Arjunavivāha by Mpu Kaṇva

List of Witnesses

  • : XXX, XXX, XXX, XXX
    • Content:
      • xxx by xxx
    • Colophon:
      • Physical Description: xxx
      • Hand Description: A1H1main hand of the manuscript, black ink, Sundanese script
      • History: XXXX
    • edP: Poerbatjaraka. 1926. “Arjuna-wiwāha: Tekst en vertaling.” Bijdragen tot de Taal-, Land- en Volkenkunde​ 82: 181–305. [DOI: 10.1163/22134379-90001525].
    • edK: Kuntara Wiryamartana, I. 1990. Arjunawiwaha: Transformasi teks Jawa Kuna lewat tanggapan dan penciptaan di lingkungan sastra Jawa. ILDEP 44. Yogyakarta: Duta Wacana University Press.
    • edR: Robson, Stuart Owen. 2008. Arjunawiwāha: The Marriage of Arjuna of Mpu Kanwa. Bibliotheca Indonesica 34. Leiden: KITLV Press. [https://www.jstor.org/stable/10.1163/j.ctt1w76vqn].

    Metadata of the Edition

    • Title: Arjunavivāhaxxx
    • Text Identifier:

    Encoded in TEI according to the Conventions of Project DHARMA

    avighnam astu

    Canto 1

    ambək saṅ paramārthapaṇḍita huvus limpad sakeṅ śūnyatā tan saṅkeṅ viṣaya prayojananira lvir saṅgraheṅ lokika siddhāniṅ yaśavīrya donira sukhāniṅ rāt kininkinnira santoṣāhələtan kəlir sira sakeṅ saṅ hyaṅ jagatkāraṇa 1

    (1)(2)(3)(4)(5)(6)

    uṣṇīṣaṅkv i ləbūni pādukanirā saṅ maṅkana lvirnira maṅgəh maṅgalaniṅ mikət kavijayan saṅ pārtha riṅ kahyaṅan sambandhanya bhaṭāra śakra katəkan durnīti lāvan bhaya vvantən daitya madəg nivātakavacākhyātiṅ jagat digjaya 2

    (7)(8)(9)(10)

    jə̄ṅniṅ meru kidul kuṭanya maharəp sumyūhaṅ indrālaya mvaṅ molih varavīrya tan pəjaha deniṅ devayakṣāsura ṅhiṅ yan mānuṣa śakti yatna juga ko nā liṅ bhaṭāreriya yekā nitya hinə̄m vatək r̥ṣi kabeh riṅ svarga hārohara 3

    (11)(12)

    saṅ hyaṅ śakra sumimpəniṅ naya kumon pə̄hniṅ rasālapkəna an vvaṅ śakti sahāyaniṅ məjahanekaṅ śatru petən təkā saṅ pārtha pva hañar karəṅvan atapāsādhyājayā riṅ raṇa yan polih vara hundaṅən ləvu matevəhniṅ kr̥tānugraha 4

    (13)

    vyarthekāṅ japamantra yan kasalimur deniṅ rajah mvaṅ tamah ṅhiṅ yan laṅgəṅ ikāṅ śivasmr̥ti ḍatəṅ śraddhā bhaṭāreśvara ambək nirviṣayālilaṅ huvahuvā lvirnyān sukhādhyātmika siṅhit mātra juga prabhedanika lāvan prih kayogīśvaran 5

    (14)(15)

    yāṅde saṅśaya ri hyaṅ indra tumahā saṅ pārtha tan dhārakā hetunyān pagave ta bañcana panone citta saṅ phalguna yan hīnā mara tan harəp=harəp ametmetāśrayā len sira yapvan tan kavənaṅ binañcana marān maṅgəh paliṅgihnira 6

    lakṣmīniṅ suraloka sāmpun ayaśāṅrəñcəm tapa mvaṅ brata akveh saṅ pinilih pituṅ siki tikāṅ antukniṅ okir mulat rvekāṅ ādi tilottamā paməkas iṅ kocap lavan suprabhā tapvan marma tuhun ləhəṅ ləhəṅa saṅke rūpa saṅ hyaṅ ratih 7

    tambenyān liniṅir kətekin inamər deniṅ vatək devata sampūrṇa pva ya mapradakṣiṇa ta yāmūjāmidər pintiga hyaṅ brahmā dumadak caturmukha bhaṭārendrāmahākveh mata eraṅ miṅgəka kocivāmbəkira yan kālanyan uṅgv iṅ vuri 8

    yekā rakva kinon hyaṅ indra səḍəṅ amvit kapva tāmurṣita aum putrī silihəṅkva rūmta sakarəṅ vāsvās manahny arjuna strīnyekāṅ inucap manohara subhadrā mvaṅ si ratnolupuy tan sora pva təkapnikā daśaguṇan rūpanya dentānaku 9

    yan tan poliha rūm səkarniṅ asanānuṅsuṅ rarabniṅ rərəb tan paṅdeha raras liriṅni luruniṅ lek lvir vulatniṅ laṅit mvaṅ yan kelikanaṅ gaḍuṅ vahu mure mambə̄ gəluṅ kesisan tāntuk tebu huvus hayunta kabalik hyaṅ kāma yan maṅkana 10

    liṅ hyaṅ śakra nahan sinambahakən iṅ vidyādharī mūr təhər və̄rnyālon kadi mandamāruta yayan meṅgal ḍatəṅ riṅ paran akveh tāpsaraceṭikā milu tuhun kapvāṅiriṅ doh kabeh ton tekāṅ vukir indrakīla maparə̄ maṅkin tumampā ta ya 11

    (16)

    eñjiṅ kālanikān ḍatəṅ vijavijah vāhv āḍarat riṅ hənū osik cāmara riṅ gəgər ḍaraḍaran lvirnyān panon apsarī masyaṅsyaṅ pakatonaniṅ kayu manis sinvamnya maṅgəh miguh kadyānaṅtaṅi bāṅnikaṅ susu lavan lambe marūmrūmana 12

    tiṅkahniṅ vanavṛkṣa mogha tinəṅət rāmyanya deniṅ hima rəm tan vaspada sāparə̄ juga katon mūr ṅ vaṅ muvah yāhavūk sinvī ta pva səkarkuniṅnya dinələ̄ kumbaṅ humuṅ tan katon dvīniṅ mrāk rumarab kasampir i ragasniṅ candanāpāyunan 13

    ābhāniṅ patapān gihā vatu putih liṅgan panuṅsuṅ guyu tūt himbaṅ magiraṅgiraṅ vinulatan rāmyanya de saṅ ḍatəṅ gə̄ṅniṅ prihnya kunəṅ nimittaniṅ unaṅ moghārarəm ṅ vaṅ mulat aṅde kūṅ makuvuṅkuvuṅ laṅitikātruhtruh kasənvan ravi 14

    tuṅhāniṅ paraṅan maṅuṅkuli juraṅ pātālatulyādaləm er tambaṅ malabuh juraṅ kapaləyə̄ ṅkāne ləṅisniṅ paras rəsrəsnyan hana riṅ tavaṅ parəṅ avū makrak tikaṅ sundari kayvan vruh maṅuṅaṅ katon vəlasarəpnyāluṅ sumambyāṅave 15

    Canto 2

    ikaṅ vukir apakṣa pājaran abhasma limut adaluvaṅ kukap magə̄ṅ pətuṅnya tumakul mareṅ lvah añavuk bañu parəṅ atəkəs macāmana kayunya paḍa kāyikān pasaji sarvaphala tinəmuniṅ macaṅkrama ataṅkil adavā mure titir aṅañjali sulurika riṅ hañar ḍatəṅ 1

    alas katəmu saṅgraheṅ tamuy an āmalaku javuh i taṅgaliṅ kapat liraṅnya linəṅis huvus makatirah ya ta dunuṅani tiṅhaliṅ mara athāsaji səkar suhun kayu sənə̄ humaturakən avaknya sumpiṅa vuṅū mvaṅ asanāṅruhunruhunakən səkar anahapi rāganiṅ mulat 2

    ṅəlihniṅ amarāṅganān laku hañar vinuvuhan i katoniṅ āśrama atuṅgalan unaṅ rumūpaka saṅ arjuna vahu təka dūtaniṅ lara linud ri ləṅəṅiṅ vanāntara katon inuluran i pakəmbaṅ iṅ gaḍuṅ rapuh ta juga rakva mūrchita hatinya pinasukan i śaktiniṅ smara 3

    (17)

    śilāśayana yan paṅantyana hanārjunataru maṅisapvakən riya təhər kinəmulan səvə̄ hana pənədnya ta kunaṅ avəḍakvəḍak lumut samīpa hana poh rurū vruh iṅ aṅel lvah asaji bañu tan madoh i sor ikāṅ amarakāminī paḍa kapeṅin umulati vilāsa maṅkana 4

    (18)(19)

    araryan akədə̄kədə̄ karika jə̄ṅnya hana katikəlan halis vaneh dudū taṅ aṅuḍoḍa riṅ lvah aṅəlihṅəlih asəmu sumāmijət vətis hanārahup alon təkapnya mañavuk bañu dudu gavayākukur gəluṅ matanya dinələ̄nya riṅ bañu pilih tumakitaki təkapnyan aṅlare 5

    (20)

    aliṅgih agunəmgunəm paḍa yathāsukha hana ta masamparan taṅan mucap təkapaniṅ mare saṅ inamərnya ri hati mapa kālaniṅ təkā sirəmsirəm iṅ ara pāyuni vuvusnya mamənaṅana tambvaṅ iṅ vulan aṅanti ta ya lālanāṅucapucap kətəkətəga lavan təkāsiha 6

    haneki kajənəknya kocapanikaṅ vvaṅ ahayu lavan iṅgitā mati asiṅ mamanisiṅ samānuṣa paḍāa tuladana ri denya molaha marapva tan asambhavān dulurananya mata ya ləkas iṅ kadevatan ikāṅ hayu riniñci varṇa lavan ambək apuhara dudū vinarṇana 7

    (21)

    hanāhayu rakət ṅaranya kuraṅ ambək amanis agəlon paveh lara tan endah aku ta pva denya mava rūmnya tivas ika ya tan pabhūṣaṇa kapantəs ika varṇa cāmpaka vulatnya dugaduga təke daləm hati umom yan aharəp huvus ya tan akūṅ alaraṅ alara tan harəp=harəp 8

    ikaṅ vvaṅ atulis vulatvulat ahadyan arudita katon ḍatəṅ rəṅu anaṇḍaṅ anamun yayāhayu gəluṅnya makusuta yayā jugāraras agaṅgaṅ anipis ləvih susu kuraṅ təṅah apamulu gora ta pva ya titir maṅaraṅiṅ puḍak mara hayunya mətu saka ri tuṅtuṅiṅ tanah 9

    (22)

    Canto 3

    rūpāguṇḍik avarṇa daṇḍa pamatan kadi cala təhər aṅhəmū guyu vruh tāṅdohi vulat vruhāṅhəlahəla vruh amahivagakən raras hati enak ta pva panūtnikaṅ hayu təkapnya vəkasan ahaṅan tiniṅhalan moghātə̄n humirashiras rəṅat ikaṅ laṭi ri vaja baśāṅdələ̄ mata 1

    rūpādyah paṅavaknya mambət aṅəlihṅəlih umulat alon liriṅnikā hayvābhūṣaṇa tan padon kətəkətəg juga pahayun umuṅgu riṅ mata varṇa śyāma kuraṅkuraṅ guyu mahā ta gisigisi pinə̄m amatyani sə̄ṅniṅ lāṭi jugān valaṅvalaṅ arəs ṅ humulat avədi luṅhid iṅ vaja 2

    varṇākryan kadi mās tatur vahu sinaṅliṅ agalak amanis tikuṅ mata ambəknyāku ləvih ya ta pva kalarāku tak alara panarkaniṅ mulat yekān rājasa yan hanāmaca tulis mañaritakən arəṅva ta pva ya ndan riṅ rātri jugān kinon təkap i kūṅnya majarumana tambvaṅ iṅ vulan 3

    (23)

    nāhan tanduk i goṣṭhiniṅ suravadhū pakaśaca ri təkapnya molaha liṅsir pvaṅ raviraśmi hetuniṅ adan hana təka paricārikāṅhyasi denyāṅendahakən manis paḍa dudū sahayusahayu tan pamiṅrvani lvir maṅgiṣṭa miṅiṅ guladrava haturnya kadi madhu huvus pinastika 4

    maṅkat śīghra katon tikaṅ vivara ramya pinakapatapan saṅ arjuna arddhāhə̄t harəpanya tan təka tigaṅ ḍəpa dunuṅan ikaṅ surāṅganā vetan rakva mukhanya maṅharəpakəñ juraṅ aṅəḍap ikaṅ valikkaḍəp kady ākon masukāvarah ri hana saṅ kinirakira səḍəṅ pakolihən 5

    (24)(25)

    lvir tan pavvaṅ ikaṅ gihāluru pamurṣitanira hana kuṇḍa niṣprabha tistis tan hana vuryaniṅ sapu magātra vahu mətu dukutnikaṅ natar sakvehniṅ vivudhāṅganā səḍəṅ avor unəṅ iriya lavan raras hati kāścaryān paṅuṅaṅ katon kadi liṅir kanaka kadi śaśāṅka pūrṇama 6

    āpan sāmpun ikaṅ anāśrayasamādhi tinəmunira saṅ hane daləm lekan rakva sirān pasampunan aṅarcana kuməñar ikaṅ prabhāṅadəg rūpanyān paśilātəhər kumisapuṅ taṅan apatitis agranāsika līnaṅ sūkṣmaśarīra māri karəṅə̄ praṇava huvus apiṇḍa niṣkala 7

    (26)(27)

    ndān ambəknikaṅ apsarī kavənaṅāta sira ləkasananya bañcana hāmhām deni hayunya parcaya ri tan vənaṅanira kumə̄l tumona ya tan vruh yan kadi sornikaṅ sasavi deniṅ acala sukhaniṅ samāgama deniṅ jñānaviśeṣa yan pamatəluṅ paramasukha luput linakṣaṇa 8

    vvantən sūkṣma ləkasnikaṅ saviji rakva mara marək aṅusvakən vuvus rakryan śrī drupadātmajā pəjah akūṅ makatəmahan ikiṅ mare kita mantuk riṅ suraloka tan təmu kitātunuturakəna gatinta sanmatan saṅkeṅ svarga ta saṅhulun mahal avak mami madulur anambahe kita 9

    (28)(29)

    lāvan toh saṅapeku pamrihakənanta paran iku kināryaniṅ tapa vvaṅ sānakta huvus pəjah pinaribhūta kinalahan ikaṅ suyodhana nāhan vastunikaṅ vuvus dinulurunya rəṅih inuparəṅga riṅ taṅis luhnyāganti mareṅ vəhaṅ maraharah vuṅavuṅani susunya yan tibā 10

    len tekāṅ mavəḍakvəḍak haṅət areh vinajuvaju magātra riṅ vijaṅ mvaṅ siñjaṅnya mirir katon viruvirunya maṅadəg anusarnusar susu līlānumpiṅakən sadak gaḍiṅ adoh tikatikani təkapnikaṅ gəluṅ tiṅhalnyān guyu tan pujin kirab ikaṅ vaja kadi həlar iṅ madhubrata 11

    anvam pahyas ikaṅ vaneh turuṅ anūpura kuməñar ikāṅ murit mirah kambaṅnyān panəlat rikaṅ kasay aniṅgahi halis ahəmuk təkeṅ kapə̄ ləṅgaṅ mātra kurugnya riṅ jaja magātra kadi pəṭə təkapnikaṅ susu olug ndān inukurnya denya matapih parəṅ umiṅisa yan sirir pisan 12

    (30)

    tuṅgal saṅ magəluṅ grət oləm asəkar taji kuməñar ikaṅ tutup gəluṅ mekət ken mvaṅ abāhurakṣa maṇi hīra marakata sadarpa riṅ hayu hintən rūmnya manoharāṅhadahadāṅhudani rava sənə̄nya riṅ mukha sumrak kasturi riṅ vijaṅ kanaka cūrṇa sakasagaritāṅhulap-hulap 13

    (31)

    vvantən lvīr ariniṅ vulan kadi kadaṅniṅ atanu riṅ aveh raras hati vāhv adyus makəmul putih katitihan gəluṅ akiris atə̄b hañar mure piṅheniṅ vaja pintigān kininaṅan gisigisi juga hīṅaniṅ mirah mrik taṅ saptakumārikāṅləṅa vaṅinya pinakamukhavāsaniṅ tapih 14

    (32)(33)

    tanṅeh buddhinikaṅ vaneh mara ri viṅkiṅanira tumitihtitih mahā nyāsanyāṅəsəsan vaśāṅarasakən susu mahaṅət arūm kinumkuman deniṅ harṣa kinolakənya ri gulūn taṅanira təka kosapiṅ təṅah kenyāraṅ kadi varṇaniṅ hima taraṅtaṅən aṅavara vimbaniṅ vulan 15

    (34)

    anyat mālihaṅan pupū təhər asaṅga vəhaṅ asidəhāṅdələ̄ mata maṅhat-hat karavaṅnikaṅ giṇa karāsikanira tinəmunya riṅ mata tan vruh yan hinilan vulat ri vulatiṅ taruṇa nipuṇa riṅ smarāgama tvasnya lvir pasəpan timah drava katon ri mata təkapikāṅ smarānala 16

    (35)

    Canto 4

    akveh təkapnya rumuvat brata pāṇḍuputra luṅhā ṅ divaṅkara ginantyanikaṅ śaśāṅka tāmtām aniṅhali vilāsanikaṅ surastrī oyut mahānuluhi ləs sumilih kameghan 1

    (36)(37)(38)(39)

    lvirnyān kədə̄ mulati gātra saṅ ārya pārtha miṅmaṅ mamañcana kabañcana deniṅ kūṅnya māry ānahāṅiduṅiduṅ humirib laranya tuṅgal makaṅsi makəcap maməṭikməṭik jə̄ṅ 2

    (40)

    vvantən mañumbana puḍak ginuritnya pārtha ndān susvasusvani kinolnya hanan liniṅliṅ rakryan vədinta tan akun ləvu paṅhavista heman kitābapa nirāgraha māsku liṅnya 3

    (41)

    līlā hanāmaṭimaṭi vruh amet vilāsa maṅlālanāṅhapiti rakva taṅan saṅ ārya edan mahān tukupakənya rike susunya kady āṅrəṅə̄ vuluh aghāṣa hatinya mūrcha 4

    (42)(43)

    len taṅ mareṅ natar agoṣṭhi mahāṅiriṅ doh denyāvisikvisik avor guyu śabda mesi mañjiṅ muvah manəmu leśya muritnya kāri ṅkāne kisapvanira rakva vəkasnya ṅūni 5

    (44)

    svecchā hanan təhər asaṅhulunan ləkasnya məṅgəp kənəp hinilagan kapituṅgal aṅher kenken miṅis kadi pacəh təkapiṅ kaśaktin vvantən katon idəmidəm cala tan tinaṅgap 6

    (45)

    ambəknikaṅ kapitəmən maṅaraṅ haneṅ heṅ śokāṅure kadi maṅāśraya riṅ śaśāṅka toh hyaṅ vulan ndak aminaṅ pva raras lavan rūm ndak syuh samādhinira saṅ viku vītarāga 7

    (46)

    nā liṅnya saṅ pravara phalguna niskalaṅka pañcendriyāvədi tumon viṣayanya ṅūni vruh maṅrəṅə̄ vruh umulat juga tan vikalpa māry āṅaveśa ri hinəṅnira saprahāra 8

    (47)(48)

    saṅsipta sampun aləh ambək ikaṅ surastrī aṅhiṅ tigaṅ vəṅi lavasnya mavantivanti enak pva dhīranira tan kavənaṅ vinighnan mantuk ta yāpapatəhan hati mesi pārtha 9

    prāpta pva yāsuma manəmbah i saṅ hyaṅ indra enak təkapnya mavarah guməlar kramanya sasvarga harṣatara kapva manādhukāra akveh maṅañjali ri deśaniṅ indrakīla 10

    Canto 5

    huvus maṅgəh tāmbək surapati lavan devata kabeh ḍəṅə̄ vr̥tta śrī pāṇḍutanaya mamaṅgih kasutapan yayā taṇḍasniṅ daityapati juga kavvat hiḍəpira tuhun tuṅgal sandeha talətəhikaṅ harṣa kavəkas 1

    (49)(50)

    kavairāgyan saṅ pārtha kavaśanikaṅ dhyāna vimala didin siṅhit riṅ mokṣaphala malupeṅ vāhyavibhava luput pvekaṅ sādhyā ya ta karaṇaniṅ mahyun umara lumampah lvir vr̥ddharṣi lilu tumakul sāmpun amudā 2

    (51)

    vavaṅ prāptāpan hyaṅ kadi makahavan hyunnira təka kapaṅgih tekaṅ āśrama vinuni deniṅ jaladhara hudan pvekaṅ kālāṅgəgəs ata sirāṅinkin atəkən maṅantī tuṅhāniṅ vivara mapi tan vruh makiḍukus 3

    (52)

    asove tan sinvāgatan api vatuk lāgi maḍahəm aparvāmbək saṅ pārtha linəsuniraṅ yoga sakarəṅ katon saṅ pāṇḍyāveh ta sira sakapūjāniṅ atithi matakvan riṅ saṅkan parana sumahur saṅ munivara 4

    (53)

    ṅhulun mābhyāsātīrthagamana mahas riṅ girivana anon teja nda ṅke paraparahikaṅ lakṣaṇa katon pilih tīrtha pvekaṅ madhanuha yatan paṇḍita tapa kṣamā tāntən tan paṅlalarana samādhīṅ kadi kita 5

    (54)(55)(56)

    ikuṅ yogābhyāsātiśaya bapa kāṇḍəg ṅvaṅ umulat kavoran hiṅsākarma kavaca laras kadga humaḍaṅ panonan ry ambəkniṅ maṅusira sukhākarya vibhava namū heman yan tan makaputusa saṅ hyaṅ kaləpasən 6

    ikaṅ ambək yan sampun amatəh anūt riṅ bratatapa kənoh pəṅpə̄ṅən siṅhitakəna mareṅ uttamapada aṅiṣṭi pvekaṅ vāhyaphala luməkas teka kasasar ndya doniṅ janmātiṅgal amr̥ta mahāṅuṅsira viṣa 7

    (57)

    apan yan vāsvāsənn idanidan ikiṅ rāt putusana amet bhoga svargādi katəmu yayātah kasakitan aṅel deniṅ pañcendriya sadigave mogha vulaṅun muṅə̄ṅ tan vruh ry āvaknya vuta təkapiṅ rāgaviṣaya 8

    hanānonton riṅgit manaṅis asəkəl mūḍha hiḍəpan huvus vruh towin yan valulaṅ inukir molah aṅucap haturniṅ vaṅ tr̥ṣṇeṅ viṣaya malahā tar vihikana ri tattvanyān māyā sahanahananiṅ bhāva siluman 9

    (58)

    ujar saṅ pāṇḍyārūm kamunivacanan bvat kaviratin sinambut de saṅ pārtha rahayu dahat liṅ munivara kunaṅ yan dharma kṣatriya yaśa lavan vīrya linəvih ya yāvat riṅ gəgvan makaputusa saṅ hyaṅ kaləpasən 10

    (59)

    apan nora vvaṅ tyāga ri daləm i heṅ yāvat ahurip ikaṅ nirbāṇācintya pati patitisniṅ vaṅ irikā paṅantyantyan tekaṅ sukhavibhava līlāməṅaməṅan ujar saṅ pārthāṅakṣama sinahuran de munivara 11

    Canto 6

    ya mariku bapa mevəh ṅ ambək yāvat inuluran pinakahalanikaṅ rāt yan rāgopahr̥ta juga sipi marika kaśaktinyaṅ pañcendriya linagan alah amarəki ta ndah saṅsāranta katətəhan 1

    (60)

    tuhaburu təmahan moṅ śakteṅ sattva dahat ikā tuharava vuhayekān dadyāniṅ dr̥ḍha riṅ ivak sakatiliṅaniṅ ambək tan vyarthān dadi kapitūt taya mara ya katr̥ṣṇan byaktekaṅ taya katəmu 2

    (61)

    nahan ujarira ṅəsṅə̄r kālap tvas nr̥patanaya anəmu kaparamārthan māvak riṅ kṣaṇa humənəṅ vəkasan avuṅu tekāṅ ambək tan tuhu kapitūt atutur i pavəkas saṅ śrī dvaipāyana ri sira 3

    sahurira tan apañjaṅ siṅgih śabda munivara ṅhulun atiki katalyan deniṅ bhakti lavan asih hana pinakakakāṅkv an śrī dharmātmaja karəṅə̄ sira ta pinatapākən mahyun digjayavijaya 4

    harəp ayaśa mahayvaṅ rāt lāvan kaparahitan juga raputu maharṣin pamrihmrih matakitaki yatan anumata saṅ hyaṅ tāde matya tan uliha nahan ujarira yekān pendah rūpa munivara 5

    (62)

    valuy atəmahan indrānambah saṅ nr̥patanaya luṅayanira sinambut de saṅ māsih atanaya anaku bapa pahenak tiṅhaltāku surapati niyata sira bhaṭāra hyaṅ rudrāsiha ri kita 6

    (63)

    ṅhulun umutus ikaṅ strī prāptāmañcana ri kita kavaśa marikuṅ ambək denta byakta kr̥tavara hana kavədi mataṅnya ndak tvasteṅ rasa kavikun taya təhəra virāgyā tan polih ṅvaṅ apunagi 7

    (64)

    kita mara laki maṅgəh deniṅ mānadhana təpət tulusakəna tikuṅ prih meh saṅ hyaṅ hayu ḍatəṅa muliha ta kami maṅke liṅ hyaṅ śakra tan asuve ri huvusira sinambahh antarlīṇa namunamu 8

    (65)

    ri vurinira matambəh prih saṅ pārtha daśaguṇa kadi gatinikaṅ usvan yan vāhv āvukus apanas maṅinakinaka taṅ vvaṅ byaktā tan pavijil apuy vahu lumacalacāṅ don maṅkin ṅ vaṅ tan upirupir 9

    (66)(67)

    Canto 7

    byātītan saṅ haneṅ āśrama səḍəṅ aṅivə̄ dhyāna lāvan samādhi maṅgəh tāmbək bhaṭārendra musuhira tikin matta sampūrṇavīrya saṅkəp sāmanta mantrī saha bala balavān vallabhān kapva bela maṅkin lobhān idī kahyaṅan aṅusakasik sə̄k səsə̄k rakṣakanya 1

    (68)

    akveh svargenadəhnya ndan ininakinakan deniṅ opāya sandhi sāma mvaṅ dāna hetunyan avəlas atətəg tan təkeṅ indraloka vruh yan popāya saṅ hyaṅ surapati kapanaṅ devadaityān patūta hetunyān yatna riṅ nīti kabalasah ikaṅ cāra sūkṣmeṅ triloka 2

    vvantən vəltiknikaṅ vr̥tta vinarahakəniṅ cāra core pracāra an saṅ pārthātapeṅ indragiri pininaṅ iṅ devatā yan pralabdha hetunyān kon ikaṅ daitya kr̥tayaśa daṅū mr̥tyu matvaṅ tumon ya mūkekā saṅ tapāmə̄kana luməkas ikāṅ daitya momo si mūka 3

    (69)

    tan varṇan lvirnya riṅ mārga təka ta ya mahas vibhrameṅ indrakīla ndātan paṅgih kināryanyan aputəg apəg ambəknya deniṅ kamūrkhan syūhəṅkv īkiṅ gunuṅ liṅnya dadi matəmahan və̄k mahākrūrarūpa bhinna lvir kumbhakarṇāṅrəpa makabarubuh taṅ gunuṅ guntur agra 4

    ambək saṅ pārtha molah kadi vinarah ikāṅ dhyāna lāvan samādhi təkvan kolāhalekaṅ vivara vahu rəṅat deni sovenya liṇḍu hetunyāṅlīlalīlāmijil amava laras hrū təke taṅkulaknya tonton tekaṅ varāhāṅrurah acala śilā śīrṇa sinvabnya kabvaṅ 5

    (70)(71)

    yekī sākṣāt mahāvighna hiḍepira pacəh niścayāṅəṭṭahāsa yatnādandan rukuh mvaṅ kavaca miṅətiṅət dadyaniṅ daitya mūrkha ardhādoh ndān aṅinyan təka mamusus ikāṅ vr̥kṣa rūg tan paśeṣa kālanyāṅher təkanya nda tucapa ta ḍatəṅ śrī mahānīlakaṇṭha 6

    (72)

    ṅūnin lampah tumūt siddhar̥ṣigaṇa parəṅ lāvan icchāsvabhāva saṅkeṅ kailāśa yar ton halahayuniṅ ulah lāvan ambəknikaṅ rāt saṅ pārtha pvātasak yoganira sira tikin kinkinən riṅ svakārya lāvan durdāntaniṅ daitya parəṅananirān leśyanāburvaburvan 7

    r inte tekāṅ varāhātəhər amava laras mvaṅ vatək siddhasaṅgha sākṣāt kālap ləkasniṅ ratu maburu paran kārya tan siddhajāti saṅ pārthātah mulat liṅnira mavuvuh ikaṅ śatru makveh lumaṅkuṅ maṅkin tekaṅ varāhāṅucupi linəpasan denikāṅ mr̥tyujihvā 8

    Canto 8

    sampunyan luməpas ikaṅ śarāṅəne pyah ndan saṅ hyaṅ parəṅ amanah parəṅ tumampuh tuṅgal rakva kaninikaṅ mahāvarāha hrū tuṅgal katəmu siniddhikāra tuṅgal 1

    saṅ pārthāta malapikāṅ panah matīya tan sandeha vulatirāpagəh sinantva saṅ hyaṅ śaṅkara mavuvus paran kitāri hetunyān gaṇagaṇa sāhasāṅalap hrū 2

    nir taṅ valkala majaṭā hāneṅ vanādri hiṅsākarma tan ahaləp viruddhaveṣa pakṣa pveku viku ləkas nirāgamanyu saṅkəp prāṇaharaṇaśastra pāpakarma 3

    (73)

    aṅhiṅ saṅ gurumu kapātakan təkapmu hāh dūrān hana daśaśīla kavruhamva burankv īki hinalaṅanmu tan vruh iṅ rāt tan vriṅ tvaṅ kuhaka sapatyanāvamāna 4

    (74)

    cəb pəṅ karṇa nr̥patiputra de bhaṭāra krodhāṅdagdha sahurirātərəh tar agyā āyay hayva kadaluruṅ təkapmu mojar sugyan tan vruha ri si pārtha yatnayatna 5

    (75)

    siṅgih kātara tak aṅas viruddhaveṣa saṅ śrī rāmaparaśu darśanaṅku riṅ rāt ndan yekin kaparitahān hanāvamāna hetunyān pamava laras siluṅluṅanya 6

    nistanyan kalivat ujarmu karṇaśūla yan mopakṣama ri ləbūni pādukaṅku tan dady āku təhəra vaira dīrgharoṣa yan tan supraṇata katon pəjahmu deṅku 7

    (76)

    liṅ saṅ phalguna tuməke kirātarūpa sumyūk taṅ śaravara siddhasaṅgha makrak kapvāṅambuli maṅasut mañakra maṅduk tan kevran sira kumutug tikāṅ kadhīran 8

    (77)

    hetunyān pamanahakən ta bāyubajra sātus tambana pavanāmaṅun śarīra kabvaṅ dhvāsta kahabalaṅ musuhnirāvri saṅ hyaṅ śaṅkara juga kāri nirvikāra 9

    (78)(79)

    ndah madvandva ta sira kātarekatūla krūrākāra paḍa parəṅ mapatrayuddha saṅ hyaṅ sāhasa mamanah riṅ ardhacandra heman tan təka pinanah riṅ antarāla 10

    krodha hyaṅ śiva paramārtha denirāpraṅ hetunyān pamanahakən śilādrikūṭa hrū vuṅkal savukir amānuṣāṅalimpuṅ saṅ pārthāṅgətəm aṅusap ləmah tuməṅha 11

    hrū vailamba paḍa sənāha tan pramāda sevu kvehnya mamukha loha saprasāda atyanta prakaṭa parəṅ ləpas mavantah guntur sakṣaṇa ri təṅahnikaṅ raṇāṅga 12

    (80)

    kagyat hyaṅ śiva ri hilaṅnikaṅ śilādri sambut ṅ āyudhavara sāyakāgnirūpa paṅdagdheṅ tripura huvus kr̥tapradhāna ambək saṅ nr̥pasuta saprayatna denya 13

    hrū sambartaka pamapagnirādhikāra meghānuṅgul aṅadəg iṅ raṇāṅgamadhya āṅin mādrəs akilat aṅdəmak hudanya dhvastekāṅ apuy alilaṅ parəṅ vināśa 14

    (81)(82)

    Canto 9

    saṅ hyaṅ rudrātəmən krodhanira mayatakən pāśāyudha sira hrū māvak śaṅkalākāra mamukha bhujaga krūrāṅamahamah ndan raṅkəp kāladaṅṣṭrā pinakadulurikaṅ prāṇapraharaṇa saṅ pārthāṅəṭṭahāsāmaləsa mahavəlū laṅkapnira muvah 1

    prodbhūtaṅ vainateyāstra pamapagira riṅ nāgākr̥tiśara təmpuhniṅ kāladaṅṣṭrā tulakən aparəpək məṇḍək juga sira puṅgəl tekaṅ laras karva rukuhira rəmuk ratnanya sumirat krodhān tandaṅ masādhyāmupuha makagadā laṅkapnira tikəl 2

    laṅguk saṅ hyaṅ parəṅ rakva parəkira huvus tyaktāyudha sira kapvāsove silih bandha masəlur aṅiriṅ cidrānəmu sikəp saṅ pārthāsor karəṅgut sira vahu katətəh śīghrānəmu valəs jə̄ṅ saṅ hyaṅ karva kārun təkapira kasikəp sāmpun kakavaśa 3

    sānyāsāmbəknirāṅjambakəna hilaṅ ikaṅ jə̄ṅ tan pajamuga sumyūk taṅ puṣpavarṣāmarəṅi jayajayāstūṅkāra karəṅə̄ māyāmāyā jugāṅañjali vəkasan anon tejākarakara sākṣāt dr̥ṣṭārdhanārīśvara təka hana riṅ padmāsana maṇi 4

    śīghrānəmbah ta saṅ paṇḍusuta nipuṇa riṅ devopacaraṇa vrug riṅ saṅsiptapūjā sira humarəpakən hyaṅ rudra tan adoh mudra mvaṅ kūṭamantrasmr̥ti vimala nahan puṣpāñjalinira sampunyān maṅkanāṅastuti ta sira rəṅə̄n uccāraṇanira 5

    (83)

    Canto 10

    aum səmbahniṅ anātha tiṅhalana de trilokaśaraṇa vāhyādhyātmika səmbahiṅ hulun i jə̄ṅta tan hana vaneh saṅ lvīr agni sakeṅ tahən kadi miñak sakeṅ dadhi kita saṅ sākṣāt mətu yan hana vvaṅ amutər tutur pinahayu 1

    (84)

    vyāpivyāpaka sāriniṅ paramatattva durlabha kita icchāntāṅ hana tan hanāganal alit lavan halahayu utpattisthitilīnaniṅ dadi kitāta kāraṇanika saṅ saṅkan paraniṅ sarāt sakalaniṣkalātmaka kita 2

    (85)(86)(87)(88)(89)(90)

    Canto 11

    śaśivimba haneṅ ghaṭa mesi bañu ndan asiṅ śuci nirmala mesi vulan iva maṅkana rakva kiteṅ kadadin riṅ aṅambəki yoga kiteṅ sakala 1

    katəmunta mareka si tan katəmu kahiḍəpta mareka si tan kahiḍəp kavənaṅta mareka si tan kavənaṅ paramārthaśivatva nirāvaraṇa 2

    (91)

    Canto 12

    stutinira tan hulus sinahuran paramārthaśiva anaku huvus katon abhimatān katəmunta kabeh hana paṅanugrahankva caduśakti vinimba śara paśupatiśastrakāstu paṅaranya nihan vulati 1

    (92)

    vuvusira saṅ hyaṅ īśvara mijil taṅ apuy ri taṅan vavaṅ aśarīra kātara maṅiṇḍitakən varayaṅ tinarima saṅ dhanañjaya tikāṅ śara sūkṣma tikā ṅ analaśarīra sātmaka lavan varayaṅ vəkasan 2

    kr̥tavara saṅ dhanañjaya manambah atipraṇata pinisalinan laras makuṭa tan hana kālahalah vinaravarah sireṅ aji dhanurdharaśāstra kabeh kr̥tasamayaṅ prayoga dadi sūkṣma bhaṭāra śiva 3

    saha surasiddhacāraṇa parəṅ kṣaṇa śūnya muvah rasa tan i rāt hiḍəp nr̥patiputra katonanira kadi masalin śarīra sukha tan pabalik prihati satirutirun kr̥tārtha sira deni kadhīranira 4

    hana mara janma tan papihutaṅ brata yoga tapa aṅəṭul aminta vīrya sukhaniṅ vidhi sāhasikā binalikakən purihnika ləvih tinəmunya lara sinakitaniṅ rajah tamah inaṇḍəhaniṅ prihatin 5

    (93)

    kadi hana pūrvakarma dinalih saṅ akarya hayu ulah apagəh magəgvana rasāgama buddhi təpət ya juga sudhīra muṅgu ri manahnira saṅ nipuṇa karaṇanikāṅ sukhābhyudaya niṣkala yan katəmu 6

    syapa kari tan təmuṅ hayu masādhana sarva hayu niyata katəmvaniṅ hala masādhana sarva hala təvas alisuh manaṅśaya purākr̥ta tāpa tinūt sakaharəpən kasiddha makadarśana pāṇḍusuta 7

    atha ri huvusnirān təmu kināryanikāṅ hr̥daya sukha rumarasraras hatinirān pakire muliha gumuṇita harṣacitta saṅ anuṅsuṅa yaṇ ḍatəṅa aṅavaśa mānuṣatvanira rāga lulut sumaput 8

    ri səḍəṅirān samaṅkana hanāpsara vāhu ḍatəṅ ahaləp alih sikīnutus umiñjəma supraṇata amava kalambi kambala mapāduka ratnamaya tulis acələk surādhipa pasuṅnya ginaṅsalira 9

    tulis i bapanta māsku ḍatəṅāmuhurāsih agə̄ṅ ri kita tuluṅ pva tāku katəkan bhaya niśśaraṇa pəjahanikaṅ nivātakavacāsura kārya mami ubhayahitātəhər pamapasanta varāstra śara 10

    rasani tulis hyaṅ indra paṅanugraha yogya dahat ndan asuma saṅ hinundaṅ avəlas ri kakārinira laraniṅ inaryakən paḍani kūṅniṅ aniṅgalakən karaṇanirān hənəṅ rudita śoka sumə̄ṅ ri mata 11

    (94)

    muvah avuvus tikā saṅ inutus bapa kāsihana anəlaṅa śakti kīrtinira saṅ suranātha laki pahayun ikaṅ surālaya layanya magə̄ṅ biṣama kadi saphalanta tāśrayanikān saphalān tuluṅən 12

    ya marika hetuniṅ kapihənəṅ kṣama tan vihaṅa laraniṅ inambvakən kadi mavīrya lavan maguṇa makadadahāṅ hurip tuvi yayā tika keraṅiraṅ guṇani kadevatānira jugākr̥takr̥tya hələm 13

    (95)

    paḍa maṅalap kasor paṅucapiṅ paḍa vāgmimaya krama maṅadəg ta saṅ nr̥patiputra səḍəṅ tumihaṅ təlas akalambi kambala mapāduka sādhananiṅ gaganacarāṅiriṅ ta sira saṅ rva mavāstranira 14

    Canto 13

    mamvit narendrātmaja riṅ tapovana maṅañjali ry agraniṅ indraparvata tan vismr̥tī saṅkanikaṅ hayun təkā svabhāva saṅ sajjana rakva maṅkana 1

    (96)(97)(98)

    maṅkat ḍatəṅ tolih arūm vulatnira sīnambay iṅ cāmara saṅka riṅ gəgər pānavvaṅiṅ mrāk panaṅisnikū ṅ alas eraṅ tiniṅgal masaputsaput hima 2

    luṅhāṅləṅit lampahirāṅavetana lāvan saṅ airāvaṇa bajra nāryama tan varṇanən deśanikāṅ katuṅkulan āpan ləyəp mukṣa sahīṅaniṅ mulat 3

    bhāvisyati meh ḍatəṅeṅ surālaya grāhādi makṣatra kabeh paḍākrama tejomayāpūrva kaḍatvan iṅ laṅit pāmuktyaniṅ janma sudhīra subrata 4

    tārāṅganāditya śaśāṅkamaṇḍala ālit katonanya sakeṅ svamānuṣa āgə̄ṅ ivāmaṅkana deni dohnikā kāton sakeṅ madhyapadāṅhulap-hulap 5

    vintaṅ ləvih litnya ləyəp tiniṅhalan rūhurnya saṅke śaśivimba kāraṇa sādohniṅ āditya sakeṅ niśākara kādohnikāṅ bhūmi sakeṅ divākara 6

    tiṅkahnikāṅ svarga lavan haləpnika vātaṅ nikālālana goṣṭyatūt havan pājar saṅ airāvaṇa riṅ nr̥pātmaja kādi ṅ paṅipyan tan i rāt hiḍepnira 7

    kāton tikāṅ indrapada prabhāsvara vetan sakeṅ meru marəp maṅambara kūṭanya malvā gupuranya pāt maṇik keraṅniṅ āditya śaśāṅka nityaśa 8

    sāmar divāratrinikāṅ surālaya deniṅ prakāśātmaka sarvabhāsvara aṅhiṅ səkarniṅ kumudājariṅ kuləm mvaṅ cakravākān papasah lavan priya 9

    tanṅeh aṅāścarya viśeṣa vastunən tan varṇanən lvirnya tinon saṅ arjuna ḍātəṅ sirādan makire manəmbaha ginyākəniṅ cāmara kon umañjiṅa 10

    Canto 14

    hadi harṣaniṅ tarulatāṅəlih aṅayamayam labuh kapāt sukhaniṅ sakendran i ḍatəṅ nr̥pasuta kadi tambay iṅ hudan ṅuniveh tikāṅ suravadhū dumadak asəmi kūṅnya denira kətəriṅ patər paḍani vr̥tta nira lagi rinəṅvarəṅvakən 1

    ri səḍəṅ nirān tama sinaṅgraha ta sira təkapniṅ apsarī amapag sakeṅ paṅuṅaṅan maka pasaji manisnikāṅ mata hinuvusnya riṅ crəmin ikāṅ liriṅ aluru binaṅkitan guyu asəgəh manahnya tamuyan vənaṅ asiliha riṅ smarāgama 2

    surakanyakā sahananiṅ kararan atiki tan hanāṅuṅaṅ kadi tan pamātra turidanya linacalacaniṅ kakāṅhyasi aviṅitviṅit sinuruyan dalidalihana riṅraṅiṅ hati agələm ta yāñalukakən sahaja cala tinagvatagvakən 3

    hana tāpi tan vruh i ḍatəṅ nr̥patanaya mahāṅhadehade ndan atən tumiṅhali susunya maṅuvahi tapihnya tan lukar hana lālananya ginavenya madana həlariṅ madhubrata anasar təkapnya n agave hinaməramər alaṇḍəsan kuku 4

    mvaṅ ikāṅ pituṅ siki rikāna kadaluruṅ ulahnya riṅ gihā kataman hiraṅ paḍa mapet silib acatu hanāgəlar nita aṅikət səkartaji vaneh titir aṅuvahi mogha tan tulus apa tan vuruṅ rəṅərəṅə̄n pati rəṅurəṅu yan hanāṅucap 5

    aṅənəs vaneh mapi turū mapi lara mapupuk vulanvulan aṅanam vilāśa ri hatinya ta kunəṅ anuṅ endahāraras ulahanya lāvan ujaranya hələm i sira saṅ hañar ḍatəṅ aturū mateki vəkasan kadikadi maṅipīpi rakva ya 6

    maṅucap vaneh samasamitra maguñəpan avarṇa gopita lalitā harəp=harəpan ahyas ajajar ataviṅtaviṅ crəmin asalin ginoṣṭinika yan kadurugan agave vulat dudū ahirit svaranya karəṅə̄ tinunatuna tinuṅtuṅan halis 7

    adavān kathākəna rarasrarasi hati nikāṅ surāṅgaṇā sira saṅ dhanañjaya ḍatəṅ dumunuṅ i kahanan surādhipa kahaḍaṅ gumopita ṅ upāya gavayira lavan vr̥haspati hana devatā milu tuhun makəḍika taya dumpidumpilan 8

    ararəm saṅ arjuna səḍəṅ praṇata vinuvusan surādhipa śivam astu śāśvata vəkaṅku śaraṇaniṅ anātha digjaya taśileṅ paṭārana sabhāgya ta kita bapa tan kagiṇḍala bapa kāryakāraṇa mataṅhulun i kita manuṅsuṅiṅ bhaya 9

    iki hetuniṅ hulun ahə̄m pralayabhaya tuhun mapadgata hana daitya śakti si nivātakavaca subhageṅ jagattraya kṣatrakr̥tya tan pəjaha deniṅ asura r̥ṣi deva dānava kunəṅ antakanya laki mānuṣa juga pavəkas hyaṅ īśvara 10

    karəṅə̄ pva vr̥tta mami miñjəm i kita tumuluy prakāśita aṅutus ta yāsura viśeṣa məjahana kiteṅ tapovana ya tikā varāha təmahanya pinarəṅanira hyaṅ īśvara pakaleśya taṅ maburu ṅūni səḍəṅira ṅanugrahe kita 11

    nda huvus katon kr̥tavaranta təkapika pakāśrayan mami tumihaṅ ta rakva ya śumīrṇa sahanahananiṅ kadevatan alavas harəp luməbura ṅ surapada madaləm galaknikā kita teki rākṣasa harānaku pakayaśa saṅ hulun kabeḥ 12

    na vuvus hyaṅ indra sumahur nr̥patanaya huvus kr̥tāñjali apa yan tahan kari təkapniṅ aṅutusa saliṅ surādhipa inanugrahan ṅaraniki n vinadal i liḍahiṅ huvus vibhuh riṅ apan paniṣphala ṅ acāmana rarabi ləbūni jə̄ṅ prabhu 13

    aparan tikāṅ ulaha yan mapa putusanikāṅ alapkəna varahən patiksurapati ndya ta vəkasiṅ upāya sādhana taña saṅ dhanañjaya pagəhni manahira kumon surādhipa bhagavān vr̥haspati marah sira ri putusikāṅ alapkəna 14

    laki kumva pə̄hni naya saṅ vivudhapati lavan vatək r̥ṣi aləməh təkāna niyata ṅ surapada ya viśīrṇa kambaha anəkāna ta pva kita śatru parəpəkana tan tahəntvasən varavīrya śaktini bapaṅku juga lagi hiner pakāśrayan 15

    mvaṅ ikāṅ nivātakavacātiśaya nipuṇa śakti nītimān śatajarjjharīkr̥ta ta rakva niyata juga yāhurip muvah ri luput nikāṅ paramaśakti hana ta ya vəkasnikaṅ varah kahananya teki viniveka viphala ṅ alagāṅhavaghavag 16

    hana tāpsarī pinalakunya malavas i surendra tan kaveh kinirim vaneh juga ya lāgi salahasa titir harəp=harəp rinasan katuhvan atikin tan ika vənaṅa marvanī ratiḥ ya tikā maṅuṅgahana jātyanika gərəmə tan panaṅśaya 17

    palarən ta yājara hələm sigisiginən ikāṅ anugraha makahīṅana ṅ kagaməlātiki saṅ inarananta suprabhā usənā ta yāvaraha yan pavaraha ṅ asurādhipe riya atəhər ta yāṅhira salampah i kita tadulur harānaku 18

    anubhāra donani bapaṅku vulatana sabhānikaṅ musuh bhaya durganiṅ kuṭa lavan pagəlarana dəlāha kavruhi takalambi kambala tapāduka tacələk adr̥śyasādhana kami pārccayānaku kapāna kita bapa kasambya denikā 19

    ndan araryarayyana matānaku labuhana de sureśvara hana tān panaṅgraha mami ṅ atithi juga bapaṅku tasyasih palarən vatək r̥ṣi kabeh maləsa kita riṅ ambək uttama paṅucap vr̥haspati sinəmbahakənira saṅ ārya phalguṇa 20

    Canto 15

    ndah tinamuy ta saṅ nr̥patiputra ri vəkasiṅ anindya ṣaḍrasa tuṅgal ikāṅ turuṅ rativilāśa hinilanira tan vavaṅ labuh prārthana yan huvus pəjah ikāṅ asura sira mamuktya saṅgama riṅ tadanantara krama haturnira mamuhun i jə̄ṅ surādhipa 1

    rāmya parəṅ manəmbah aṅənoh savava kadi huvus samāgama auṃ bapa śāśvatā ta kita kārva sulabha mənaṅeṅ prayojana liṅ suranātha maṅkat aṅadəg saṅ adulura huvus ḍatəṅ ri heṅ tan paṅucap tuhun matanirā ta juga maharakən manahnira 2

    sāmpun adan sirāpaduluran turida pisaliniṅ manobhava ardha kameraṅən təkapi lampahira hana dudūnikāṅ ulah deni pakon surādhipa lavan kadi sumariha maṅkanā hələm hetunirān hənəṅ pinaguñəpguñəpakənikaṅ apsarāpsarī 3

    ambaramārga lālana tuhun hatinira paḍa kabvatan lulut mogha mahiryahiryan anahā ṅ rumuhuna sakarəṅ parəṅ mulat saṅ nr̥paputra mojar ibu toh rumuhuna kita hayva tākəmul ndak pahavas larisni panəpinta rinacanan i piṅgiriṅ tapih 4

    yan ruhuna ṅhulun rari katon kita baribari lāgi tolihən yan parəṅa ṅ lumakva kadi vehən aparəka məne n panuntuna rāmya nikāṅ haneṅ vuri manambyakəna kahulunan palar vruha nyaṅ suruhan mahāyva gəluṅanta maṅayati lukarnya meh tibā 5

    mepu jugān tumona mukaniṅ purupuru cala yan tiniṅhalan tan hana doṣaniṅ marəṅu rakva yan ahalana raśminiṅ guyu yan ri daləm ri heṅ vəṅi maṅanti pətəṅ uməniṅ aṅgəgə̄ smara tan dadi tan tikəl juga halista kadi marahakən pəhiṅ hati 6

    maṅkana liṅnira ndan api tan vruh ika saṅ i harəp salah sahur rakryan adoh ulih nr̥patiputra lumaku huniṅan tikuṅ havan riñcinikāṅ surālaya matiṅkah aṅuliliṅi meruparvata bhāratavarṣamaṇḍala kidul ndi kunəṅ araharah ri hastina 7

    tan rumaras kari tvasiṅ anon ayapayapi sabhā saṅ aṅlare kūṅ nira saṅ pataṅ siki kakārinira kalima saṅ patibrata hayva hinopakən taṅisikāṅ vvaṅ abuhaya dudū sake sira liṅnya saṅ arjunānahurakən śapatha juga sirāṅdələ̄ mata 8

    maṅkana denirāmarəkakən kirakira tucapa ṅ katuṅkulan lvah ri lurah nikāṅ tuhinaparvata maṅapa kasor sakeṅ tasik riṅ mapasir mapaṇḍan akaraṅliman asəmu ləyəp tiniṅhalan riṅ mamanuk manambay aṅadoh vruh anavanakən ambəkiṅ mulat 9

    piṅgirikāradin kadi lilit patapatahanikāṅ hənīriya rāmya śanehśaneh mavatu hantiga vinasəhaniṅ pasaṅ surud aṇḍul aśoka bānasaka pālaśa parigi hanā puḍepuḍe vvadnya kadīnukir hana kadīnanamakən aṅasut śilātala 10

    śūnya tanora mānuṣa təke riya ya tan adhikārapaṇḍita ṅhiṅ saṅ anambi riṅ vatu sumoṅ vvaṅ ika nipuṇa maṅhuvushuvus brāhmaṇa tīrthagocara pilih saṅ atakitaki niṣparigraha sarvasukhākəmul hariṇacarma madulur anusup lavan kidaṅ 11

    konaṅunaṅ katon limanalasnya tuhagaṇa masūryasevana vvai sumirat sake tulalayanya n asidəkuṅ ulahnya yan pakə̄m mvaṅ hana satva kasturi səḍəṅ maṅiḍəmi səkariṅ gaḍuṅ mure tiṅhalikāpəḍe humarəpiṅ dinakara kadi maṅhiḍəp smr̥ti 12

    nyāsa kadī ṅ paṅipyan aparan kunaṅ ika riṅ anādhikālasan caṇḍi śilānanā ṅ caviri piṇḍa manaṅisa mahəmbihəmbihan kālyan aśoka rambay anisih pariginika rinuntuhiṅ nadī nyū gaḍiṅ aṅlaṅut paḍa matəb tumirisakən avaknya yan ruru 13

    tan hana kapva kārva ləpihan mahasahas i rikāṅ nadītaṭa mrāk juga mukti rāmyani rəməṅnya vahu təka maṅambvakən hudan vruh tumiliṅ maniṅhali kilat lumari kadi cariknikāṅ laṅit tan huniṅān sinaṇḍiṅ i rabinya maṅamər anisik sakeṅ vuri 14

    Canto 16

    hana mata pājaran vahu katon tinuduhakən ikāṅ valāntaga hana kadi ləmbu maṅrəpah i sornya pinutih apayuṅpayuṅ vəlu purupuru tan katon atəpi raṅkaṅika təkapi saṅhubiṅ nadī asəmu kadevatān malalayan magupura kadi mukṣa tolihən 1

    suravanitā mamañcana təhər lumaku kili śināpa saṅ r̥ṣi asaji səkar mareṅ bañu dudū ṅ anətək asəp i saṇḍiṅiṅ duruṅ manis i matanya tan dadi kaliṅ sira mapaga ri tiṅhaliṅ tamuy hinilan aśabda yan təhər aṅiṅguti halis irikāṅ tapovana 2

    lvahika mijil sake vukir anak titir analaga tūsnya tūt lurah gumulakiṅ agra jambaṅan aṅertali mələk amaṅunmaṅun himā təka ri pasir nikāṅ suranadī hiliraniṅ asanāsinaṅ rurū sukha hana jīvajīva masibū mvaṅ asisik amivirmivir həlar 3

    kavəlas arəp səkar səminikāṅ kayu paḍa turuṅ aṅharas gəluṅ aṅayamayam kasumpiṅa tiliṅtiliṅa təkapiṅ kavīśvara təka mara saṅ dhanañjaya lavan kalulutira səḍəṅ smarātura inuhuhikāṅ inuhuhikāṅ kuvoṅ sira n arāryana kinivat i luṅgahiṅ gaḍuṅ 4

    atha halivat sire rika katon tatarabani sabhānikāṅ musuh divasa pituṅ tabəh kəñariṅ arkka sinidik i tibānikāṅ hudan aṅadahadāhavūk midər anūtakən aṅin i hiriṅ nikāṅ laṅit hana lumarap manuknya samənur tinalitali tinuntuniṅ vulan 5

    i paraparahnikāṅ i maṇimāntakanagara kasiṅgahan hudan ya juga tinolihiṅ dinakarānəpuhi kanakabapra gopura akarakarā katiṅhalan ikāṅ ḍavalagr̥ha ri pə̄haniṅ kuṭa dumaśaguṇa ṅ surālaya haləpnya pinakaphalaniṅ səḍəṅ jaya 6

    ri surupiṅ arkka tan hana pətəṅ metu təkapi pajaṅ nikāṅ vulan makin aparə̄ sayabni laku saṅ nr̥patanaya lavan dulurnira padahi paran tikību gumuruh pilih aṅajarakən mahotsava asura paḍāvərə̄ vijavijah sakuvu sakuvu kapva ghūrṇita 7

    pataña narendraputra sumahur saṅ ahayu tuhu liṅ nr̥pātmaja niyata mamaṇḍimaṇḍi tuməkāna vivudhapati kapva saṅraha amahayu sañjatāśramanikāṅ ləbuh alapalapan mabherava tuhu mata yan pituṅ vəṅi hinernya lumuruga mareṅ kadevatān 8

    nr̥pasuta yan katon bhayaniki ṅ paṅutusira surendra durgama aputək arəs tvasiṅ pinativar sinuruṅakən anambaheṅ musuh syapa tan arəṅva heva mulate kagaməla təkapiṅ durātmaka ləhəṅa jugā ṅ pəjah saka ri pāpaniṅ anahən iraṅ lavan lara 9

    kunəṅ apa tan vineh təkapikāṅ vidhi vinilətakən tvasiṅhulun pinarikədə̄ marambatana tan sakavaśa kayuhən pakāśrayan təvas aṅəlih makānta ṅ aṅave tavaṅ ataya kədə̄ niniṣṭura vuvusikaṅ apsarī təhər apet taṅis aṅisəkisək gavegave 10

    rari mapa liṅta meraṅ i pakon surapati rinasan kasiṅgihan kunəṅ i hanaṅku sākṣya mulate kita marək aparan kasaṅśayan si kagaməla pva deniṅ asura ndya ta vədi palalunta kə̄lakən ibu hiḍəpən ṅhulun rari təkapta manisakən i heṅ tikuṅ vulat 11

    saphala yaśanta yan vutaha denya mavarah i rahasyaniṅ hati kavənaṅ ikāri yan kadi ləkasta riṅ acala rikāna riṅ gihā vuvusira saṅ dhanañjaya təhər mahayu gəluṅ i saṅ vinodhanan tikəli halisnya tan prihatihetu sajisaji pinəñciriṅ guyu 12

    Canto 17

    akveh goṣṭinira taṅeha yan vivākṣan leśyāpatti rasa paḍākəkəs vilāśa lāvan tocapaniṅ upāya sāmpun arpat ndah maṅke ta sira təkerikāṅ parāna 1

    riṅ tāman ri vəlahaniṅ puri n pararyan strī ṅ antahpura kahaḍaṅ paḍāmajaṅ lek len taṅ strī pakirimira hyaṅ indra ṅūni maṅlīlāməṅaməṅ aneka devakanyā 2

    vvantən rāmya racana śūnya kāvakanya ṅkāneṅ kalpataru paran saṅ ārya pārtha riṅ raṅkaṅ sphaṭika dulurnirān paṅanti sākārāniṅ ujar arūm karəṅva dohnya 3

    rūpanyān paṅuray atə̄b mələs gəluṅnya mvaṅ kenkenya bhujagacarma raktavarṇa gātranya pva kadi tatūr hañar sinaṅliṅ abhrā taṅ sphaṭikagr̥hāsinaṅ rinəṅga 4

    endah taṅ sphaṭikagr̥hāsalin prabhānya akveh tāpsaraduhitā mulat vikalpa hetunyān para maṅuṅaṅ vaneh hanāṅliṅ induṅ toh syapa ta kitāri māsku liṅnya 5

    ndan dūrān nr̥patanayān katona denya sarveccān pacələk adr̥śya sūksṃatatva saṅ ləṅləṅ ta juga tinonya dīnacittā lvir śākāṅəlih alaṅə̄ mulat luməṅhe 6

    āṅrəs tvasnikaṅ umulat marək tigaṅ vvaṅ strī ṅ kendrān iki pakirim hyaṅ indra ṅūni nda k vāsvās pva kita kadi vruhāku liṅnya maṅgəh niścayani manahnikān təkāṅliṅ 7

    māskvinduṅ syapa dumulur kitān para ṅke sākṣāt handaru maṅənəs hiḍəpku rakryan śrīniṅ kendran iki təkānurun mara ṅke sādhyā saṅ prabhu kita suprabhāṅku māsku 8

    suṅsut detyapati subaddha ri hyaṅ indra tan len hetunika ri tan kavehta ṅūni maṅkin kembuhan i ḍatəṅ saṅ arjuna ṅkā nāhan hetu saṅ asurādhipānəkāna 9

    tan hārohara kari saṅ hyaṅ indra maṅko vr̥tteṅ svarga mapa varah kakanta māsku nāhan liṅnya saha taṅis giraṅ nimitta mojar saṅ kinasəgəhan malap manahnya 10

    Canto 18

    ḍū nohanku kakān kacuṇḍuk i kitān dunuṅ kadi dine maṅkeka pva haləpnikāṅ i maṇimantakāparimitta ṅūni ṅvaṅ mara yan vruhāləviha saṅka riṅ surapada maṅkin śīrṇa kəta ṅ surālaya huvus hilaṅ malaradan 1

    sambandhanya huvus katon saṅ asurādhipān lumuruga byaktā bhrāṣṭanikāṅ surālaya viśīrṇa həntya kahala yekin kāraṇaniṅ ḍatəṅ humulu pādapaṅkaja haji maṅlonloni kasevakan ṅhulun abhaktya tan kahañaṅa 2

    vīnāṅ dyah pira harṣa saṅ prabhu ruməṅva denta mavuvus lvir śrīniṅ madhumāsakāla təka riṅ hapit juga kita kiṅkiṅniṅ tr̥ṇavr̥kṣa tulyani lulut saṅ onəṅ i kita induṅ mājara saṅhulun dr̥ḍha tumona garjjita haji 3

    rvekāṅ mājara kāri tunṅal aṅucap lavan saṅ asumā prāptekāṅ mavarah satorasi ri saṅ nivātakavaca sojar saṅ prabhu suprabhān vahu ḍatəṅ suməmbah i haji maṅke prāpta sakeṅ surālaya haneṅ taman kasiharəp 4

    hetunyān təka kūṅnya ṅūni hulune pananmata haji saṅ hyaṅ śakra jugātəṅət mahal avaknya teki vəkasan āpan byakta viśīrṇaniṅ surapadān təkap saṅ ahulun prajñāṅloni kasevakan dugadugāləməh kahañaṅa 5

    nāhan liṅnya kinon marəkmarəka de nivātakavaca harṣāṅgañjar i raśminiṅ guyu sirāmanis vulatira saṅ konəṅnira ṅūni rakva təka tanpa saṅkan inucap tanpojar sakarəṅ pijər mənəbənəb raras hatinira 6

    mojar bhāgya jugāṇ ḍatəṅ maṇikikāṅ surendrabhavana lakṣmīniṅ suraloka kagraha təkapku sāmpun aṅalih nāhan liṅnya madān umaṅkata mareṅ taman mamapaga luṅhāṅgopita denirān laku tanora kapriya tumūt 7

    sāmpun prāpta sireṅ tamān alasalasnya tulya rahina deniṅ lek gumavaṅ linūdan i kəñar nikāṅ maṇimaya riṅ raṅkaṅ sphaṭikān dunuṅ mulati gātra saṅ vahu ḍatəṅ māmbət bhāvanirān panəmbah aṅəlih pinaṅkvakənira 8

    muṅgah muṅgvirikāṅ gr̥ha sphaṭika saṅ nivātakavaca saṅ konəṅ kinisapvakən titir umiṅsər epu maṅəsah luṅhā taṅ paricarikā syapa kasaṅśayan təkapira mojar saṅ maṇimantakādhipa təhər makon lumihata 9

    ndyah maṅke pva baliknikāṅ hr̥daya mār paranti rumaras rva ṅ ve ta pva kakanta māsku kumətər halisku ri təṅən akveh dūtanikāṅ sukhāpuhara harṣa tan pajamuga ipyankvību kagunturan madhu balik pva tan kita təkā 10

    lāvan tebu hiḍəp-hiḍəpku ri pananmatanta tan i rāt lvir sambegani luṅgahiṅ gaḍuṅ aṅolakən kayu ragas truhniṅ megha kunaṅ kitānuruni cātakāməlasarəp saṅ hyaṅ lek tumurun kamāsihən anon cucur kari kita 11

    nāhan liṅnira saṅ nivātakavacācavuh maṅarəki meh meh rājasa met pasambulihaniṅ tapih juga sira saṅ sinvamniṅ aśoka kaṅlihan atākiput kasiharəp mojar ndān atəhər maṅañjali ləkasnirāṅasihasih 12

    Canto 19

    sojar saṅ prabhu hayva cinapalan səmbahiṅ śaraṇāgata ri haji yan yogyā vəliniṅ suraduhitā herən riṅ rahinān kadi kavava 1

    ndin luṅhā rasaniṅ gula hinəmu de saṅ nātha harisharisən atah gə̄ṅnyārəmbha patik haji huluna sambegān saphalākəna rumuhun 2

    lakṣmī tulyanikiṅ suraduhitā yan riṅ śakti maṅāśraya ri haji saṅ nātha pva ya siddhi kr̥tavara accedyāmaraṇāṣṭaguṇa hana 3

    kīrtintāṅavaśeṅ bhuvana kabeh sabrahmāṇḍa huvus kahalivatan riṅ viṣṇvaṇḍa śivāṇḍa paḍa kumə̄l tan hopən tikaṅ indrapada kavəs 4

    aścāryātiśayanta mapa kunəṅ deniṅṅ indriyavigraha matapa yan sātus yuga yoga haji ginə̄ṅ rudrānugraha tan sipi kavənaṅ 5

    māskvinduṅ varahaṅkvi kita harah uṅgvankvātapa tan sipi saphala lambuṅniṅ himavān hana ta gihā piṅpāt guntur atīta kaḍəḍətan 6

    rudrārādhana nirmala satata sambega pva bhaṭāra kavəlasən sāsiṅ sādhya kasiddha pinalaku bhūh svargādi pavehnira huluna 7

    mvaṅ śaktiṅku rahasya vəkas iki riṅ jihvāgra pavehnira saphala brahmā viṣṇu kavəs ya kakavaśa ṅhiṅ rakryan vruha hayva ta vavahan 8

    nā liṅnyān pavarah kadi kahuvan deniṅ pet sivi tan vruh iṅ ulaha syūh rəmpū hr̥dayanya minanisan ṅke rāgan sakalāmuhara hala 9

    ndan saṅ paṇḍusutāmiḍəṅərakən eṅət rakva sire samayanira mə̄r ṅkāneṅ gupurān təka maṅadəg guntur bhrāṣṭa huvus dinədəlira 10

    mākrak taṅ sakaḍatvan avuruhan akveh strī katibān riṅ umah əmās kagyat saṅ maṇimantakanr̥pati jātī vismr̥ti gadgada maṅadəg 11

    saṅ konəṅ sumalah sira sakarəṅ mə̄r məṅpə̄ṅ pasalahnya vahu miṅe saṅ pārthāmapagiṅ gaganatala ndah maṅgəh kasilibni musuhira 12

    Canto 20

    səḍəṅ mavurahan tikāṅ sanagara hanāvarah i saṅ nivātakavaca nda tan kahuniṅan taṅisnika kabeh pijər kahənəṅan tikəl halisira 1

    apan kahilaṅan maṇik hiḍəpira anargha makahəmbanan taṅanira pinetnira huvus məsat namunamu udhāni ta sirān kəneṅ kirakira 2

    pamañcana bhaṭāra śakra niyata huvus manaravaṅ katon təkapira kunəṅ vətuni denirāvaravarah kasaṅśayanira nda tan karakətan 3

    vavaṅ madəg ikāṅ kamānavibhavan saparvata sumeru muṅgu ri hati ḍatəṅ sahananiṅ mahāsurabala parəṅ tumama riṅ kuləm tan inatag 4

    huvus hibək ikāṅ pəkən pasək agə̄ṅ təkeṅ alunalun kabeh paḍa səsək inastvakən ujar mahāsurapati dumona suranātha maṅkata məne 5

    vaṅuṇḍahina detyanātha mijila ikāṅ bala sənaddha sāmpun arəpat paḍāruharuhan humuṅ vijavijah mr̥daṅga kala śaṅka ghūrṇitatara 6

    hanan kadi gəlap salakṣa niyuta ikāṅ parəṅ asiṅhanāda gumuruh kuməl rasanikāṅ samastabhuvana təkapni bala saṅ nivātakavaca 7

    Canto 21

    yan bvat nivātakavacāgulagul pragalbha krodhe rikāṅ maṅiku nīti mamet upāya tan sāma bheda dhana kevala daṇḍakarma gə̄ṅniṅ parakrama jugenadu kapravīran 1

    mantrinya pād ubhaya śuddhakula praśāsta krūdhākṣa duṣkr̥ta virakta karālavaktra vetbet hiraṇyakasipuh kula kālakeya maṅgəh kr̥tārtha ginulaṅ haluriṅ raṇāṅga 2

    nirbhīta lāgi tinurun sura riṅ sumeru maṅke pva śakra sira saṅ pususən təkāna mvaṅ mānuṣāśraya kaniṣṭa dumeh ya māna tan saṅśayan təka rumampasa ṅ indraloka 3

    maṅkat ta detyapati kātara mr̥tyurūpa sāmpun pratiṣṭha sira riṅ ratha hīrabajra mātaṅga rākṣasa maṅīr manisih vəlaṅnya gumrit bəlah sahananiṅ pr̥thivī hinambah 4

    krūrāmire sira ri kūvaraniṅ rathālvā devāṅganāṅisapu jə̄ṅ salayāṅudoda anyat mañāmarani deni panasnikāṅ tvas krodhānalālatulatūmətu riṅ matābāṅ 5

    ardhāsəsək lakunikāṅ baladetya saṅghya saṅkīrṇa lakṣaśata rākṣasa rākṣakanya vyāghrāśva siṅha hana garddabha vāhananya sarveccaṅ āyudha mijil ri puhun vulunya 6

    təṅran mələk bhujagacarma təke mukanya cūḍāmaṇinya bhukakuṇḍurika pradīpta sevu vvaluṅpuluh atiṇḍih anekavarṇa lvir vaṅkavāṅibəki rāt dhvaja detyarāja 7

    krūdhākṣa duṣkr̥ta panəṇḍas arampak agya sānak samāyudha samadhvajavāhananya sundopasundasuta śūra mahāprabhāva salvirniṅ endah atibhīṣaṇa bhūṣaṇanya 8

    sakvehnikāṅ asura dānava paṅharəpnya saṅkəp hanan gaganamārga hanan padāti təṅran gajājina viśāla təke gaḍiṅnya lvīr andhakāra kuməlab lumarap kilatnya 9

    rvekāṅ tulakbalakaṅiṅ laku sārabhūta kəmbar sulakṣaṇa virakta karālavaktra kapvāhavān asurajanma gajendrarūpa vruh riṅ gadāyudha paḍāmava lori hīna 10

    sə̄k śūradānava mahāsurapādarākṣa ākāra sārvuda jurunya dudūṅ balanya təṅranya siṅha sinasat kuməlab vulunya kadyāluniṅ jaladhi deniṅ aṅin pracaṇḍa 11

    sakvehnikāṅ asura dānava tan pradhāna tapvan pəgat saka rikāṅ kuṭa pāt lavaṅnya kadyācalālakulaku mvaṅ alas juraṅnya lvir sāgarātulatular gumuruh sakāmbah 12

    ndātan hanālas aṅadəg paḍa bhasmibhūta āpan rəbah təkapikāṅ anilapracaṇḍa syūh deniṅ aśva rathacakra linūd inambah liṇḍū hudan saha gəlap kumupak halisyus 13

    utpātaniṅ samaṇimāntakarājya śīrṇa guntur tikāṅ acala tūt kiduliṅ sumeru kolāhalān tinapakiṅ baladetya saṅgha svargālilaṅ sakahavan rinurah rinampak 14

    Canto 22

    ryaṅkat saṅ daityarāja nda tucapa ta ḍatəṅ paṇḍuputra pralabdha śīghrānəmbah ri saṅ hyaṅ surapati kahaḍaṅ hə̄maniṅ devasaṅgha saṅkəp deniṅ maniṅkah varavarah apa tan vāspadākveh matakvan təkvan deniṅ manəṅgah jayajaya təkapiṅ garjjitāṅəṭṭahāsa 1

    mojar saṅ pārtha n aṅkatṅ asurapati pilih prāpta saṅkəp sənāddha yatnā ta śrī surendrāparan ulaha lavan byūhaniṅ maṅlagāna āpan tūt lambuṅiṅ meruṅ asurabala sə̄k śīrṇa taṅ svarga kāmbah mundur kapvākukud byakta ḍatəṅa niyatāṅaśraye jə̄ṅ surendra 2

    aum putrāpan kitenanti mami huvus adan kapvāpakṣānəkāna maṅkat pvekāṅ musuh durga ya tika pahayun byūhaniṅ maṅlagāna sākambah denya konən makukuda sakarəṅ kapva rākṣan sahāyan ndan vāsvāsən purihniṅ maṅulihulih ikā sānukāne vvaṅ akveh 3

    ambəkni ṅvaṅ mahāvīra tinəkan anəke rakva tātan prabheda maṅkin durgrahya tekāṅ mr̥gapati tinəkan yan paṅantī guhānya mātiṅ moṅ yan parāṅdon graha vuhaya pəjah yan pareṅ vyāghradeśa ṅ vaṅ yan tan viśvaseṅ deśa lagi sigasigun prāya tan vriṅ bhayanya 4

    liṅ saṅ hyaṅ śakra citraṅgada sira sumahur yukti liṅ śrī surendra pə̄hniṅ kāmandakekā kunəṅ iṅətiṅətən dr̥ṣṭa sāmpun vināsvās kālahniṅ vaṅ təkap saṅ kṣitisuta ṅuniveh denikāṅ meghanāda kagyat kevran dinon durbala kaparəpəkan rimbit akveh tinolih 5

    aṅkatniṅ śatru maṅko parəṅana papagən riṅ havan śīghraśīghra rvekāṅ lābhāvamānāparimita katuluṅ sākidulniṅ sumeru āpan sāmpun madan saṅ suravara tumihaṅ tan hanā tan sənāha maṅgəh ṅvaṅ samprayuktālaha mənaṅa huvus misyanaṅ dharmayuddha 6

    liṅ saṅ citraṅgadāṅaṅgəhi ri surapati mvaṅ vatək devasaṅgha sāmanyopāya sāmpun pinapakira kabeh kapva tātiṅkah agya rāhasyopāya saṅ pārtha juga sira huvus niścaya mvaṅ surendra tan lokopāyaniṅ śatru parəṅana bhaya kvehnikaṅ cāra sūkṣma 7

    Canto 23

    saṅ hyaṅ surapati mətu saṅka riṅ kuṭa lavan surabala gumuruh erāvaṇa gajapati rəṅgar uṅgunira ratna kadi gunuṅ apuy bajrāyudha marək i sirāpayuṅ garuḍaroma kadi jaladhara sākṣād aruṇa riṅ udayādri vimbani dhanuhnira makarakara 1

    siddharṣigaṇa paḍa sumuṅsuṅ iṅ gagana ghūrṇita majayajaya lumrāṅ surakusuma lavan hudan kṣaṇika tan pajalada tumibā akveh vihaganira śarīrakampa śubhamaṅgalani lakunira vuntuṅ bhuvana təkapikāṅ mr̥daṅga kala bheri murava kumisik 2

    vidyādhara samaradhurandharāsura katiṇḍih anulam i harəp lakṣāpapan apapatihan pinaṇḍita mapiṇḍa pirapiraṅ ivu devāṅsukataruka suratsurat dvirada matta rinavisan əmas təṅrān ika kadi jaladāṅhəmū hudan agə̄ṅ matəpitəpi kilat 3

    citraṅgada ri harəpirāhavan ratha maṇik marakata sagala piṇḍārvuda pamajanirānapuk paḍa vidagdha mamava kr̥tala təṅrānya paḍapaḍa mirah dalugdag adavā təhər avajagalah digdāha kahiḍəpanikān ginandha kanakadrava makabharaṇa 4

    ṅkāne vuri surapati citrasena saha bhūṣaṇa mamava laras muṅgviṅ sphaṭikaratha rinəṅga bhāsvara təkapni vəḍihanira bāṅ malyāla curiganira kadganiṅ bala kilatnya pinutər ahulap sātus vvalu kadi śiva śuddha riṅ gagana təṅranika katulajəg 5

    jyeṣṭātmaja surapati saṅ jayānta ratha phaṣṭika kahananira sāmpun matəguh inabhimantra matvasa sakeṅ vəsi varaṇi makas piṅhe dhvajanira suradārucarma hulu lañcaṅ amukamuka mās sumrāk təhər anavanakən sugandha mr̥ganābhi panəpak i riya 6

    rotāpsaragaṇa macapiṅcapiṅ mamava tomara pamajanira anyat taṅ apalaga maṅuṇḍa coli śivapatra hana ri takuraṅ kapvā rukuh avaju sinimbaranya masavit səkar aruharuhan məttājenujənu mavəḍakvəḍak kanakacūrṇa kavigaran avū 7

    saṅ paṇḍusuta paməkasiṅ lumampah ahavan sakaṭa maṇimaya saṅ mātali ṅaranira sārasārathi manojavani lakunira piṅhe dhvajanira kadi sarvavarṇa təkapiṅ dhanuh aṅadahada sə̄ṅniṅ makuṭa kavaca vāṅkavāsalivərañ juga ri harəpira 8

    gandharvataruṇa ri harəp dhanurdhara padātinira saṅaṅ ivu len taṅ maliman alimunan dudūṅ makuda sārvuda mamava tuhuk lumrā dhvajanira həlariṅ vimāna kadi megha marəkiṅ aruṇa kākaṇḍa kadi liḍahiṅ antakāṅaladalad mamalaku bhuvana 9

    saṅ citraratha pinakabāhudaṇḍa pinatih surapati marəka maṅ devata sapinasukiṅ surālaya tumūt ri vuri nr̥pasuta nānāvidha pagəlari sañjatanya kadi rəm kadi kilat avilət lvir parvataśikara tinolihiṅ ravi hanan kadi jaladhi pasaṅ 10

    lvirnyān gaganacara mələk sakeṅ kuṭa makin sumahab aḍarata miṅsor maṅusir i sukuniṅ sumeru kadi sāgara maṅavaṅavaṅ sārsə̄k prakaṭa kadi laṅit rəbah saha navagraha makapuratuk lvīr andaru saṅaṅivu candra bhāskara paḍəm ri laku surapati 11

    lvir saptabhuvana vahu vartamāna ri panr̥ṣṭinira paśupati kapvākrama tumitah avaknya riṅ sajuru kātaratara sumaput sāsiṅ kahavan atəmahan ləbū təkapiṅ aśva ratha gajapati lvah luṅka təmahan aratā təgal təmahaniṅ vukir alas inidək 12

    Canto 24

    prāpta ri lambuṅikāṅ girirāja kidul suranātha sənāddha saṅgraha āpan avās paṅapuyni musuhnira tūt gəgəriṅ gigiriṅ gunuṅ midər sāk sira saṅ kahavan kahalālaradan kapapag təkapiṅ surāpsara śeṣanikāṅ tinavan pinaṅan hinañaṅ təkapiṅ bala daitya rākṣasa 1

    tan dva təkāladalad maṇimantakarāja manalyani sāhasāṅusī tan patuhan varagaṅ varagaṅ kalavan panəṅərnya tatan pasañjata kagyat anon magəlar makukud ta ya maṅkin atambəh atimbun akrama byūha surādhipa kātara sə̄k makarānana yeka dumehnya kaṇḍəga 2

    de suranātha madan sira sāra śarīra huvus pinakāṅganiṅ gəlar mukya təmən nr̥paputra dhanañjaya paṅharəpiṅ sura riṅ raṇāṅgana citrarathādhika mitranirāparəkiṅ ratha sāra n umuṅgu riṅ liman mvaṅ surasaṅgha gajāśvarathanya padāti samūha vilaṅnya sārvuda 3

    təkvan ikāṅ giridurga təgal palagan maratā hinapitnikāṅ juraṅ śuṣka kuraṅ bañu pə̄ṅ vadarā havaniṅ ləvu guntur atap tikāṅ vatu priṅga juraṅnya kakilyan i rāryanirān humaḍaṅ humarəp rikāṅ musuh ṅkāna ta saṅkananiṅ maməgatməgat i pratisāra hanāṅrəpeṅ sukət 4

    (99)

    Canto 25

    saṅ citraṅgada citrasena panihuṅ kānan paṅantīṅ gəgər muṅgviṅ keri ta saṅ jayāntaka sumār mākrəp kahañjur mahā sākṣād dhastanikāṅ gəlar haṅunaṅun mahyun rumohaṅ musuh maṅgəh byūhanirāpagəh mavunuhan tan pokihan durgama 1

    sāmpunyān marəpāt katon ta sahabiṅ daityāḍarat ghūrṇita pakraknyān paḍa garjjitāṅamahamah sākṣāt gəlap sāyuta gritniṅ syandana paṅhrikiṅ kuda liman lāvan krəbətniṅ dhvaja vāgyutpāta kilat sake patakisiṅ daṅṣṭrāgra tan pāntara 2

    sār sə̄k sañjata vāh mahāsura tasik muntab titahnyān vutah liṇḍūṅ rāt gumivaṅ mahītala bəlah saṅsāra kadyāyunan mrəmṅ āditya ləbū ḍəḍət paruṣavātāvor alisyus mələk saṅ hyaṅ meru rubuh tasik mavurahan brahmāṇḍa kāṇḍəg rəṅat 3

    praṅ bvat detya mamāh gunuṅ parəṅ amūk durnīti tan vriṅ bhaya gutgūtən suməgut paḍāṅgragut apan krodhālavas gə̄ṅ galak praṅniṅ śūrasura pva sāra paḍa tāvantah matəmviṅ təṅah lvir guntur mapagut matambəh i harəp norāṅucap mundura 4

    hūṅniṅ bheri mr̥daṅga māri karəṅə̄ deniṅ papan pākrəpuk āṅrəs kākrəcikiṅ təvək ketugikāṅ kontāṅəne sāmaja lāvan deni paṅohaniṅ maməkasi prāṇāṅuhuh kātara mvaṅ pahyāniṅ amə̄k ikā kr̥təbikāṅ vāhvāpulih mombakan 5

    vyarthaṅ jantra panah galah kasəsəkan tan paprayogākabət aṅhiṅ kadga gadāṅəne silih arug riṅ tomara mvaṅ tuhuk anyat mānahut aṅdədəl paḍa silih bandhālupeṅ sañjata akveh māti silih təkək patəhikāṅ pātrəm lavan kris pamə̄k 6

    kapvālvaṅ saka sevu sārvuda dudūṅ mātaṅga lāvan kuda rūgniṅ rəṅgarathān pabəntur asilih tiṇḍih rəmək bhīṣaṇa apraṅ riṅ kunapādri ta pva vəkasan saṅ vīra siṅhāḍapur məntas riṅ rudhirārṇavārurək arok hyun hyun vijah ghūrṇita 7

    saṅ siddharṣi haneṅ laṅit harəp anontonātakut tālayu kapvāmrəm matukup kapə̄ kapələṅən trāsāṅlayaṅ miṇḍuhur āpan lvir sinaṅaṅ laṅit ri dilahiṅ sarvāstra muntab murub āvrəg riṅ ravilokamaṇḍala hilaṅ tīstīs tikāṅ bhāskara 8

    lvirnyān maṅkana saprahāra kapahuṅ tekāṅ vatək rākṣasa tan vruh yan sinəsəb kagəm pinəgatan saṅkeṅ gəgər durbala saṅ citraṅgada citrasena tumitih mvaṅ saṅ jayāntāṅusī yekān pāvrəg i vuntat avri vulaṅun tan vriṅ laganyān vinor 9

    abyūran kakasut vaneh paḍa ta yāmūkvūk maṅuṅsī kivul təkvan pvāsaləsək maṅunduri juraṅ vāhvāpulih kedəkan anyat teka riṅ antarāla pinananh rəmpūh tibāgənturan de saṅ pārtha lavan surendra tumitih saṅke harəp sāhasa 10

    pāt mantrīnira saṅ nivātakavaca rvekāṅ kapə̄kan parəṅ saṅkīrṇaṅ bala daitya mukya kavənaṅ keṇḍit ləvih sāyuta kālanyān sinəsəb paḍālapalapan saṅ vīra vidyādhara kagyat durbala binvatan pinulihan deniṅ vatək rākṣasa 11

    sakvehniṅ kahalāvaluy ri təka saṅ daityādhirājāpulih muntab krodhanirān kahənti pinusus sakvehnikāṅ paṅharəp hetunyān təka maṅdəmak kadi ta saṅhārāgni sākṣāt murub sə̄kniṅ rākṣasa bhāma sāk sakapapag sañcūrṇa bhasmīkr̥ta 12

    Canto 26

    kahalaṅ amara de saṅ asurapati māti matip atitihan inidək inamahamah ikaṅ apuliha tan panəmu havan anə̄r i galahika nətər ~ ~ ~ anəsərakən yama rika rasa rākṣasa təka mamulir hulu haṅunaṅun anəkək anəpak anəpah anaravataṅ asañjata saka ri puhun vulu saka ri mata śara muśala masulam 1

    (100)

    gaja ratha kuda ḍūli rəmək inadu durbala kagirigiri kadi giri pamugari surabala gila pinraṅ inadəgan arəs rinaməs asasaran alaradan alulunan gəlarira surarāja makaramuka śīrṇa panihuṅira rumuhun alahasa tura asidəkuṅ apulih ta nr̥pasuta tulakbalakaṅ ikaṅ amalakaṅ amalakuṅ asih 2

    Canto 27

    saṅ hyaṅ pāśupatāstramantra rinəgəp nr̥pasuta masamādhi sakṣaṇa rəp māvak tikaṅ agni rākṣasaśarīra pituṅ ayuta kapva sāyudha maryak mālun alumba riṅ gagana pūrṇa mətu saka ri tuṅtuṅiṅ panah krūrākāra təkāṅasut guməsəṅīkaṅ asura saha bhr̥tya vāhana 1

    siddhi śrī maṇimantakādhipa manusmaraṇa vara bhaṭāra bherava accedyāmaraṇāṅjəlag ri təṅahiṅ havu ri hilaṅikāṅ balāsura dhyāyī rəp mətu taṅ balāsura muvah saka ri tutuk apūrva bhīṣaṇā iccānantara kātarāpulih amūk dumaśaguṇa haləpnikāṅ hilaṅ 2

    piṅ pat piṅ lima yan minaṅkana muvah kagirigiri muvah trivikrama ṅkā saṅ hyaṅ tripurāntakāgniśara paṅləpasira ya muvah trivikrama ndah ṅkā yan pinasaṅ rahasyaniṅ upāya təkapira saṅ ārya phalguṇa sūkṣmajñānaniṅ antaśāpa katuturnira ri vəkasikāṅ anugraha 3

    ṅəsṅə̄sən surasaṅgha māvrəg alayū təkap i paramaśaktiniṅ musuh saṅ pārthāta mahātumūt katavurag sira pinakapamuntatiṅ murud lvir kevran matavantavan tiki tinūt inujuṅan inirup sināhasan deniṅ rākṣasa paṅharəp mamanah aṅhudani muśala cakra tomara 4

    yekān garjjita saṅ nivātakavacānudiṅi kiva maṅuṇḍa tomara hāh hāh mānuṣa dibya kon vənaṅ amaṅpaṅ aku sakalalokikāntaka akvīkiṅ makadr̥vyaṅ aṇḍabhuvanāku makahulunikāṅ jagattraya paṅlampūnya siluṅluṅamva muliheṅ nirayapada nahan vuvusnira 5

    ndan saṅ paṇḍusutāsuve sira huvus tumihaṅakən ikāṅ śarottama nārācāstra śarīrabandhana ṅaranya saha japa samādhi devatā təmpuhniṅ varatomare sira mahārhapit i ya mapi kantəpiṅ ratha makrak saṅ maṇimantakādhipa təkāṅamahamah atəhər maṅadvakən 6

    kālānyān kasilib kabañcana məṅā babahanikaṅ anugrahe sira tan vyarthān pinanah səsək śaravarāstra tutukira kaləṅgakiṅ ratha ambək niścaya sāvalepa magave lupa larapanikāṅ patin təkā byatītan təkaṅ antaśāpa ya tinūtni paṅavaśanikāṅ anityatā 7

    Canto 28

    huvus pəjah saṅ asuranātha riṅ raṇa linūd iṅ agniśara sabhr̥tya vāhana kadi pva kālayavana ḍūli sakṣaṇa śināpa denira kucukuṇḍatāpasa 1

    rərəb kuvuṅkuvuṅ avilət riṅ ambara anīla nīlajalada maṅhəmū hudan raviprabhā kalaṅanirānisih katon viśeṣa cihna saṅ adhikāra yan pəjah 2

    ikāṅ surāpsara mati len hanāsakit sinaṅgraheṅ amr̥ta təkap surādhipa yathārtha nā saṅ amara tan tulus pəjah muvah sulakṣaṇa saha bhr̥tya vāhana 3

    mulih ta saṅ surapati tan vənaṅ kinas ikāṅ sukhāsamasama sə̄ṅnya riṅ muka mulih maṅarvani ratha saṅ dhanañjaya jənək mucap kramani təkapnirālaga 4

    marək tikāṅ surabalasaṅgha riṅ ratha mavətvavətvan ulah ujar kasevakan paḍomucap kramani ləkasnirālaga balik tikā saṅ aguṇakāya tañ jəvah 5

    byatīta saṅ muliha səḍəṅ haneṅ havan aneka taṅ jayaphala rājabhūṣaṇa viśeṣavāhana hana ratnakanyakā sapāṅhaḍāpan ulihiṅ aṅdhvajāhr̥ta 6

    kunəṅ pva saṅ mabuhaya yeki varṇanən ikāṅ sənəṅ kadi hiliran paḍāṅhaḍā anekavr̥tta paḍa rinəṅvarəṅvakən svabhāva nāgata pinarabyakən hañaṅ 7

    hanāṅaraṅ matəlasanāṅaraṅ huləs maṅə̄ hanan ləsu paṅisinya tan padon huvusnya saṅgraha katəkan panas bharan ləhəṅ ta kanya pabuhayaṅku riṅ natar 8

    haneki parccaya ri hasihnikāṅ sənəṅ tumohi gə̄ṅni kahulunanya riṅ priya vuṅan bhavahni vuvusikā məṅənməṅən vənaṅ karī bañu hañaṅ aṅləbur tasik 9

    haneki gə̄ṅ lara ləvihiṅ putək hati pilih titir pinaśapathākən iṅ tilam rare turuṅ vruhi purihikāṅ karāsikan vənaṅ ləñok ṅvaṅ i səḍəṅiṅ pasaṅgaman 10

    hanākire vulat amanis panuṅsuṅa ikāṅ vuyuṅ saputana raśminiṅ guyu harəp tumiṅhalana jalunya pet sivi malah priyambadanika liṅnya maṅkana 11

    dudū tikāmahayu vəḍaknya gopita muṅup katon ri hati luput sakeṅ tapih ləkas mahāpi lara sinaṅgraheṅ huləs pinet ikāṅ ubhaya hita tan kapaṅgiha 12

    taṅeh kavraṇṇani laraniṅ surāṅganā viyoganiṅ vahu pinarabyakən hañaṅ ḍatəṅ ta saṅ surapati kapva ghūrṇita təkapnikāṅ tabətabəhan təkeṅ laṅit 13

    Canto 29

    atha sāmpunirān təka sukhasukhaniṅ jaya tan vuvusən hana pāvana nandanavana katəkānira pāṇḍusuta ndah aneka ta paṅharivuvuni manahnira sarvarasa paripūrṇa daśendriyanira tuməke viṣayanya kabeh 1

    ginaveṅ abhiṣekaphala ta sira ratva riṅ indrapada praṇidhāna surendra manəlaṅa pituṅ vəṅi rakva sira satiləm vəṅiniṅ surapada rahinanya sataṅgal ika ya mataṅnya pituṅ vulana siran amaṅgiha śūraphala 2

    śubhakāla ḍatəṅ krama mətu suranātha rikāṅ pasabhān inatag r̥ṣisiddhasuragaṇa paḍāgəlariṅ vataṅan valiniṅ suraloka humaḍaṅ atatā ginəlarnya kabeh aparan ta kasaṅśayanira saṅ anəmvakənāṣṭaguṇa 3

    təka tārya dhanañjaya sinaji riṅ āsana siṅha maṇi makuṭādi sabhūṣaṇanira surarāja sinaṇḍaṅira makavastra limuṅsuṅanira saṅ ananta huvus dinala maṇinīla pamarṇa śaśarudhira dinrava mār araras 4

    surarāja lavan yama baruṇa kuvera marək marəpat barəbət kala śaṅka murava gumuruh stuti devagaṇa aṅadəg ta vasiṣṭa sira pinakanāyaka saptar̥ṣi saha śānti maṅastvakəna jayajayāmr̥ta devamaya 5

    bañuniṅ śatatīrtha pinupulakəniṅ ghaṭa hīra pitu rasa piṇḍa rasāyana sakala vajadrava saptaghaṭa amr̥tāntukiṅ aṅlvaṅi śaśadhara pūrṇa pituṅ kalaśa salikur maṇikumbha saha vidhi samāhita paṅdyusira 6

    hana ta pras anārgha kagirigiri gə̄ṅnya haləpnya ḍatəṅ sphaṭikānaravaṅ pinahad udadhimanthana tuṅkubikā sahaneṅ hariloka śivapada pitāmahaloka təka pinakesinikāṅ paramarasa sama mvaṅ acintyapada 7

    (101)

    adavān vuvusən kramaniṅ aṅabhiṣeka ri pāṇḍusuta ri huvusnira maṅkana hana gr̥ha saṅgraha saṅ vinaraṅ kaləvihnya sakeṅ smarabhavana ratīmaya sə̄k i riya i rikā ta sirān dinunuṅakən umantuka mābababab 8

    asalah sira bhūṣaṇa təlas arəpat masalin vəḍihan hana megha rinaṇḍiniṅ aruṇa śināpa parāgyanira aṅure kadi rājasa niram alavas juga rūpanira katəkā sihaniṅ mata vaja jaja bhūṣaṇa jāti sadā 9

    i surambyanikāṅ pavaraṅan i rikā ta sirān paśila gr̥ha rāmya pituṅ siki midər upacāra paḍātiśaya hana sarvamaṇik vaṅunanika hanādhika puṣpamaya pavirāmanikāṅ paḍa piniḍuḍukiṅ smara riṅ śayana 10

    Canto 30

    vara menakā sira kinon surapati marəke dhanañjaya sira katvaṅiṅ suravadhū pinituhu təkapiṅ sakahyaṅan tuvi tan vaneh tuhatuhāṅgəhira makakulārya phalguṇa sira tāṅucap kadi lumālana sivuhən i saṅ dhanañjaya 1

    laki hantuṣākəna ta gañjaraniṅ amənaṅiṅ raṇāṅgana pratuhun pamañcananikiṅ kapitu bapa təkap nr̥pātmaja hayu cakravartiniṅ arūm pinakaguru manis kinatvaṅan riṅ ulah vagəd paḍa huvus mayaśa paḍa təlas makabvatan 2

    nya ta suprabhā nitanitan lihati makalavan tilottamā təkapiṅ maminta parihe riṅ avahiri ḍatəṅ tatan humuṅ amənaṅ hiḍepnikaṅ alah makin araras arumpukan gaḍuṅ papagən liriṅnya laki məṅgəp aṅuvahi gəluṅnya tan lukar 3

    nya vaneh dr̥ḍhāmava vilāpa hana vahu huvus madarpana guməluṅgəluṅ kakakakānya sinurusuruyanya riṅ taṅan hana maṅgupit ruditagīta manamanama hastakośala kadi hintən esi dinələ̄ tiṅətiṅətakəniṅ pasaṅgaman 4

    vəkasiṅ vəkas tiki kabeh nda tak amihəri tāku riṅ vaneh laku ta truhun tumama riṅ tilam aku mutuseka ṅayvana iti maṅkanojarira saṅ vinuvusan atikiṅ salah sahur aṅucap vaneh kadi nirāgraha tuhun umasuk mareṅ jinəm 5

    vara suprabhā sir kinon mamuṅarana rikāṅ samaṅkana phalaniṅ huvus mapihutaṅ priya parəṅ umasuk mareṅ jinəm alvas patūtnira lavan padulurira ri kāla riṅ hənu rasa tan papaṅgila kinol rəṅurəṅunira tan təkeṅ hati 6

    arəṇah saṅ arjuna marəkmarək aṅusapi gātra pet sivi anəpak taṅan saṅ anulak vahuvahu kinayuh təṅahnira asaputsaput susu parəṅ rva karika tinahānikāṅ ulah aləməh katona tumukup kətəkətəgira mār sumamburat 7

    mavuvus ta saṅ nr̥patiputra mijil upasikāṅ karāsikan ibu tāsyasih mapa manista n alarisa halista yan lihat avanəh rəṅunta yat aməm vaja huvus atasak mirahnikā laraniṅhulun hinənəṅan kadi maṅucapucap lavan tulis 8

    mapa deniṅ ahyas ibu ṅūni karaṇaniṅ anəmvakən hayu maṅunəṅ galuh karika nitya karamasiṅ anə̄bakən gəluṅ apupur mənur mavida kembaṅ asana karikā dyahiṅhulun athavāsusur təbu kita dyah ari tuhagaṇāpəpəh madhu 9

    sira saṅ minaṅkana kahənti hatinira tuhun mapet sivi aṅəlihṅəlih makasahur paṅəsahira lavan rəṅihnira katəmu pva muṣṭini tapihnira lukar irikān tiniṇḍihan mata mesi manmatha tiniṅhalakən i mata tan lumismata 10

    ri huvusnirān kavava mukṣa hatinira maṅuṇḍəṅiṅ dagan anaṅis tumuṅkul umusap hariṅətira matūt grətiṅ təṅah asaput huləs juga sirāgila təkapi mələsnikāṅ tapih mvaṅ ikāṅ pupū kadi kukū gaḍiṅ amayamayā təkeṅ wətis 11

    nr̥paputra mātyakən avaknira riṅ ulah arūm priyambada təka piṅrva pintiga sirenubhaya hañar atūt ulahnira vuluh aṅharas təbu papaṅgihira paḍa rināmyaniṅ manis aṅənoh vavaṅ matəmu ros matəmu vuku silih dələ̄ mata 12

    ndah aneka lālana pararyanira sasumukānaṅ indriya hana yan vijil suməlaṅ ahyas ajajar atitihtitih pupū aṅatag narendrasuta mañjiṅa ñamuñamur iṅ rasādhika gətihiṅ kukap kadi təgəl mamutani kadi hampasiṅ madhu 13

    krama kāla meh təka ta nālikanira matutur ta suprabhā tumurun mareṅ bañu təhər mulih amirah ikāṅ matāpəḍe akədə̄kədə̄ lakunirāmirumiru təpiniṅ tapih lukar tumiliṅtiliṅ mulat i sor masəmu rəṅu paran kunaṅ katon 14

    Canto 31

    gandharvī surakanyakā mava mr̥daṅga tatapan aṅiriṅ svarāvatī vīnā rāvaṇa hastakośala maṅanti hana ta sinameniriṅ kiduṅ ambə̄niṅ tigasān aṅutkaṭa səkar jənu vaṅiniṅ asəp nirantara ambək saṅ vinaraṅ kavə̄r kavakavā titir aṅipi mareṅ smarālaya 1

    sakvehniṅ vara ceṭikāmava manahnya ri taliṅa paḍānaviṅ kabeh vaṅvaṅ mātra ri kapriyambadanirān vinaraṅ amaji padmaniṅ hati hetunyān pakukur gəluṅ pati pəkulpəkul itiki hanan sinikvakən len taṅ bhrānta kədə̄ silih kisapu mārəkarəkana kəmulkəmul huləs 2

    kagyat yan vətu suprabhā garavalan taya dumulurakən vijilnira āpan riṅ satiləm prasiddha sakuləm sira kapitu magantyagantyana rvā ṅve rvāṅ vəṅi vastuniṅ limavəlas vəṅi pinapitu nālikānikā nā hetunyan ulih pilih karakətan nda tucapa sira saṅ silihnira 3

    maṅkat ratna tilottamā tumama tan magigu dahat apan huvus tama saṅ kocap titir aṅləbur brata huvus kr̥tayaśa matuheṅ pamañcanan ndān anvam kadi hantəlū kinulitan pumulunira payodharātənəṅ yāvat madyusa riṅ surālayanadī takari muvaha ratna kanyakā 4

    saṅ menā manamākən ojar i saṅ ārya bapa pahalavə̄ tikuṅ manah hayvānəṅgah aṅel parārtha purihiṅ kadi kita guməgə̄ smarāgama nā liṅnyān paṅucap mulih tucapa saṅ kavəkas inadu caṇḍi riṅ tilam kadyāpraṅ marəpat huvus tinəbahan galah aḍəḍəs atuṅgalan raras 5

    mojar saṅ nr̥paputra rakryan apa yan hinarəpakən umuṅkurāṅdyahi petpetən ṅvaṅ i rāmyarāmyani vuvusta pamasamasa ṅūni riṅ gihā maṅke sarvamanikvakən taṅan alah ṅhulun ibu təkapiṅ prabañcana ambəkni ṅvaṅ arəs madadyana tanah kavadi larani vuryaniṅ kukū 6

    dyah yak mātya hələm huləs təmahanaṅkva sasiriṅa maran sinanmata nohan ṅvaṅ parəkən kasuṅkəmananiṅ mapi lara matukəltukəl hati aṅgoniṅ prihatin kunəṅ kəmulaniṅ mijil aṅənəs i tambvaṅiṅ vulan rakryan rāmyanikiṅ mamuktya sukhaniṅ sinikusiku maṅolakən təṅah 7

    nāhan śabdanirāmanis kadi kire maṅətərakən i nālaniṅ hati saṅ sinvī kinisapvakəñ juga taṅeh kavənaṅa makiputkip tapihut tan saṅkeṅ vədi kapryaniṅ tahu tuhun hana keparitahānikāṅ ulah bvat mampəh ləkasiṅ priyambada sukhāṅinakinak ika yan huvus vineh 8

    saṅsiptan ri huvusnirān kavava meh vaśa riṅ ulah aveh yathāsukha maṅgəh prītinikāṅ ulah kadi pucaṅ luvak atəmu lavan sərəh vaṅi ampəhniṅ mavisikvisik muni salə̄nira saha kisikiṅ huləs hañar hə̄hə̄h mātra lavan rəṅih paḍa rinəṅvakən ikaṅ anaviṅ silih gupi 9

    Canto 32

    akveh kətəkətəgira sṅ nr̥pātmaja lumālana suraduhitā rāmyāṅiliṅiliṅi manaṅhulun tinarimāṅudaṅudaṅa susu eñjuh maṅisapu təhər aṅharas pipi gəluṅ lukar inajumira ojar sira təhər ataləhtaləh təlas aveh səpah amasamasa 1

    dyah saṅ kadi raras i hayunta denta magave ṅrəs i nalaniṅ hati tajyāmisani kari parasparasta halis olih aṅaniniṅ akūṅ lakṣmīni mataniṅ aṅaraṅ hayunta pinakāməṅaməṅan inamər kadyānəṅər asahasahan huvus matəmu deniṅ umulat i kita 2

    tan samvas iṅ amuhara kūṅ vaneh grəti gulunta kadi tinulisan āṅrəs tapaki talitalinta deni paṅucalnya kalayu manəḍəṅ rakryan humənəṅa si kitāri tuṅtuṅi halista juga sumahura hyaṅ śrī karika humalivat hade vaṅini kenta karika kasirir 3

    aum saṅ nr̥pasuta paja deniṅ ojar amaveṅ laṅit aṅalihakən nā maṅhudani rava sirān priyambadaniṅ onəṅ alavas aṅaraṅ maṅke ta karika subhaganta saṅ paḍa lavan səpahiṅ ahañutan kadyāsana k aruhun akəmbaṅ iṅ katiga tan sipi pinarəbutan 4

    tan vehən aṅucapa marāṅhuvus pəjah aniṅhali ratibhavana saṅsāraṅ umulati matanta tībra laraniṅ kaparək aṅucapa rakryan sipi kari huyaṅiṅ kumə̄lakən unəṅnya manaṅisi vulan māmbə̄ kari gəluṅiṅ akūṅ rinaṅkəpan avak ri kita ya taṅure 5

    nāhan paṅucapira təhər yathāsukha masaṇḍiṅ anaḍah i yava sāsiṅ parama rasa bhinukti sāriniṅ anindya rasa paḍa hana byātīta gatinira ḍatəṅ ta nālikanikāṅ samaya pinapitu mantuk ta sira vara tilottamā dinuluriṅ kaka śata vanitā 6

    Canto 33

    rare rasiki saṅ gumanti vinuruk ruṅ atanu vinarah riṅ iṅgita suvəṅnya maṇimāya pahyasana saṅ maṅarəki karikā sinaṅgraha ikāṅ laku kadīṅəriṅ liman ariṅnya savava lavan ambətiṅ təṅah miguhmiguh alon hanan kadi kinaṅsyan patakisikāṅ kale susun 1

    vaṅunvaṅunaniṅ smarāmuhara kiṅkiṅ umahiṅ agave raras hati pavehnya lara rāga vatvanika vāhu mapatiga susunya komala lavaṅlavaṅikāṅ manah kadi tan evəh asuhunana kapriyambadan vəlahni paṅavaknya śoka maya paṅhrəti manisi matanya yan lihat 2

    ya teka tinamākən epu ta kariṅ tinarima maka paṅkvanaṅ təṅah mijil pva vara menakāgigu məhāh tiki kinisapu miṅsəriṅ tilam katon pva hariṅətnya mogha kadi hīra rinəmək i səlānikāṅ susu vavaṅ marahakən huyaṅni hr̥dayanya dugaduga ri saṅ nr̥pātmaja 3

    maśabda ta saṅ ārya māsku pakapuṇya manisi pamatanta toh lihat ri denya kinənan sipat ri pagavenya turida titir aṅlare hati pipinta pinatiknikāṅ bhramara kotuka luməvihi gandhaniṅ puḍak tapihta tinəṅət dahat kadi tapih təlas inapi paṅaṇḍutan vulan 4

    vuvus nr̥patiputra maṅkana kasəṅkvan aṅənaṅənirārdha sāhasa tan ora kusumālume harasən iṅ bhramara sacanirān parigraha ikāṅ kadi rare pinə̄han anulak jaja kaṅəlihan aṅgətəl taṅan karəsnya səḍəṅan hañar tinipasan paḍa nisiri tikāṅ samaṅkana 5

    mijil ta ya sinuṅsuṅiṅ kaka paḍāvəlas asəmu pacəh paḍāvuvus ariṅku kadi pāṅrəṅihniṅ anapak vatu ridaṅ amatəmvakən halis ikāṅ lara hitāvasāna palalun pva ta bibi tarahuprahub kabeh kadi vvaṅ aṅagəm vəlad dinudutan mata laranika māsku kə̄lakən 6

    nahan vuvusikāṅ kakāṅatərakən masuka muvah arəs ta saṅ kinon katon mara manismanisni vaja saṅ priya kadi masiratsirat madhu kumə̄l ta juga yan pininta kasihan vruh aṅiriṅi pataṅkisiṅ kale məne paḍa məne vuvus paḍa vuvus riṅariṅani vuvusnya tan humuṅ 7

    Canto 34

    katuhvan ndi ṅvaṅ tan gila təkapikāṅ duhka tamuyan karəsrəs lvirnyānon kadi daṅananiṅ krisniṅ avayaṅ hanan mrəm maṅlampū tuhun aṅəsəsan māri manulak apan vahvāmaṅgih rasa huvāhuvā tan pakəcapan 1

    laluṅ səṅkər mantuk ta rasiki kakātiṅkah aṅiriṅ ikāṅ rūpāṅdevī śuci kadi laṅit tan pajalada kadi śrīniṅ sandhyān pakakəmul ikāṅ raṇḍi tinulis vətis keṅis gātranya kadi tapakiṅ vintaṅ aṅalih 2

    taṅeh yadyan varṇan saka sasiki deniṅ mamaraṅa tiga lvir saṅ kekət rara tuha rare byakta riṅulah byatītan sāmpun saṅ kapitu sapanivyan silihasih pradhāna strī len taṅ tumama tama tapvan kaharana 3

    ri kālanyan maṅkā sukha vibhava tan pāṅənaṅənan kapaṅgih de saṅ pārtha sivuhən ata tvasnira kədə̄ təkap saṅ kārīṅ āśrama mapa kunəṅ lvirnira məne ivəhniṅ janma vvaṅ kalapakat i lambuṅ vvaṅ ahurip 4

    ya hetunyan ləṅləṅ maṅənəs umareṅ nandanavana hana nyāsa bvat madhyapada manavaṅ pājarajaran mahandoṅ luṅsir mogha kadi guyuniṅ paṅkti maṅuṅaṅ mapaṇḍāpaṇḍañ cāmara kadi kukus māsana mabət 5

    apan moghā varsih sira təkapikāṅ svargaracaṇa kadi lvirniṅ bhūmi pracalan avakiṅ mānuṣapada samaṅkā taṅ teja pravala pakəkəsniṅ surapada mataṅnyān sarvābhrā maṇimaya dudūṅ kañcanamaya 6

    tan āścaryānon kalpataru parijātāparimita kədə̄ deniṅ kiṅkiṅ tvaṅira n ayayah lāvan akaka tumolih kāsyāsih saṅ aṅarəparəp kāri riṅ alas mataṅnyān paṅlampū dalihana ṅikət bhāsa rudita 7

    rinekākən muṅgviṅ vulətan aradin varṇa cacahan tinəṅhātəṅhā lālana paraniṅ ambək mabayaṅan huvus tuṅgaltuṅgal ta juga kavəkas tan hinuvusan rinəṅvan tiṅhal svaṅ lagi vinaluyan deniṅ amaca 8

    Canto 35

    yak mātību hələm patər təmahanaṅkva mamarəṅana tambvaṅiṅ vulan rakryan sāmpun atəmva lāvan ika saṅ panuluyan apa dāya lalvakən yan kālanta heneṅ tilam tiliṅi tāku taliṅa panaṅisku rəṅvakən nda k ton ləṅgaṅa ta pva denta maməkul mamituturi vilāśaniṅ hulun 1

    yan petən huripiṅ hulun pahadələ̄n riṅ asana karuhun səkar sapaṅ bhrāntaṅkvibu katona riṅ manuk adoh maṅəḍapəḍap i lambuṅiṅ vukir ləṅlənku n vulatiṅ vulan karahinan katuturana ya k āṅrəṅə̄ kuvoṅ nāhan hīṅanirāṅikət kasuvayan miṅətiṅət ikaṅ antya menaka 2

    ndan saṅ ratna tilottamānuturakən maṅənəs i vuri tan kinavruhan bhrāntāmbəknira deni tan tulus ikāṅ kakavin apəga tan vənaṅ kumə̄l hetunyān paṅiduṅ sapāda rasa bhāṣa mutusi palupuy dhanañjaya yekā satya ṅaranya riṅ kadi kitānivi kavi vəkasiṅ patibrata 3

    nāhan tāntya tilottamāviṅaviṅan taruvara təhər aṅhəmū guyu saṅ pārthāta lələh manolih aparan tiki manulusakən vicakṣaṇa nāhan liṅnira saṅ maliṇḍuṅan atāṅgyat aṅupiki pacəh nr̥pātmaja harṣāveh pakapūhanāṅlavani rāga hana kadi mulat kasaṅśaya 4

    akveh lālana saṅ nr̥pātmaja mijil ta sira təhər atuntunan taṅan tanṅeh yan caritan vilāśanira riṅ saka sasiki ginanti denira saṅsiptān upalakṣaṇākəna huvus təka ta sira pituṅ vulan gənəp hetunyān pamuhun ta mantuka ri jə̄ṅ surapati mararəm kr̥tāñjali 5

    mojar sājñā bhaṭāra mantuka manəh surapati manaḍah varāmr̥ta aum aum putra katon tvaṅiṅ makaka lāvan ayayah ika tan kagiṇḍala tan doṣan pasayut mamīkita purihniṅ anahura hutaṅ sasambhava rapvan rāmya vinarṇanānikaṅ anāgatakavi vijayanta don mami 6

    lvāmbəktānaku hayva ta ṅ vaṅ asalin manah i təkanikāṅ anugraha kadyāmbəkta rikān səḍəṅ tapa jugāmbəka tan lupa riṅ samāhita saṅ yogīśvara tovi saṅ tumənu ṅ aṣṭaguṇa kajənəkan pva riṅ sukha yan tāmtāmana ṅ indriyā puhara mūḍapatita niyatā bakal muvah 7

    akveh caṇḍi rəbah katona təkapiṅ variṅin athava bodhi hambulu litnyālāyanikāna yan pipilaneka davutana kapāna yan hana hīṅanyan vatunən tikāṅ mada vimoha tumuvuh i manahta sapvani yan tāmtāmana viṣṭi yan paṅavaśanya bhasa mamubura ṅ parakrama 8

    nāhan liṅnira saṅ hyaṅ indra maṅadəg nr̥patanaya huvus sinaṅgraha de saṅ mātali muṅgahiṅ ratha sasañjatanira tumihaṅ sinimpənam maṅkat maṅkin aṅindriyāpan ativega saka ri lariniṅ samīraṇa byātītan laku saṅ dhanañjaya taṅisniṅ alara kari yeki varṇanən 9

    (102)

    sakveh saṅ maṅaraṅ vimūrccita huvus paḍa kapihutaṅan karāsikan mūkṣāmbəknya tumūtakən larinikāṅ ratha paḍa ləyəp aṅdələ̄ tavaṅ hisniṅ luh tikəliṅ halis pinakapahyasika katiga luṅsuriṅ tapih sambatnye hati riṅ puḍak paḍa katon hana mətu tinatanya riṅ tətə̄ 10

    hāh saṅ mās maṇikiṅ hulun sənəṅ apaṅkva kita ya k aṅadəg rinūpaka saṅ metmet i manisku keñjuh apuyurpuyur agələm amahvamahvani saṅ vruh riṅ gitaniṅ hulun ya k aṅəlihṅəlih apilara tan ginocara luṅhā pva ṅ sahajāmənərmənərakən pupur i rahi manambyakən pipi 11

    luṅhā pvā huvuseka tān ariṅa cumbana təlas ahuruphurup hurip ndi ṅ vaṅ meta karāsikanta vinisikvisikakən iṅ akālihan huləs tolih sākni gəluṅku tan sinuruyanta jariji tumibeṅ salaṅsalaṅ nda k hāt hāt ragətiṅ hulun ri susu denta mituturana kiṅkiṅiṅ hulun 12

    ndī kukvanta ta kumbarah salahasaṅku k aləṅavaṅi yan tibāṅ taluṅ nda k vāsvās mukaniṅ hulun mapi turū mamuni guyu sinaṅhulun təhər mvaṅ yan heva miṅe syapā tika mamet aparan i liriṅiṅ hulun priya tan tr̥ṣṇanta maṅāryakən syapa tikāmupihupiha halisku yan tikəl 13

    riṅ janmāntara yan kalaṅkyaṅa kitāku jalada maṅurambateṅ vukir nda k vāsvās panaṅista tuṅsira rəməṅku lihatana sakeṅ tahən ragas yan meh prāpta sumambəra ṅhulun aliṇḍuṅana ta ku ri hə̄bniṅ er tali bhuktinta pva risisku denta ri surupniṅ aruṇa maləsāku nistura 14

    yan paṅjanma kiteṅ gaḍuṅ hulun adadyana liraṅ i sarenikāṅ juraṅ byakteki n ta maṅola yan vulata riṅ pupus aputih apan hañar məkar luṅluṅtā ṅalayan harəp harəp añumbana humabəta tāku kāṅinan rapvan vruh ri səkəlniṅ ahyun añuluhñuluha mapuharāṅgagap tavaṅ 15

    Canto 36

    nā sambatnikaṅ apsarī valuyanā ta gati nr̥pasuta cuṇḍuk riṅ vadarītapovana kakārinira paḍa hana sākṣāt vāk sukha rāmya karva kadi megha manuruni tasik saṅsiptan ri huvusnikāṅ samaya digvijaya gatinira 1

    sāmpun katəkaniṅ kathārjunavivāha paṅarananike sākṣāt tambayira mpu kaṇva tumatāmətumətu kakavin bhrāntāpan təhər aṅharəp samarakarya maṅiriṅiṅ aji śrī airlaṅgha namo stu saṅ panikəlan tanah aṅanumata 2

    ity arjunavivāha samāpta

    The text was first typed in 2008b by Arlo Griffiths. Some corrections of the word division of Poerbatjaraka’s text, and of misprints in it, were applied tacitly, but in general, real changes to Poerbatjaraka’s text (P) were indicated at the end of the respective line. Most of these changes were inspired by a reading of the text with I. Kuntara Wiryamartana (Kuntara Wiryamartana 1990). For Sargas 10 and 11, see C.C. Berg’s article (Berg 1933).

    Andrew Ollett converted the transcript to ISO-15919 in June 2018.

    Arlo Griffiths adjusted the resulting XML file after Robson’s text (Robson 1990) in June-July 2018.

    śūnyatā edP edR
    śūnyatan     prayojananira edP edR
    prayojñana nira edK    saṅgraheṅ edP edR
    saṅgrahe     siddhāniṅ edP edR
    siddhaṅ niṅ D    kininkinnira edR
    kininkin ira A C F Gkiniṅkiṅ nira B P edPkiniṅkin ira D    sira edP edK edR
    nira C    uṣṇīṣaṅkv edP edR
    uṣṇīṣakv     ləbūni edP edR
    ləbuniṅ D    saṅ maṅkana edP edR
    samaṅkana D    sambandhanya em.
    sambaddhanya edP edRsambandhāvva F sambandha pva Gsambaddha pva edK    sumyūhaṅ edR
    sumūhyaṅ C    deniṅ edR
    ḍḍeniṅ A    pə̄hniṅ edR
    pə̄hni D    rajah edR
    raja D    mātra edP
    matra edR    mandamāruta edP
    mandamarūta edR    mūrchita norm.
    mūrcita edRmūrccita edP    śilāśayana edP
    śila śayana edR    vilāsa norm.
    vilāśa edP edR    tumakitaki edR
    tumukitaki edP    mamanisiṅ edR
    minanisiṅ edP    gora edR
    ghora edP    rātri norm.
    ratri edP edR    ramya norm.
    rāmya edP edR    mukhanya norm.
    mukanya edP edR    aṅarcana norm.
    aṅarccana edPaṅarcaṇa edR    līnaṅ norm.
    līṇaṅ edP edR    drupadātmajā edR
    drupadātmatjā edP    ikiṅ edR
    ikin edP    ahəmuk edP
    ahəmūk edR    manoharāṅhadahadāṅhudani em.
    manoharāṅadahadāhudani edRmanoharāṅhadahadā hudan i edP    saptakumārikāṅləṅa vaṅinya OJED
    sapta kumā rikāṅ ləṅa-vaṅinya edPsaptakumārikā ṅ ləṅa vaṅinya edR    pinakamukhavāsaniṅ OJED
    pinakamukhavāśaniṅ edR    gulūn edR
    gulū edP    karavaṅnikaṅ edP edR
    karavitnikaṅ edK    luṅhā ṅ divaṅkara edR
    laṅhā ṅ dinākara edP    vilāsanikaṅ norm.
    vilāśanikāṅ edPvilāśa nikaṅ edP    oyut edR
    ūyut edP    sumilih edR
    sumilib edP    ārya norm.
    āryya edParya edR    nirāgraha edR
    niragraha edP    vilāsa norm.
    vīlāśa edPvilāśa edR    mūrcha norm.
    mūrcca edPmūrca edR    agoṣṭhi edR
    agoṣṭhi edP    svecchā edR
    sveccā edP    ndak edR
    ndā k edP    phalguna edR
    phālguṇa edP    āṅaveśa norm.
    āṅaveṣa edP edR    ḍəṅə̄ edR
    ṇḍəṅə̄ edP    talətəhikaṅ norm.
    talətəh ikaṅ edRtalətəhikāṅ edP    kavaśanikaṅ norm.
    kavaśanikāṅ edPkavaśan ikaṅ edR    ata edR
    atha edP    asove edP
    sove edR    mahas riṅ girivana edP
    edR    yatan
    ya tān edPya tan edR    samādhīṅ edP
    samādhī edP    aṅiṣṭi edR
    maṅiṣṭi edP    tattvanyān norm.
    tatvanyān edP edR    ya yāvat edP
    yayadvat edP    amarəki ta edR
    amarəkita edP    sattva norm.
    satva edP edR    maharṣin edP
    mahārṣin edR    hyaṅ edP
    edR    təhəra virāgyā edR
    təhər avirāgyā edP    sinambahh antarlīṇa norm.
    sinambah antarlīṇa edPsinambah hantarlīṇa edR    daśaguṇa edR
    daśaguṇa edP    taṅ vvaṅ edR
    ta ṅ vaṅ edP    rakṣakanya norm.
    rākṣakanya edP edR    core pracāra edP
    corepracāra edR
    OJED s.v. core expresses the opinion that “corepracāra = cauryapr. seems less likely for AW” . It is unclear if (and if so why) Robson really opined differently.    vinarah ikāṅ edP edR
    OJED s.v. wara III reads winara hikaṅ dhyāna lāwan samādhi and states: “Perhaps winara is passive from wara < awara, hence = inawara. KBW has the var. mawara, not given by Pb., who reads winarah ikaṅ; bal. com.: kasaṅkala, binañcana.”     śilā edP
    śila edR    mahānīlakaṇṭha
    mahā nīlakaṇṭha edPmahānīlakaṇṭa edR    viruddhaveṣa edR
    viruddhaveśa edP    hinalaṅanmu edP
    ṅ inalaṅanmu edR    agyā OJED
    agya edPāgya edR    təhəra vaira edR
    təhər avera edP    phalguna edR
    phālguṇa edP    śarīra edR
    śarīa edP    musuhnirāvri edR
    musuh mirāvu edP    kvehnya edR
    kveknya edP    pamapagnirādhikāra edR
    pamapagnirādhitāra edP    dhvastekāṅ norm.
    dhvāstekāṅ edP edR    maṅkanāṅastuti edR
    maṅkanā mastuti edP    lvīr edR
    lvir edP    vyāpi Berg
    vyāpī edP edR    paramatattva norm.
    paramatattva edP edR    icchāntāṅ edR
    iccāntā ṅ edPiccānta ṅ Berg    līnaniṅ Berg
    līṇaniṅ edP edR    kāraṇanika edP
    kāraṇa nikā edR    niṣkalātmaka edR
    niskalātmaka edP    paramārthaśivatva edR
    paramārtha śivatva edP    paśupatiśastrakāstu edP
    paśupatiśastrāstu edR    aṅəṭul edR
    aṅədul edP    laraniṅ edR
    lanariṅ edP    hurip edR
    hirip edP    maṅañjali edR
    māṅañjali edP    təkā edR
    təka edP    svabhāva edR
    svābhāva edP    śuṣka
    śuska edP    i galahika nətər ~ ~ ~ anəsərakən edP
    i galah anəsəki mamanah anəsərakən K    mvaṅ acintyapada K
    mvaṅ ~ ntyapana edP    sinaṅgraha
    sinaṅraha edP