅ kadi kita guṇavān ṅhulun tuhan

nyata saṅ mahājana tamolahiṅ acala kita prayojana

kita māsihānulusakən patayaśa pinakāśrayeṅ hayu

na vuvus dvijarṣi sira saṅ nr̥patanaya təhər umaṅkata

mahavan halas-halas ikaṅ paṅajaran i siluk nikaṅ vukir

irikaṅ nadī siran atīrtha maharaḍin ikaṅ kasatvikan

maliheṅ purāntara kunəṅ parananira sinambrameṅ suka

vvaya teki bhūpati hinuttama suyaśa mahārddhikeṅ praja

sinivi ṅ mayūra vararājya nagaranira saṅ nareśvara

karəṅə̄ pva saṅjñanira citradahana tuhu bhūmipālaka

satatāsiheṅ agati tan vijigi siran anon nirārthakā

sira ta narendra citradahanānak anindya hayu

kadi paśarīraniṅ raras amiṇḍa ri gātra nira

svaṅ avaṅi gandhaniṅ kusuma tan pagap arddha marəs

mataṅ ika citragandha panəṅərnira rājasutā

apituvi rakva buddhi naranātha yayān masəkəl

gatinira tuṅga-tuṅgala makesi ni nāla nira

bisama ya tan kagantyana dəlāha hiḍəp nr̥pati

karaṇa nirān viraṅrvaṅ i karākṣakaniṅ nagara

paṅayam-ayam niraṅ nr̥pati mahyun amantva məne

ya ta pinametakəñ jalu sulakṣana tan kahala

makaphala vaṅśajā sumiliheṅ pura len karatun

alah apəgā ṅ manah maṅən-aṅən ryy abhilāśa nira

syapa kari saṅ mahānipuna vastu vineh atikā

maran aharəp mahalvakəna tan baśa yan kavavā

niyata kaduryyaśan liṅira tuccha gatinya təmən

tan ulahaniṅ janottama yadin parateṅ vipata

hana mara tôpamanya ta kunaṅ yadiyan varaṅən

kusuma səḍəṅ manohara sumambyakəniṅ bhramara

ləvu mara denya yogya hañaṅənya varəg juga ya

ya paṅupadr̥ṣtaniṅ taruṇa moliha tan vibaśa

karaṇa nirāsəkəl taya maṅenaki buddhi nira

luluy aṅajap ndatan palalayan tvas irābayaṅan

ṅuni-ṅuni tekanaṅ bala kadi pva ya niśśaraṇa

taya mara ṅūni liṅnya sahananya məhah malara

tuvi mara kārmmaniṅ dadi ikaṅ rva tumūt mijila

hala hayu yeka rakva tinəmunya lanā manapəl

paḍa-paḍa tan kasah pva ya rikaṅ dadi janma kabeh

sudhana kr̥pāna len ganal alit taya tan kahana

vvaṅ alupa riṅ rasāgama anāḍi Śivasmaraṇa

niyata nikān panəmva hivəhiṅ dadi tan ləpasa

kathamapi saṅ mayūrapati satvika lot ginəgə̄

panəmu nireṅ inak ruḍita śoka marək maṅikū

ya tika ginopiteṅ hr̥daya gə̄ṅ ni kaduhkan ira

ya juga lanā linālana vinehnira tan masukər

pasisi vanāntarāśrama nahan ta pamenan ira

bari-bari yeka rakva paṅimūr pva ri suṅsut ira

pira ta kunəṅ lavasnira narādhipa rañca makuṅ

tinuduh i siṅhitiṅ manah aṅiṣṭy avasāna nira

pamahayuniṅ hyaṅ aṅdani ḍatəṅnira pārtha məne

niyata sireka maṅruvagi suṅkava saṅ nr̥pati

tuvi karəṅə̄ ta rakva hayu saṅ vara rājasutā

aṅətərakən raras ni ləṅəṅiṅ giri māryy alaṅə̄

kalavan ikaṅ vilāpa kadi māntəna rūmnya larut

karaṇa nirān ḍatəṅ kavava de ni karəṅvan ira

prakaśita yan ḍatəṅ pravara paṇḍusute nr̥pati

sipi kari gə̄ṅ i buddhi naranātha sirātamuyan

atava kəta ṅ balāmala-malar taya len ri sira

kadi salagālabəh ri təkaniṅ ririsiṅ jalada

sahaja savaṅ mahodadhi katonan ikaṅ nagara

gumuru[h] ikaṅ vvaṅiṅ pura mijil ya tikin kətəra

ndan asəmu candrapūrṇa nr̥paputra sumə̄ṅ iriya

ya ta karaṇanya sə̄k turida lot kumisik maṅəsah

iniṅət-iṅət haləpnira narendrasutātiśaya

madana basanta komala lavan madhumāsa ḍatəṅ

tuvin anivaryyaśakti lituhayv aguṇeṅ samara

nr̥pasuta kevalāta viṣaya ny ucapanya vagus

irika ta saṅ nareśvara marək ri narendrasuta

vulat amanis panuṅsuṅira sārjjava buddhi nira

ruməsəp i nāla saṅ vahu ḍatəṅ ta panantva nira

sipi kari bhāgyamānta mami vet ni ḍatəṅta laki

kadi tr̥ṇavr̥kṣa [rukṣa] makirih ya paḍaṅkva huvus

hinilan ikaṅ hudan bisama kuṅnya maṅel aṅajap

kavadiy uyaṅnya kāvit asəvə̄ pva ya niskaraṇa

amənaṅi sih bhaṭāra suranātha tahāṅkva kita

kalavan ikiṅ kaḍatvan atiśuṣka ləvəs viphala

kadi hana ta svakārmma nika gāryyaṅ atah makucəm

hana mara gantaniṅ hayu kapaṅgiha denya məne

kuśala guṇanta mūlya aməṅanyan amuktya hayu

vacana narendra harṣa mavuvus ta narendrasuta

taha mara liṅta nātha katuluy pva mahā maṅuḍaṅ

parama kasajjananta atiśuddha parārtha vibhuh

suməkar i padmaniṅ hati mataṅnya sumeva haji

irika ta yan pinintanira saṅ vararājasuta*

taya vinihaṅ narāryya ri mayūra papātra nira

bapa halapənta māsku sivinənya kiteki baśa

nya pahalavə̄nta teki punagiṅkva pakīrtyakəna

prathama nikiṅ mayūra vararājya rəṅə̄nta harah

prabhu sira saṅ prabhākara nahan ta ravitkva sira

ati malavas r adəgnira tan ora tanūja haji

lumaku sirāgave tapa maṅiṣṭya anak ya ta don

karuṇa ta saṅ hyaṅ Ïśvara katon dr̥dha saṅ nr̥pati

təhər aṅanugrahānaka savijya atah ri sira

katəka-təke svaputrakula maṅkana hayva vaneh

ya tika tinūt ni vījanira yan hana riṅ nagara

təvək nikaṅ viṣama kabhukty aveh suma

taya ṅ purākr̥ta masəvə̄ vyamohita

nya saṅhulun kavəkas anak varāṅgana

katon pva tan təhər agave prajāṅhita

hudāśinanta bapa sinambhavāsiha

ikāṅ anak jalu ya pininta ni ṅhulun

yayānaka ṅhulun inahā gumantyana

pratiṣṭhiteṅ nagara ya sulkakanyakā

ahan vuvusnira nr̥paputra tan cala

inakvakən ryy anaka narendrakanyakā

jalu prasiddha sumiliheryy adəgnira

samāpta pāyuniṅ ubhayenalapkəna

huvus suvārddhana para taṇḍa de haji

panivya saṅ nr̥paduhite saṅ arjjuna

saharṣa taṅ bala ruməṅə̄ ta tan vihaṅ

pajātyaniṅ manivi susatya maṅkana

vavaṅ dine tikaṅ upakāraniṅ smara

pasaṅgrahe siran anavuṅ haneṅ jinəm

vavaṅ ndatan kahala kabeh paḍāṅhaḍā

subaddha pūrṇa vali nirāsameṅ hayu

ikaṅ vvaṅiṅ pura ruməṅə̄ yathāsuka

paḍāmahayvakən agave pamūrṣita

vaneh madan hyas ika samenakeṅ tamuy

ikaṅ kətəg-kətəg araras rinūpakā

haneki saṅgraha gr̥ha rāmya kottama

ri de nikāparimita vr̥nda riṅ haləp

anopameṅ racana kinantaniṅ raṇu

savaṅ himālaya ri haturnya komala

nahan parantyanira ta saṅ dhanañjaya

aneka taṅ surasa pasajya pāvvata

sənāha taṅ marək umivə̄ hanāṅavat

sinaṅkyaniṅ paḍahi lalitya len kətur

surup nikaṅ ravi umulih narādhipa

taya ṅ kasaṅśayanira buddhi sāśvata

savet ni gə̄ṅ i manah ire dhanañjaya

panonaniṅ suka mijileṅ mukābuṅah

prāpta narendra riṅ gr̥ha cumuṇḍuk i kahanan i saṅ nareśvarī

lāgi sinuṅsuṅiṅ smita ḍatəṅnira tinamakəniṅ vulat marūm

denira saṅ narendramahiṣī dadi mavara-varah nareśvara

[r]yy ārtha nikaṅ prayojana məne kavaraṅanira saṅ suputrikā

tan vinihaṅ təkap nr̥pavadhū yugalanira narendrakanyakā

maṅkana teki saṅ vvaṅ i daləm paḍa gərəmə hanāsəvə̄h lulut

saṅ nr̥paputra liṅnya sira vastu savava pamave suputrikā

ndā * havivākṣitan krama parəṅ narapati parateṅ suputrikā

tan dva ḍatəṅ ta rakva naranātha kunəṅ iki narendraputrikā

arddha viraṅrvaṅ epu ruməṅə̄ samanahira ta saṅ narādhipa

prāpta ta saṅ narendra ri sirāmuhara salahasān kinə̄lakən

luhnira lot pinə̄m tuhun anuṅsuṅ i təkanira saṅ narādhipa

marmma manah nikaṅ vvaṅ i daləm ri viṅitira sumə̄ṅ mənəb-mənəb

kveh paricārikānvam aṅiriṅ paḍa vihikaniṅ iṅgite sira

denya marək manimbaṅi katonan ikan asəmu pañjrahiṅ mənur

śrī nr̥paputrikāmava laṅə̄nyan amuṅari hatur niśākara

kāla nirān panəmbah alaris luṅayaniran amādapālume

ambət ikaṅ təṅah savava rosnya pañuriganiṅ aṅga tan siṅi

tovin arūm katon kirab i gātranira təkap i tejaniṅ damar

byakta vənəs nikaṅ muka savaṅ vulan aluru vaśāṅrəsi ṅ hati

ṅkān paṅucap narādhipa muvah nr̥pavaramahisī suputrikā

om rari tan vaneh kita lanā pinala-palar apuṇya ri ṅhulun

rūmta ya kesyananta atavānulusakəna hajə̄ṅ suputrikā

ṅhiṅ kita tāsyasih karaṇaniṅ tuməkakəna mareṅ nirātmakā

rakryan arebu māsku takari ṅ kita rari hinarəp-harəp mami

lāmpun ujarku denta riṅ apāku lumugasana sihkva putrikā

vet ni tuvuhta sāmpun anəḍəṅ sapaṅalapan akārmma tan sali

ndah sira saṅ dhanañjaya sivinta sira saphala sambhave kita

maṅkana liṅ nareśvara kunaṅ nr̥pavaraduhitā ndatan sahur

mepu təkāṅadəh luhira kāsrək i manahira tan vriṅ olaha

rəsnira yan lumaṅghaṇa pakon narapati ri sirāmaṅun səkəl

hetu nirān məhah juga taṅeh yan amituhu ri saṅ yayah bibi

ndah mavuvus narendramahisī tuhan ibu naranātha siṅgihən

tan hana rakva lena ri kitebu makalarapaniṅ tvaṅ i ṅhulun

vandhavavargga puṇyakəna denta yat anuvuha jalva putraja

tan maliheṅ mayūra ya ta paṅgajaha nagara sulkakanyakā

toh palalu nda hayva tumahā nr̥pati mubura dharmma saṅ prabhu

prārthana saṅ masūnva varabhāryya hana kari hivəhnya sūṅakən

piṅgiṅ ikaṅ katalyana ri sihniṅ atanaya mahəlya duryyaśa

hātnya tatan kənenaku ikaṅ hala hayu panəmunya riṅ prajā

sāmpun irān ghumoṣita mulih narapati kavəkas suputrikā

śoka tinuntuniṅ kaka amogha malumay agəyuh kakiṅkiṅan

prāpta sireṅ daləm gr̥halatā prihati pamatəkiṅ kakanyakan

kevala luhnira drava makin hinari-hari linālaneṅ kaka

strī-strī haneṅ nagara ləṅləṅ osik aṅaraṅ linurvaniṅ unəṅ

bhrantālaṅə̄ kasarikiṅ manis nr̥patiputra tibra maṅani

mogāhuyaṅ hamuni kuṅnya moyut amajaṅ śaśāṅka ri daləm

maṅkin tinəṅv an ahavan vulan ḍatəṅ irān panūkṣma turida

ānyāt ta moruk aṅure rikaṅ patiga mūrcchitāṅrəs asuma

kiṅkiṅnya lāgi tinatānya riṅ sumanasālaṅə̄ dadi ṭikā

denyāmisik-misiki ceṭi kānya laraniṅ rimaṅ kinəcapan

yāṅde təñuhnya rumase ṅ viṅitnya ri vilāpa maṅləṅərakən

vvantən kalusyan i kisapvaniṅ kaka huyaṅnya tibra tan aləh

bhrantāṅajap kalavanan raras ri rəcəpiṅ rimaṅ saturida

līlā yadin layata riṅ pasir təhər aṅiṣṭya bhāṣaracana

tañ jrih rinūdha ri panumbəriṅ ryyak arəṇah tayeṅ paṅinəpan

strī ratna dug siṅi rarasnya tekin asavaṅ səkar sumalaga

śokāṅaraṅ kapilaṅə̄ ri sor nikaṅ aśoka mār pinijətan

lot vinvaṅiṅ kaka hamatya-matyani hatur priyambada marək

tovin vruh aṅlipurakən ta kiṅkiṅ ika tan saheṅ nr̥pasuta

ndin ṅganya yan məkara dantaniṅ salaga viṣṭi rūmnya tan irəṅ

ardhāluñut ri tayaniṅ kapat marəkakən ririsnyan aməḍar

nirdon səvə̄nya kadi tan sihiṅ pavana irṣya medi capala

maṅgāṅañut jalada nisturān pinalariṅ hunaṅ katanəhan

toh ndyāvaśāna nika tan vaneh viḍala rūmnya denya kapati

nirva mrikiṅ hasana len mənūr suraga nāgapuṣpa vilaja

yar tan sinambhava nikaṅ madhubrata dumohi tan paṅarasa

lāvan hyaṅ indu māri raśmi yadyapi tinambaṅiṅ cucur akuṅ

rakryan tuhanku kita saṅ savargga ri kalaṅvaniṅ masa kapat

vruh ṅvaṅ riṅ iṅgita nikeṅ vuvusta cumiteṅ aśoka salaga

sis ta pva denta mamaṅun velaskv ibu mulat manistan alume

byaktānusah kusuma vāhu sah saka rikaṅ patah mrik avənəs

hāh dyah nihan manə-manəhta māsku marəke narendratanaya

mvaṅ ketakārjja vavanənkva cihna niki paṅhyaṅiṅ katuridan

ndin tan kasanmata katon manistan ajapən riṅ ārṇava madhu

byaktān karəm kalələpeṅ təṅah ri paṅariṣṭa rāganiṅ akuṅ

tanṅeh pvāmbək ikaṅ katəkan unəṅ

vetniṅ rāga viraṅvraṅ anaputi

hetunyan balisah paḍa malara

riṅraṅ bhranta kinə̄lnya kaḍəḍətan

tan maṅkā sira saṅ nr̥paduhitā

kiṅkiṅ tan vruh i rātnira maputək

ceṭī mvaṅ kaka lot aṅupuk-upuk

vruhnyôjar hamaveṅ rasa kalaṅə̄n

maṅkin tibra sirān məkəh asəkəl

vetniṅ tvas baribin riniṅa-riṅa

tan ryy amban sira tar kəjəp aṅaraṅ

jātīniṅ yuvatī ya tika hana

paṅde saṅ prabhu motusa ri sira

tambe rakva məne sira varaṅən

ndah yekin lumare hr̥daya nira

hetunyan sira mohita vəvəgən

gəṇḍiṅ mvaṅ padahī yava karəṅə̄

rāmyārūm paṅavatnya kiniduṅan

ləñjəpniṅ curiṅ arja pamiḍuḍuk

kapvāsraṅ sakuləm hamarimisi

saṅsiptan vəṅi sākṣaṇa kalaluṅ

luṅhā ṅ lek sumurup ta sira humə̄t

ṅkān piṅ sapta tikaṅ ghaṭita muni

kady aṅgyākən ikaṅ rahina təkā

atha suməgəp atiṅkah salvirniṅ vali sumaji

krama tumama tikaṅ vvaṅ ṅkāneṅ heṅ paḍa tumatā

divasa vimala tumraṅ hyaṅ vai bhāsvara sumirat

nagara cumaraṇākrām gəṇḍiṅ ghurṇita hamijah

nr̥pati sira sineva ṅkāneṅ maṇḍapa ri yava

makin amuvuhi sobhā ṅ rājya lvir tasik aṅəbək

vvaṅ ika supənuh aṅjrah bheda vyāpara marivə̄

saragi kumisik asraṅ rāmya lvir kətəriṅ alun

hana ta parəṅ agasyak sāmpūrṇāmaṅan aṅinum

sarahina vijah ayvan sarvvecchā taya kahala

nda tucapa nr̥paputrī ṅkāneṅ veśma piniḍuḍuk

raras i manis irānraṅ rūm-rūmniṅ ratih inajə̄ṅ

ri səḍəṅira pinə̄ṅpə̄ṅ deniṅ sthāpita ri daləm

tekapiṅ aṅajəṅ endah ndan saṅ dyah makin asuma

sumalahasa sire tvas saṅ nāthān taya tinahā

karaṇanira tan arṣeṅ rūmniṅ hyas kinənakəna

saphala sira haṅantyākən śrīniṅ kapat araras

kunəṅ i viṅit irāṅde rūkṣa lvir səkar alume

aruṇa tumiliṅ aṅdoh varṇāṅgyākəna varaṅən

patər ahirit arəs mār himpərnyān paṅavat akuṅ

irikaṅ alaya ləṅləṅ ṅkā rakryan hinarivuvu

apituvi sarəcəpniṅ nyāsanyān linaraṅakən

pamiḍuḍukan irāśrī mār mrat maṅlələhakəna

kaka-kaka tinameṅ rūm məṅgəp lvir suramahiṣī

ləvu rarasira sākṣāt hyaṅniṅ reka pinahayu

inanupama suputrī ratnānindita ri daləm

drava tatan avalə̄r lyus hyaṅ-hyaṅniṅ juruh aṅajap

ri manisiran aṅaṇḍəh kepvan rūmnya piniturun

ravi sumurup anolih krāmnyānuṅgv i laṭi nira

jalada sumaravat truh ndan byakte gəluṅan ira

dadali habayaṅan mə̄r lvir miśre rəṅuniṅ alis

kilat aluru kumiñcaṅ ṅkāne jə̄ṅnira niyata

ndan aməvəhi pamakpakniṅ maṅgalya puja-pujan

linəṅəṅakəna deniṅ vvaṅ ri jro pamiru-miru

aṅaraṅi panameni ṅ gəṇḍiṅ mvaṅ curiṅ araras

saji-saji nika mambə̄ posikniṅ [h]udadhi ləṅə̄ṅ

atha ri surup ikaṅ vai meghanyāñavəli lumə̄ṅ

masa kalima tumaṅgal ^†tumraṅ hyaṅ vulan alaṅə̄

savaṅ alara ya medī de saṅ sūkṣmaniṅ ahajə̄ṅ

alah aluru maṅanti ṅkāneṅ rəm pinisusuran^†

pamatəh i haləpiṅ hyas de saṅ vvaṅ marək i sira

lvir aṅiraṅi laṅə̄niṅ sandhyāmvīt i raras ira

ṅuni-ṅuni sarəcəpniṅ bhāṣa mvaṅ rasa palupuy

hana ri manis irāṅde kiṅkiṅ ta pva kinəcapan

avicarita suputrī ndah varṇan nr̥patanaya

kinə[na]kəna təkapniṅ pūjāsambhara hinivə̄

təkapira saṅ atiṅkah maṅke pvan pavaraṅ ira

krama tumuluy umantuk varṇan deniṅ amaraṅa

irika ta sira kālih muṅgah riṅ jinəm alaṅə̄

vidhiniṅ amayu yekān rāmyāvās ri lulut ira

asəmu ləṅəṅ aṅicchā yan kesyan karas arəṇik

saṅ ahayu sira sākṣāt rəsrəsniṅ riris alaṅə̄

ri səḍəṅiran umuṅgah ndan saṅ śrī nr̥paduhitā

sumar i hāti nirôsah tibrāśā tinamakəna

tuhun avədi savetniṅ kiṅkiṅ vāhu tinarima

tan aṅinaki riṅ āmbək tan paṅhrət prih inuluran

papupulira piniṇḍa ryy āmbəkniṅ mulat araras

pupus arəja ya tekā pamyakte nr̥paduhitā

nr̥pasuta sira himpər jaṅgāñjrah luluy aṅaras

na vuvus ika paḍônəṅ rəñcəm tvasnya ləṅərana

maṅke pvāmiṣayeṅ laṅə̄nya təkapiṅ vulan manəpuhi

abhrāvā gumavaṅ vaṅun-vaṅunaniṅ ^†gr̥hāparimita

lāvan sə̄ṅ ni vuvuṅnya kañcana rinəṅganiṅ maṇimaya

krāmniṅ lek mavənəs kasənvan i sənə̄ nikākara-kara^†

mambə̄ nyāsan ikaṅ smarāśrama haləp nikaṅ jamaṇikā

lvir digdhāha rinantageṅ aruṇa ta pva himpər aṅalih

təkvan yan hadukūla mālini paturvaniṅ gr̥halatā

ambə̄niṅ mukavāśa gopita miṅiṅ mvaṅ utkaṭa sumār

sāmpun rakva ciniṇḍya riṅ śayana saṅ narendratanaya

ṅkā saṅ dyah tinameṅ kisapvanira śoka mār mabayaṅan

tan pendah bhramarāṅamər salaga yan tiniṅgal i daləm

maṅkin lvir taḍahharṣa matta marəkiṅ niśākara ləṅə̄ṅ

saṅ ləṅləṅ sira maṅkin āṅrəs aṅəsah viraṅvraṅ avənəs

māmbət yan kinayuh təṅahnira tikin humiṅsər atulak

kiṅkiṅ lot sumaput ndatan pahaməṅan təñuh manah ira

luh ṅkāneṅ mata aṅdadak madhu tikəl ny alisnira mayat

maṅkin [h]eñjuh amātyakən kətə-kətəg ta saṅ nr̥pasuta

siṅgih yan sira pāvakiṅ madhu lavan gula drava rinok

vvaṅ tūsniṅ patəriṅ kapat malapi kiṅkiṅiṅ katuridan

pə̄hniṅ rāsika deniṅ ojar asirat-sirat manis ira

dyah saṅ katvaṅ i ləṅləṅiṅ hasana kəmbaṅiṅ sanagara

dentāṅdadya paran kunəṅ karaṇaniṅ raras rumimaṅa

harṣa pveka lavan hunəṅ karika dadya ratna vinagəd

tuṅtuṅniṅ haṅaraṅ sakeṅ smara siniddhikāra ta kita

sambandhanya manis-manista pinakadya hiṅ vvaṅ araras

tāsyāsih riṅ aṅə̄lvakən hr̥daya paṅdaniṅ manasija

nityāṅde tvas akuṅ nimittaniṅ umulv amet ṅvaṅ i kita

maṅke pvan katəkān maṅatpada rarasta riṅ pakasutan

nāhan liṅnira saṅ minanvakən irān miṅe saha taṅis

kady ālūma ləməs nikaṅ paṅavak āsmu sinvam aṅəsah

bvat paṅrājaśa saṅ narendratanaya śru saṅśaya nira

ardhāṅintay ameta rakva ri lukar ni puṇḍutan ira

om rakryan mapa viṣṭi ni ṅvaṅ aməlas-harəp cinapalan

yadyan praṅpraṅəniṅ halis kapana denya māliha laṅə̄

nohan yan curikənta riṅ vulat arūm sadenya cacahən

donkv īnduṅ hamalar sihanta riṅ unəṅ mənen tinarima

saṅ śrīniṅ tvas akuṅ kaṅelan anukər luməṅhay anaṅis

tan sārān panəpak yayāpalisa luṅhidiṅ naka nira

kokih taṅ tali-taly amogha cuculiṅ təṅah mrik alaris

lvir mātyenayatan sirāṅlalu ri rəs nirān rinabhaṣa

maṅgəh citta narendraputra magiraṅ makin tan avəliṅ

gə̄ṅ-gə̄ṅən sira tan kamāsihən i pamratiṅ smara səsə̄k

təmpunye vəkasan tatan dva rumujak mare saṅ araras

sāntən trāsa kalandəṣeṅ jaja sayatnya māṅrəs arisi

sāmpunyan kavava gupe vimūrccha saṅ dyah

himpər pādapa mavənəs hañar kalahrvan

məṅgah mār mavuṅu mareṅ dagan maṅuṇḍəṅ

siñjaṅ mriknya karudhiran mələs sujinya

yāṅde tvasniran agilāmahayvakən ken

vetniṅ rəsnira tumaheṅ ulah kapiṅrvan

tan sobhāta sira mijil sakeṅ jinəm mrik

ndah mogārəṅu tumiliṅ ri jə̄ṅ nirāmvas

kāgyat taṅ kaka ri vijil nirān sinuṅsuṅ

māskv induṅ rari palalun laranta māsku

tan pendah hañar aṅinaṅ pəḍəs ri lambe

byaktanyān ahəli rəsəp gatinya sovah

hetunyan mulih anəku ta[ma]n* masove

liṅnyāṅasvakəna rahup ri saṅ suputrī

saṅ sinvī rumaras arəs katon riṅ āmbək

mañjiṅ riṅ kṣaṇa hinatər sire kamantyan

ndan saṅ kavəkas i rūmniṅ jinəm araras tvasnira makin eñjuh

deniṅ mulat arəjāṅras manisira himpər sarasija lindi

hisniṅ kapat alaṅə̄ lvirnira tikin ojar maṅətəri ṅ āmbək

mambə̄ madhukara medəm riṅ asana mār mrik [h]atalə-taləh rūm

dyah saṅ maṇikiṅ akuṅ muṅgv i tələṅiṅ onəṅ həla-həla rāgī

darpāṅrimaṅi rikaṅ tvas luṅid i halistāṅani hati rəñcəm

ndin tan pəjaha linurvan təkap i matantāmiṣayani kiṅkiṅ

denyāṅrahatiy ^†unəṅ rūmta pinakasāntən satata tumaṅgə̄ṅ

ndan yan pəjaha kakantātəmaha sipat rup kavadi lavan ken^†

rāmyān paṅaləpi rūmniṅ vulat añəñər mvaṅ marək i kapə̄ mrik

yan riṅ jinəm aṅaras riṅ susu rumagət mvaṅ təṅah arəjākrām

rakryan mapa suka ni ṅvaṅ tinarima deniṅ maṅarəki raśmi

liṅ saṅ nr̥pasuta cumbv āṅari-hari mār mrat rasa nika ləṅləṅ

śr̥ṅgāra malapi rəs ṅvaṅ kəna turida prih malara katurvan

oruk nr̥paduhitāṅunṅun asəmu səbsəbniṅ aruṇa mātis

tapvan lumihati rūm ni[ṅ] liriṅiṅ akuṅ lvir juruh aṅañut prih

akveh rarasira maṅlālanakəna kiṅkiṅnira nr̥paputrī

harṣāṅarəki sirān aṅhulunana təkvan haṅayati sāntən

aṅhiṅ pamatəh ikaṅ cumbana təpətiṅ dhyāna samaya pinrih

yekān kadi ləyəpiṅ lod juruh inaras riṅ jaladhara rāgī

i kapiṅrva nikaṅ gati nr̥paduhitāṅlih alah mavənəs

manisiṅ muka moləm aluru kadi candra səḍəṅ makucəm

tuvi kembuhaniṅ damar anuluhi mogha təkāṅrahati

nr̥paputra makin pamasa-masa savetniṅ unəṅ tan arən

ndan ikāṅ anaviṅ paḍa ta kapilaṅə̄ kakənan turida

ruməṅə̄ ri kətərniran aṅudaṅ-udaṅ sahajāṅrarasi

sira saṅ rva tiḍəm paḍa maharip aṅel manavuṅ salulut

rasa tan huniṅeṅ uləsira saha ken kavəkas dinaga

tan ivə̄n pva panidranira ri mariniṅ gati riṅ śayana

krama meh təka taṅ rahina tuvin arūm siririṅ pavana

anavan vaṅiniṅ śri-gaḍiṅ asana puṣpa lavan kamuniṅ

ləṅəṅiṅ parahasyan asəmu pavirāman aveh tvas akuṅ

araras muni kokila nika paṅuhuhnya malon karəṅə̄

mvaṅ ikaṅ mrak aṅuvvaṅ alalə[h] irikaṅ gupurāṅlaṅəṅi

kətəriṅ bhramare kuvuṅ ika kadi cumbva vayuh maṅamər

kajənəknya vinuṅvaniṅ asana lavan puḍak ārjja miṅiṅ

saṅ hyaṅ ārkka sumənə̄ vahu tumraṅ

varṇa raśminiṅ amə̄m smita rāgī

māva taṅ kiraṇa bhāsvara lumrā

megha dhūmra sumirat-sirat abhrā

ceṭikā paḍa sənāha patiṅkah

riṅ surambyan umaḍaṅ paḍa ceṣṭa

sopacāra ḍamu yeka vavanya

kapva məñcuh atisomya saharṣa

kunəṅ saṅ karvāpə̄m lagi karahinan luhya saharas

makin kagyat vāhv āṅlilira* lukariṅ ken pinahayu

mijil saṅkeṅ jro pāmrəman ata sirān tiṅhal apəḍay

akarvan-karvan lagy aḍamu pinapakniṅ kaka-kaka

parəṅ məntas ṅkāne tataraban ikaṅ veśma mapupul

yathālīlāsaṇḍiṅ patiti-titihan paṅkvan aśila

vināsvās devī-deva haləpira saṅkeṅ surapada

marək pvekaṅ gundik ri sira matatāmaṇḍaga ri sor

ndatan maṅgəh ṅganyan mapupul i surambyan gati nira

vavaṅ monək deniṅ manisira saṅ aṅde kataləhan

kalurvan tiṅhal pintən aṅatagakən mañjiṅ i daləm

maluy muṅgah ṅkāneṅ śayana sira rāmyāvuḍa-vuḍa

tuvin [h]endah lvirniṅ pamiḍuḍukiran karva hinivə̄

arūm kady āmakpak paṅuda-ṅudaṅiṅ gəṇḍiṅ alaṅə̄

lavan [h]ambə̄niṅ [h]utkaṭa jənu vaneh gulgula mirir*

ya tāmuṅvākən rāganira rasa tan peda saharas

tabəh piṅ pat ryy ābhānira mijila saṅkeṅ gr̥ha parəṅ

sənāha pvekaṅ sarvva surasa huvus pūrṇa humaḍaṅ

karaṇḍan kapvātiṅkah atiśaya denyālava-lavā

gupit mvaṅ nr̥ttārūm panaḍahira sarvveccha tinəkān

kasiṅhyan bvatniṅ kāma ratih inajə̄ṅ riṅ pakasutan

ndatan giṇḍal deniṅ silih-asih atūt solura laṅə̄

rəsəp lvir duh ni vvah sərəh arəja lāvan vaja siṅi

samāptāṅde tuṣṭī suməkar i panoniṅ bapa-bibi

byakta huvus amatəh līlā citta narapati

maṅkin apulih inak vvaṅ riṅ rājya sapurati

vr̥ddhi vavaṅ umaluy krāmniṅ vīryya sanagara

nora sumukəri ṅ āmbək nirvighna sama-sama

tan hucapa ta lavasniṅ lek saṅ rva silih-asih

nora kavival irātūt sakrandana ri daləm

kapva paḍa maṅəne tvasniṅ nāla gāti [ni]ra

tulya maṅunəṅ umaṅkəp mvaṅ jaṅga silih-asih

maṅkin anupama sih saṅ nāthān panəkakəna

denira nr̥patiputrāveh sobha manah ira

mogha tələb alulut saṅ pārthāta juga lanā

tovi suməkariṅ āmbəkniṅ vargga bala hita

prāpta paṅətər ikaṅ rətv ākon mahas alaṅə̄

saṅ nr̥patanaya hāmhām ny āmbəknira ruməṅə̄

hetunira ta madan maṅdon maṅraraha laṅə̄

tīrtha vimala nahan bhyāṣan liṅniran atutur

sāmpun inanumatan vinvīt saṅ kalulut ira

mukya sira naranātha mvaṅ śrī varamahiṣī

ndah [h]atita sakatambe maṅkat nr̥patanaya

rabdha bala haji milvā maṅkat paḍa marəpat

rāmyārūm vaṅiniṅ taman kapavanan hūṅniṅ mayūrālaṅə̄

ṅkā tādan nr̥paputra maṅkat alaris riṅ rājyadhāny ān laku

luṅhā ṅ ratri katon tikaṅ saḍavatā kalrān rarabniṅ rəməṅ

byaktāpiṇḍa maṇik sumār sumarasah taṅ bun pənuh riṅ təgal

meh tumraṅ ravi rīndradeśa sumirat lumre lurahniṅ vukir

kumrām taṅ vanavr̥kṣa kapva mahaləp sinvamnya mabhrāraras

harṣān paṅjra[h] ikaṅ cakora ri lurahnyāsraṅ laki-stry āṅariṅ

maṅkā ṅ kokila kārkaśān uni hatur sambeganiṅ parvvata

vāhv āron amərəh-mərəh gati nikaṅ vr̥kṣākirih katraṅan

rāmyāluṅ səminiṅ latā vila-vila mvaṅ taṅ suṅutnyāsalit

ekəlniṅ katirah mure ya ta rumaṅkəp riṅ tahən kañcana

holnyāṅol hurayiṅ vanañjari hatur monəṅ paṅayvan lulut

tūt təmbiṅ ni gəgər-gəgər patarukanyāśrī kasənvan ravi

məṇḍuh ta pva pucaṅ gaḍiṅnya manəḍəṅ nyuhnyārəjātuntunan

ṅkāne himbaṅ ikaṅ gagānyan alaṅə̄ kalyan pisaṅ riṅ juraṅ

hāryyanyāgəlariṅ ləmah vahu rurū mambə̄ tikəlniṅ tanah

tandur-tanduran arja təkvan ahijo vāhv ākiris kābunan

jahli mvaṅ hvi hilus payaṅgu manəḍəṅ cuṅnyātatātūt galəṅ

len taṅ muṅgv i ləbak-ləbaknya tan adoh sāśrī ləmahnyāraḍin

varṇākāra saḍak gaḍiṅ vahu muṅup srakniṅ taləsnyāməḍar

aṅlīlā pupusiṅ liraṅ vinulatan sākṣāt panəpy āṅligā

kady āsā makuśeṅ ləmah kapilaṅə̄ jaṅganya lum yāṅajap

lvir sāntəñ juga kesisan [n]dan agəmuh ləṅləṅ nikaṅ nyū-gaḍiṅ

pintən ṅganya titir malap rarasiṅ oghānis humuṅsyālaṅə̄

ramyā ṅ caṅkiluṅiṅ juraṅ sinamayiṅ piṅnyan humuny ānaḍeṅ

eraṅnyān aṅəlik svaranyan apəyəh monəṅ maṅanti ṅ* raṅin

hə̄h-hə̄h paṅlariniṅ samīra kətəriṅ priṅ vuṅvaṅ aṅde laṅə̄

lāvan pakṣi kətur manohara karəṅva lvīr amuṅvāraras

luṅhā ta lakunira huvus makin katəmu taṅ sakamatan alaṅə̄

vvantən lura-lurah aləbān inambahira tūt halas-alas arənəb

aśrī pagaga-gagan aneka tanduran ikāta pinuyu-puyuran

heman ya vipula hinatīta mogha maṅaluṣya sumarik atalu

koñjuk cara-cara nika piṅgi-piṅgir i hənūnira təgal araḍin

muṅgv ī suku-suku nikanaṅ gəgər paḍa maṅuṅkuli tarukan ikā

traṅniṅ dinakara karaṇanya kapva paḍa vāspada tuvin aṅuṅaṅ

ṅkāne para-parah ika sūkṣma miñcuk i luvuknya hana kaluvutan

kubvanyan amarək i rəṇəs-rəṇəs lvir anular-nular i paṅajaran

sugyan ya magigu ri panas hyaṅ ārkka palapatnya kadi kadahaka

lāgy ājaga-jaga ri kadhūrttaniṅ vray avəgig ya malapa tanəman

mvaṅ sūkaravana kadurus mahāṅrabhaṣa cūra paḍa guragaḍa

nyū-danta majaja-jajar arja suṇḍay amarantya riy unur aṅavay

rāmyān paḍa ḍara-ḍaran aṅlaṅūt sabha-sabhā nikaṅ aṅapi laṅə̄

ndan vyarttha pajap-ajap anambi riṅ vut aṅavandha təhər aṅuruṭut

tan pāntara paməḍi-məḍinya kārkaśa kupiknya lalu tan inapa

honya ṅ gagaraṅan asuhun-suhun kusuma pākṣa manulari laṅə̄

ndan vismr̥ti juga ri haturnya tan pavaṅi mātra kadi tan akumə̄d

cəṅgānaru-naruh i raras nikāṅ asana riṅ kapat inalihakən

denyānasa-nasariṅ arūm apan pisaniṅūn ri ya magavay unəṅ

kamvāgan aməḍar i vaṅinya yāṅəmukakən pupulutan arusit

maṅgājəmur aṅavatakən kasinya kadi moddha kuṭila kuhira

bāṅniṅ pilapilu pamarəṅga honya suka paṅgil umavit i juraṅ

mvaṅ siṅgugu sumaji səkarnya rurv apasah asmu suma maṅalaśā

jrahniṅ vuṅa tali kadi cāla-cāla ya pujin hivag aṅani hati

dūran paṅavadi viparīta rehnyan akuraṅ-kuraṅ ulah atəṅə̄

lvir bhranta manigi-nigi maṇḍalīka sinavenya mariris umiṅəl

laṅguk ya tan amiṣaya rāga meṣi paṅalimbaṅ ika kajaruhan

nāhan racana ni ləṅəṅiṅ katiṅhalan i lampahira nr̥pasuta

akveh para tapa tumurun yathākrama cumuntən i sira lumari

masvāgata duga-duga somya mavvata mahoṣadhi phala surasa

tuṣṭenabhimata dəmakan təkap nr̥patiputra tatan upir-upir

kveh porajana tan ucapəñ jurunya pinireka paḍa-paḍa marək

sāmpūrṇa pahula nika bhoga honya phalamūla duvəgan amanis

tvak len kilaṅ sahana-hane kuvunya hinatərnya taya puji-pujin

līlā nr̥patisuta ri denya maṅkana hanāhyuniran aṅinəpā

tambe kamənanira muvah [h]umaṅkata marāvana mahas alaṅə̄

sanyāsa divasa sumurup tikaṅ ravi mataṅnira madan akuləm

ṅkāneṅ kuśala cinaturaṅgabhr̥tya paḍa tan palə-paləh akəmit

tovin hina[ri]vuvu təkap nikaṅ para duvan marək atata-tatā

ri təlas ikaṅ kuləm nr̥patiputra lumaku muvah aṅrarah laṅə̄

i silu-siluk nikāṅ acala rāmya kahavanira piṅgiriṅ paruṅ

alapat arūm karəṅvan i taluktak ika ləṅəṅ aganti riṅ juraṅ

pakəcapiṅ erttalinya tan avās tuna-tuna karəṅə̄ maveh laṅə̄

lura-lurah aṅlunaṅ ri pəlukiṅ vukir alas-alasanya tūt hiriṅ

alaləh i sornya kampira putih jalada nika katon ñamut-ñamut

hana tuməḍun maliṇḍuṅan apiṇḍa tura-turah ikaṅ vəṅin hilaṅ

kuməḍap ikaṅ valik-kaḍəp aganti kadi matag amukṣa tan hiner

atha kuməñar hyaṅ ārkka mabiṅar kadi mukaniṅ akuṅ haneṅ jinəm

apalarasan tusāra nika riṅ tr̥ṇa haṅada-hadānusup-nusup

alilaṅ avās hanāmpu tapa muṅgv i patarukan i lambvaniṅ vukir

asəmu ḍarāputih lumarap ārjja kasuluhan ikaṅ divākara

balanira rāmya tūt ri ləbakiṅ gəgər ataratayan kasamburat

mvaṅ ikaṅ alumba-lumba savaneh taṅ aruruku riṅ agra lor kidul

amija-mijah mamet ri ləṅəṅiṅ girivana pinaran paḍāgiraṅ

tuvi karəṅə̄ pratidhvaniniṅ aṅgrit aṅidəri paḍātri ghūrṇita

nr̥pasuta harṣa yan tumuruniṅ ratha lumaku mahas mapet laṅə̄

manusupa riṅ vanāntara ya kavruhana niyata liṅ nire hati

tuhun alaris tayāṅdulura kevala sira juga tan hana vruha

kalalu layat nirān ləpas adoh ndan anəbu-nəbu saṅśayālaṅə̄

kunəṅ iki saṅ nr̥pātmaja kalaṅvan i racana nikaṅ vanāṅaḍaṅ

kinivat ikaṅ mahantən aṅuṅaṅ sinama jamur i duṅhusiṅ trəbis

ya ta kahanan narendrasuta lālana tumiliṅ i rāmyaniṅ tətə̄*

hana ta parabnya mātra palupuynya riniṅa-riṅa lāgi tan lutur

patapan añar katon ri təpiniṅ juraṅ arəcəp aṅuṅkul-uṅkuli

kunəṅ iki saṅ tamolah i daləmnya kasutapanira ndatan hinop

linavananiṅ tapī pili-pilih pamuruṅiṅ [aṅ]usir jayendriya

titir aṅanam rarasnya kinirenya luməṅəri samādhi saṅ r̥ṣi

lvah amalahar [h]amānuṣa katonan ika kadi paṅipyaniṅ laṅə̄

ya juga katuṅku-tuṅkulaniṅ agra kadi ta paṅanak nikaṅ pasir

kunəṅ i sarenya rāmya hana riṅ palipiran acavit śilātala

pilih avarah pənədnya tanahən paṅudarana gurit kaviśvara

ikaṅ i təṅahnya manda tan avās karaṅ ikin amaranti riṅ bañu

ya ta dinələ̄ ndatan cala pakə̄mnya yan inupuk-upuk kasəmburan

sinahaja komalānidəhi pāṇḍan ika paran i saṅhubiṅ limut

hana ta puḍaknya keṅis aṅuḍoḍa kadi pitəṅəniṅ mahas maṅə̄

iniṅət-iṅət riṅ iṅgita laṅə̄nya pavulatan ikaṅ nadītaṭa

luluy aṅalap ri ləṅləṅiṅ apālapan aṅusira rāmyaniṅ parab

vvaya ta manuknya kīnnara lavan dali-dali təka mampireriya

hana kapukət rikaṅ vvadiṅ aket təlas asibu pijər parəṅ miḍəm

caṅak ataramtamiṅ bañu vaneh maṅadəg-adəg apakṣa bhikṣukā

aṅikət-ikət vilāśa pakaleśya nikan anuliṅi lyaṅiṅ vəlut

kapacə[h] ikaṅ maniṅṭiṅ akəcək salaki-bini milag parəṅ məsat

humənəṅ ikaṅ mayūra tan ari ñ jənək aṅigəl aṅantya riṅ bañu

nr̥paputra makin sira harṣa mulat

irikaṅ valahar mahəniṅ vimala

ya mataṅnya masə̄ ta sirān parahup

tuməḍun ri daləmniṅ anindyanadī

varamudra viśeṣa kināryya təhər

ri bhaṭāra sahasraravin pajapa

saha kūṭarahasyasamādhi nira

dudugiṅ paramārtha acintyamaya

səḍəṅ pravara phalguṇājapa manə̄b təḍuh nirmmala

ndatan dva hana ta grahāhugah agə̄ṅ matuṅgveṅ nadī

ya hetu nika tan hana ṅvaṅ umarerikālah kumə̄l

məne pva hana gandha saṅ pravara pārtha koṅas marūm

vavaṅ pva mamaṅun galaknya maganas savetnyālapa

laneṅut-iṅutən hatinya ya umə̄ṅ vibhukty ālavas

katon ya ḍuməpaṅ haneṅ bañu maṅaṅ sihuṅnyāsalit

karal-karal ike mukanya kadi rāhu rodrādbhuta

mulat nr̥patiputra tan vighani niścayātah sira

hinernira ḍatəṅnya tan dva maparə̄ harəp maṅdəmak

samaṅkana parəṅ masə̄ ta masəlur pataṅkəp nira

makin mapuliṅan paḍāṅiriṅi cidra tapvan marəs

savet ni pataruṅ nirāpan agəlis maṅinte sikəp

kadi pvan udula ṅ nadī bañu nikin katūb miṇḍuhur

hanan lvir inayun ya motər i təṅah latəknyān vutah

savaṅ tinavu de nirān silih-usī saroṣāṅdumuk

jəmūr maputəran silih-gyat avilət bətah tan maṅel

vicitra tuvi nirbhayān ginurumuṅ ndatan kātrəsan

maləs ta manikəp tuvi pva kinavil rinuṇḍək rinok

hanan parəṅ akañjaran laga nirān maraṅkəp muvah

taṅeh praṅira saprahāra ta masor ləkasniṅ graha

kacidra sinikəp ndatan dva pinutər ya kady āhaṅan

pinanduk irikaṅ śilāgra kapisan vəhaṅnyānanā

cəṅəlnya ya tikəl ndatan pabiṣa de niraṅ phalguṇa

ri sāmpun ika māti tan dva vinaverikaṅ bhūtala

mulat kapənətan ta saṅ nr̥patiputra rehnyān pəjah

baṅun paniluman hiḍəpnira rikān panon apsarī

ya rakvan avatāraniṅ vuhaya māti sākṣāt hayu

rərəb kusuma tan pəgat ya tumibe narendrātmaja

ikaṅ bhramara medran āṅhrəṅ akaraṅ-karaṅ riṅ səkar

nahan mara pamūrṣitanya ya rurū ri saṅ phalguṇa

ya kāraṇa narendraputra karəṇan matakvan sira

krama mavara-varah tikaṅ surastrī

suravanitā ṅvaṅ ikin manəhta sākṣāt

hulunanira dhanādhipa pratīta

ṅhulun iki nāma si sarvvadā ndatan len

papat ahayu sanak mamin surastrī

adulur atūt ṅvaṅ ameta rāmya secchā

katəka riṅ alakāvatī pradeśa

ya ta tamaniṅ hamarāvatī surāmya

vvaya ta sira mahārṣi siddhayogī

gumavayakən tapa tan sameṅ triloka

smaraṇanira nahan vinighna deṅku

kadi paṅatagniṅ anəmva pāpakārmma

gələṅira ta manāpa koṅ asampay

graha təmahamva kaṭuṅka ghātakeṅ rāt

na vuvusira samāntarāntasūkṣma

kami kavəkas vulaṅun saśokabuddhi

krama lumaku mamet nadī visāta

təka riṅ avindya muvah sirān kapaṅguh

mami parəṅ umusap ri jə̄ṅ nirāṅhyaṅ

ri vəlas irāta maveha ṅ antaśāpa

prakr̥tinira parārtha śantacitta

karuṇa sinambah inambvakən kabhaktin

maṅanumata anugrahāntaśāpa

valuyaniṅ aṅdadi śuddhaniṅ kajanman

palalun iki dəlāha rakva təmbe

hana ta ya pārtha ṅaranya paṇḍuputra

hanan* ikana ḍatəṅ mahas mara ṅke

rasika suməṅkakəne kitān muvah hyaṅ

ri təlas i paṅucap nireka luṅhā

kami vəkasan manusup mamet pradeśa

kalalu təka rikeṅ nadī svabhadra

təhər atəmah vuhayeka rodrakārmma

pira kari lavasiṅ yuga vyamoha

alapa vibhukti tatan vri rāt mahūṅhāṅ

mr̥ga uraga asiṅ ḍatəṅ minum vve

niyata pəjah parilənkva śīrṇa bhakṣan

karaṇa nika tatan panoñ juga ṅvaṅ

kami katakutnya kabeh musuhnya ri ṅke

makin alapa halib pva duhkapāpa

paṅavaśaniṅ [h]ati bhaṅga kaśmala bvat

kunəṅ iki ri ḍatəṅta labdhacitta

kita tiki sopananiṅ maluy surastrī

aparimita hutaṅku tan pahīṅan

kita ta suməṅkakəniṅ [h]aveci pāpa

kṣamakəna yadiyan kənoh rasanya

tuluyi usə̄nta kadaṅku hilvakənta

apan iki kavəkas mamukti duhka

paḍa ta matuṅgalaniṅ nadī ya tāṅher

nā liṅ nikaṅ suravadhū ri saṅ āryya pārtha

ndātan vihaṅ nr̥patiputra hinop asantva

yekān lum[am]pah adulur tikanaṅ surastrī

təkvan mānyāt larisnira tan parāryyan

prāpteṅ nadī kahananiṅ graha durgga rāmya

sāmpun sinəṅkakən ireka kabeh uməntas

saprīti kapva umuvah matəmah surastrī

maṅkin maṅañjali ri saṅ vara paṇḍuputra

he āryya pārtha kita sādhu parārtha riṅ rāt

rakryan prasiddha śaraṇaṅkva pavitra sākṣāt

siṅgih bhaṭāra naradeva kitāśarīra

aṅhiṅ guṇanta sumənə̄ mibəkiṅ triloka

ndah maṅka ôjar ika harṣa narendraputra

heh apsarī kita kapān aku bhagnacitta

aṅhiṅ [sva]dharmmanira sajjana sambhaveṅ rāt

nāhan tinūtkun umaropaṇakən laranta

tan saṅka riṅ rajata kañcana ratna bhoga

donkun [h]uməntasakəne kita duhkakāla

bvat saṅ kṣinatriya tatan dadi nistureṅ rāt

kīrtyādi kevala ginəgva nahan sinadhyā

nāhan vuvus pravara pārtha sahôpapattya

lvir kodanan təkapiṅ āmrəta taṅ surastrī

denyādhikāra panəmunya varaprasāddha

tan vruh pva yāmuhakaneṅ yaśa merutulya

atyanta bhāra kuśalanta təlas kabhukti

ndātan pamātra valəsaṅkva amogha nirdon

nirvighna māsku kr̥takr̥tya jayārtha maṅko

maṅgəh paṅə̄baniṅ anāśraya bhūmipāla

akveh paṅastuti nike nr̥paputra pārtha

ndātīta sāmpun amuhun ya ri saṅ kirīṭi

luṅhā parəṅ kṣaṇa məsat ya riṅ antarikṣa

riṅ svarggaloka dunuṅənya tatan vivākṣan

saṅ pārtha kāri sivuhən sira mār katr̥ṣṇan

lamlam luluy kamadələ̄n sira yan tuməṅhā

cəb ṅər manahnira rumeṅva gərəh ya māsrət

ṅkāne du kilyan anamar svaraniṅ surastrī

taṅheh paṅūhanira mogha tiliṅ hyaṅ ārkka

maṅkin sirāsəpi ri tīra nikaṅ sarasvan

rəsrəsnya kevala maśabda lumer ya medran

paṅliṅganiṅ sarayi śuddha śinuddha liṅnya

ndah varnaṇən bala nirān təka yeka magyā

kapvāruhun-ruhunan amrih anūt ri vuntat

harṣāgiraṅ hana ta rəsnya tikin silih vor

denyan ḍəṅə̄ gati ni vr̥tta nireṅ surastrī

tatkāla saṅ nr̥patiputra humer hana ṅkā

ndan saṅ mahāmuni riṅ aśrama teki vāktan

sakveh nirātapa ri deśa nikaṅ svabhadra

kapvāṅrəṅə̄ ri hilaṅiṅ bhayaniṅ patīrthan

yekān satuṣṭa magiraṅ mari de nirārəs

ṅkā prəgya maṅkata kabeh parate saṅ āryya

cuṇḍuk ta saṅ pravara pārtha səḍəṅ marāryyan

ryy ākāraniṅ lituhajə̄ṅ ya maveh kapūhan

atvaṅ saṅ arjjuna ḍatəṅnira saṅ para rṣi

ṅkānan sirāśila sasomya paḍātiśanta

mojar pararṣi tija bhāgya ḍatəṅta maṅko

ṅke riṅ svabhadra umah ārjja ri saṅ tapasvī

ndan liṅku de nr̥patiputra mareṅ vanādri

siddhyānu bhāra pinakāśrayaniṅ masadhyā

paṅde bhaṭāra niyateki jayanta riṅ rāt

byaktān kr̥tārtha ri hiḍəp mami pamrihanta

nā liṅ niraṅ rəṣi narendrasutārjjavôjar

opvan haneky anumanā mpu rikeṅ kadi ṅvaṅ

paṅgil vənaṅ dadahaiṅ maṅusir śubhārtha

icchānta mantasana kārmma nikaṅ triloka

nā liṅnira krama ḍatəṅ tikanaṅ pamṭjā

pādyādi cāmana hanārgghya vaneh sərəh vvah

lāvan mahoṣadhi dudū ṅ phalamūla pattya

vinvat nikaṅ tapi-tapī paḍa sopacāra

kāścaryya vāhu lumihat ri saṅ āryya pārtha

sis hyaṅ manobhava sireki nihan mara ṅke

sadhyā dumona mənəm aṅraraheṅ kalaṅvan

irṣyāmunah brata samādhi nahan ta liṅnya

ṅkā saṅ vatək tapa parəṅ ta sirān paṅajñe

saṅ pārtha tan dva hinivə̄ sira de pararṣi

sāmpun sirekana pinūja makin sutr̥pti

ndah riṅ samāntara mahārṣi muvah ta mojar

he saṅ nr̥pātmaja kitādhika śāraṇaṅkva

sakveh niraṅ muni sagotra kabeh rinākṣa

āpa* ndatan hana vaneh pakapuṇya jāti

saṅke panonku ri kitāñ jaya siddhakāryya

ndan mātra teki pitəṅən ṅvaṅ ikin rəṅə̄nta

yāvat sukābhyudaya tāvat ivəhnya bhuktin

vitniṅ janapriya adr̥śya mataṅnya laṅgəṅ

nāhan pradhāna pinakāsya kadharmmamūrttyan*

aṅhiṅ prihən təmən i sandhi nikeṅ śarīra

ekātva mukya sarapuṅnya ginə̄ṅ tar olah

maryyāda yukti haməṅānya nahan vinr̥ddhi

nāhan ta hetu nikanaṅ ripu tan tumampək

yapvan triloka riy avakta tatan prabheda

nirdvaiṣa deniṅ anurāga lavan kaśāntan

sakveh nikaṅ ripu ya tan tumame yave jro

sarvveccha nirbhaya kiteka sakāma-kāma

nā lvir nikaṅ samaya vinyakr̥tātiyukti

ṅkā saṅ dhanañjaya sireka manādhukāra

tovin saniścaya yinogya təmən rasanya

saṅsipta maṅkana pagoṣṭinira byatītan

prāpta ṅ kuləm ndan aṅinəp pravarāryya pārtha

ṅkāneṅ tapovana ginocara saṅ tapasvī

rāmyāsyakāraṇa samr̥ddhya nikaṅ patīrthan

deniṅ prabhāva nr̥paputra sumiddhikāra

henak ta saṅ nr̥patiputra haneṅ paranti

riṅ sthāna maṇḍapa manojña viśuddha mārsik

simpar ya tôṅgvanira rakva muvah pinūjā

ndan saṅ vatək yati kabeh tuturuṅ visāta

ardhālaṅə̄ ləṅəṅiṅ aśrama śūnya rāmya

deniṅ niśākara ruməṅga pajaṅnya moləm

tulya praḍīpa suluhiṅ patapan katejan

mār gandhaniṅ mayaṅ arūm ruməsəp ta subnya

aṅras raras paṅəsahiṅ sara ḍanta kerir

kumbaṅ mahāṅisək-isək ri kuvuṅnya māsrət

ṅel kuṅnya riṅ vəṅi hanāḍin aśoka tañjuṅ

darpāmaṅun rəsəp i citta narendraputra

akveh pva gocara niraṅ r̥ṣi kapva tuṣṭa

lāvan narendrasuta phalguṇa rāmya sātūt

tiṅkah nikaṅ suravadhū ya vinahva-vāhvan

ndātan kathākəna ikaṅ vəṅi tan dva luṅhā

eñjiṅ ta saṅ nr̥patiputra mulih saka ṅkā

tan varṇanən ta sira riṅ vanamārga ṅūni

prāpteṅ mayūrapura rāmya sirān sinuṅsuṅ

strī rājya harṣa sahananya rikaṅ kaḍatvan

riy ulihnira ndan alavas pva pakurənira rāmya riṅ daləm

pūrṇa sanagara kagə̄ṅan inak

kavave sutr̥pta haji de saṅ arjjuna

ri patūt nirāmithuna saṅgama lulutira tan kathākəna

mānak aniru lituhayv aguṇa

vara vabhruvāhana tināma saṅ yayah

irikān kināryya viniśeṣa valinira aneka de haji

tuṣṭa manəmu maṇikiṅ jaladhi

iva maṅkaneki suka saṅ nareśvara

sira tan vaneh ri hatiniṅ sanagara karuhun vvaṅiṅ daləm

ṅhiṅ sira juga liṅ ikān sivinən

hinarəp-harəp pinakarākṣakeṅ prajā

kalaranya ṅūni ya hivə̄n kadi kalara nikaṅ tr̥ṇāṅkura

rūkṣa malar i titisiṅ jalada

kasarambahañ javuh avās hurip muvah

kadi tan pacāla sakapunpunanira katəkeṅ ḍusun-ḍusun

kapva rahayu ya ta māryy asuṅə̄b

abuṅah lvir oliha śaśāṅka bhāskara

adavān mateki sukaniṅ sanagara yadiyan vinarṇana

saṅ nr̥patanaya gumanty ajarən

atutur sire vacana saṅ r̥ṣiśvara

apitovi sāmpun aparə̄ savəlas ika tahun ya meh gənəp

hetunira tiki muvah tumihaṅ

ndan ikaṅ kadhīran i manah nirāpagəh

sira saṅ priyānira kinol inari-hari təkap nr̥pātmaja

tovi vinara[h] ikaṅ ayva tinūt

nda hələm sirān maluy umandaṅe sira

varaputrikā vruh i manah ni kalulutira tan kasaṅśaya

śāsananira paramārtha təpət

aləməh yadin kajahateṅ varāṅganā

ya ta hetuniṅ tvasira tan magigu saphala rājaputrikā

ndan liṅira pisaniṅūn mahala

yadiyan makon mulahakən kaniṣṭikān

irikā dhanañjaya marək təhər amuhun i saṅ nareśvara

tan vinaḍa sira təkap nr̥pati

tuhu sādhu satya satirun sireṅ sarāt

saṅsiptan ri təlas nirāmuhun umaṅkat atəhər alaris təke yava

tan maglis dahatən ta lampahira tūt havan aṅinak-inak pijər maṅə̄

rāmyānon laṅəniṅ pradeśa kadi tan bəsur asayut asaṅgrahe sira

hetunyan hacavit-cavit ndan amalar vinulatan aṅuṅaṅ ya tāṅaḍaṅ

piṅgir-piṅgir ikaṅ havan paḍa katon sumaji-saji laṅə̄nya yan liriṅ

nyāsanyan kamatəṅgəṅən lvir inatīta paḍa kahənəkañ jugāṅadəg

lvir tan ryy amban alə̄k mirah ni kayu teja nika cala məhah linalvakən

osik priṅnya mariṅguṅan [n]dan agəyuh ri panavatiṅ aṅin ya moṇḍuhan

vanvātyanta haləpnya sə̄h sabha-sabhā vruh anukani patiṅkahiṅ hənū

maṅhāt-hāt ya tikin panuṅsuṅ i laṅə̄nya tinəmunira yan lumampaha

honyekin valaharnya nirmmala ri heṅnya kumuliliṅi tīraniṅ ləbuh

vvaṅnyāṅaṅsva mareṅ pabañvan ika len taṅ aruruku katon paḍāhaləp

nāntən ṅganya pilih-pilih tinavuṅiṅ gati hinuḍaraniṅ kadaṅ-kadaṅ

līlā bhāva nikeniriṅ saha tabaṅ-tabaṅ araras arūm kinaṅsyakən

aśrī denya marumpukan kusuma sāhyas avahəl apənəd bhinūṣaṇan

pintən yan panəkar yathāciṅaṅ anon ri haləpira səḍəṅ halintaṅa

maṅkā tiṅkah ikāṅ avan paḍa katon kaləṅəṅan ika de nr̥pātmaja

kveh səñjaṅ majajar-jajar tuvin apañcuran atalaga kapva nirmmala

kalyan paṅkaja vāhva maikala savaṅ mukaniṅ ahayu karvaban manis

raśminyan lagi kāmukan ri vərəhiṅ bañu hasəmu kase sumār marūm

tambak-tambak ikārjja ^†kapva minahā vaṅunan ika sulakṣaṇāhayu

maṅkā bapra nikeṅ gaḍuh bhinaṭa miśra mapacira minerv agopura^†

sarvvecchān paṅave sminiṅ bhujagapuṣpa malaris anamar girahyasən

duṣṭāniṅ pavanāsriṅ edi karaṇanyan akusa-kasikan lumimbaya

kady ābhūṣaṇa raśminiṅ jriṅ avəlas-harəp arəja savaṅ vulaṅ tatur

añjrah taṅ vara padmarāga niyata vruh aṅavakəna joṅ jugāraras

kumbaṅnyālarasan yayākalib añumbana rumabhaṣa māryya koluyan

lvir tan pātma tinampikiṅ pavana nistura mavarah i raśminiṅ mənur

tiṅkahniṅ rava rāmya təkvan aməvəh-məvəhi ləṅəṅ ikin vinarṇana

kady aptyākilayūn laṅə̄nya ri laris nr̥patanaya təkāṅalimbaṅa

koṅaṅ rūm ni sare-sarenya hana pāṇḍan asaniga puḍaknya tūt sisi

pañjrahniṅ śatapatra məmbaṅ abuṅah mara haṅavay ikaṅ madhubrata

ṅkāne tīra nikānəḍəṅ suraga rājasa paḍa kadi kambaṅiṅ jinəm

honya ṅ cāmpaka kāpnətan viphala danta nika turuṅ inudvadeṅ maṅə̄

kāryy āṅlampva hunəṅnya vet ni tayaniṅ kavi humañaṅ i kuṅnya səmpalən

maṅgā māty anapih kalaṅvan aṅañut kusuma nika ləvas tibeṅ bañu

tanṅeh tiṅkah ikāṅ avan mara hiḍəp nr̥patanaya yadin davākəna

maṅkin śighra layat larisnira atīta ri lavasira sambya maṅləṅə̄ṅ

tan dvekīn kavaverikaṅ jaladhitīra tinəmunira rāmya kāhasan

alvā lvir ni bañunya śuddha kadi miśra vəkas ika lavan laṅit ləyəp

təpi-təpiniṅ lod hamuhara ləṅləṅ

i silu-siluknyārəja tuvi rāmya

hana ta ya suṅhe bañu nika māhniṅ

savaṅ akirim riṅ jaladhi laṅə̄nya

manuk aṅurambat ri təpi madhāsya

hana maputih lālana ri ya lumrā

pravala kuməṇḍəṅ kumilip atuntun

asəmu mənur lvir paṅisi jugāvrā

kadi lukariṅ ken pata-patahanya

vijah aṅariṅ taṅ himi-himi rāmya

sahaja rajaṅnyāgaravalan osyan

makukud umaṇḍəm ri surud ikaṅ [r]yyak

hana ta karaṅnyān rucira kasātan

gətəm aṅisis muṅgv iriya sumaṅlə̄k

aruñu-ruñu kraṅnya paḍa kasaṅsaṅ

mrakata kasenvāniṅ aruṇa raśmi

huraṅ aṅariṅ [ṅ]kā ri hujuṅ ika kveh

ya ta katakutniṅ vihaga tinonton

hana ta ya meṅin sumayab umiṅsor

kamaga manambər mavədi layat mūr

hivak uməsat kveh paḍa ta ya kombul

ya tika masimban mələtuk alivran

hana ta pəsut mvaṅ balanak avantah

makapaləsat pva ṅ maḍəmit inambah

ri təka nikaṅ ryyak gumuluṅ umaṇḍəm

kadi ta ya binvaṅ timi ya ta kentar

makasarakat pva ṅ hagər-agər avrā

svaṅ anuji luṅsir maṅaləpi paṅka

gumələk ikaṅ maikala ya kavantus

vavaṅ atəmah sāṅhub amava vr̥ṣṭi

təhər amaṅun vaṅkava ya katejan

anaravatāvrā kadi guruviṇḍa

hana ta rəmis kraṅ bahuvidha lumrā

kalavan ikaṅ hāryyan aṅalaśākrām

ri surud ikāṅ urmmi kumisik asraṅ

makakərəcək lot majəmuriṅ aśmā

suku-sukuniṅ parvvata paḍa rāmya

ya tika lumañjam riṅ udadhigarbha

vvaya ta gihānyāsama-sama majro

makapaləyə̄ taṅ dadali parəṅ mə̄r

hana tiki nūṣātiśaya ləyəpnya

ri təṅah ikāṅ ārṇava vahu koṅaṅ

ri gati nikendah ya juga manuṅgul

para-paraniṅ rəm hanuruni rāmya

baṇava kuməṇḍəṅ lumari layarnya

aṅulap-ulap lvirnya kadi manambay

amarahakən śrī ya ta vinavanya

yan ahiliran śrī nika pahavr̥ddhin

ikaṅ amayaṅ sə̄h manəṅa[h] asaṅkya

hanan avəlah tuṇḍan ika tumimbaṅ

lagi kabalik yeka malara kedər

təkapiṅ ivak kadbhuta giri tulya

jaladhi gərəhnyān kumətər avantə̄

kadi maṅave kavy aṅapi kalaṅvan

lalita lumimbak kadi ta ya mosik

agiraṅ anuṅsuṅ nr̥pasuta pārtha

rāmya nikaṅ sakatiṅhalan i laku nire təpiniṅ hudadhi

təkvan ikaṅ masa tuṅgaṅ acala divasanya ya tāṅləṅəṅi

tovi vələk ni kukusniṅ amadək i samīpa nikaṅ vulusan

mukṣa paroknya ri sāṅhubiṅ udadhi hatur sapadəlvan unəṅ

mvaṅ pasavah-savahanya hana pakapasan tinalun-talunan

lvir tan apujya laṅə̄nya sumaji-saji rāmya ni tambak ika

kīrṇa panuṅsuṅ ikaṅ pasuṅ asira-siran tan aganty aməsat

kāryya midəṅ ta vidəṅnya pakivəṅ-ivəṅiṅ vvad ikaṅ piḍaḍa

maṅkana kuntul ikāmulih adulur arantayaniṅ gagana

kapva mamet kahananyan akuləman apan paḍa moruk atis

vāhu sirəm-sirəmiṅ kiraṇa təkap i səbsəb ikaṅ jaladhi

təkvan ikaṅ braja yeka cumaraṇa urutnya savaṅ sumirat

ndah ri siluk-silukiṅ pasir acala madoh hana mātra lumə̄ṅ

krām-krām ikaṅ baləman vahu makapuratuk sumināṅaraman

lvir balutiṅ liriṅ oləm anahəli rapuh kavaveṅ śayana

svaṅ mavarah hana vanva pakuləman i saṇḍiṅ ikaṅ pasisi

kāla surup nikaṅ ārkka kayu nika katon guməgəs ya matis

lāgy amiluṅsuṅi rəm nikaṅ udadhi ya rakva hatur masuma

aṣṭami kr̥ṣṇa təṅah vəṅi umətu tikaṅ vulan aṅdadari

lāmpah ireka muvah pira ta lavas irāsriṅ aṅanty aṅinəp

riṅ prabhaṣa lva[h] anindya parama ya tinəmva narendrasuta

kyāti pavitra ya tāmr̥tamaya śuci śuddha hilīnya magə̄ṅ

yeka patīrthan ikaṅ yadunagara tanora vaneh karəṅə̄

hetu nikīn adhikāra śaśadhara upāla manr̥ṣṭya jagat

ṅkā pravarāryya dhanañjaya mari ta sirān pahavan pasisi

rāmya matūt təpiniṅ prabhaṣa juga sireka maṅulvan atah

mogha makuṅ lumihat sakaləṅəṅan ikin milaṅa ṅ tvas aṅel

lot asəgəh ri halintaṅira nr̥patiputra mahā suməpər

siṅgih anindya patiṅkah i racana nikaṅ lva[h] apūrvva leṅə̄ṅ

sə̄h kusumāluru hayvan*iṅ aṅusuma kāryya hane ryyak ikā

mvaṅ jənu kumkuma miśra satata karaṇanya ya nitya marūm

vvaṅ ri daləm nagara pratidina umahas ya vijah mapuḍe

byakta karaṅ bhujaganya apənəd anamar karaṅiṅ jaladhi

honya tikīn asavaṅ dviraḍa kinasutiṅ vvad ikānulale

yeka paran-paraniṅ mahas aṅapi laṅə̄ umañut turida

lot pamavāna nikāhañaṅ adulur anis maliheṅ pasisi

arcəp i təmbiṅ ikeṅ sana-sini tuvi pāṇḍan ikān panəḍəṅ

rāmya katon maṅuḍoḍa puḍak ika vaneh ta muṅup suməkar

yan rinarah təkapiṅ bhramara kajaruhan ri hr̥buknya miṅiṅ

lvir gatiniṅ paravan lumaru-laru yathāsuka maṅrabhaṣa

tan huniṅan nr̥paputra sira nr̥pati kr̥ṣṇa gumanty ajarən

ndah ruməṅə̄ hana saṅ nr̥pasuta vara pārtha saharṣa sira

śīghran umundaṅa paṇḍutanaya vara sāmbha kinon lumari

mvaṅ yaduvīra sahaśva gaja ratha surākṣa tumūt maṅiriṅ

ṅkā ri ḍatəṅnira sāmbha marək aṅayubhāgya ri paṇḍusuta

liṅnira toh parateṅ nagara sira narendra makon ḍatəṅa

sis ta giraṅnira kr̥ṣṇa atava baladeva kagə̄ṅan inak

kintu muvah sira saṅ yadukula mabuṅah ruməṅə̄ ri kita

ndah vvaya teki siraṅ nr̥pati rikaṅ araivatakāgragiri

bvat hari kīrti paṅutsava divasa nikin paripūja haji

tan kavəkas sira saṅ yadukula maṅənākəna hotravidhi

yeku kalotakənanta ri haturira yan taya riṅ nagara

nā liṅ saṅ pravarāryya sāmbha ri sirādara taya vinihaṅ dhanañjaya

ndah maṅkat sira karva muṅgah irikaṅ ratha yadukula kapva maṅdulur

līlātah tuvi darśśanīya pakatonaniṅ aṅiriṅakən paḍāhaləp

maṅkā ṅ parvvata nāma raivata ya rakva paranira saṅ āryya phalguṇa

varṇan posik ikaṅ vvaṅiṅ sanagarāsəmu salaga turuṅ kagəntəran

maṅke vāhu rumeṅva yan təka narendratanaya kadi dūtaniṅ kapat

strī-strī ratna haneṅ daləm paḍa sumə̄ṅ turida nika pinə̄m vavaṅ məkar

tan vriṅ dāya kataṇḍəgan təkap i kuṅnya paḍa rəṅə-rəṅə̄n kəneṅ hunəṅ

akveh saṅ makire sumaṅgraha manisnyan abuhaya ri saṅ hañar ḍatəṅ

dudv īkāguñəpan ya tāṅucap-ucap sira vinisikakən ya tan humuṅ

āṅrəs kelu savaṅ linad tvas iki de ni kavuvusan irāmaṅun lulut

ṅhiṅ ganyesi nikaṅ gəluṅ lamakananya təka pinamahugya sanmatan

vvantən bhranta managva-nagvakəna raśmi nika sira minuṣṭi riṅ hiḍəp

ləṅləṅnyān paṅajap priyambada nirān paṅalapi lara kuṅnya mohita

agyāmbəknya tikīn umaṇḍəma laṅə̄nya paṅudanakən*iṅ matāmanis

maṅgālampva kaninya riṅ jaja yathāsuka bhaṣama yadin pakolihən

tanṅeh varṇana buddhiniṅ vvaṅ i daləm paḍa malara kəneṅ raras hati

saṅ pārthāta ḍatəṅ ri nātha harimūrtti papupulan i saṅ vatək yadu

mukya śrī baladeva kapva marəpat sahananira ri mādhyaniṅ sabhā

sobhā sthāna supūrṇa de ni haləpiṅ para yadu kadi devatākrama

yekān śrī nr̥pa kr̥ṣṇa garjjita manahnira təkap i ḍatəṅ saṅ arjjuna

ṅkān sanyāsa sinuṅsuṅiṅ smita manohara vacana nirāmaṅun rəsəp

antənkun tan i rāt hiḍəp mami manəmvakəna kasuyaśanta digjaya

ṅke paryyaṅka kitāri māsku tariman hana humavitakən taye kita

maṅhat-hāt ṅvaṅ i māsku təkvan alavas ṅhulun aṅapi gatinta māmriha

an muṅgviṅ himavān tamolah atibhāgya katəkana mənen samāgama

paṅdeniṅ vidhi hayva vismr̥ti hivəh saṅ anəmu suka tan kabañcana

ṅke riṅ dvāravatī paṅantya ta kitāmutusa samayaniṅ mulih muvah

nāhan śabda narāryya kr̥ṣṇa sira saṅ nr̥pasuta mararəm ri jə̄ṅ nira

om om sājña narendra pəh nikaṅ anugraha saphala namo’stu kośala

nāhan liṅnira saṅ halāyudha gumanti ri siran aṅucap sagorava

toh rakryan [n]da mateki saṅ yadu kabeh kita sahaja lanenarəp-harəp

yekiṅ kāryya kināryya saṅ yadu kitāri vəkas ika dumeh sulakṣaṇa

ndah yekin paṅaropaṇanta sarabhāra ni kapagəhaniṅ jagaddhita

aṅhiṅ maṅkana siddhayātra paṅaranya larapaniṅ umantukeṅ sabhā

maṅgəh ṅvaṅ tumuteryy ulihta bapa tan kari ta sira narāryya keśava

sāmpun maṅkana de narendra baladeva tinulusakəniṅ vatək yadu

ndān āmbəknira saṅ minaṅkana savaṅ kumuda məkar inasvaniṅ rərəb

siṅgih liṅta sinambhavānulusakən kr̥tavara ri patik nareśvara

sākṣāt ambalaniṅ manəmva guṇa tan viphala juga ṅ aṅaśraye kita

henak rakva patūt ni saṅ yadu kabeh taya kavival ire saṅ arjjuna

ndah sāmpun tinamuy-tamuy ta sira saṅ nr̥patanaya samenake sira

taṅheh varṇana riṅ samāntara surup tikaṅ aruṇa ḍatəṅ tabəh vvalu

sə̄ṅniṅ megha rinaṇḍiniṅ kiraṇa varṇa cinaraṇa ginantyaniṅ kuləm

mantuk saṅ nr̥pa kr̥ṣṇa tar sah i narendratanaya malulut nareśvara

soṅgvan buddhi nirārəsəp ndan atəhər maṅalihi parahasyaniṅ kuvu

saṅsiptan gatiniṅ paḍôpasama saṅ yadukula katəke dhanañjaya

sāṅhub mvaṅ bañuniṅ samudra ya ta rakva kahiḍəpanira ndatan pahī

byātītan sira saṅ nareśvara kunəṅ tucapa gati nikaṅ vvaṅiṅ daləm

lvīr edī ri hunaṅnya ta pva masa paṅlvaṅ amaribini tiṅkahiṅ kuləm

vintaṅnyān paṅalih tinəṅvakən avarṇa cala-cala nikaṅ liriṅ miṅe

və̄rniṅ haṅsa lamuk-lamuk pilih akarvan ahañaṅa mareṅ ghaṭālaṅə̄

kāryy āśā laraniṅ madhubrata kararvan inalapan aṅanti riṅ gihā

āpan tan məkariṅ saroruha dumadyakəna hala lakunya medəman

sāmbatniṅ taḍaharṣa śoka tayaniṅ śaśi lumavad i kuṅnya riṅ kuləm

oruk trāsa savet nikaṅ navami kr̥ṣṇa tan aməḍar i tambvaṅiṅ vulan

təkvan mandra patərnya himpər aṅatag kaləṅəṅan ika tan saheṅ kapə̄

amvat gandha sirir nikaṅ pavana varṇa jarumaniṅ aṅantya maṅkata

tan dvāvās pajaṅiṅ vulan suminaṅ aṅdadari madəg i śr̥ṅganiṅ vukir

lvir harṣān paṅuṅaṅ savet ni rarasiṅ vvaṅ ahavu-havu rāmya riṅ daləm

aśrī rehnya parəṅ marumpukan aśoka sumanasa vijah mabhūṣaṇa

eñjuhnyān pagunəm-gunəm ri pajaṅiṅ śaśi hana maṅanām kukūr gəluṅ

lāgy āpet kalaṅə̄n vilāśa ni pagoṣṭi nika təhər aluṅluṅan lulut

deniṅ kuṅ rasa tan kalib juga manisnya kataləhan anon niśākara

rūmniṅ strī vinagəd riṅ iṅgita maṅambvakəna turida rāganiṅ kavi

pantəs yan mapənəd tayāṅivagakən raras i panalukatnya riṅ kiduṅ

sotanyān vinicakṣaṇeṅ nagara məṅgəp amuvuhi manis kinaṅsyakən

tapvan marmma ri paṅgarutnyan aṅalih madhujaladhi laṅə̄nya mombakan

strī-stry āṅendahakən rarasnyan apaṅus paḍa tinama təlas jayeṅ laṅə̄

aṅləñjəp ta ləkasnya maṅgupit aṅīrakəna ri rəcəpiṅ svarāvatī

seṅərnyān paṅalap gula drava lavan madhu kasiṅi sakeṅ vuluh rəmək

kady āmiśra ri tambvaṅiṅ śaśi ri denyan agaməl avaśāmiraṅrvaṅi

vvantən rāmya magoṣṭi kapva paḍa mesi turida mamanis ginocara

vetniṅ tvasnya kaḍaṅhanan təkap ikaṅ manasija pamavanya koṭuka

kiṅkiṅnyālayanan vaneh majamahan rasa kakavin umuṅgu riṅ puḍak

tibrāṅrəs hadamar vulan paṅucaranya ya kamuni unəṅnya mūrcchita

ndan saṅ vyāpaka sūkṣmaniṅ raras arūm śrīniṅ ṭikāṅiṇḍarat

antən pvāṅgəh ire narendra baladevānopameṅ kadyahan

siṅgih yan karəṅə̄ hajə̄ṅnira subhadrā saṅ maṇikniṅ purī

saṅ sākṣāt ñəñəriṅ gula drava maluy pvāṅaṭpade rūm nira

rāmyāpan hamajaṅ śaśāṅka ṅuniveh strī ratna muṅggviṅ purī

vah rūmrūm vihikan masiṇḍyan agaməl sākṣāt surastry āraras

ṅhiṅ devī sira tan vaneh panikəlanyeṅ gīta pattyānulus

denyāgasyak arūm savaṅ pasir anak kontviṅ baratniṅ kapat

tan samvas rarasiṅ vvaṅ adyah i daləm siṅgih putusniṅ manis

aṅhiṅ raśmi niraṅ narendraduhitā tan popamānuṅgali

lvir tuñjuṅ suməkar manohara lumə̄ṅ saṅke kəñarniṅ śaśi

aśrī deniran ahyas arja dinələ̄ lvir mukṣa-mukṣeṅ laṅə̄

ndah piṅ pat ri tabəhnya rakva səḍəṅiṅ strī-stry ārjja rāmyāvijah

ṅhiṅ devī sira harṣa vet ni pagaməlnyāṅde haripniṅ mata

hetunya ñ jinəm arja lāgi tinatā sorniṅ vuṅū mrik sumār

raśminyan vinahəl sminiṅ kayu manis lumrā miṅiṅ mvaṅ mənur

ṅkān pāmrəm nr̥paputrikāsəmu raras rūmniṅ ratih riṅ tilām

lolyānidra rināmyaniṅ kaləṅəṅan yekān panūkṣme hati

len taṅ pādapa kady añāmara mirir lvirnyan miguh kāṅinan

aṅriṅriṅ karahan haneṅ vivara taṅ kumbaṅ ndatan krākaśa

lāvan posik ikaṅ garantuṅ alaṅə̄ tan pāntarānraṅ patər

rāmyārūm svaraniṅ gupit sapaṅavatniṅ strī lalityāraras

kady āmakpak anurva-nurvakəna rakryan yan panidrālaṅə̄

tan pendah valiniṅ rara dyah anavuṅ śr̥ṅgāra muṅgviṅ jinəm

kaləṅəṅan ika ñəpñəp ṅkāne kvan paḍa ruməsəp

tuvi kətər i kusuhniṅ tūbanyan lagi karəṅə̄

palu daluvaṅ ikāṅgyat śabdanyāmuhara ləṅə̄ṅ

pali-palin ika masriṅ sugyan motus ahañaṅa

gərəh umuni magupyan lvir kaptyāmisiki kapə̄

kadi hamaji kucupniṅ puṣpāṅjrah səkariṅ unəṅ

haṅani hati lulut kuṅ mār mrat taṅ mayaṅ aməḍar

asana kasirir aṅras mrik gandhanya kapavanan

sahana nika laṅə̄nyan lālityāṅətəri hati

karaṇanira tan āmrəm saṅ pārthāmbəkira ləṅə̄ṅ

kəsəhiṅ anila sūbnyān maṅde srəp təka riṅ avak

valik umuni rinəṅvan sāmbatnyāmuhara pacəh

krama rahina təlasniṅ ratri lvir pinisalinan

ri məkariṅ asananye tuṅhāniṅ patapan arūm

hyaṅ aruṇa gumulak riṅ vveniṅ lod vahu humidər

kiraṇa mava ya tumraṅ diknyābhrā kadi sinəpaṅ

manuk aṅaji rikaṅ paṅ rāmyāsraṅ parəṅ amijah

bhramara humuṅ alivran muṅgviṅ srak vayuh aṅaras

irikan avas irādyus saṅ paṇḍvatmaja maraḍin

kamənanira maṅādhisthānāditya japavidhi

ulahanira saṅ amrih kastutyan tan alaṅ-alaṅ

tuhagaṇa tikuṅ āmbək bhakti ṅ hyaṅ ginavayakən

kimuta ta sira saṅ śrī kr̥ṣṇāṅgə̄ṅ japa karatun

taya viluma masadhyā līlāhyas makin ahaləp

nda i təlasira kālih sāmpūrṇārahup ajapa

krama umətu tan imbā ṅkāneṅ gopura tumihaṅ

vəḍihanira ya kumrām lvir vālārka cumaraṇa

dinakara sira sākṣāt karve tuṅtuṅiṅ udaya

yadukula təlas arppāt sāmanta krama sumaji

haladhara sira sāmpun sahyābhūṣaṇa dumilah

aparimita sirāvās siṅhākāra sabhinaya

prasama təlas adandan saṅ vr̥ṣṇy-āndaka maḍəḍə̄

krama lumaku tumanduk ṅkāneṅ kośala vəkasan

prasama təlas atiṅkah rāmyāləp taya kahala

dhvaja kuməlab ahoccālīlāneka marakata

layu-layu ya ta molah mvaṅ paṭṭāka kagurilap

yadubala vija[h] evə̄r ṅkāneṅ maṇḍala vəki sə̄k

ikaṅ aṅavat asaṅkyākveh taṅ nārttaki manaḍeṅ

təhər aməpək i kulvan vetan lor kidul aṅuhuh

murava paḍa humuṅ mvaṅ gəṇḍiṅ roñji masahuran

makin atiśaya osik kvehniṅ vr̥ṣṇi yadukula

jalanidhi kusumāñjrah sobhāhyasnya vinulatan

ṅuni-ṅuni tikanaṅ strī-strī ratnāmuhara haləp

paja-paja karikilnyān polahniṅ halis aluṅid

makin asinaṅ tikaṅ kuśala koparəṅgan i samūhaniṅ yadu kabeh

amanuṣa rehnya tulya suraloka kapva viniśeṣa kārcanan ikā

apan adukūla sə̄h saha manitra kairatila mulyavastra tinatā

asəmu siniddhikāra pinakolur-olur ika cavli varṇa dumilah

sta[va] jaya ghaṇta-ghaṇti kadi paṅhrəṅiṅ bhramara medraniṅ səkar arūm

ya tika linaṅvakən ri paṅuhuh ni śaṅka nika sinraṅiṅ gubar avū

ḍvijavara kapva mārddhava parəṅ maṅunyakəna mantra sasphuṭatara

makaphala hayvaniṅ nagara nirviruddha hilaṅiṅ durātmaka kabeh

ri huvus ikārcana [pva] vəkasan mamuṣpa ta narāryya riṅ vidhigr̥ha

lavan ika saṅ vatək yadu kabeh mamuṣpa puruṣottamāstu kinəñəp

sumilih ikaṅ yaśôttama varādi kañcana ya rakva soṅnira kunaṅ

ri sira vasundhara pratita hetuniṅ subhagakārmma saṅ narapati

vəkasan ikaṅ valikrama gumanti yeka ta dināhan adbhuta dahat

vija-vijah aśrama-śrama ta saṅ vatək yadu parəṅ tumandaṅ ahaləp

təkapiṅ amiṇḍa-miṇḍa paḍa paṇḍiteṅ raṅin abhindhivāla paraśu

makabharaṇaṅ katon larap ikaṅ rasuk ri pasəlurnya maṅkin ahulap

hana ta mapaṇḍəṅan tama silih-silih dəha palayvan arddha vihikan

parəṅ apajəg təkāruh-aruhān apan tinahu bhāvakanya riṅ ayun

kahaləp ikin supatra lumarap sipiṅ-sipiṅ ikā* karahnya kumilat

gumuruh ikaṅ gubar paḍahi lot amuntaraṅ avəh ləkasnya rabhaṣa

ikaṅ avərə̄ tumandaṅ ahaləp sabhūṣaṇa nikārasuk maṅaraman

paḍa kuməñar vijaṅnya təkapiṅ ḍaḍarnya savaneh bapaṅnya kumilat

paḍa ta rumampayak tar uniṅeṅ ulah kavəlikan kiduṅnyan akikat

ikanaṅ aminta suṅsuṅana riṅ larih ya mari lajjitāṅaca-kacak

ikaṅ aṅuṅaṅ vvaṅ adyah ana tānakiṅ kryan inucap hajə̄ṅ panagara

kapacəh anon mataṅnyan atukup ri lambay ika tan vənaṅ puji-puji

makin araras patəmvan i liriṅnya de ni kəcapiṅ guyunyan amanis

kadi pasamūhaniṅ madhu tinəṅvakən ri paməḍarnya vahva samirah

avicaritan gatinya ri tiliṅ hyaṅ ārkka tadanāntarān sinapihan

ginavay ikaṅ mahotsava ri mādhyaniṅ yaṭana de niraṅ yadu kabeh

paḍa humaḍaṅ tikaṅ surasa sesiniṅ vukir alas lavañ jalanidhi

vijah anaḍah sirekana rināmyaniṅ paḍahi deniṅ aṅlava-lavā

narapati kr̥ṣṇa pārtha baladeva saṅ nr̥patiy ugrasena manitah

karaṇa nikāsmu guntur atulumbu tulya giri pāṇa mātsya surasa

lavan upabhoga sāsiṅ inarəp-harəp ya tinəke* təkap narapati

makin avərə̄ kabehnya tuvi kāmbahan dravina sindu māstava marūm

nā lvirniṅ pūja vinyākr̥ti təkapira saṅ vīra vr̥ṣṇy ādimukya

saṅsiptan rakva sāmpun panaḍahira kabeh prīti de śrī narāryya

kintu pva ṅ vr̥ṣṇi bhr̥tya prasama-sama huvus pūrṇa riṅ pāṇa bhukti

maṅkin rāmyāvijah riṅ guvug ika savaneh lālanāguyva-guyvan

tistisniṅ vai kamantyan irika ta baladevāṅrarah laṅva-laṅvan

maṅkā śrī kr̥ṣṇa muṅgv ī vuriniran ahavan saṅka riṅ rājyadhāni

^†seriṅ saṅ pārtha riṅ śrī narapati mahavan syandanākarva-karvan

byaktekin vaiṣṇava mvaṅ madana hatur ireṅ rūpa^† karvānivaryya

təkvan saṅ vīra vr̥ṣṇy-āndaka makin apadudvan [h]amet* rāmya secchā

honyāmet-met mareṅ pājaran aṅapi laṅə̄ tīraniṅ lvah paraṅ groṅ

bheda pvāmet mareṅ śūnya vana paṅalusanyāṅuṅaṅ sāgara jro

len tekāburva-burvan vijah akəla-kəlan bhukti taṅ laryya-laryyan

maṅkin ləṅləṅ pamaṅkat* nr̥pavaraduhitā saṅ hatur citra molah

sāśrī muṅgviṅ rathārəṅga kanaka sakala hyaṅ-hyaṅiṅ karttikeṅ rūm

aṅlīlā lvir sakeṅ sūkṣma umətu maṅalih rāmyaniṅ kendriyāṅras

saṅkəp taṅ vīra muṅgv ī sana-sini kaharan pādarākṣāləp ahyaṅ

vvaṅ saṅkeṅ jro kaḍatvan kadi salaga məkar harṣa cittanya sobha

gundik mvaṅ ceṭikāsraṅ vija-vijah aṅalap paṅjrahiṅ puṣpa sālas

akveh taṅ dampa hemāruku-ruku savaneh nīlavarṇāpajə̄ṅ mās

yekāṅkən satpadāṅdon səkar amiru-miru truh-truhiṅ ciṇḍagāvra

varṇāṅhrət luṅluṅanyāṅiṅin-iṅin aṅavə̄r cittaniṅ vvaṅ lumakva

lāvan hododnya māpəs vahu mulur aṅure lvir lume lolya maṅlih

saṅgākāśāraras lvir kamasihən aməkul mañjarinyārjja rāgī

təkvan luṅgahnya rumbe ruməmu saḍavatānyeka mambə̄ manambaṅ

abhrā taṅ karṇikārānəḍəṅ asəmu tajug kañcanāmūrvva raśmi

humbutniṅ hanvam olah cala-cala rumave lvir tan asvī gaḍuṅ mrik

mogha svaṅ yan miguh menəh i paṅayuh ikaṅ luṅluṅan [-]* rumambat

rāmyāpve pva ṅ cakikyar makəpə-kəpək i sor strīnya tar sah kinuṇḍaṅ

maṅkā taṅ kayva-kayvan ḍara-ḍaran aṅəsah de nikaṅ mārutālon

molih truhniṅ kapat ṅganya vijah atamuyan rūmniṅ onəṅ ya masyaṅ

poh mvaṅ maṅgiṣṭa vuṅlvan vaḍara vuni paḍāly ācavit kapva məṇḍuh

kahyun-hyun pva ṅ sakī kapva mamupu phalaniṅ vvah-vvahan tūt avan kveh

menmen kapvālaṅə̄ rāmya kətə-kətəg ikin kendahān ton kalaṅvan

denyāpiṅkas paḍāpet raras aṅaləpakən kabvatanyārṣa tibra

keṅis rosniṅ vətisnyāsəmu gaḍiṅ anamar ketakī kesisan ken

pantəs denyāṅəūək rāga turidaniṅ akuṅ kāṇḍəhan śīrṇa denya

nya ṅ kəmbaṅniṅ vanānraṅ pura racana ləṅə̄ṅ puṣpitābyūha kīrṇa

strī-strī lvir kāmikāvīra rumabhaṣa parəṅ kevala syūh inasvan

sākṣāt siṅheṅ raṇa lvir madhukara manuruṅ darpa tan seṅ ṣəkar mrik

hetunyan kelu śīrna ṅ kusumita hañaṅənyan sinəmpal tan amvas

akveh denyākire raśmi sahaja pinənəd rūm nikālakva-lakvan

sarvvecchāśoka sinvam pakamadana nikārumpukan sāri sumrak

śrīḍanta mvaṅ vuṅū bhūṣaṇa nikan asavit mvaṅ kaluṅnyārjja mahyas

kāsəṅkānye hajə̄ṅ tulya sakadaṅiṅ akuṅ de nikāpet manisnya

śrī kr̥ṣṇa pārthāta sireki varṇanən

matūt gəgər lampah irān yathāsuka

himbaṅ ri sor byakta laṅə̄nya koṅkulan

katon mavit rāmya nikin tiniṅhalan

vvainyārjja muñcar kumiriñciṅiṅ juraṅ

vaneh pva tūsnyānalagāmaṅun laṅə̄

sāśrī pva lumbunya nahan kasəmburan

byakteki* kalyan maṇi ratna sə̄k riya

len taṅ viśuddhāmalabar sakeṅ vukir

katon hilīnya sphuṭa maṅduk i[ṅ] paruṅ

ṅkānerikaṅ groṅ gumuruh savaṅ patər

anraṅ* gubar gəṇḍiṅ ikaṅ mahotsava

tovin siratnyan mahəniṅ larap-larap

ya teka lumrā sumavur kasamburat

tulyāñjalinyan mararəm panuṅsuṅa

təbəṅ mamūjā ya ta rakva liṅ nira

aṅhiṅ narāryyārjuna harṣa yan vulat

təkap nikaṅ parvvata kady asaṅgraha

mrāknyān paṅuvvaṅ ri hunur nikaṅ gəgər

vaneh kamānak ya parəṅ silih-sahur

kumbaṅ lalityāṅaraṅiṅ səkar marūm

atūt havan somya karəṅva de nira

denyāṅisəp sāntən avarṇa bhikṣuka

maṅasvakən stotra ri saṅ rva yar ḍatəṅ

lāvan kətərniṅ camaranya kāṅinan

tan aśru miṅgut ya ta kady ameñjuha

mandrāpəpə̄ pva ṅ puputər manambaṅi

sinaṅkyaniṅ pakṣi kəturnya susvara

luṅ hiṅ vəlas-hyun ya marūm arumpvana

lavan ikāṅ aṇḍiva moda tan kasah

muṅgviṅ tahən kapva sumoṅ rumambaya

rinamvaniṅ śevala varṇa māsiha

təkvan hureniṅ prabhu sanmatān hana

latānya lumrānavəṅ i[ṅ] sukət-sukət

kahyun-hyun añjrah ta vuninya yan ratəṅ

vruhnya*n pamārppat luṅidiṅ vajāhirəṅ

tiṅkah nikaṅ revata parvatāhayu

nahan vinarṇākən iraṅ janardhana

ṅkā teki kasthitya bhaṭāra keśava

paṅə̄baniṅ dvāravatī ya tan vaneh

nāhan ta don saṅ yadu vr̥ṣṇi nityasa

amr̥ddhyakən pūja sabhakty amūrṣita

amrih rika svārtha umayvakən prajā

pakāśrayan hetu nirāñ jayeṅ hayu

nāhan ta liṅ kr̥ṣṇa ri saṅ dhanañjaya

ya tāmaṅun gəṅ i manah nr̥pātmaja

maṅkin sirômaṅkata harṣa de nikā

atūt silukniṅ palapat juraṅ-juraṅ

āhə̄t ^†hənunyārddha tətəl vuluh nikā

tinampikiṅ māruta manda moṇḍuhan

len taṅ kalusyan^† minahāṅisis təṅah

savaṅ luməṅhay haṅəsah katiṇḍihan

səṅkanya luṅkān umiriṅ rupit-rupit

gəsiṅ pətuṅnyan mapipit paḍāṅadəg

keṅis lumis kapva matanya tar miḍəm

lavan [h]abuṅnyān agatəl paḍāmraṅa

taṅheh vivākṣan [r]yy alivat nireṅ sukət

makin kacuṇḍuk kalaṅə̄nya de nira

ṅkānan tinəṅhānilumañ jugeṅ hayu

pacaṅkraman rāmya laṅə̄nyan uttama

vvaṅ ri jro nagarālaṅə̄ paḍa katon raras ika kadi vimbaniṅ tulis

rāmyānəmpala puṣpa pādapa haṅendahi hayu nika kapva komala

lvir hintən liniṅir patiṅhalan ikāṅləṅəṅ amija-mijah macaṅkrama

utpatti ṅ kalaṅə̄n ayunyan aśarīra vahu mijil i pañjrahiṅ səkar

kīrṇekāṅ ahajə̄ṅ manisnya sakadaṅ mvaṅ asana vahu vanva riṅ nadī

len mahyas haṅilo rikaṅ vvay amatəh gəluṅ ika vinahan susup-susup

dudv īkan paṅuḍoḍa tapvan ahuyaṅ svaṅ aṅivagi kucupniṅ erttali

kahyun-hyun haməḍar pva ros ni paṅavaknya hana hanuji kaṅsyaniṅ smara

strī-stry ārjāsəmu citra molah amanis pamatan ika ri denya yan liriṅ

darpāveh lara rāga tan cala patahnya makiris anamar ghaṇāhirəṅ

ambətniṅ paṅavaknya təkvan akarah kaluṅ asana lavan vəlas-harəp

himpər manmatha sr̥ṣṭi-sañcaya hayunya kinəḍapan i rāganiṅ maṅə̄

len taṅ tibra ləṅə̄ṅ mulat ri*ləyəpiṅ jaladhi hayu nikāṅgagat lulut

paṅdeniṅ kalaṅə̄n rarasnya tan i rāt rasa maluya hajə̄ṅnya riṅ ṭika

tan seṅəh kahuvan təṅahnya ri paṅol ni tali-tali nikān dadak lukar

keṅis mātra savaṅ gaḍiṅ saphala paṅhurusakəna* rikaṅ jayendriya

vvanten rūmnya vagəd cumāmpaka kapantəs ika linaraṅiṅ manobhava

denyāmaṅku puḍak vaśāṅisisakən vətis ika kadi hetuniṅ javuh

raśminyān panulis ṭikānak-anakanya hinuḍaran ikeṅ nakāluṅid

sarvvecchāsidəheṅ karaṅ təhər anuṅkuli kaləṅəṅaniṅ vvayiṅ juraṅ

ānyāt ta[ṅ] sumareṅ śilā śayana raśmi nikan inapi mūrttiniṅ puḍak

rūmniṅ pādapa len mənur tila-tilamnya jənək i ləyəpiṅ laṅit ləṅə̄ṅ

gātranyānvam avarṇa sinvamiṅ aśoka sinavava təṅahnyan aṅligā

byaktālūma yadin linakṣyakəna riṅ śayana təkap ikaṅ smarātura

gundik rāmya mavā laṅə̄nya mavilāśa sumalaga ləvas raras nikā

hāmhāmnyān paṅusir manis paḍa rumūpaka raras aṅənoh kinonəṅan

harṣanyan pamabak-mabak kusuma sinvam apənəd avahəl-vahəl vuṅū

lindinyan hamərəh-mərəh sama-samāṅrahatakəna gəsəṅnya molaha

lvir tan varśih apet kalaṅvan agalar-galar asana miṅiṅ lavan mənur

tañjuṅ mvaṅ priyakārjja məmbaṅ inaṅitnya sinahaja pakə̄ nikaṅ gəluṅ

rupnyānvam taravarṣa roma saha nopura hinadu manis luṅiṅ gaḍuṅ

sumrak rūm ni vijaṅnya təkvan akase hr̥buk arəja təkeṅ payodhara

akveh ṅganya pamiṇḍaniṅ raras ikaṅ vvaṅ ahayu yadiyan kathākəna

nistanyan taya paṅharusnya ri manis ni hayunira saṅ aṅdiri ṅ daləm

simbantən maṇikiṅ purī marəki varṇanira viphala rūm nikākalib

hīṅanyan sira sāriniṅ [ha]hayu* sūkṣma ni kaləṅəṅaniṅ tasik madhu

ānyāt teki parantyaniṅ kaləṅəṅan kadi haniriṅi rāmyaniṅ tulis

aṅlīlā pinahat karaṅ tuvi rəcəp niki jinamaṇikeṅ vəlas-harəp

honya ṅ jaṅga mure mareṅ liraṅ apiṇḍa lalayan ika rāmya tūt sisi

molur keṅgutaniṅ samīraṇa vaṅinyan aṅasəpi sumār nirāntara

nāhan parṇah irān rəsəp lumihatiṅ kaka paḍa tinameṅ gitālaṅə̄

maṅkin lvir prathimāṅaraṅ hayu nirān hana hamarəkakən puḍak miṅiṅ

ndāñ jātīnira tapva rañca sira kevala puji-puji ratnaniṅ purī

varṇākāra nikaṅ madhu drava katon yan aṅucapa sirāparan kunəṅ

siṅgih yan sira hatvikiṅ raras arūm maṇikiṅ ahayu jīvaniṅ sarāt

bhrantā ṅ satpada riṅ puḍak milu lələh tan avəliṅ aṅaras ri jə̄ṅ nira

aṅgə̄ṅ tan makalib salah ṅ iḍəp anon ri səḍəṅira haneṅ karaṅ liman

hyaṅ-hyaṅniṅ kalaṅə̄n valiṅniṅ umulat kṣaṇa maluya mareṅ nirātmaka

ndin tan bhagna larut raras ni vijiniṅ sumanasa kalavan puḍak sumār

yadyastun racaneṅ pralāpita kapāna vənaṅaniṅ amarvane sira

māntən denya ya tan pupug luṅid ikaṅ tanahiṅ aṅapi tibra tan padon

lit-litniṅ karas ārjja həntya tamatan palaca-laca hirəṅnya de nira

byakta syūha laṅə̄ nikaṅ pasir arəs vinaḍal i ləvu tan panoliha

lāvan parvvata śīrṇa tan vani gumāp təkapira kadi māryya ləṅləṅa

mogāsep ləṅəṅiṅ tavaṅ yan ika vastvakəna niyata nirva kiṅkiṅa

śrīniṅ tāman amukṣa raśmi nika yadyapi mamaṅun aśoka tan təpət

ṅkā saṅ pārtha sira ḍatəṅ tumūt ri kr̥ṣṇa

harṣāmbəknira mulatiṅ vanādri rāmya

ndan saṅ phalguṇa sira mogha tibra ləṅləṅ

muṅgviṅ tvas nr̥paduhitā maveh prapañca

nā marmā nr̥patanayātañe narendra

yeko saṅ hinucap anindyarājaputrī

lakṣmīniṅ raras ahajə̄ṅ tikuṅ subhadrā

putri śrī nr̥pa basudeva ratnakanyā

siṅgih tan papaḍa sireṅ jagat samasta

ndya ṅvaṅ rāsika tan akūṅa denya mūrccha

aṅhiṅ rūm nika taya len paran ya rāgī

mās ratnôttama tar ivəh vəlinya yogya

maṅkā liṅnira sumahur narāryya kr̥ṣṇa

om siṅgih ya tika nahan valiṅta rakryan

yeky āntənkva tuvi rare səḍəṅ sukanyā

vastv evəh karaṇa nikān vineh atəmva

aṅhiṅ prārthana gavayən svayambarātah

yan sahyāharaṇa kunəṅ ndatan vanehan

yan vvantən ta sira mahāpravīra śakti

vāny āṅambila tan arəs ri sanmukaṅku

sugyanyāṅavaśakəne tuvuh ny ariṅku

mvaṅ tañ jrih tumahəna vīra vr̥ṣṇivaṅśa

ndah nāhan liṅira janardhanātərəh bvat

kady āṅgəṅ mavəṅis i citta paṇḍuputra

saṅ pārthāta sira sudhīra tan hanāvri

sakvehnyan vənaṅ umavit syuhənkva śīrṇa

nāhan liṅnira tumuluy madəg sirôjar

ndātañ jrih ri yadu kabeh vavaṅ ta maṅsə̄

sāglisnyan hinalapakən narendraputrī

kumyus mūrcchita viparīta yan pinaṅkva

muṅgah riṅ ratha pinəkul gupe sirārəs

byaktekin vinavan irāhañaṅ visāta

ndah maṅkā ṅ yadubala kapva dīnacitta

sakvehnyālara mabunək ndatan tinaṅgəl

āśābhūta maṅən-aṅən [r]yy avaknya nirdon

denyan tuccha lalu kumə̄l dumehnya luṅhā

saṅsiptan lvir narāryyārjjuna tucapa tikaṅ vr̥ṣṇin kapalajə̄ṅ

prāptānambah mare śrī haladhara mavarah reh pārtha ri sira

yekān sakrodha saṅ bhūpati vavaṅ aṅadəg taṅ mānavibhava

muntab sə̄ṅniṅ vulat kady alatu-latu sake bāṅniṅ muka nira

ndah śīghrāṅambuṣātyanta təkap i pamanasniṅ krodha kumutug

dhik hāh pārthātiḍuṣṭādhama niyata katon śīrṇanya pususən

nāhan liṅ saṅ narendra krama madəg aṅalap śaktyāyudha magə̄ṅ

maṅkin kady anyuha ṅ rāt mvaṅ amalika tasik rudrāgni sakala

sakvehniṅ rājaputra pramuka haji parəṅ sakrodha suməgut

təkvan kapvātirodrāgaravalan aṅadəg lvir siṅha masiga

pradyumna mvaṅ gadā satyaka niśaṭha vaneh sāmbhāśru maganas

kapvātyanteṅ mahāśakti tuvi kalilipiṅ siṅhākr̥ti sira

mvaṅ tekaṅ vr̥ṣṇi rotāṅjuru sahana nikin kakyāti nipuna

tovin śūrānivaryyeṅ raṇa jaya kinavih maṅgəh kr̥tayaśa

tāvak* yan daitya len rākṣasa kapana ya tan sāñcurṇa yan asə̄

maṅken ^†krodhāṅgakārāṅgətəm aruh-aruhan vetnyārddha magələṅ

lvir syūha ṅ revatāvrəg kənas ika təkapiṅ śaṅkātri tinulup

gəntər^†niṅ bheri lāvan kala-kala kumisik yekān muni parəṅ

lāvan pārguṅ nikaṅ sāmaja kuda gumuruh paṅhriknyan aṅuhuh

nānāvarṇāsulam təṅran ika katulajəg sarvvāstra lumarap

saṅkəp sakveh nikaṅ yodhagaṇa bala pənuh lvir tan patagihan

āmbəknyāṅgə̄ṅ kaśūran makin aṅipak-ipak tulyārṇava pasaṅ

maṅgəh sāmpun hinajñan sajuru-juru dumon pārtha prih usirən

nā hetunyan paḍāgyā guragaḍa maharəp hāmhām tan atakut

gə̄ṅ-gə̄ṅən krūra mākrak kagiri-giri katon tekaṅ yadu kabeh

kevalyāmātyana ṅ pārtha liṅ ika rarahən rohən tan inaris

kapvānambut laras mvaṅ palaga nika kabeh sakvehnya tumihaṅ

garvvanyan kapva tulyāntaka sahana nikin magyāṅala-hala

vāgyūt [t]aṅ vīra maṅkat saha bala lumurug ryy āṅkat haladhara

kapvārāmpak guməntər kakərətug asəlur denyan silih ayun

cuṇḍuk śrī kr̥ṣṇa tapvan haruhara ya tikin cittanyan atəgəg

yekāṅde gadgada śrī haladhara lumihat de saṅ narapati

ṅkā rakvān śīghra maṅsə̄ ta sira mujarakən ^†śrī kr̥ṣṇa tumuluy

āyay hantən ndya donta prih umənəṅ i ləkasniṅ pārtha vipata

nir taṅ sānak pva yāṅgəhnya taya ṅ iṅət-iṅət^† ḍo hayva tinahā

vyartthān sāmpun pinūjāpratihata rahajə̄ṅ sāmpūrṇa hinivə̄

yekin sampaynya yak ton ləvəs aṅapa karih denyāṅapuyana

dhik dhūrttāpa kramāṅgə̄ṅ kuhaka juga tikī nirśānta magələh

sis tan vriṅ tvaṅ humə̄t riṅ smr̥ti vənaṅ avamānāntənta hinañaṅ

gə̄ṅ mūrka crol ya tekā niradara katuluy denyāṅdəha hulu

nāhan tôjar nirāpyak irika ta sumahur śrī kr̥ṣṇa ri sira

ḍū sojar śrī narāryyātiśaya mara hiḍəp saṅ nātha tan ade

jātī ṅvaṅ vīra bhūpālaka saphala jayā lumreṅ tribhuvana

gə̄ṅniṅ śaktinta sākṣāt jalanidhi vinuvus atyanta madaləm

nda nihan paramārtha tūtananta

purihiṅ paṇḍita riṅ jagat guṇajña

taya lamban amet viveka yukti

tar ivəh riṅ maganal halit kaveśa

vvaya taṅ hari len sahāya tonton

ya lanāmiṇḍa paḍātisūkṣma kālih

pamihaṅ nikanaṅ hajə̄ṅ gatinya

ya tikā hetu nikaṅ hayun kadadya

kita ta prabhu riṅ jagat viśuddha

ikanaṅ durnaya tan haneka mātra

kadi bahni mahojvala prakāśa

hilaṅiṅ sarvva kaləṅka donta nitya

amr̥tātmaka tulya riṅ halaṅghya

umañut vyāparaniṅ kaluṣya citta

tuvuhiṅ yaśa dharmma śuddhadeha

kita ta śreṣṭhi rikā kabeh byavasta

iti marmma nikin humodana svī

takari ṅ hīna haṅalpa buddhi nātha

si dhanañjaya liṅta yar masampe

katuluy tvaṅnya magə̄ṅ nahan hiḍəpku

nya dələ̄n prabhu yogya liṅnya sādhu

yan ikaṅ strījana vəlyaniṅ [h]apeṇi

mvaṅ ikaṅ maṇi ratna kañcanādi

ya tan olin paśujāti kāṣṭa hīna

ndi ta saṅ minahān tinonta riṅ rāt

agələm dumval anakniran sukanyā

kinayogya kəta ṅ svayambarātah

tan ahāt rakva sireṅ adharmma riṅ rāt

nda məne apa tan kināryya ri ṅke

ikanaṅ kārmma viśeṣa dharmma yukti

ya ta hetu dhanañjayāpravr̥tti

vara sahyāharaṇa ndatan ya hīna

nya katon paṅaḍānya vīra śakti

ya pinintonakənānivaryya deha

ri vənaṅnya malap rikeṅ* subhadrā

takarih parcaya de nikaṅ kaśaktin

yan svīnən pva ya de nareśvara hade hiḍəpku viphala

āpan byakta katoñ jayārtha nika riṅ svayambara daṅū

yadyastun hana teki ganta nika yan prihən kavənaṅa

tā ṅvaṅ śakti vənaṅ mamaṅpaṅa guṇanya mon surapati

an sāmpun karəṅə̄ pratāpa naranātha digjaya kita

yapvan sora kiteṅ parakrama təkapnya keraṅ-iraṅa

saṅkṣepanya haneki rakva kaləhəṅnya tak magalaka

tūtən tann apalenaniṅ yaśa tinuṅgaliṅ parahita

nyā taṅ deya hitāvaśāṇa gəlarən təkap saṅ ahulun

tapvan piṇḍah akon umundaṅa rikaṅ dhanañjaya usə̄n

toh pūjān varaṅən śramākəna huvus nda hayva viluma

donyātūta lavan sa-paṇḍava pasānakanta rahajə̄ṅ

aṅhiṅ maṅgəh i buddhi ni ṅvaṅ apa tan vaneh ṅaran ikā

hetunyan tan akūṅa riṅ vimukatāṅatīta hənəṅa

nāhan liṅnira kr̥ṣṇa nora vinihaṅ təkap yadu kabeh

tulyāg[n]y āṅabaran galaknira kavarṣan āmrəta haji

somya śrī baladeva denira narāryya kr̥ṣṇa sakarəṅ

ṅkān maṇḍəg vəkasan kabeh sumalahiṅ varāstra palaga

tan dvādan tumuluy humundaṅa ta saṅ narendratanaya

gəṇḍiṅ rāmya ləṅə̄ṅ svaranya makapaṅharəp laku nira

maṅkat saṅ para rājaputra saha bhr̥tya kapva mahaləp

hopən pasraṅ ikaṅ karaṇḍanira sə̄h tikaṅ gaja ratha

lvir tūban kumusuh grəbəg ni lakuniṅ vvaṅ ākrəp aṅiriṅ

sahyābhūṣaṇa varṇa puṣpa vana komalālaku-laku

lāvan təṅran aneka varṇa madulur haləp vinulatan

abhrāpiṇḍa kuvuṅ-kuvuṅ manuruniṅ səkar sumalaga

lāmpahniṅ ratha len liman kuda savaṅ karaṅnyan alaṅə̄

luṅkanyāntaraniṅ lumāmpah aḍarat matambəh arivəg

tan varṇan ta sireṅ havan nr̥patiputra pārtha vuvusən

ṅkān paṅrəgrəg aṅolakən saṅ ahajə̄ṅ sirepu tan arən

maṅkin tan humənəṅ sirārddha sumave ri saṅ yadu kabeh

lvir mātyāṅəsahiṅ kisapvanira tan vri rāt kaḍəḍətan

hetunyan hinimūr savet ni rarasiṅ priyambada sira

māskv induṅ palalunta māsku kapanan valuy kita məne

heman rūmta yadin haṅiṣṭya luputanta riṅ karatala

lvāmbək tebu huvus purākr̥ta kabhukti denta kavava

maṅke byakta panəmva ni ṅhulun i māsku ratnaduhitā

yogyān rūmta siluṅluṅaṅkva musireṅ kasiṅhan ayaśa

maṅgəh prārthana ni ṅhulun rəbutəniṅ lavan tan avəḍi

hīṅanyan kinaniścayaṅkva mapage kabehnya ḍatəṅa

kasniṅ bāhu nahan ta tiṅhalana śulka riṅ kadi kita

tan mithyāku kitāta sakṣya ri kaśūran i ṅhulun ibu

maṅkā śabda narāryya pārtha saha marmmarāñulu-ñuluh

aṅhiṅ drəs nikaṅ aśrupāta panulak saṅ onək aṅəsah

akveh deniran amrahāsana ri saṅ prapañca malara

ṅkānan rakva ḍatəṅ vatək yadu kinon umiñjəmi sira

aṅhilyākəna sopakāra savilāśaniṅ mamapaga

kapvāvvat ri giraṅ nirān ḍatəṅ amūrṣite nr̥pasuta

t āntuk māsku ri saṅ nareśvara nihan pakonira huvus

mvaṅ devī sira karva keriṅa t ulih pareṅ pura məne

āpan tuṣṭa dahat manah saṅ ahulun humundaṅa kita

tan pendah hati*niṅ liraṅ vinilətiṅ gaḍuṅ juga sira

nā liṅ saṅ para rājaputra suka saṅ narendratanaya

luṅhā ṅ ārkka samāntarān laku nirān umantuk iniriṅ

muṅgviṅ ḍampa vuluṅ səsə̄k lakuniṅ aṅrakət ndan ahaləp

lvir nārīśvara sārdhadeha manurun hanopama sira

ndan saṅ śrī naranātha kr̥ṣṇa ri yavā lavan haladhara

maṅkā ṅ strī haji kapva rāmya suməneha meh təka nira

māvāvās ri sənə̄ nikaṅ sulu[h] aneka piṇḍa rahina

lvir mājar sukaniṅ sarājya kisikiṅ garantuṅ araras

ndah ṅkā prāpta dhanañjaya mvaṅ iki saṅ narendraduhitā

ṅkā rakvān paṅusap ri jə̄ṅnira narāryya kālih papupul

təkvan māri vival narendra baladeva harṣa masəgəh

siddhāniṅ paramārtha saṅ nr̥pati kr̥ṣṇa nora kahala

sāmpun maṅkat adūta saṅ nr̥pati mantukeṅ purasabhā

ṅkane jə̄ṅ basudeva nātha mavarah ri tiṅkahan ira

byātītan ri lakunya saṅ pravara phalguṇāta valuyan

rāmyārūm papupul nireṅ kuvu lavan vatək yadu kabeh

maṅkin sə̄h avuvuh viśeṣa paṅivə̄ nire nr̥pasuta

salvirniṅ [h]upabhoga ṣadrasa huvus dine pva ya hana

ndātan pis ta təkap narendra harimūrtti sapriya tuvi

āpañ jātiniran kr̥tajña kajanapriyañ juga lanā

byātītan ri səḍəṅ ni saṅ pravara paṇḍuputra hinivə̄

luṅhā pva ṅ vəṅikāla sākṣaṇa pakəg nikaṅ sanagara

məntas riṅ vəkasan təkā ṅ rahina kapva sāmpun avuṅu

ṅkān mantuk sira saṅ narāryya dinulur nikaṅ yadukula

saṅ pārtha pva sireniriṅ mvaṅ ika saṅ narendraduhitā

ṅkā riṅ dvāravatī sirāstu pinapak təkap saṅ ahulun

nya ṅ pāṇigraha kāryya maṅgala vivāha kārmma gavayən

āpan ya pranidhāna saṅ nr̥pati kr̥ṣṇa yan paṅucapa

ḍatəṅ ta sira saṅ vatək yadu haneṅ nagara lagi sinuṅsuṅiṅ vvaṅ aṅuṅaṅ

manahnya paḍa kāñaran mulat i saṅ nr̥patanaya sirādhikāra karəṅə̄

ya hetu niki kapva māprəgi savetniṅ abhinava vavaṅ marāmpak i yava

rare matuha len ulañjar aṅaḍaṅ hana lilu tumakul ya milva mijila

paḍāgaravalan parəṅ kapalayū hanan aṅuhuh arəpnya tan karuhuna

silih səḍək arok vaneh taṅ apipit-pipit aruh-aruhan tayeṅ ləbuh agə̄ṅ

alah ya nirupekṣa riṅ hyas asuluṅ-suluṅ arəbut anon ri saṅ nr̥pasuta

dudū taṅ amahayva kenya umijil ya katərag alayū ndatan dva kavudan

atīta ri ḍatəṅ dhanañjaya lavan narapati madulur cumuṇḍuk i daləm

yathākrama sirāṅusap ləmah i jə̄ṅ narapati basudeva len nr̥pavadhū

kataṅgama sire dhanañjaya apan lituhayu tuvi śūra śakti guṇavān

lavan savava molihe prabhusutā hiḍəpira taya len pasānakan ira

nihan liṅira he vəkaṅku kita pārtha kunaṅ iki ujarku māsku ri kita

prasiddha kita śāraṇaṅkva taya len vvaya tiki harimūrtty akarṣaṇa tuvi

pahayvakəna teki māsku kinatuṅgalakəna bapa tan dageṅ manah anūt

apan sakura nora bheda ṅaraniṅ kadi kita sasavīja hayva malupa

vuvus nr̥pati sārjjavāmr̥ta haturnya maṅinaki saṅ aṅrəṅə̄ rasa nikā

tuvin saphala vr̥ddhabhūpati huvus kr̥tasamaya ri sandhiniṅ parahita

siraṅ vinuvusan maṅañjali umastvakəna hayu ni vākya saṅ narapati

mahāṅinakakən rəsəp ri manahiṅ bala gaṇa ruməṅə̄ saharṣa mamuji

ri huvus nirāṅucap-ucap krama tinuduh ikaṅ balādhikā

tumitah tikaṅ pamiḍuḍuk pasaji-saji nikaṅ smarāgama

ri hatur narendraduhitā tikin inayu lavan dhanañjaya

śubhakāla rakva sakatambaya ta sira ciniṇḍya de haji

ya [ta] hetu saṅ yadu kabeh pənuh acatura muṅgu riṅ sabhā

mvaṅ ikaṅ balakrama haneṅ nagara sajuru-jurv atiṅkaha

humivə̄ ri kāryya naranātha hasaniga kabeh mapadgata

tuvi sāmprayukta vinidāna təkap ikin anindya riṅ haləp

nda huvus dināhan umaḍaṅ sahana-hana nikaṅ valikrama

kavave pratāpanira saṅ nr̥pati parama viṣṇu kottama

ṅuniveh vaṅun-vaṅunaniṅ gr̥ha ri yava təke daləm purī

paripūrṇa kapva atisobha paḍa-paḍa minūlya hinyasan

asinaṅ pva maṇḍapa nikāhaləp inululan ārjja bhūṣaṇa

savave tihaṅnya pinakokiran ikin apadudvaniṅ tulis

tuvi vaṅśapatra lumarap palipiran i pagərnya bhāsvara

tinulis-tulis ri mayaniṅ tuvu-tuvuhan ikā savaṅ rakət

katəke vuvuṅnyan apənəd pravala cinaturaṅga viḍruma

pinapat hivak tinamiṅiṅ jamaṇika paciranya tūt sisi

tinatā tikaṅ kanaka jaṅga marakata luməṅhayiṅ tətə̄

amirah tikaṅ cavəni simbar ika sinuji luṅsir ujvala

tuvi ghūrṇiteṅ nagara varṇa pamarabal ikaṅ payonidhi

svaraniṅ mr̥daṅga ṅuniveh paḍahi haji parəṅ magənturan

ulahiṅ mahotsava kināryya təkapira ta saṅ vatək yadu

kamənā nirāṅarəpakən pavaraṅira saṅ āryya phalguṇa

siraṅ ugrasena təlas arppat i yava ṅuniveh vatək ratu

karuhun narāryya harimūrtti makajuru lavan halāyudha

irikā narendrasuta pārtha hinarivuvu rāmya riṅ sabhā

avuvuh [h]aləpnira savaṅ surapati hinucap ndatan vaneh

vvaya teki rāmya pavirāmaniṅ atanu hinuttameṅ prabhu

smarasr̥ṣṭhi hīra vaṅunanya rəcəpiṅ aṅajap linaṅvakən

kuməñar hatəpnyan abhirū śinaśarudhira vimbaniṅ mirah

mayaniṅ vulan laṅi-laṅitnya sinuji kinalacyaniṅ cucur

nya ta laryya-laryyan ika riṅ pamanisan i surambyaniṅ gr̥ha

ləṅəṅiṅ taladhvaja piniṇḍa vinəḍarakəniṅ labuh kapat

ginəlar ta kalpataru puṣpa pakaśaca ri rəṅganiṅ jinəm

mrik ikaṅ hasəp lələh aveh turida miṅiṅ arūm nirāntara

irikā ta rakva pinapak nr̥pavaraduhitā gi*

............rāgama huvus hinənakəna kabeh sumaṅgraha

abhivāda maṅgala paṅarccananira ri harəp nareśvara

nda[h] aneka mukya kinənākəna paṅucaraniṅ valikrama

araras tikaṅ paḍahi paṅharivuvunira rāmya len gupit

ulahiṅ hanindya tadanāntara pinisaliniṅ vəṅin təkā

ndan ahəly avās təkap ikaṅ damar asəmu samūhaniṅ ravi

tan ivə̄n masāmpunan ikaṅ pamiḍuḍukan irān mapahyunan

riy ulih nirāṅalih i ḍampa kadi salaga karvaban riris

panameni gəṇḍiṅ araras ri lakunira lalitya komala

kətəbiṅ lumakva kadi karttika siniriṅ i śabdaniṅ patər

muṅgah riṅ gr̥ha ratna nīla pinakoṅgvanira tinavuṅiṅ samāgama

mār mrat rūmnya sinaptagopita paragyan ika miṅiṅ arūm kinumkuman

mrikniṅ karpura gandhaniṅ jənu-jənunya makatilakaniṅ pasaṅgaman

byaktāmuṅva ri ləṅləṅiṅ manah akuṅ lumaya-laya gatinyan aṅlare

ṅkā saṅ pārtha sirātiharṣa maṅisapvakən i sira narendraputrikā

təkvan sūkṣma paṅumpətiṅ manasijāṅuyaṅi hati nirān kəneṅ hunəṅ

oyut vetnya hinə̄t kunəṅ [r]yy ulih i saṅ vvaṅ amaraṅ i sirān haneṅ jinəm

maṅkin lvir səminiṅ gaḍuṅ paḍa ni kuṅniran amilət i tejaniṅ vulan

saṅ hyaṅ-hyaṅniṅ akuṅ prapañca rumaras miṅay agigu məhah minanvakən

śīghrāṅluh sumarambahiṅ mata nirān kadi maluy atəmah madhudrava

polahniṅ tikəliṅ halisnira tikin mayat arəṅu kinol nr̥pātmaja

rəmpū tvasnira mepu lāgi kinisapvakən alara kavəs vinodanan

yekāṅde sivuhən ta saṅ nr̥patiputra rumiṅa-riṅa marmma pet sivi

kepvan bhranta savet ni kuṅniran aṅol təṅah alaris amatya-matyakən

vetniṅ harṣa nirān kədə̄ kalavanan tvasira karaṇaniṅ harəp-harəp

lāgy āvah manisiṅ priyambada pañumbvanira təmahaniṅ karāsikan

rakryan saṅ kinəñəp ri nālaniṅ unaṅ saṅ inapi paśarīraniṅ ratih

sūkṣmāṅdadya sakeṅ nirātmaka ri ləṅləṅiṅ aṅajap i sandhiniṅ laṅə̄

pāvakniṅ madhu saṅ hyaṅiṅ kusuma lakṣminiṅ asana maṇikniṅ aṅdyahi

śrīniṅ karttika mūrttiniṅ prathima ratna kari kita madadya putrikā

maṅke pvāri katon pralabdha hiḍəp i ṅvaṅ aṅisapu marək mare kita

saṅ tan sah [h]inajap kunəṅ karaṇaniṅ ḍatəṅ i kita mənen pamaṅkvakən

saṅ sākṣāt maṇikiṅ hiḍəp pinakahəmbanan i tələṅiṅ aṅgəgə̄ smara

donkvālābha ri siddhaniṅ bhaṣama sātmaka katəkan amuktya sanmata

epū ṅvaṅ mapa kālaniṅ pinuvakan vulat anahəli kuṅnya tan lutur

ndak ton kiṅkiṅ ikāməgəṅ turida yadyapi kaluputaniṅ priyambada

byaktān māntəna jīvitanyan apuput pati kasarik i ratnaniṅ purī

maṅgəh prastutiniṅ rarasta pakamuṣṭiniṅ aṅaraṅ aṅel kəneṅ riris

nāhan cumbva narendraputra mamanis lvir aṅətəri hilik suputrikā

mambə̄ satpada matta maṅrəṅih i paṅjrahiṅ asana miṅiṅ turuṅ məkar

pet-pet harṣa manambyakən vuvus arūm təhər aṅarəki kədv aṅolakən

eñjuh yan paṅalap kasor ləkas irāṅiliṅ-iliṅi mahāṅgagap təṅah

ndan śrī nr̥pavaraduhitā miṅe ri manisiṅ vuvus aṅari-hari

tapvan gərəmə ri rəcəpiṅ prahāsana narendratanaya maṅamər

ardhāgigu vinisikakən humiṅsər anaṅis tikin inarəkana

mogākiput avəḍi yadin kacidra paduniṅ tapih iniṅətakən

təkvan rəṅu-rəṅu ni liriṅ nirārəja ñəñərnya hamiṣani ṅ akuṅ

lāvan tikəl i halis irāṅani tvas amaṅun lələhiṅ aṅaməra

lāvan panulakira kadi pva sinvamiṅ aśoka kasiririṅ aṅin

himpər sarasija kinudaṅ nikaṅ bhramara matta cala-cala nira

āmbək nr̥pasuta kataləh kəneṅ manis i rūm nr̥pavaraduhitā

maṅkin raga-ragan aṅamər sirāṅusapi gātra lagi palə-paləh

lāvan taṅanira tumameṅ təṅah marək i puṇḍutan inarəpakən

sanyāsa maṅuvahi ri kapriyambadan irāṅucap amahi laṅə̄

rakryan saṅ inapi maṇikiṅ kalaṅvan anusah tvasiṅ alara makuṅ

dentāṅrahatakəna manis-manista ləvu denya sumusuk i hati

sa[ṅ] nitya cumarik i laṅə̄ṅku lot makaparantyaniṅ añulu-ñuluh

himpər śaśadhara juga tan panīsi kucupiṅ salaga kapanasan

saṅ kady asana kusuma rūmta muṅgv i vahəliṅ patah arəja miṅiṅ

rāmyāṅiṅin-iṅin amaṅun hunəṅ juga rarasta bisama kinəmit

ṅvaṅ satpada lalita maṅel aṅə̄lvakəna rāga turida malavas

tañ jrih maṅarəki suka mātya yan huvus acihna hamuṅari gəluṅ

hāh ndin koluyaniṅ laṅə̄ ṅvaṅ iki denya mucapakəna sotaniṅ rimaṅ

dūran yan hana mātra kampirakəneṅ kətə-kətəg ikan amriyambada

simbantən ṅvaṅ atə̄n ri denyan aməkul təṅah ahuyaṅ aminta sanmata

vāliṅnyan kakənan karāsikan inambvakəna kalaraniṅ kəneṅ hunəṅ

lāvan toh paṅamāknya ləṅləṅ inaveśa kapuritən i paṅdaniṅ smara

bhrantajñāna kapəñciriṅ jariji len vətis anuji hunəṅnya mohita

epū tvasnya karəṅrəṅan kasarikiṅ gəluṅ alara kəneṅ matāmanis

tan vriṅ rāt kapanan ginocara pameny amapaka rika liṅnya lampunən

nā liṅ śrī nr̥paputrikālara sineva lagi vinuvusan nr̥pātmaja

māskv induṅ tarimanta pamrihiṅ amaṅkvakən i kita hamaṅhya-maṅhyakən

yadyastun hinilanta riṅ smita təhər cacahakən ta yeṅ nakāluṅid

mon mātyāku sapadya yan kalavanan bhaṣamaniṅ aṅusir smarālaya

saṅsiptanya dələ̄nta sotaniṅ akuṅ tikin amarəkakən priyambada

sāhityān paṅajap sihanta pamavan lara turida minuṣṭi tan bəsur

māntən tan katəkān prayojana marambataniṅ ahayu ratnakanyakā

aṅhiṅ ganya hinūrnya tan maliha keraṅ i manah ika tan sinanmatan

liṅira narendraputra sira saṅ narendraduhitāṅəsah kaparihan

gupay anukər sirātulak i paṅrəmihnira ta saṅ narendratanaya

viphala pupug tikaṅ kuku nahan pamādhaka nirāla[h] arddha kabalik

yaya tan avəh ləkas nr̥patiputra maṅkin ataləh-taləh maṅarəki

nr̥paduhitāti kepvan atahər ndatan pajamuga ṅ tvas epv aṅəsəsan

tuhu nikanaṅ taṅisnira ya teki rakva paṅavə̄r nire nr̥pasuta

kalalu ya tan hiniṣṭi panəpak nirālah alisuh ndatan paṅupama

nr̥pasuta maṅkin aṅhudanakən prahāsananira lvir ārṇava madhu

dyah [h]iṣṭaṅkv ibu puṇya denta pamatanta tan arəṅu miṅe tumiṅhala

heman tebu rirista tan paṅuniṅeṅ alara turida kokalan lulut

tan luh tan paṅəsah lavan prihati hetuniṅ akalib aseva tan liniṅ

hīṅanyan kapanan vival ṅvaṅ ikin amrih anəkən avilāśaniṅ marək

kenaknyān ḍavuhən manista ta kari ṅ sinavava riṅ akuṅ ndatan cala

āpan vyarttha rəṅihta hetuniṅ aṅel cala-cala riṅ apan kasiṅgihan

siṅgih yan panəpak jajāṅayatakən kuku bisama hamə̄m vajāmirah

nistanyan pinalalvakən* ḍatəṅ i māsku patayaśa ni paṅhyaṅ i ṅhulun

nāhan byakta ni kuṅ saṅ arjjuna madadyana vacana hanorakəñ juruh

kədv āmbəknira tan kumə̄lakən unəṅ rinəṅihanira lot sinikvakən

ndan saṅ śrī nr̥paputrikāgəyuh alə̄k lalu viphala taṅis nirātulak

tan vriṅ dāya sirān kinevala makin linuruṅ i paləkas nr̥pātmaja

byātītan panukər narendraduhitāṅəlih alara kacidra riṅ gati

sahniṅ siñjaṅ irān miṅiṅ ndan aməḍar təṅah añuriga rosnya komala

maṅkin tvasnira saṅ dhanañjaya girahyasən i paṅavatiṅ smare sira

lvir kumbaṅ vahu kāñaran təkap i rūm-rūmiṅ asana baśānəsəp madhu

ri huvusira pinurvāṅlih lume śrī suputrī

nr̥patanaya manambut mār mrata tvas nirônəṅ

saṅ ahayu sira sākṣāt raśminiṅ padma rukṣa

cinulu-culuhiṅ ojar de nirāṅrəs maṅuṇḍəṅ

nr̥pasuta sira maṅkin tibra de śrī suputrī

kavuvuhan i kəñarniṅ ḍīpa moləm ndatan krām

makin asəmu tulis mās de nirāṅlih tar olah

nr̥pasuta tatan aśrv āṅol amaṅkvāṅajum ken

kunəṅ iki nr̥paputrī śoka moruk lumuṅsur

tuvin agila təkapniṅ siñjaṅ amləs karāhan

krama umijil inəmban saṅ priyāsih tan imbā

kamənanira sinocan riṅ surambyan cumuntən

kaka-kakanira tan doh kapva sāmpun sənāha

humənakən aḍamu vruh rīṅgitājñān patiṅkah

paḍa-paḍa vinagəd riṅ lālanātyanta pattya

avicarita sinocan devi tar sah makarvan

huvus aḍamu ta kālih saṅ səḍəṅ vāhv apaṅgih

pinuyu-puyur iniryyan-hiryyaniṅ ceṭikāsih

rari palaluniṅ āmbək kə̄lakən duhka mātra

apan iki lara rakryan ndan ya malvī lulut tvas

kusuma sarasija mrik mvaṅ mənūr nāgapuṣpa

mapa kari paṅadeśanya ndatan len ya yogya

viniru-viru təkapniṅ kumbaṅ onəṅ viśīrṇa

taham ibu panahāṅkve māsku nāhan patəmva

maluya rari usə̄n riṅ veśma tāntuk haram dyah

ahəla-həla saṅ onəṅ mogha hāmhām sirāṅher

nahan ujar ika masvī ndan haneraṅ suputrī

krama hinamər umantuk riṅ jinəm mrik [h]umuṅgah

riy ulihira suputrī ryy āntaniṅ veśma rāmya

nr̥pasuta sira maṅkin harṣa yekāṅisapvan

aṅupuk-upuk amāsvās nā ṅ mukālurva moləm

təhər aṅaras avantə̄ rūmniṅ ojar savaṅ truh

saṅ sākṣāt kadaṅiṅ vulan saṅ apatər turida saṅ ariris-riris laṅə̄

saṅ nityāṅdani kiṅkiṅ i ṅvaṅ asəvə̄ hunaṅ athava lulutkv asinvama

marmāṅol i raras-rarasta sahajāmvatakəna səkariṅ karāsikan

tan vriṅ rāt ri sukaṅkva yan kalavanan pavilətana ri tatvaniṅ gati

maṅke pveki dələ̄n harebu sipi bhāgyaniṅ aṅajəṅ (ṅ)acatva cumbana

rūmtenduṅ pinakāntya jīvita siluṅluṅiṅ anəmu sayodya riṅ prəman

maṅgəh nitya sinandhi riṅ mata tamolah aṅañuta ri kiṅkiṅ i ṅhulun

ndan yan mātya manəhta sātmya ri manista ḍavuhən irikaṅ tasik madhu

iti nā ta lālana nirāṅlipurakən i narendraputrikā

araras manaṅhulu maveh səpah arəja mahānəsəp laṭi

təhər aṅririh-ririhi romanira tama hamatya-matyani

amasaṅ-masaṅ ndatan aləh mayat i gəmuh ikaṅ payodhara

ahirit sinambaṅan ireṅ kakavin asəmu mombakan laṅə̄

sinəlan-səlān ri rəsəpiṅ maṅarəki pipi rāmya meñjuha

ri pamāhva-māhvan i manis ni culu-culuh irāmriyambada

anusah mayaṅ vahu məkar ndan amanəhi rinəṅva-rəṅvakən

papupul nr̥pātmaja lavan nr̥pavaraduhitā haneṅ jinəm

maṅunəṅ mənur paḍaniran katirah aṅarasiṅ vəlas-harəp

alaṅə̄ hatur ləṅəṅ ikaṅ gaḍuṅ avilət arok vanañjari

nda nahan patūtnira tikin prasama-sama tinuṅgaliṅ laṅə̄

nr̥paputra rāmya ri daləm śayana kumavaśe* karāsikan

sakuləm sirārddha tan arip lalu paṅamər ire suputrikā

karəṅə̄ prahāsana nireka təkapiṅ anaviṅ lavan rəṅih

saha nopurāsriṅ atakis marahakəna panandhiniṅ gati

kalalu ṅ vəṅi tan dva rahina mava tejaniṅ ārkka lumə̄ṅ

irikā ta ḍatəṅ krabanira sahananya huvus marəpat

paḍa tānupamāparimita kadi saṅka riṅ indrapada

viniśeṣa təkap narapati harimūrtti makon tumatā

vara saptakumārika tuvi mr̥ganābhi sugandha sumār

ya mamuṅva laṅənya ri sira saṅ amūrvva haneṅ śayana

mvaṅ ikāṅ asəp aṅrahagi sahaja subnya təkāṅləṅəṅi

amapag rarasiṅ cavəni jamaṇikanya miṅiṅ tan arən

gupit ārjja lavan kiduṅ ika hanameni parəṅ haṅavat

kahiḍəp ləṅəṅiṅ madhumasa ri haturnya savaṅ bhramara

svaṅ aṅimbuhi raśmi tan ari pasajinyan amuṅ salulut

aṅaveśa ri rəsniran anavuṅ unəṅ sagavenya marūm

ndah avāsira saṅ rva tumama ri surambyaniran ^†majajar

krama sāmpun asoca maṅənakəna bhūṣaṇa pahyas ira

anavuṅ haləpiṅ sarasija sinavaṅ madhu rūpa nira

sinaran hana^†niṅ kaka-kaka sararasnyan amaṇḍaga sə̄k