Pārthayajña, or The Sacrifice of Pārtha: Digital Critical Edition

oṁ rudrāya namo ’stu te mara panəmbaha ra putu bhaṭāra nityaśa,

saṅ muṅgv iṅ tələṅ iṅ hiḍəp saṅ atiśūnya tuhu-tuhu jagatpramodita,

mvaṅ sakvehnira paṇḍitādhikaviveka rinacananiki svarastuti,

saṅ vijñātmaka riṅ laṅə̄ kavi vənaṅ tuladana saguritnireṅ sabhā.

mevəh ṅvaṅ mucape kadarśitan i sarvagatanira haneṅ jagaddhita,

ndan sūkṣmā sumilib riṅ aṇḍajana kokiraniran atirūpa vīryavān,

saṅ tvasniṅ lara rāga sāriniṅ unaṅ saṅ amisani rarasniṅ aṅrəṅə̄,

saṅ sākṣāt pinakesiniṅ manah akūṅ rahina vəṅi lanāṅudaṅ lulut,

yekīṅ ambək aṅel śumakti ri viyoganiṅ alara kəneṅ smarānala,

paṅdeniṅ lara rāga yeki tumuvuh ri hati mamunah aṅgəsəṅ manah,

tr̥ṣṇāgə̄ṅ sumaput pətəṅ təmahaniṅ rahina pati gagap-gagap tutur,

kāmārtha pva ya hetuniṅ mapəniṅan mamulaṅuni ri saṅ huvus licin.

yāṅde rañca ri citta maṅkin alaṅə̄ təkapiṅ alara śoka kāsyasih,

ṅhiṅ vikvā jugaṅ enakānusupa riṅ vana tumulusa tan kabañcana,

śaktyāṅuṅsira siddhaniṅ manəmu sandhi kaləpasən i patyaniṅ tiga,

ṅhiṅ tekā palakun ri pādanira saṅ yativara maləsāvakājñana.

hana tāṣṭaliṅga ya vinastu ləvih,

pinakopajīvaniṅ atīrtha hayu,

pagavay halā hayu ya vastu hilaṅ,

ri vəkasni sandhiniṅ amukṣa hati.

ya ta hetuniṅ manəmu śabda tutur,

apan evəhaṅ luputa riṅ vimala,

dyutakarma yeka maṅimur maṅikū,

ya dumehnikā manəmu pāpa magə̄ng.

vara darśananta huniṅan rumuhun,

nr̥pa pāṇḍaveki caritan ta nihan,

huvus iṅ binañcana halāh anita,

təkapiṅ suyodhana kaṭuṅka dahat.

sira saṅ yudhiṣṭhira təmən kalaran,

kapəgan manahnira məhah maṅəsah,

ri hilaṅnikaṅ hayu lavan kavikun,

ri manahniran kapətəṅan ri hala.

sira duryaśeki təkap iṅ sajagat,

apan aṅśa dharma guṇatattvanira,

vihikan ta riṅ naya parārthaguṇa,

lalu yan kəneṅ dyutavikalpa malā.

humənəṅ sireki sinəsəl vəkasan,

təkap iṅ sarāt paḍa kabeh malara,

ṅuniveh ta saṅ drupada matsyapati,

kalavan ta saṅ vidura kr̥ṣṇa muvah.

sira rena saṅ lima təmən kalaran,

manaṅis masambat akusā kapati,

ri hilaṅnikaṅ kanakarājapura,

kalavan sabhūṣaṇa təlas karuhun.

nr̥paputrikā rika rapuh kumətər,

vinudan təkapni śakunin dumaha,

atəhər gəluṅnira rinəṅgut ika,

irikaṅ sabhā sira kavəs dinudut.

ri vijil nireki manaṅis madulur,

saka riṅ kaḍatvan atiśoka rapuh,

ri pakumbakan ya vinəgil manəhər,

manaṅis rikaṅ vəṅi taman paturū.

maṅurai gəluṅnira masāk makusut,

mətu taṅ vuvus tan ahajəṅ vəkasan,

hana ta pratijñanira yan gəluṅən,

rah ikaṅ suyodhana ya śucyanira.

ṅuniveh ta saṅ pavanaputra mavū,

sahasāṅuhuh sira təhər mavuvus,

mupuhe pupūni si suyodhana riṅ,

palagan pratijñanira tan vuruṅa.

paḍa mətvakən vacana tan rahayu,

sira saṅ suyodhana muvah mavuvus,

niyatanya yan pəjaha liṅnya hələm,

makatuṇḍa təṇḍas i musuhnya lima.

ndya tikan patūta maluyeki muvah,

ya ta kāṅəniṅ tvasira dharmasuta,

samayanya dūra tiki yan mijila,

rva vəlas tahun lavasaniṅ layata.

ya tikāgave lara magə̄ṅ ri hati,

nr̥pa dharmaputra hibəkan prihatin,

vəkasan sireki mavuvus matərəh,

maməlas harəp saha taṅis masəkəl.

ariṅku rəṅə̄n ta vuvusku denta,

uḍūh mapa teki manahta liṅta,

laranta ri tan sipi durnayanta,

ṅhulun juga pāpa tivas hiḍəpku.

titahta dumeh ya manəmva duhkha,

huvus vruh akun sinəsəl təkapta,

kunəṅ ya taṅ enaka vikva tan len,

marān akəḍik paṅucapnikaṅ rāt.

yadin kita tona ya keraṅ-eraṅ,

təkapni vuvusnikiṅ opavāda,

vanāśrama liṅku tatan hanaṅ len,

vukir saparāna juraṅ tasik lvah.

vavaṅ pavanaputra mojar agasul,

apan paḍa ta vastuniṅ pəjah amūk,

i sanmukha si koraveśvaraśata,

alot juga hələm təvas keraṅ-iraṅ.

apan paḍa ta rakva vastunikihən,

təkapnikana saṅ vruh iṅ pati təpət,

kaśūrapuruṣan kadhīran apagəh,

ya teka rinəgəpnirāmrih atəhər.

apan dalu kapāpaniṅ vədi-vədi,

təvas manəsəkī sarāt tapa guṇa,

kapātaka mamet sukhāmriha iku,

ləhəṅ pəjaha tan təmuṅ sukha pinet.

hanāmrih adagaṅ mamet alayaran,

tasik bhaya havanya tan tinaha ṅel,

təkānya ri paranya tan hana vaneh,

sukhā pəjaha tan təmuṅ sakapinet.

kunəṅ hikana kāptiniṅ hulun usən,

ikaṅ pəjah asiṅhanāda riṅ ayun,

ya teki ya hələm tasən ləkasana,

matī tuha rare paḍeki niyata.

dhanañjaya mapeki liṅku ya hiḍəp,

nda mah ləkasi matya tumpura pisan,

maran tan adavā təkapniṅ aṅucap,

na liṅ pavanaputra siṅha magalak.

yudhiṣṭhira muvah sireki mavuvus,

ariṅku lalu memaniṅ pəjah amūk,

ya tan hana tinūtnya nīti rahayu,

təvas kadaluruṅ pəjah kadi suvuṅ.

nihan mara vuvusta tan sipi-sipi,

ikaṅ pəjah ameta vastv akaraṇa,

ləhəṅ karika yan vruhe pati təpət,

ya tan vruh irikeka meman inucap.

apan lagi vuvusnikaṅ vvaṅ aṅucap,

ikaṅ tapa ya rakva liṅnya sapəṭik,

ləhəṅ katika yan vruh iṅ pati pisan,

ya tan vruh irikā ta meman inucap.

kalīṅanika memaniṅ vvaṅ aṅucap,

kunəṅ təpətaniṅ vruheka makəḍik,

yadin vruha tatan kənenaku juga,

sugih varas ikā vənaṅ ya maṅucap.

ariṅku tapvan vruha riṅ parārtha,

rare tuvi pvan taya riṅ kabhikṣvan,

kunaṅ hiḍəpkv ī kita meta tīrtha,

maran hilaṅ kleśanikiṅ śarīra.

nihan hana vvaṅ masavah rikaṅ lvah,

lavan maluṅguh mamaṅāniṅ ajrəm,

kəṭəṅ masimsim tuli yan pakaṅsi,

ikaṅ samaṅkā pva dələ̄n təkapta.

kunəṅ kitāntən vruha riṅ parārtha,

maran hayuntā manulus katona,

apan kadhīranta rikaṅ kasatyan,

avās manuntun təka riṅ kasiddhan.

huvus mara vruhta rikaṅ kaśāntan,

ləkas ta tāmrih taṅivə̄ ta jīva,

huripta pə̄ṅpə̄ṅ ya ta sādhananta,

maran tan evəh təkap iṅ paratra.

ariṅku laki saṅ dhanañjaya kiteki bapa pinalar i ṅhulun təmən,

paṅə̄bananikiṅ jagat gumavayaṅ parahita dadaheṅ parākrama,

tasən ləkas ikaṅ hyaṅ iṅ puri pameta patapana maṅiṣṭy anugraha,

riṅ eñjiṅ iki yan lumakva kita tan kahavarana maran kasiddha ya.

təṅah vəṅi huvus lumiṅsir i səḍəṅnira mavuvus i saṅ dhanañjaya,

ḍatəṅ ta siraṅ ārya nāma vidurāṅlavad i sapaṅutusni saṅ kaka,

sagadgada manah nirāsəmu taṅis maməkulakən i saṅ yudhiṣṭhira,

uḍūh anaku māsku tan sipi vəlasku ri kita lalu tan sih iṅ vidhi.

apan kita daṅū pva nīti riṅ ulah vədi-vədi mahatī kasāttvikan,

ginə̄ṅ ta ya linolyan iṅ hati lanāṅguṇita hayu lavan kaṣaḍguṇan,

harah mapa tikin kəneṅ kira-kirāhala pinasukaniṅ malendriya,

tuhu pva ya ta mevəh iṅ vvaṅ anulus lituhayu kavi śakti paṇḍita.

savaṅ kadi manəmvakən varah i saṅ yativara vinarah ta riṅ havak,

ri dāyanikanaṅ smr̥tī muliha riṅ pati patitis i tattvaniṅ dadi,

huvus manaravaṅ təkapnya vəkasan paranani paraniṅ nirātmaka,

təkā pva təkaniṅ pasārani patinya dadi ya manasar mareṅ hala.

kalīṅanika tan kənenaku jugaṅ hala hayuniṅ ulah ya laṅgəṅa,

phalanta vihikanta riṅ naya parārtha tan alavasa duhkha pātaka,

ajum pva haradin manahta phalaniṅ təlas anəmu varah mahāmuni,

lalū savətuniṅ titah ya tariman hala hayu sukha duhkha taṅgapən.

katon tivas ikaṅ vavaṅ vvaṅ amunah lumicinakən avaknya yan hana,

apan purih ikaṅ śarīra kəna riṅ lara viṣaya lavan rajah tamah,

mataṅnya paḍəmənta riṅ brata samādhi gavayakəna taṅ kasāttvikan,

trikāyasama taṅ sahiṣṇu muditā dulurana karuṇā si kāyika.

səḍəṅnira saṅ ārya nāma vidurāmitutur i sira saṅ yudhiṣṭhira,

ḍatəṅ ta rəṣi dhomya śīghra sumuyug ri kahananira saṅ nareśvara,

vavaṅ nr̥pati gadgadāṅadəg aṅañjali maməkul i jə̄ṅ mahāmuni,

parəṅ paḍa humuṅ taṅisnira kabeh yativara kavəṅan sirāṅadəg.

taṅis-taṅisirāsəkəl nr̥pati dharmasuta mulati saṅ mahāmuni,

nda tiṅhalana teki pāpaniṅ apuṅguṅ i varahira saṅ pinaṇḍita,

agə̄ṅ sapr̥thivī jugaṅ hala kabhukti təkap i rahulun munīśvara,

hanā madana tan hanāṅləvihaneṅ adhama kaluṣa mūḍha kaśmala.

nda liṅgihana saṅ mahāmuni da honya ta sira babuni ṅhulun hana,

tumūt milu kapāpa dīna kadi lampuran aṅahasi deśa met nasi,

karəm ri təṅahiṅ mahārṇava hiḍəpnira ri laranire samaṅkana,

abəh ta punikaṅ matāsrət apəyəh svaranira karəṅə̄ nirantara.

sabhāgya ri ḍatəṅ munīndra sira teki mavəlasa ri saṅ hulun kabeh,

ndan ahyun atərən ranaknira mareṅ vukir anusupa riṅ vanāśrama,

yadin təhəra tan vanāśrama ləvih ta halani paṅucapnikaṅ sarāt,

sukhā pəjaha satya riṅ para-paran makaphala masiluṅluṅaṅ lara.

panaṅisnirāṅrəs asəkəl nareśvara,

vəkasan ta saṅ r̥ṣi maśabda gorava,

ya ta hetu saṅ hulun apadgatan ḍatəṅ,

ruməṅə̄ ri bhūpati kabañcaneṅ nita.

nyama gə̄ṅni kuṅ lara ri saṅ nareśvara,

apan adbhutaṅ vacana denikaṅ jana,

kita teki vastuni huripnikaṅ sarāt,

ya dumehnikaṅ jana kabeh paḍālara.

syapa teki tan mavəlase kiteṅ sarāt,

ri kasajjananta tuvi yan binañcana,

pira teka pāpaniṅ asuṅ lare kita,

kala mūḍha mūrkha tuvi tan kəneṅ vəlas.

yadiyan ruməṅvakəna saṅ mahāyati,

ri kadurjanan saṅ agave lare kita,

matukup kapə̄ sira savetnikaṅ hala,

atakut kapelutana

ndak ajar kiteka rusitiṅ vvaṅ iṅ kali,

kavi sandhi vijña riṅ upāya ṅarṣaṇa,

mamanis maśabda madulur valokana,

maṅimur magoṣṭhava mamet aləṅkara.

maṅucap sudharma guṇatattvaniṅ dadi,

mahaləp mataṅgvana saloka sākṣara,

ri tutuk juga vruh aṅucap taman təpət,

ri hatinya kimburu mabuddhi sādhana.

riṅ agoṣṭhi śabda mamahā marək ta ya,

maharəp ri kosvaniṅ ujar salah kəna,

kagiriṅ tikaṅ vvaṅ aṅucap ta yāpəpər,

mamilət vuvusnya dumalih mamatyana.

hana len kadurjananikāgave kadaṅ,

maṅucap ri mūlanika ṅūni riṅ vaneh,

ṅaraniṅ bapebu madagiṅ lavan kaki,

mara riṅ sugih dadi mapintasādhana.

hana duṣkarāharəp i duhkhaniṅ vaneh,

mamiveka polah aṅusī mamet hala,

mamilət mabheda maṅucap sahāgama,

yan alah vuvusnya maṅucap madudvana

hana duṣkr̥tātuhagaṇan sapustaka,

rahineṅ kuləm vinaca nitya vus tama,

kahiḍəp rahasya tuhu dharma saṅ viku,

ndan isinya mudra kala caṇḍapiṅgala.

hana len mabuddhinika rūpa bhikṣuka,

mamanis maśabda mara riṅ pradhānika,

saha lepanāṅajarakən vruheṅ guṇa,

sipat iṅ kasiddhyana manon asambhava.

vara teki liṅnika katona maṅśila,

pinarək sinevaka maminta sādhana,

tinəkan sakāptinika siṅ samenaka,

kuṭilā hatinya dadi miṅgat iṅ kuləm.

təka riṅ mavalkala tatan mahājana,

pracəṭāṅ aləṅkara ri buddhiniṅ para,

maharəp kabhaktyana pujīniṅ āśrayan,

luməvih sumamyak alicin vavaṅ tyajet.

ṅuniveh tikaṅ vvaṅ arəbut pamuktyana,

silih ol paḍāṅdəha mamet upāśrayan,

hana bañcanā hapan alit viṣāmrəta,

sumilib madoh kuṭila tan kənenuha.

si suyodhana pva ya musuhta nityaśa,

śakunī patihnika patihnya riṅ hala,

makaṅūni riṅ carita bhīma sārayu,

rinacun si bhīma linabuhnya riṅ bañu.

kita teki tan vruh iṅ upāya riṅ nita,

təkapiṅ suyodhana mameti bañcana,

śakunī ya tādadi parih təkapnika,

ya dumeh nitālaha tatan sakeṅ tivas.

vatuniṅ karaṅ paḍanikaṅ suyodhana,

maluṅid malaṇḍəp arusit pasaṅ ləyəp,

pinaran bhayāṅanini tan kənenapəs,

mrigigih makas kasəlatan sahiṅ-sahiṅ.

syapa lena saṅ vənaṅ ataṅgəheṅ hala,

kadi bhīṣma yogya pituhun vuvusnira,

yan apeka yan mapəsa saṅ suyodhana,

umənəṅ pva yāpituli tan kənenavər.

tuhu yan hanā kaliliran sakeṅ bapa,

vuta tan rinakva ri hatinya tan dəliṅ,

duməliṅ yan iṅ hala manon ndatan vuta,

pinasuknikaṅ mala maluṅ kadurjanan,

dalu pāpaniṅ vvaṅ amusuh paṅutpata,

parabañcanāṅulah-ulah ri saṅ viku,

umənəṅ ta saṅ sujana satya sāttvika,

apan āṅśadharma guṇatattva saṅ mahān.

yadiyan kataṅkəpana riṅ kadurjanan,

paḍananta riṅ kira-kirārusit malit,

niyatārebut kavah amet kapāpa ṅel,

mamaṅan tahīṅ paṅisiṅan mahurhuran.

kita teki yan maləsa riṅ kadurjanan,

manugəl sukunta tinapəlnikaṅ pəlus,

manəvər liḍahta mavədī rəhak vatuk,

rasananta teka mara tan təmuṅ lara.

kaṅ ariṅasana kasnika matəguh apəs,

kapanasana tikādbhuta matəguh akas,

tinisan api tumūt maṅuluri maləməs,

ya tika paḍani saṅ sujana parahita.

havan aradin ataṇḍəs abəcik aratā,

kasukətan araciṅ tahi majimət arok,

sinapu sinasapan muvah ika maradin,

ya tika paḍani citta saṅ anəmu hayu.

hana vəsi riti tambaga matahi-tahi,

salavas ika mijil juga təhər atahi,

ya ta paḍaniṅ avak matahi-tahi mala,

radinana pahayun dadi mari mahala.

halanika ri daləm dadi mətu ri yavā,

halanika ri yavā dadi mulih i daləm,

hiṅət-iṅətən ikaṅ kadi damar akəlir,

hala hayuniṅ ulah paḍa mamaya-maya.

tivas ikaṅ añale hala hayuniṅ ulah,

tivas ikaṅ aṅaləm luməvihakən avak,

tivas ikaṅ aṅucap təka mamaśa-maśa,

tivas ikaṅ aṅaləm kadi maṅuguṅ-uguṅ.

hana viku maṅidan maṅidəri bhuvana,

makuravit agəluṅ sukər aburarutan,

təhər ikana purihniṅ avak apəniṅan,

si hurip ika ya vastu sukər aburarut.

hana sira lumicin viku lagəna muna,

vinulatan aradin taya sukər iṅ avak,

tuhu saka ri həniṅnira təka ri daləm,

taha si purih ikaṅ hurip aṅaṅən-aṅən.

iṅət-iṅətən ikaṅ manəmu sukha magə̄ṅ,

rasa-rasana təkapta maṅinakana rāt,

vvaṅ atika pinakārgaḍanika śaraṇa,

niyata pamaləsanya sukha phalanika.

hana viku maṅigəl macarita rinubuṅ,

bisa tivas ika siṅ vvaṅ atika vihikan,

vvaṅ atika maṅalem ri guṇanika ləvih,

vvaṅ atika saṅ asuṅ mamiguṇani guṇa.

syapa karika vinastu ləviha ya təmən,

masuṅa varah anugrahana savijayan,

pamulikana bhaṭāra masuṅa karatun,

saṅ aṅaran ika siṅ vvaṅ atika vulikən

katəmu mara təkapta manəmu kavikun,

ləkasakəna ləkasnira niravaraṇa,

kaṅ aṅinakana riṅ jana ya ta gavayən,

phalanikaṅ aṅucap hayu təhər apuji.

ya karaṇanikanaṅ viku yan apitutur,

lumipura ri laranta phalanika təmən,

purihira saṅ agə̄ṅ sukhanira kalaran,

yan anəmu lara duhkha tan ari malavas

kita mara laki sampun anəmu kavikun,

vaṅunən ikaṅ acintya ri hati muliha,

matutura ri bhaṭāra karaṇa sira tah,

parahupana maśucya ri sira satata.

huvus ika maradin manah alilaṅ aho,

ləkasi ta pagaventa kaṅ aṅinakana,

mapa karika manahta tulusa manusup,

tan asaraga hiḍəp mami kita sakarəṅ.

kunaṅ iki nayani ṅhulun iṅət-iṅətən,

saṅ arəjuna sireka luməkasa tapa,

makaphala mara tan hana maṅapakara,

tumikəla taṅaniṅ vvaṅ anuduha hala.

kunaṅ ikana tukar tar ala səminika,

sulur ika pagaventa hayu rajasura,

makakusuma taṅisnya makaphala pati,

rinatəṅaniṅ umah gala-gala ya pinə̄m.

mataṅ ika paḍa ṅadva guṇa varaśara,

hələm i təkanikaṅ bharata ya vaṅunən,

paḍa matihaṅa sañjata ya ta pahayun,

niyatanika hələm juga taya vuruṅa.

nahan ikana vuvus munivara karuṇa,

mamitəkəti ri saṅ nr̥pati lima suta,

dadi ta nr̥pati dharma sumahur atəgəg,

ri hilaṅ i pətəṅ iṅ hati maluy apaḍaṅ.

tulusakəna tikuṅ sih saṅ mahāpaṇḍitārya,

ri pukulun apan evəh ṅvaṅ kədə̄ dhīra satya,

naya ra putu mahārṣi pveki maṅkin saharṣa,

ri tulusani saṅ āryā phālgunāṅhyaṅ riṅ agra.

pinəkətana ri sandhijñana de saṅ munīndra,

ləkasiṅ atapa nisniṅ jñana sampun viśeṣa,

nāhan ikana vuvusniṅ nātha dharmātmajāsvī,

ri larisani saṅ antən śīghra maṅsə̄h manambah.

mamituhu ta sirosən saṅ kinon siṅ pakona,

ri sira dadi ta mojar saṅ rəṣī nīti yogya,

riṅ ulahaniṅ acintyan dug səḍəṅ dhyāna yogī,

avarah alaniṅ ambək bañcanākveh musuhnya.

hana ta musuh anūkṣmālit mamor īṅ acintya,

aṅidərakən anuntun riṅ katon mogha lam-lam,

pinatitis iṅ alitniṅ jñāna nis tan paśeṣa,

mata pinati vinaṅsul sandhiniṅ yoganidrā.

gavayakəna ləkasniṅ lakṣaṇā mudra jāpa,

mata mulati lalāṭa byakta yoganta siddha,

katəmu taman inuṅsī vastuniṅ tan pavastu,

kadi laliniṅ aṅantuk ləs ləyəp riṅ kamokṣan.

kavaca śara laras len taṅkulak tan madoha,

phalanika si kadhīranyan rumakṣeṅ śarīra,

səḍəṅ iṅ avamanan deniṅ musuhtekamusuhteka

sukha pəjaha siluṅluṅ taṅkulak len laras hrū.

hana ta vukir apūrvāgə̄ṅ paran saṅ matīrtha,

saphala paraniṅ aṅhyaṅ byakta saṅ hyaṅ hana ṅkā,

girivarasura sākṣāt rīndrakīlāgra rāmya,

ya ta pinakakasiddhan ṅūni de saṅ hyaṅ indra.

hana ta sira maharṣi khyāti riṅ svargaloka,

sira ta rata paranyan yogya vus labdhacitta,

tuvi ṅaranira saṅ dvaipāyaneṅ rāt kavīryan,

sira ta vəkas i dharma hyaṅ śivan vus pralabdha.

nahan ikana tuduh śrī dhomya riṅ nīti yogya,

rahina tuvi kamantyan tejaniṅ sūrya tumraṅ,

gagaṇa kadi sinapvan taṅ pətəṅ tan paśeṣa,

kadi manah i saṅ amvit maṅkatāṅhyaṅ riṅ agra.

dadi ta sira madandan saṅ təlas labdhacitta,

praṇata təlas amuṣpeṅ saṅ mahāpaṇḍitārya,

ibunira sira vinvit luhnirādrəs tan ampət,

kadi təhəra tan antuk denirāpan katrəṣṇan.

anaku yanaku māsku ṅke lah uṅsuṅku śīghra,

ṅhulun umulat amə̄ṅpə̄ṅ dak pahāvas ta putra,

mapa tika vuvusaṅkvā māsku tan vruhku mojar,

ri kita laki savetniṅ tībra deniṅ larāgə̄ṅ.

nihan ikana pasuṅkvāmah tikaṅ vastra taṅgap,

kəmulani tanayaṅkv āṅhiṅ pavehniṅ kahīnan,

anaku laki pahenak mah səpah ṅke vajaṅku,

vacananira maper luh nitya madrəs tan ampət.

tan ṅeh tikaṅ lara yadin caritan bhaṭārī,

sampun saṅ ārya mamuhun ri narendraputra,

saṅ dharmaputra humənəṅ magəgəh katīkṣṇan,

luh nityaśāmili-hilī ri pipi dravādrəs.

mojar sirāṅisək-isək səsəgən tan ampət,

antənku saṅ tulusa siddha ri pāda saṅ hyaṅ,

eṅət kitāntən i vuvusnira saṅ mahārṣi,

lāvan kayatnakəna nitya tikaṅ samādhi.

nā liṅ narendra saha luhnira pan katr̥ṣṇan,

mamvit muvah sira ri saṅ vara bhīmasena,

saṅ bhīma yeka mahivaṅ panaṅisnya ṅəmbe,

lvir miṇḍa riṅ təgal ayun malajəṅ kavarṣan.

maṅkin taṅis pavanaputra maṅantug-antug,

umbəl mijil gidə-gidə̄ riṅ iruṅ ya madrəs,

lāvan ta lətnya kuməlus mabaṅə̄r vətunya,

kompol katon tan inivə̄ təkapiṅ larāgə̄ṅ.

tan ṅeh taṅisnya caritan pravarārya bhīma,

saṅ phālguneki mamuhun ri saṅ āri karva,

saṅ dropadī sira ta rūkṣa rapuh kaləsvan,

śokānaṅis maṅiḍupuh sira yan panəmbah.

saṅ phālguneki manaṅis maṅadəg sinəmbah,

kepvan ta cittanira denya maśabda maṅrəs,

yekāmukət pinakaśatru təkapniṅ amrih,

hetunya yan kapihənəṅ sira denya kepvan.

siṅgih ḍaḍuṅ pinakapāśanikaṅ kamokṣan,

tr̥ṣṇā jugāgavaya sih mamilət riṅ aṅga,

vyaktinya yan dadi śarīra muvah kabhāva,

ṣaḍvarga yeka dadi riṅ dadi mogha tr̥ṣṇa.

maṅkin ta kāṅən i halanya yadin katūta,

marmanya śīrṇa pinəgatnira riṅ kadhīran,

śāntā sahiṣṇu pamunahnira tan paśeṣa,

hetunya śīrṇa malilaṅ dadi citta mahniṅ.

maṅkat sirātəlas abhūṣaṇa ratna mabhrā,

lāvan sasañjata kabeh paḍa nora kantun,

luṅhā sirāṅinak-inak təka riṅ pradeśa,

akveh tikaṅ vinulatan magave praharṣa.

rāmyārūm kahaḍaṅ kapāt lakuniran vahu-vahu katiban javuh pisan

vahv āron səminiṅ trəṇāṅkura laṭākiris asəmu hijonya kābunan

vahv aṅluṅ sakilan gaḍuṅnika lavan katirah aṅurukəl suṅutnika

aṅhiṅ kəmbaṅ ikaṅ mənur mvaṅ asanāṅruhuni ri pasəkarnikaṅ vuṅū

rəmrəm traṅ manisih-nisih vahu mayat javuh ika malilaṅ kapāvanan

gəntər dohnya ləyəp tunenaṅən-aṅən vahu lumarap ikaṅ taṭit ləṅit

lumrādrəs mapalayvan iṅ gagaṇa meghanika silih alintaṅ iṅ laṅit

məṇḍuṅ-məṇḍuṅ adoh riris ḍumavuh iṅ vukir aṅinaki cittaniṅ maṅə̄

tistis lampahirāṅavetan aṅalor tan agəlis aṅadəg sireṅ hənu

ləṅləṅ deni gərəhnikāmisiki karṇanira kadi makon manoliha

ṅkān maṇḍəg sira tan vavaṅ lumaku denya kadi pasayut iṅ haneṅ jinəm

marmāṅrəs tvas irāsəkəl dadi tumuṅkul aṅusapi ri luhnikaṅ mata

śokāṅlih kumətər tikaṅ hati baṅun tan apupula muvah tikuṅ manah

lāvan bhrāntani saṅ kināryakənireka malara ri pasahnireṅ priya

yekāṅlūd ruməmək manahnira təkapniṅ aṅucapa kakūṅnya tan hana

aṅhiṅ luh kalavan taṅis juga siluṅluṅira yan iṅucap ndatan humuṅ

maṅkin cittanirāləməh dadi maluṅguh akəcap aṅəsah vuraṇḍuṅən

aṅlūd deniṅ aripnikaṅ mata pilih sira hinucap aṅāryakən ṭikā

lāvan trāsanikaṅ ləbū ya ta tiniṅhalanikaṅ aṅuṅaṅ malar vruha

aṅhiṅ caṇḍinireka tambak inukir cinaviri mapucak patah muṅup

akveh kāri vimūrchitālara təkapnira kapihutaṅan karāsikan

bhrāntajñāna makiṅkiṅ osah aṅəsah rahina vəṅi taṅisnya tan pəgat

karāsikan

pə̄mpə̄man ri daləm pamə̄man i huvusnya ratəṅ ika paḍanya tan pahi

maṅkin kāṅən-aṅən təkapnika ri tan ḍatəṅaniran asuṅ lare hati

aṅlampū pəjaheṅ tilam gatinikāruruba sapavəkasnireṅ karas

len tekaṅ humənəṅ maṅantyakəna liṅni kaḍatəṅan i saṅ mareṅ vukir

hetunyan pamuluṅ-muluṅ kusuma maṅrəbu-rəbunika muṅguheṅ jinəm

vvantən bhakti mamuṣpa riṅ pratima ketaka sira ta vinimba tan vaneh

kəmbaṅ padmaśarīra gandha ri pipinya panirama ri luh nirantara

puṣpāvrāṅkən ikaṅ gəluṅ guduha tañjuṅ amiraga maghəṇṭa nopura

susvāhrit lurus iṅ təṅah ya pacarunya maṅucaraṇa sambat iṅ ṭikā

aṅgantaṅ punagiṅ tilam səkar aśoka rurubanika yan ḍatəṅ hələm

aṅgantaṅ

lāvan yan humuvah kənaṅ tulam amaṅkvakəna kusuma jaṅga sampəta

len tekaṅ bakakak puḍak pamapasanya mabulakana piṅgiriṅ nadī.

kāṅkən yajña manobhaveka panaṅisnika mabalik aveda sasmita

sə̄ṅniṅ candra mañar lumə̄ṅ ri hati kāṅkən apuyaniṅ ahoma nismara

lumrāvrā kukus iṅ pupur mələk avor vida ri jaja tibeṅ tapih suji

vvantən mūlya təmən sajinya vəkas iṅ kinəliran adhikeṅ pasaṅgaman

len taṅ yoga turū samādhinika rūpanira ya ta minuṣṭi riṅ hiḍəp

enak maṅgəh ikaṅ lulut manəmu sandhi sumurup amisarjaneṅ tutur

ātmārok si hurip məsat dadi turū təmahanika maṅipy asaṅgama

sampun siddha sayogya riṅ pakasutan matəmu paḍa saharṣa sasmita

tan ṅeh yan caritan hiḍəpnira ri sambataniṅ alara yan kināryakən

mvaṅ polahnika tan pəgat makapuput patinika yaya tan varəg lara

āpan jātinikaṅ manah juga tumūt yan ulurana katon tivasnika

ndan sūkṣmā humənəṅ sirāṅaṅən-aṅən hilaṅani malaniṅ daśendriya

śīghrā śīrṇa pətəṅnikaṅ hati dumehnira maṅaṅən-aṅən lumampaha

samy ādan maṅadəg təlas lumaku tan hana maṅavara rāmya tūt havan

məntas riṅ valahar matīrtha sira sampun arahup aradin tikuṅ hala

tūt mārgā hana siṅgulan ləba-ləban kamaṅi kapur avor pakis ḍaḍu.

garyaṅ-garyaṅ ikaṅ təgal kakacəman valikat upama vor kataṅ-kataṅ,

səmbuṅ got kucubuṅ mavor pila-pilū kutu-kutu kulurak ləpaṅ pahit,

paṅgil paṅgaga siṅkaban lava-lavan hana nanavidharālundāluṅ

lundāluṅ kalavan galiṅ lumalay iṅ vaduri lalavatan paḍāsinaṅ.

sakaton paḍāmuhara rāmya ri havanira tan madoh dahat,

pagagan hañar binabadan pagər ika rinurah təkeṅ havan

inalih təhər sinariban hana tilas ika vetan iṅ pagər

ya tinūt nirāṅinak-inak duruṅ agənət apan havan hañar

maṅalor muvah katəmu mūlani havanira tan madoh dahat

sinamar-samar pagər ikājajar amənər atūt havan magə̄ṅ

agənət ḍukutnya maradin sari-sari havaniṅ təkeṅ vukir,

galagah kidulnika tinunvan avurahanikaṅ manuk mibər.

mələsat valaṅnya ya manūt kukus amarəki riṅ sukət-sukət,

garagat manamber aṅusī dali-dali manucuk valaṅ kiṭik,

barabat barā mahurahan gulunika masavit valaṅ gayār,

humənəṅ caṅaknya mavədī raray aṅaruhi riṅ təgal humuṅ.

halivat sirerika suməṅka ta lakunira tan madoh dahat,

pagagan səḍəṅ vinulatan tanəmanika kabeh paḍāhijo,

jalureh lavan kacaṅ uris təpinika masinaṅ bayəm suluh,

kamale valuh paḍa lumuṅ karavila mabiluṅka hantimun.

jinajar-jajar jalih ikaṅ jalu jura javavut jabuṅ jarak,

cipakan hirəṅ muṣika tumbar akəñcur ajasun putih laja,

salarik jasun mirah avor pacar adiləm arok bayəm kakap,

sulasih kidulnya manisih patula paliṣa len kacaṅ hijo.

kahalintaṅan təkapirān panəmu tarukaniṅ siluk-siluk,

mapabañvan endah alaṅə̄ vuninika magulaṅ-gulaṅ pətuṅ,

tinanəm tikaṅ kayu puriṅ jinajar i təpiniṅ pagər-pagər,

mayanāsinaṅ vuṅa talinya vuṅa vari mabāṅ hanāputih.

maṅalor sirānəmu gəgər śavayanikaṅ alas talun-talun,

ri lurah ləbak pasavahan bañunika maputih tiniṅhalan,

masamīpa poh pisaṅ alas nalikira hana riṅ juraṅ-juraṅ,

halaləh tinolih alaṅə̄ maṅəḍap-əḍap ikaṅ valīkaḍəp.

maṅavetaniṅ gəgər ikaṅ lakuni sira suməṅka riṅ gunuṅ,

irikaṅ katon gəmən alas vinulatan iṅuṅaṅ tikaṅ kidul,

daśadeśaniṅ nagara tan katəṅər i paṅasutnikaṅ limut,

dinələṅ baṅun tan aratā ləmah ika kadi toyaniṅ tasik.

patapan kasimpar alaṅə̄ havanika titir olihiṅ mahas,

abaṅət kalinya maməluk lagi manucul i sandhiniṅ tapih,

haradin puḍaknika hañar pinaraban anilib təkeṅ kuləm,

vulakan pilih pañulikan hana səmi kadi layvaniṅ gəluṅ.

hana tāhañaṅ katəmu riṅ havan alaləh aliṅgih iṅ vatu,

paṅadeśaniṅ vaṅ umulat kətə-kətəg ika mār sumamburat,

haṅagəm ḍuhuṅ lakinikā saṅ anakəbi ya tātapih sabuk,

kataraṅgul adbhuta tumon sira paḍa murəṅaṅ parəṅ madəg.

alivatnirerika katon ta suku-sukunikaṅ gunuṅ magə̄ṅ,

masəkar tikaṅ kayu palāśa kadi gunuṅ apuy katon murub,

asanāləvas kadi hudan kanaka ḍumavuh iṅ ləmah marūm,

mariris mrəbuk saha kilat vəlas arəp amilət katon lumuṅ.

mapasar-pasar savaṅ ikā vukir amava laṅə̄nya yan katon,

maḍasar gaḍuṅ mənur avor katirah aravayan matūt havan,

matihaṅ luruk-luruk aśoka dalima mavade tahən manis,

dagaṅanya sarvaphala yeki viphala vəḍətan hanāhañar.

puji tan ləvih phalanikaṅ vukir avuni salaknya yan tasak,

hanamar mətah vila lumutnya pisaṅ ika tumuṅkul iṅ havan,

kamiris ratəṅ kacapi juṅga masinaṅ atəguh taman rurū,

hana duryan aṅruhuriṅ ambavaṅ ika mapagəh paḍālurus.

sakaton təkapnira baṅun tan anumata ruhurnikaṅ kayu,

hatugəl juraṅnika lukat bañunika luməvih mareṅ kali,

pujiyan paḍāṅrəs ikanaṅ paraṅ apiṅit aroṅ daləmnikā,

hamunah səkar barat ikāṅhalani ri sapañandhiniṅ vuṅu.

tumurun sirerika katon ləbak ika hana simpaṅ iṅ hənu,

humənəṅ vatunya hulatən ri lavas ika panambir iṅ kayu,

atuhākəpuh vahu mataṅkil amasah i sarenikaṅ juraṅ,

pasaṅan lələh ləvas amaṅku kamata-mata tuṅgakiṅ pətuṅ.

i samīpa vaṅkay iṅ apeki ta kunaṅ ahariṅ turuṅ ləvas,

hana valkalātulak alī kupina kayu lavan valuh tutub,

viku ganya saṅ mati pilih maṅaluśa tumurun sakeṅ vukir,

paṅadeśaniṅ vaṅ umulat raga sapikul avuk hibək cacah.

asamun hənunya maṅalor ya ta havanira tūt alas magə̄ṅ,

asuṅəb sumoṅ kayu rumambay avilət arukət lavan latā,

sira hānamun tapak ikaṅ kidaṅ adulur amaṅsul iṅ juraṅ,

muni təp macanya hana riṅ sukə-sukət amarəki riṅ rənək.

arənəb hi sor kadi guhā təkapiṅ aruṇa tan katon dahat,

aradin ta yaṅ ḍukut alit mati təkap i patapnikaṅ sukət,

kasilib kuciṅnya mamanek phala mamucak iliṅ vəsah təpus,

kapitūt təkeṅ vana lumuṅ maṅalaya manuduh-nuduh tavaṅ.

alivatnirerika suməṅkā ta lakunira rāmya tūt hiriṅ,

ri ləbak-ləbaknya tan adoh vara kayu gumuliṅ lakar hañar,

mapaḍaṅ kidulnya babadan hana kadi patapan kacuntəna,

muni poṅ kəpoṅ svaranikaṅ pamalu-malu lavan tabaṅ-tabaṅ.

nda nihan kapaṅgih ikanaṅ pathani ləvas avūk hatəpnikā,

vulətan gigal katuruhan hana parab ika mātra tan ləbur,

kakavin lutūr hana ta śeṣanika mapitəṅət samar-samar,

suhunanya mesi ri lavasnya hana viku maṅambareṅ ləmah.

ri havanya rāmya majajar kañiri kayu puriṅ tahən manis,

kamuniṅ lavan kayu kuniṅ parajita marurub vəlas harəp

tinatā tinumpa tinapan vatu havan ika tūt hiriṅ-hiriṅ

tinalaṅ-talaṅ bañunikā murus anərusaniṅ juraṅ-juraṅ

kalalu lakunirosən koṅaṅ taṅ patapan arūm

kagiri-giri patapniṅ merv akveh makapuratuk

saviji tika maṅuṅgul tumpaṅnyādbhuta savəlas

pucak ika kadi teja hyaṅ sūryān vahu sumənə̄

pinatiga ya marəp pat pantinyāvəlar aratā

paḍa pinadu tinumpaṅ sakvehnyārəja hinəduk

ri natar ika mavelālvātaṇḍəs mamarakata

paṅəḍap-əḍap i tejanyan polah makagurilap.

cara-caranika rāmyāpan baprāhaləp aruhur

inukir inapi tekaṅ gopuntən rəcəp alaṅə̄

carita cinaritākram nyāsanyātulis atulis

ri pucak ika karəsrəs liṅgodbhāva cinarita

lalayan inukir arja ndan rāmāyaṇacarita

vray ika paḍa maṅaṅkat vuṅkal kral ta ya maṅusuṅ

hana ta kapi mamuṇḍut vuṅkal sevu ḍəpanika

pravara kapi hanūmān sugrīvāṅaliha gunuṅ

hana ta kapi matambak salvāniṅ pasir inusī

bañunika kadi molah mīnānūt y ryak aṅicipir

aruñu-ruñu kadi lvirniṅ byaktān vənaṅ alapən

təkapiṅ aṅukir āpan kīrṇa nyāsanika ləyəp.

nr̥patisuta tumiṅhal riṅ lambaṅ ləṅəṅ alaləh

paṅikət ika hana vvaṅ miṅgat mvaṅ kalulut ika

rinasa-rasanireṅ tvas rəsrəsniṅ vahu hatəmu

sapada hana cinəṅgan cihnanyālara cinarik

dadi ta sira tumiṅhal riṅ paṇḍan səḍəṅ asəkar

puḍak ika maṅuḍoḍā līlā lvir vətis alaris

təṅah aṅəlih umambət lvirniṅ pādapa kasirir

sagəmuh i susuniṅ dyah taṅ nyuh danta paja-paja

iniṅət-iṅət ira lvir tiṅkahniṅ pura katikā

patapan arəcəp akveh nyāsanyāmuvuhi laṅə̄

niyatanika pasevan honyaṅ gopura maruhur

vvaya ta viku ri saṇḍiṅniṅ kontən maṅucap-ucap.

hana ta kili sake jro karvānāma vasanika

lakunira gaja līlāken keṅis təkapiṅ aṅin

hayunira kadin aṅgererehniṅ mukha maluṅid

mata lumiriṅ añəpñəp yan polah təka riṅ alis

saviji makuniṅ arjāsusv ahrit səḍəṅ aləmən

təṅah alurus ajambət mambət solah ira vagəd

təka hararas aveh kūṅ sahyāsoṅ jamaṅ anipis

riṅa-riṅanikuṅ ambək tan tuhvāni kaviratin

rāmya parəṅ sirān laku paḍākavaca mirah aṅambvakən təṅah

mogha muṅup katon sadakirāputih anəlat i śeṣaniṅ jaṭā

ndan minahā lukar-lukar ikaṅ paṅisi tinigavarṇaniṅ putih

byaktani mūla-mūlanira ṅūni kaka-kaka sake daləm purī.

ṅkān dumunuṅ vulatnira rikaṅ yaśa kahanani saṅ dhanañjaya

kāṇḍəg i heṅ vulatnira manon lituhayu kadi deva manmatha

meraṅ ikaṅ manah kadaluruṅ lakunira ya ta hetuniṅ mara

sampətirānaput-naputi gātrani susunira mogha tan katon

ñər ta manahnireki vəkasan kadi-kadi hana liṅsyaniṅ hiḍəp

hetuniran paśabda hana keraṅira masəmu harṣa tan vəḍar

rūmni vuvusnirāsəgə-səgəh tuna-tuna rasa tan təkeṅ hati

ndan ri halisniran kadi kilat ri mata katəmu deniṅ aṅrəṅə̄

marma vuvusnira mpu kili yan sira kadi hana cihnaniṅ vruha

ndan paḍa meraṅ an vulat i saṅ vahu-vahu təka riṅ vanāśrama

byakta bhaṭāra manmatha savaṅ paja-pajanira saṅ hañar ḍatəṅ

ndan kadi buddhiniṅ lumihat iṅ haləsəs ika manahnire daləm

byakta saṅ arjuneki ri hiḍəpnira ri hati nihan paṅavruha

rūpa lavan laras mvaṅ ikanaṅ makuṭa kavaca ratna taṅkulak

lāvan ikaṅ manis ya panəṅərnira kadi madhu yan vinəṅyakən

hetuniran patakvan irikaṅ parananira mataṅniran ḍatəṅ

somya vuvus narendra mavalokana mavarah i doniran ḍatəṅ

“mahyun atīrtha riṅ vukir ameta patapana maṅiṣṭhy anugraha

“ātmaśarīraśoṣaṇa gəgə̄n ranakira ya ta hetuniṅ mara

pājarirāmanis duga-dugāṅinaki ri sira devatā kili

“ndah varahən ranaknira ri saṅ pinakaguru haneṅ vanāśrama

“lāvan ikaṅ vanāśrama ṅaranya ya ta pavarahe ṅhulun təmən

liṅ nr̥paputra mojar i siraṅ kili dadi mavarah satorasih

sojarire narendrasuta: “yeki kari vanavatī prakāśita

“mvaṅ sira saṅ maṅanti pinakādiniṅ anaruka nora len vaneh

“śukla pavitra riṅ brata namaskara ṅaranira saṅ mahāyanī

rājavadhū kamūlanira ṅūni tuhu-tuhu mahāgave tapa

yeka dumehnikaṅ patapan adbhuta kadi puraniṅ surāpsarī.”

maṅkana liṅnira mpu kili saṅ saviji sira ta keməṅan lara

meraṅ ikaṅ manah ya ta nimittaniran ahaliṅan duniṅ saka

ndan hana ganya polahira ṅūni ri səḍəṅira ṅanti riṅ puri

śeṣanikaṅ lulut kabalunan ya ta mətu kadi kasturīṅ tutuk

saṅ nr̥paputra yeka maṅucap sira saha guyu medəm aṅlare

gātranikaṅ payodhara maśeṣa ta ragət ika mātra tan ləbur

yeka sinindhi-sindhinira yan təlas anulus ireṅ kilīnira

ndan lumiriṅ midəm kadi mulat riṅ atapih apaciṅciṅ iṅ bañu

tan huniṅan raras-raras i śabdanira kadi mahāgave lara

hetuniran parā tumama riṅ patapan i kahanan mahāyanī

denira devatā kili paḍāṅdulurakən i saṅ ārya phālguna

kagyat ikaṅ vatək viku kabeh tapa tapi kavəṅan tumon sira

ṅkāna rikaṅ pasevan ahaləp ya ta dunuṅaniran ginocara

saṅ rəṣi goravāṅaḍaṅakən phala hana bañu muṅgu riṅ tavik

lan sərəh arja riṅ pamucaṅan kinajaṅan ahaləp lavan madhu

somya səgəh-səgəh munivare sira mataña rikaṅ prayojana

“bapa mapa hetuniṅ nr̥pati yan ḍatəṅ hiṅ acala

“aməṅ-aməṅeṅ vanāśrama kunəṅ sabhāgya ta laki

“tapa-tapa tan gənəp təmu tahun ṅhulun cumaṭaka

“manaruka tapva yan təmu kadharmaniṅ kadi kita

“kunaṅ i ḍatəṅ narendra lumavad rikaṅ vanavatī

“kadi phalaniṅ tapā pinaraniṅ vvaṅ uttamaguṇa

“athava bhaṭāra śakra manurun kunəṅ kavəlasən

“riṅ atapa lot sahiṣṇu mamaṅan-gaṅan satumuvuh”

vuvusira saṅ yatīndra mavalokanāṅupaśama

nr̥pasuta kepvan iṅ sahur apan kaduhkha virati

lara katikeka hetuni ḍatəṅniran paməṅ-aməṅ

ya tika nimittaniṅ mavacanātərəh saha taṅis

“praṇata ri jə̄ṅ munīndra huniṅan taṅisniṅ alara

“mavaraha riṅ kahīnan iki donya riṅ kadi sira

“karaṇa jugeka hetuni ḍatəṅ manəh munivara

“nr̥pati yudhiṣṭhireka kəna bañcane dyuta nita

“kanaka maṇik lavan pura təlas haneri pukulun

“ratu śatakoraveśvara ya duṣṭa tan sipi-sipi

“hana ri pakumbakan sira kabeh lavan munivara

“sira babuni ṅhulun sira tumūt kapāpa kaluṣa

“kunaṅ iki hetuniṅ təka rikiṅ vanāśramagiri

“inutus i pun yudhiṣṭhira mareṅ girīndraśikhara

“gumavaya siddhaniṅ tapa lavan bratekana gəgə̄n

“təhəra tan antukekana yadin tayāṅanumatā

nahan ika liṅ narendra saha luh nirādrəs i pipi

paḍa kapiluh ta saṅ viku kabeh tumon kasiharəp

dadi sumahur ta saṅ rəṣi tumūt ta luhnira mijil

iraṅ i manahnireki dalihan musap sipatira

“kunaṅ iki pājaraṅkva ri bapaṅku mevəh atika

“tulusa hayunya riṅ sukha mamuktya tan kahavaran

“kunaṅ iki jātiniṅ hala hajəṅ paḍeki katəmu

“hayuni tapanta ṅūni kasəlan halāhayu tumut

“mataṅ ika saṅ vatək viku paḍāharəp kaləpasən

“apan ikanaṅ gave hayu ṅaranya nora manulus

“hala hayuniṅ manah juga tumūt ta yāsili-silih

“paḍa maṅalap titahnya kətikaṅ janānvam atuha

“kadi hana taṅ vvaṅ uttama vənaṅ vinastu ləpasa

“viku sira səṅgahən ləpasa maṅkin evəh atika

“ratu sira vastunən ləpasa maṅkin evəh atika

“yadin i patinta tan vənaṅ akun ləpasnya tuduhən

“kadi hana jāti nityaśa ṅaranya yāvat ahurip

“kadi hana tan kəneṅ mala ṅaranya yāvat ahurip

“kadi hananiṅ sinaṅśaya ṅaranya yāvat ahurip

“kadi hana tan kəne pati ṅaranya yāvat ahurip.

“paməṅ-aməṅan tikaṅ sukha bhinukti yan vruh atika

paməṅ-aməṅan tikaṅ guṇa makarma yan vruh atika

“paməṅ-aməṅan tikaṅ nita pasaṅ yadin vruh atika

“paməṅ-aməṅan tikaṅ gati śarīra yan vruh atika

“kavikun karatun pva ya paḍa mamusuh

“kavi vāni marūpa maguṇa mapirak

“hina dīna tivas yaya juga hamusuh

“añale cinale ya maṅucap inucap.

“sira saṅ karakət kapaṅanan irika

“hala tan katutur təmahan ika tivas

“si rajah si tamah təka ta ya maṅusī

“mamilət manəvək ri hati ya sumaput

“nr̥pa dharmasuta pva sira karakətan

“irikaṅ kabisan guṇanira manita

“təmahan ya binañcana kinira-kira

“inupāya pinet ri kahilaṅanira

“puput iṅ naya mevəh atika karatun

“vəkas iṅ guṇa sarvagata kira-kira

“sira saṅ marəkeki pilihana təhər

“tiga saṅ vvaṅ inuttama marəka təmən”

adavān vuvusən vacana munivara

sumurup taṅ aditya pətəṅ avun-avun

atəhər ta narendra makuləm i daləm

ndan ikaṅ mata tan kəjəp aṅaṅən-aṅən

sore kāla ḍavuh pisan siran amaṅkuk aṅaraṅ aṅəsah vimūrchita

lvir mukṣā humənəṅ maṅə̄ lali maturva hiḍəpira ri śirṇaniṅ hati

kāṅən dohnikaṅ uṅsirən lavan i tan kavənaṅa paṅutus yudhiṣṭhira

yāṅdagdhātəmahan taṅis kadi taṅisniṅ inalapan i tapvaniṅ gati

ləṅləṅ saṅ nr̥paputra riṅ tvasira kepvaniṅ ulaha savaṅ kuraṅ tutur

aṅruṅkuk makəmul carik maṅiḍukus tan aharip apan ardha kātisan

ñəp-ñəp taṅ manah aṅgagap turida tan katəmu rasanikaṅ prayojana

deniṅ bhrānta kunaṅ dumehnira mataṅhi maṅən-aṅən i ṅelnikaṅ dadi

“yan vikvāku mapakṣa kəmbaṅ irikaṅ havan amarəki piṅgiriṅ nadī

“bhuktin tuṣṭaniṅ āṅaras pipi tamolaha riṅ asana kəmbaṅeṅ kapə̄

“tan tūteṅ vana śūnya mūḍhaniṅ aśoka ləvas inulah iṅ sadāgati

“enak ṅvaṅ maluyeṅ sabhānamun aṅuṅsira vəkas i liriṅniṅ aṅdyahi

“lāvan bāyu mapakṣan aṅlvaṅ iṅ iruṅ kahananika ri sandhiniṅ smr̥ti

“mvaṅ muṅgv iṅ təṅahiṅ vvaṅ adyah aməḍar tapih aṅəlih i kālaniṅ huyaṅ

“yan riṅ strī maṅisis gəluṅ katitihan kahariṅətən i sampuniṅ gati

“ṅhiṅ yan və̄tu riṅ ambəkan təmahanaṅkva ri səḍəṅ ika kenakan smarā

liṅ saṅ pāṇḍusute daləm hati taṅeh laranira caritan davākəna

ñəp-ñəp rəp humənəṅ maṅardhana sireṅ hati vəkasan avā tikaṅ manah

kāṅən teki pakon munīndra ri sirān gumavayakəna siddhaniṅ tapa

yekān śirṇa halanikaṅ viṣaya hetuniran atutur iṅ prayojana

tatkālān umənəṅ sireki caritan surakili saṅ inuttameṅ hajəṅ

saṅ tuṅgal marikāṅaran gula vuluh saṅ araras inucap sakeṅ purī

ṅkā tekin hana śeṣaniṅ turida harṣanira ri siraṅ ārya phālguna

ṅūnī jro puri rakva yan sira sarāga saturida kakumbaṅeṅ jinəm

təṅah vəṅi səḍəṅ kəjəpni paturūnira para kili riṅ bale təṅah

lavan tapa-tapī pasevan atunāguru kaki haturū haneṅ ləmah

haturū

katon kadi rare vaneh kadi śirah vahu pinaras apan hañar viku

sira mpu kili mār tikaṅ hati vavaṅ təṅah aṅəlih apan kakiṅkiṅan

ya hetunira yan lumampah aṅamər laku ḍatəṅa ri saṅ nr̥pātmaja

anūt pətəṅ ikaṅ gaḍuṅ lumalay iṅ tarətəpan aṅadəg sirerika

tapihnira vavaṅ luse ri paṅagəmnira sərəh avalun jamaṅ kuniṅ

tan eraṅ ucapən yadin hana kumavruhana ri sira yan maliṅ raras

savetni paməvəhnikaṅ smara tan olya kavuyuṅana de mahāyanī

ri tan kavənaṅ iṅ lulut sinapihan puhara lara sumə̄k təke hati

ya hetuni jamaṅnire kaviratin tamahiran akukap kakandəlan

tumindak i samīpaniṅ saka matūt hiriṅani kahanan dhanañjaya

rasāməkula deni kuṅnira vavaṅ marək asəmək anūṅakən səḍah

dhanañjaya vulatnirāciṅaṅ apan hana kavədi tumiṅhale sira

nimittanira tan humuṅ mavacanātəhər aṅisər apan parək dahat

“nini syapa siran ḍatəṅ ri kahanan ra putunira baṅun mamañcana

“huvus hila-hilā marək ri gati saṅhulun ataki-takī tapa brata

“paran karika piṅgiṅa mpu kili riṅ kadi sira viku śukla huttama

“sakeṅ viku mabhārya kevəh iṅ ulah bari-bari manalimpət iṅ hiḍəp.”

na liṅ nr̥patiputra yeki sumahur ta saṅ ahayu savaṅ kilīṅ tulis

“tuhanku laki sugya tan vruha kite ṅhulun iki kavulanta ṅūny aku

“lanā pinakakāsih iṅ kadi kitānulus araras arūm priyambada

“ṅhulun ta tiki kesiniṅ nagara lāgi pinakasuvəṅ iṅ kinonəṅan”

raras-raras i raśmi-raśminira saṅ kili mavacana mār təkeṅ hati

mapolaha maśabda tuṅtuṅiṅ alisnira ta karika nūtakən liriṅ

mrəṅəs luṅid i dūnikaṅ mata rasāməgatakəna hatin kapaṇḍəṅa

tuhun gula vuluh panəṅgahira saṅ viku ri siran anorakən kilaṅ

samaṅkana nirūpa saṅ kili savaṅ səkar asana tibā sakeṅ gəluṅ

kusut-kusut ikaṅ payodharan inaṅsvakəniran umarək nr̥pātmaja

narendrasuta heva miṅsər aṅusap ləṅənira ri pagəhnikaṅ manah

ya hetuni vuvusnirāṅənək-ənək mapitutur ikaṅ enakeṅ sarāt

“nini hyaṅ aparan ta hetuniṅ amuṅpaṅa turida katon tivasnika

“paranta ri kapaṅhiḍəpta nayaniṅ kadi sira viku yan pamet hala

“katuṅgalanikaṅ tinuṅgalakən iṅ hiḍəp inayu sinimpən iṅ manah

“ya tānulus anəmvakən kaviratin tapanira tuməmuṅ prayojana

“sahiṣṇu muditā kasāttvikanikaṅ pamunahira ri gə̄ṅnikaṅ tamah

“si metri karuṇā kaśāntananikaṅ panapunira ri śaktiniṅ rajah

“huvus pva ya hilaṅ katon ta kəḍap iṅ manəmu-nəmu katəmvaniṅ hilaṅ

“hananta ya hananta riṅ hana haneṅ kavənaṅan i vənaṅ ndatan vənaṅ

“kalīṅanika mevəh iṅ viku ṅaranya taki-takinikānuṅ enaka

“mataṅnya paḍəmən tikaṅ tamah agə̄ṅ ri hati gəsəṅaneṅ adhidrava

“rajah ta viṣa bhasmi dohakən i śrəṅganiṅ acala kumambaṅeṅ pasir

“dalañcaṅ anipis hañut ri vəkasiṅ kilat aṅəḍap i mehaniṅ vəṅi”

na liṅnira saṅ ārya phālguna maśabda mapitutur i sandhiniṅ licin

sira mpu kili kasrəpan humənəṅ epu laranira haluṅsuran taṅis

jamaṅnira kuniṅ mələs təkap i luhniran aṅapitu kālaniṅ kapat

kunaṅ hiḍəpire daləm hati samātran aṅinakana vr̥tta kampəta

vəkasan sira saṅ kili mavacana somya riṅ ambək arūm

“laki saṅ nr̥paputra tuhu-tuhu vuvusta təmən rahayu

“ra tapīki katuhvaniṅ ulah amurug təkap iṅ viṣaya

“vulaṅun gatini ṅhulun iki bapa deni vəlasku tuhan”

adavān caritan sira kili paṅucapnira vah panaṅis

praṇa bhakti maṅañjali ta sira ri saṅ nr̥pa pāṇḍusuta

atəhər maṅadəg sira humənəṅ i dāyaniran muliha

i larisnira tan vavaṅ agəlis anolih asoṅ lara sih

irikā ta sirā nrəpasuta humənəṅ kadi candra malək

sumirir taṅ anīla kusuma tumibā taṅ aśoka marūm

muni taṅ taḍaharṣa kadi manaṅis eñjuh apet karuṇā

paṅuhuhni kuvoṅ paḍa humuni manuknya hanan pañiṭo

rahina pva mijil hyaṅ aruṇa sumənə̄ kadi citta lumə̄ṅ

irikān paṅadəg nr̥pasuta mapuyəṅ sira tan paturū

ya dumehnira tan vavaṅ umarək i deni kəsəlniṅ avak

marahup sakarəṅ sira maśuci mamudra viśeṣa vidhi

mamuhun ta saṅ ārya təlas iṅ arahup,

ri mahāmuni kapva kavəṅan umulat,

umijil sira riṅ gupura təlas adoh,

ulihiṅ lumivat lalu təka riṅ alas.

prukutut muni riṅ paṅalaya-layanan,

aṅukū dr̥kukūnya muni masahuran,

paṅətərni putərnya paḍa mavurahan,

hana len humibər ya təka maṅaḍapaṅ.

hana cukcak atindak i paṅiṅ agaru,

anisik sinisik paḍa maṅariṅ-ariṅ,

vudiniṅ tumiliṅ mamarəki pahatan,

katapaṅ ya mapaṅ kadi ta tinatapan.

lvah agə̄ṅ madaləm katəmu təkapira,

umilī mahəniṅ bañunika mabhiru,

ri təpinya lumut-lumut ika mahijo,

padulurni pakuṅnya mamarəki vatu.

hana mīna mahosya ri təṅah alayū,

putihan gumivaṅ gilap ika maputih,

kadi teja sənə̄nya lumarap ahijo,

paṅacarni lajarnya mamarəki paruṅ.

ri prəḍuṅnya midər bañunika malivuṅ,

ri kəḍuṅnya mucul dələg ika maṅaluṅ,

tuməluṅ dumudul vuluh ika ri təpi,

ri parasnya susuhnya maṅavat adulur.

ri hiriṅnya pacar gunuṅ abaṅ aputih,

hana ciṇḍaga siṅgugu pakis aṅuvuṅ,

kasine makuniṅ vvah ika kunaṅ-unaṅ,

kadi kuśyaragāyuta paḍa sumənə̄.

saruṇī kadi mās kadi suvəṅ araras,

hana saṅga laṅit kuravara kamuniṅ,

paḍa məmbaṅ i sornya vulakan ahəniṅ,

irikā ta saṅ ārya marahup atəhər.

atha ri huvusniṅ marahup atīrtha

lumaku sirātūt ri təpinikaṅ lvah

jaha kayu paṅgaṅ ri təpinikaṅ lvah

paḍa pukapūrug ləmah ika runtuh

bañunika manduk ri təpi kavaṅsul,

gumuruh anəmpuh maṅənani vuṅkal,

makaparapal paṅniṅ asana kontal,

kahava təkapniṅ bañu gunuṅ adrəs.

hana bañu muñcar mətu saka riṅ roṅ

sumirat anəmbur maṅadəg anuṅgul

tuməḍun i roṅniṅ juraṅ aparaṅ groṅ

muni gumuruṅguṅ paraṅ ika sumoṅ

kalalu kapaṅgih lakunira səṅkan

kayunika məmbaṅ paḍa ya makəmbaṅ

paḍa ya makumbaṅ muni makabrə̄ṅə̄ṅ

hana muni riṅ paṅ manuk ika gəṇḍiṅ

jalada ya məṇḍuṅ sumahab atimbun

gumuruh agəntər patər ika medi

riṅ alavas onəṅ kadi kəna rāga

kadi ta ya masyaṅ hamisiki karṇa

nrəpatisutāṅlih lumaku kaləsvan

maṅadəg i sorniṅ kayu manis arja

haṅin ika madrəs kilat ika matruh

madulur alisyus camara muni syok

kalalu lumampah təka riṅ alas gə̄ṅ

vahu təka moghaṅ riris alit akrəp

narapati maṅkin lumaku han aglis

payuṅira roniṅ kamumu ya malvā

təka ya ta sumyuk hudan ika madrəs

gumuruh agəntər kadi ta ya guntur

gəlap ika makrəp muni ya guməntər

kadi vəṅi taṅ rāt kalimutan andha

narendra kumətər manambiṅ irikaṅ variṅin magə̄ṅ

təhər makiḍukus kəmulnira mələs vəḍihan putih

linūd kinasut iṅ limut kadi kukus rumakət matis

rəsəp sumusup iṅ kulit kadi kanin ya təke hati

narendra humənəṅ tatan vruh irikaṅ paranekihən

kadi pva pəjaheṅ tahən juga hiḍəpnira kapyuhan

lavan ta kumusuhnikaṅ bañu matūt ləbak iṅ gunuṅ

bənərnya tuməḍun mareṅ juraṅ arəs maṅiris hati

lavan kasulayah tikaṅ kayu kabeh kapurug rəbah

rəmək ḍumavuh iṅ paraṅ kadi səpah təkap iṅ śilā

humuṅ ya gumuruh guməntər akətug təka riṅ laṅit

patəmpuh ikanaṅ śilā kadi kilat sumirat murub

panasnya valiraṅ kukusnya sumələk təka miṇḍuhur

gəmut sahananiṅ tahən kadi tatal humilī katūt

linətnya malulun lavan kayu magə̄ṅ madulur vatu

maṅut ya ta tumūt lajarnya kapələk mati riṅ kəḍuṅ

samantaji tikaṅ hudan mari lavan pətəṅ iṅ laṅit

mavā sahananiṅ vukir paḍa katon kayuniṅ vana

asāt mari humuṅ tikaṅ lvah adaləm təka riṅ kəḍuṅ

tuhun kadi rinəkrəkan sukət ikaṅ kayu tan rəbah

hanan kaḍəḍətan linət sahananiṅ vulakan pəjah

ikaṅ paraṅ aroṅ asāt dadi hunur təkap iṅ linət

huraṅnya hana śeṣa tan pəjah aneṅ rəṅat iṅ paraṅ

susuhnya kasəlat ri səlvaṅ ikanaṅ vatu len paras

vaneh vvara vataṅ kapəṇḍəm irikaṅ lagəḍū samar

tuhun kadi karaṅ vvad iṅ kayu magə̄ṅ maṅasut śilā

hanan kasaratan vatunya kasəlap ri paṅiṅ kayu

cacal kulit ikaṅ tahən kagutuk iṅ vatu len paras

narendra maṅadəg madan lumaku mār tikanaṅ suku

taṅan kamakakən gigir valikatən kumayaṅ matīs

tuvin kəsəl ikaṅ pupū ya ta dumehnira yan malon

maṅinkin atəkən-təkən sira təhər makəmul mələs

vuluh kadi galah rəbah sinubud iṅ prarupək vani

katūb sinusupan təkapnikaṅ aṅin sahasāṅrakut

kadahut gumuliṅ

tugəl vataṅ ikāḍapur kajulinah papah iṅ hano

hulunya kababad sukunya kapipis təkap iṅ vatu

kidaṅnya malayū luvaknya manaṅis kalavan cucur

kuvoṅnya humənəṅ kagə̄m kakətəran svaraniṅ valik

manuknya hana cəb luput svaranikā hana riṅ tahən

atha halivat nrəpatisuta,

katəmu tikaṅ vana kusuma,

papupulaniṅ kusuma matāp,

paḍa manəḍəṅ kusuma marūm,

ravi sumurup laṅit akucəm,

pətəṅ alimut maṅada-hada,

kumucup ikaṅ səkar aluru,

təkapiṅ əbun rumarab atis,

kayu mavənəs mari kuməñar,

təkapiṅ aṅin sumirir alon,

asəpi tikaṅ vana kusuma,

manuk aturū mari ya muni.

ri vijil ikaṅ vulan avəlu,

manuluhi riṅ bhuvana kabeh,

vahu mapaḍaṅ tikanaṅ alas,

gunuṅ aruhur vahu ya katon.

nrəpati maṅel sira manusup,

ḍatəṅ i təṅahnikanaṅ alas,

ri vaṅinikaṅ kusuma katon,

paḍa tan avas katuduhana.

sahananikaṅ kayu majajar,

iniṅət-iṅət kadi ta vayaṅ

gagana mavā kəlir ikahən,

haṅin aṅudaṅ maṅulahakən.

kayu matatā paḍa mapupul,

hana mamisah kadi maturū,

kayu malurus paḍa maṅadəg,

hana gumuliṅ kadi sumare.

vatu humənəṅ kadi kavəṅan,

mənur aputih kadi muriṅis,

səkar amirah kadi gumuyu,

camara humuṅ kadi masurak.

vataṅ aguliṅ kadi maharip,

kayu mamilət kadi maməluk,

mragagah ikaṅ kayu makuvuṅ,

pinasukaniṅ luvak adulur.

anam-anamar kayu majajar,

kañiri putih kadi makrul,

kadi kinəsat kulit ikanaṅ,

kayu maləṅis paḍa katisan.

iniṅət-iṅət mamuhara kuṅ,

kayunikanaṅ vana kusuma,

dadi maṅadəg sira sakarəṅ,

ri pətəṅ ikaṅ kayu rumahab.

saṅ hyaṅ candra mavā sira manəṅah,

maṅkin sə̄k tikanaṅ kusuma katon,

aṅhiṅ pakṣi munīṅ kayu maruhur,

vūt būt ḍok muni riṅ kuvuṅ abəluk.

rəs-rəsniṅ karəṅə̄ hamədi-mədi,

pyak-pyakniṅ kamanak muni madulur,

ṭok-ṭokan hana kiñjəṅ avurahan,

ṅūk-ṅūk ṅok svaraniṅ kuvuk apəluk.

sakvehniṅ sakaton mamuhara rəs,

paṇḍan voṅ binabad mati magəlar,

rantan rambat ikaṅ gaḍuṅ umure,

baṅ-baṅniṅ katirah paḍa ravayan.

kandəl tvasnya tumūt milu kaḍavut,

kumbaṅ maṅhrəṅ i duryanika mati,

vok-vok jaṅgut i saṅ rəṣi rumave,

kaknyāṅanti ri paṅnikaṅ asana.

suṅsaṅ vok variṅinya pətəṅ i sor,

kalvaṅ rambat ikāṅgəlari tumāp,

lvir pəṇḍəm vvad ikaṅ kayu sumiraṅ,

mambə̄ gandhanikaṅ kusuma rurū.

rob-robniṅ camarākusa-kasikan,

tuṅgakniṅ maṅunəṅ hana sapupu,

bāt-bātniṅ kəkəbət maburu namuk,

kəmbaṅniṅ taravarṣa kadi taṅan.

kamvāgan masəkar kadi banara,

rampal roniṅ aśoka lumalayan,

aṅreṅgek səminiṅ tahən atuha,

priṅnyākiṅ kumisik təkapiṅ aṅin.

malvā ronya malad taṅ ilat-ilat,

kayvāgə̄ṅ ḍumavaṅ-ḍavaṅ aluhur,

raṅrə̄ lvirnika rākṣasa gumuruh,

molah lvir maṅigəl təkapiṅ aṅin.

valyāgə̄ṅ mamilət makaramayan,

krūra lvir masavit makasalivət,

taṅkil varṇa kaluṅ-kaluṅ anəṅah,

bə̄bə̄ṅkah paḍaniṅ valuh aputih.

baṅ-baṅniṅ pahatan makala-kalar,

sandhiṅnyā pataraṅ gigir atəhər,

grot-grot grit svaraniṅ kayu masalit,

paṅnyārok kalavan kayu tahulan.

tan ṅehniṅ sakaton paḍāmuhara rəs təkapnira manon

luṅhā lampahirāṅavetan aṅalor atūt alas agə̄ṅ

ṅkāne kakrəpaniṅ səkar hana ta teja kādbhuta ṅadəg

lāvan sodamanīndracāpa mamilət prabhānya kuməñar

suṇḍul riṅ raviloka digdaha savaṅ sənə̄nya dumilah

saṅ hyaṅ lek makucəm kasənvan abirū kadi pva sumurup

lāvan puṣpa sumamburat jənu sugandha kasturi miṅiṅ

ndan devī makateja maṅkana dudugnya maṅhibəki rāt

hyaṅ-hyaṅniṅ pura miṅgat iṅ vəṅi siran haneṅ girivana

rīndraprastha ta rakva saṅkanira deva sūkṣmavanitā

miṅgat deni kadurnayān nrəpati pāṇḍavālah anita

hetunyān dadi rūkṣa taṅ pura hilaṅ təkap saṅ alalis

yekā mār hati saṅ dhanañjaya manon surūpa yuvatī

hyaṅ śrī nora ta len hiḍəpnira tanora mānuṣa tuvi

lakṣmīniṅ pura katvaṅ iṅ ratu sinūkṣma nitya riṅ ati

yekān bhakti maṅastutī sira narendra yatnan umarək

“oṁ śrī ratnapurī nihan mara kabhaktini ṅhulun agə̄ṅ

“nityāṅimpunakən ləbūni caraṇanta saṅ śriyamaya

“saṅ hyaṅ lot pinakātma sāriniṅ acintya nitya tinutur

“sūkṣmālit maganal panəmbah i manəhta yeki huniṅan”

nān liṅ saṅ nrəpaputra saṅ hyaṅ ikanaṅ kaḍatvan avarah

“saṅkeṅ rājya vita ṅhulun munus avak ndatan kahuniṅan

“de saṅ pāṇḍava tan rumakṣa ri viśeṣa riṅ kadi kami

“durnītiṅ karatun kəneṅ dyuta vikalpa tan tuhu viku

“vruh tākun kita saṅ dhanañjaya kinon mareṅ girivana

“metānugraha riṅ vukir gumavayaṅ tapabrata gəgə̄n

“atyanteki giraṅku dentanaku satya bhakti makaka

“astu hyaṅ kiraṭāṅanugrahanaṅ astrarāja ri kita

“yan sampun kita siddha riṅ giri təkap bhaṭāra karaṇa

“ṅkā tākun maluyeṅ purinta muvaha ṅhulun hyaṅanikā

“rakṣa pvāku təkapta riṅ hayu maran rumakṣa ri kita

“sakvehniṅ magave prapañca ri hatinta tan valuyana

“dentāṅrakṣa śarīra hayva ta madāvamāna ri hati

“āpan saṅkanikaṅ musuh juga ri citta tan hana vaneh

“ya ṅke yuktinikaṅ maveh lara lavan sukhāparimita

“byaktanyān ri yave daləm pajuritan saṅ uttamanaya

“vāhyādhyātmika taṅ tutur ya pahayunta hayva malupa

“maṅke mvaṅ ri patinta yeka ta pasāra-sārana tikā

“yapvan sāk ri yave daləm sahananiṅ musuh paravaśa

“kesyan taṅ bhuvaneka vīra ratu cakravarti saphala

“hana musuh riṅ amet sukhaniṅ dadi

“daśamalādimalāmal alit mətu

“mala limāṅlali lolita met lara

“tamah anūt malulut si rajah tumūt

“ya tumuvuh maṅikū rikanaṅ dadi

“dadi dadinya daridra lanāṅdasih

“daśamaleka mamukti matuṅgalan

“lara viyoga maganti magantuṅan

“tiga tinūt ya dumehnya lulut tumūt

“ya dadiniṅ tiga tan sah ikāṅlare

“lara lapā laraniṅ viṣayāviṣa

“viṣa bisanya maveh laraniṅ dadi

“dadi tumūt satuvuh rikanaṅ dadi

“paḍa pəjah kətikaṅ mala kaśmala

“dadi təkeṅ mr̥ga pakṣi laṭāṅkura

“kala kaṭuṅka dumehnya kapātaka

“kapana taṅ mala kaśmala kaṇḍəha

“saha sakeṅ tiga niṣkala mantəna

“taha si maṅkin ikāṅ mala lot mətu

“avak ikaṅ tiga hetunikān tumūt

“tiga lanāməpəkiṅ sajagat kabeh

“tiga dumehnya kapāpanikeṅ sarāt

“tiga mamukti hajəṅ sukhaniṅ dadi

“tiga dumehnya lanāhuripiṅ dadi

hurip ikaṅ dadi māvak ikaṅ tamah

“tamah ikaṅ dadi tan varəg iṅ sukha

“sukha pinetnyan aṅel mahas iṅ paran

“parani saṅkanikaṅ dadi tan katon

“hana ta rūpa tumūt sumaput malit

“alit acintya mamor iṅ acintya ya

“ya ta samar manasar manilib vulat

“vulat ikaṅ matitis kasilib luput

“luput ikaṅ taya pakṣa maluy tiga

“tiga maluy ta ya rūpa katon mavak

“avak ikaṅ sapəṭik maluyeṅ katon

“ikaṅ anon ya maṅandəl i tan katon

“syapa katon satinonika saṅ manon

“syapa manon magave paraniṅ manon

“sira jugeki tumon sipi tan katon

“sahananiṅ sakaton kahanan manon

“ndi parananta yadin ləpasekihən

“ləpasa mokṣa tikāṅhiṅ ikaṅ təmən

“ndi parananta yadin linəpas təmən

“ndi ta si mokṣa paranya di taṅ ləpas

“hana sireki vicakṣaṇa paṇḍita

“rva madulur maṅucap ta kamokṣakan

“saviji saṅ maharəp ləpaseṅ dadi

“saviji saṅ maharəp maluyeṅ dadi

“rasana teka vuvusnira tan salah

“paḍa ta vastunikaṅ kaharəpnika

“ndi kahananta yadin ləpaseṅ dadi

“ndi kahananta yadin maluyeṅ dadi

”iṅət-iṅət katikin hananiṅ dadi

iṅət-iṅət katikin huripiṅ dadi

iṅət-iṅət katikin huripiṅ hurip

iṅətakən ta huripta məne hilaṅ

“kadi bavaṅ baṅ ikaṅ kinulit pinet

“ndi tuduhən ta vijinya ya tan hana

“saṅ aṅaran si bavaṅ hana tan hilaṅ

“muvah ikān tanəmən mətu taṅ hurip.

“hurip ikaṅ dadi sambhava yan katon

“hurip ikaṅ dadi yan vətu tan lanā

“kadi vulan katikaṅ dadi tan pahi

“alit agə̄ṅ satitahnya tumūt mətu

vahu tumaṅgal ikaṅ yaśa kāyika

“daśaparārtha kapiṅpituniṅ vulan

“tapa samādhi ya pūrṇama tan kalen

“adhika madhya kaniṣṭha tikaṅ hayu

“ndi ta hurənta yadin maharəp sukha

“paḍa mamukti tikaṅ pagave kabeh

“kadi tahən vinaduṅ pinəraṅ pinet

“sapaməraṅnya tikāntuk ikāṅalap.