Jinārthiprakr̥ti

Witness

  • : J.SchotermanA.Teeuw‘Jinārthiprakṛti: A Monk’s ABC’Bahasa, Sastra, Budaya: Ratna Manikam Untaian Persembahan Kepada Prof. Dr. P.J. Zoetmulder(none)Sulastin SutrisnoDarusupraptaSudaryantoGadjah Mada University Press1985Yogyakarta202–239

Metadata of the Edition

  • Title: Jinārthiprakr̥tiJinārthiprakṛti: A Monk’s ABCBahasa, Sastra, Budaya: Ratna Manikam Untaian Persembahan Kepada Prof. Dr. P.J. ZoetmulderOld Javanese-English Dictionary
  • Text Identifier:

Encoded in TEI according to the Conventions of Project DHARMA

Canto 1

nāhan lakṣaṇa saṅ tathāgata mahāyāna pva yan kavruhi | pūrṇeṅ rūpa sacihna saṅ viku huvus māndəl haneṅ jro hati | muṇḍī goḍuva len gaṇitri paragi mvaṅ sāmbarāśryāputih | mvaṅ tekaṅ kaṭivandha yogapaṭa sakvehniṅ sinaṅguh krama || 1

nāhan muṇḍi ṅaranya saṅ makamanah dharmāsvabhāvāhəniṅ | śuddha prakṛti niṣprapañcamaya śūnya jñāna nirsaṅgraha | nirsambodhana nirvikalpakamayālīlaṅ mahāśāśvatā | muṇḍi pvaiki ṅaranya nitya maparas mūrdhāṅ ləṅis nityasa || 2

jñāna vruh maṅiriṅ pasuk vətunikaṅ prāṇādi buddhyotsaha | mvaṅ vruh rīdər ikaṅ śarīra mahilī mendran lanā cakravat | ndah nityāṅhanakən praveśa makadon prītyaṅ prajāmaṇḍala | nāhan teki gaṇitri tan pasalahan de daṅ mahāpaṇḍita || 3

nirbyāpāranikaṅ manah ya ta maveh prītyaṅ nikaṅ rat kabeh | mvaṅ saṅ deva sireki mukhya ginave tuṣṭā nirān laṅgəṅa | mvaṅ saṅ ṛṣi sireka laṅgeṅa sivin maṅde sukhāniṅ prajā | yekā goḍuva tan kasah ri sira saṅ mahyun tuməmvaṅ taya || 4

buddhi lvir raviteja lumra sumənə̄ riṅ sarvatattvāgama | otsāhāna rajah tamah pada gəsəṅ sakvehnikaṅ ṣaḍripu | artha mvaṅ kama śabda len daśamahābhāyālahāvrəg hilaṅ | nāhan taṅ paragi prasiddha tinəṅət de saṅ masadyā hayu || 5

jñāna lvir həniṅ iṅ laṅit kinatayan deniṅ hima mvaṅ limut | vruh riṅ sarvaviśeṣatattva ṅuniveh riṅ buddhamārgottama | tiṅkah śrī jina riṅ śarīra kahiḍəp devīnirān sakramā | yekā sāmbara tan vənaṅ vinasəhan tan bhasmi deniṅ panas || 6

jñāna vruh humiḍəp ri śūnyatānikaṅ sarvatva dharmātmaka | sthīrāniṅsəti tuṅgal iṅ sakalatattva mvaṅ śarīrakrama | mvaṅ pañcendriya buddhi tan pamiṣaya tan kāpusan byāpara | nāhan taṅ kaṭivandha riṅ paramatattva ndan ginuhyeṅ manah || 7

prajñā vruh riṅ aveśa guhya atiyoga mvaṅ hiḍəp vīryavān | salvir neṅ surapūja yeka kahiḍəp naṅ devahārakrama | sarvopakriya sarvadeśana təlas taṅ mantra tantra stuti | yekā yogapaṭa prasiddha kumavītan vətva riṅ durnaya || 8

jñānotsāha taman pəgat mulahakən pūjā stuti śrī jina | suptādikriya tan katalyan inivə̄ naṅkən trisādhyātutur | maṅgāṅhela tan artha kārya magave dharma trikāyottama | yekāṅkən kaharan savit ri sira saṅ paṇḍyāhyun iṅ śūnyatā || 9

pūjānta sthiti sarvalakṣaṇa ya pūjā siṅ sasolah bhava | salvirniṅ vacanāmanis parahitāṅkən mantra nityāsthiti | siṅ cittanta japaprayoga magalar bāyu tri ratna traya | siṅ kāranta ya yogakāraṇa ri siddhāniṅ kayogīśvaran || 10

śīlantāṅinakiṅ mulat ya tika kəmbaṅ tan malum nityasa | siṅ sojarta kapaṇḍitan mijil arūm gandhā vaṅinyān sumar | vruhteṅ tattvaviśeṣa buddha ya tikā vījanta nityāgəlar | jñānāhniṅ humiḍəṅ mayā kadi miñak yekā nivedyāhaləp || 11

nāhan hetuni saṅ vuvus vruh irikaṅ dvīmātratavālicin | byaktā tiṅhala tattva sakramanikaṅ tantrenusir saṅ viku | aṅhiṅ jñānaviśeṣa buddha kahiḍəp tan dūra tan saṅśaya | ndan sāmaṅkana tan sapekṣa ri ulah lvir bhrānta riṅ lakṣaṇa || 12

vvantən teki gəgə̄n bratāṅkənan ikaṅ de saṅ makinkin hayu | naṅ ṣaṭpāramitā prakāśita gəgə̄n taṅ dāna riṅ pūrvaka | len taṅ śīla muvah ta śānti saha vīrya dhyāna len kavruhi | prajñāntyana ya teka kavruhinihan taṅ dāna tiṅkahnikā || 13

ambək nitya ləbā riṅ artha ṅuniveh yan tvak səkul bhojana | lāvan strī tuvi putri yadiyan tāvehakən riṅ matə̄n | rāh len māṅsa atinta soca yadiyan kāvehakənniṅ matə̄n | nāhan teka ya dānapāramitā yekin tambayan kavruhi || 14

rakṣekaṅ jinaśāsana kramanikaṅ śikṣa tatā gəgvani | tan byāpāra tikaṅ trikāya riṅ ulah yan ton sukhāniṅ para | naṅ prāṇātipatīviratyadi ya tekā dohakən pūrvaka | nāhan kavruhi śīlapāramita maṅgəh vvaṅ tuməmvaṅ hayu || 15

amək lvir madhu sinyukan madhu səḍəṅniṅ vvaṅ maveh duhkhita | tan molah humiḍəṅ viśuddha mahəniṅ himpər viyat nirghana | āptyāveha sukheṅ manah lara kədəh mahyun sukhāniṅ manah | śāntipāramitā pva nāma nikahən yekan gəgə̄ nityasa || 16

tan varsihnikanaṅ trikāya pagave karmāhajəṅ nityasa | yapvan riṅ rahineṅ sinapvan aṅaji mvaṅ lot mamūjānulis | yan riṅ rātri majāgra yoga japa lāvan dhyāna pūjā stuti | vīryapāramitā ki kavruhi mahāmārgāṅusir śūnyatā || 17

jñānānuṅgalakən śarīra kalavan siṅ sarvasattvātmaka | dehaṅkv ājana sarvasattva marikā dehaṅku sattvātmaka | nāhan hetuni sih nirākṣama rikā sattvādikādhah tuvī | yekā dhyāna ṅaranya pāramita teki svargamārgāpahəh || 18

jñāna vruh ri atinta len anagata mvaṅ vartamānakrama | mvaṅ riṅ sarvaviśeṣatattva samaya mvaṅ sarvaśāstrāgama | bāhyādhyātma viśeṣayoga sakala mvaṅ dikvidikdevatā | prajñāpāramitā kramanya ta gəgə̄n maṅgəh vəkasniṅ brata || 19

naṅ ṣaṭpāramiteka pūrvaka gəgə̄ntan mahyun iṅ śūnyatā | byaktāsih pva bhaṭāra buddha ri sirā sampun kacittagraha | āpan mūla viśeṣatantra vəkas eṅ tattvenucap saṅ viku | jñānādvāya viśeṣatattva nikihən devī mahākāraṇa || 20

vvantən pāramitā kramanya acaturbrahmāvihārāpagəh | metrī mvaṅ karuṇādulur mudita len tekaṅ upekṣāṅiriṅ | naṅ ṣaṭpāramitāpupul pva yan lavan brahmāvihārātəmu | yekā pāramitā prasiddha daśa sākṣāt karuṇeṅ śrī jina || 21

nāhan metri ṅaranya buddhi gumave kāhayvan iṅ rat kabeh | lāvan taṅ karuṇā pva buddhi malarānon vvaṅ mahāduhkhita | len tekaṅ muditā ova buddhi sukha yan ton tuṣṭaniṅ vvaṅ vaneh | ambək śuddha parārtha tan phala katə̄nnyopekṣa liṅ saṅ viku || 22

Canto 2

lāvan ta hayva malupeṅ bhuvanaṅ śarīra | abdhi mvaṅ adri paramottamadehatattva | maṅgəh paṅāśrayananiṅ maṅusir kamokṣan | āpan tika pva maparək saki pāda saṅ hyaṅ || 1

nāhan ta tiṅkah iṅ avak jaladhi kramanya | rāganta tan patəpi yeka bañunya majro | dveṣanta mevəh ika teka karaṅnya durga | mohanta vibhrama sumək ya tikombakāgə̄ṅ || 2

dambhanta tan pahaməṅan kruramīna rodra | īrṣyānta sarvaviṣa sarpa viśeṣa mandi | mātsarya yeka talatəkna sukət mahevəh | lāvan tikaṅ trimala yeka harusnya madrəs || 3

lāvan rajah tamah ikā taṅ alusnya nitya | krodhanta yeka ya rivut marivuṅ haṅinnya | pañcendriyāṅkəna hudanya barat halisyus | jñānanta mūḍha rasaniṅ bañu tikta lumrā || 4

jñānanta dhīra ya ta paṅhilaṅaṅ mahevəh | prajñānta yeka matəmah kṣirasāgarālva | tekan putər ta ya riṅ adri mahāviśeṣa | naṅ liṅgacetya himavān [n]din amaṇḍalāni || 5

yekā gaṇitri ya ta sarvajinan patiṅkah | naṅkən vatək hyaṅ amutər tikaṅ adriliṅga | naṅ sūtra yeki paramottamabuddhisattva | kāṅkənya nāga pamutərnikanaṅ vatək hyaṅ || 6

enak pva denta mamutərnikanaṅ vatək hyaṅ | vijñāna pāramita teki vilaṅnya śūnya | hyaṅ śrī ya taṅgalaniran rumuhun ta vəlkah | kāṅkən ta pāvakaniṅ amr̥ta meh katəmva || 7

enak pva nirviṣayaniṅ kṣiracitta śūnya | bāyu triratna humənəṅ sthiti ekatāna | yekā ta darśana bhaṭāra viśeṣabuddha | māyā prabhāsvara sirā nirakāradeha || 8

sākṣāt sireka ta mahāmr̥ta śuddha śūci | ndah yeka taṅ pana sirerika sāri-sāri | byaktā luput sira sakeṅ maraṇātivr̥ddha | byaktā kaṅ aṣṭaguṇa tan sah avas panutnya || 9

nāhan ta tiṅkah ika aṅga samudratattva | tiṅkahnikaṅ tanu mahendranihan kramanya | ndān uttamāṅga hata śr̥ṅganiṅ aṅgapārśva | pādanta pādanikaṅ adri śarīratattva || 10

ṣaḍvarga durgama sukətnya juraṅnya majro | moṅ siṅha barvaṅ ikanaṅ trimalātirodra | durśīlatr̥ṣṇā paraṅanyan asarpa mandi | mvaṅ taṅ rajah tamah udanya gəlap halisyus || 11

kyekā paṅāśrayananiṅ maṅusir kasiddhan | bəntar babad sukət ikaṅ ati riṅ kadhīrān | vruhteṅ mahāparamatattva vadūṅ atīkṣṇa | vijñāna dharma tarukan pagagan ta donya || 12

ndah yeka tunvani tayeṅ smr̥ti sūryatīkṣṇa | byaktāgəsəṅ sahananiṅ sukət iṅ śarīra | sampun pva nirmala gəsəṅ gələh iṅ svacitta | maṅgəh tayan vuluku riṅ brata pūja mantra || 13

sampun pva tandurana yoga lavan samādhi | raṅkāta yeṅ kuśalamūlani śīla yukti | jñānāhəniṅ ya maṅənə̄ divasantacandra | byaktā jinasmr̥ti tuvuhnika śāśvatāṅgə̄ṅ || 14

byaktā phala pva ri katonta bhaṭāra buddha | maṅgəh sireka paṅaranta pakopajīvan | enak pva denta masamūha lavan bhaṭāra | siddheka siddha kaharan təkaniṅ kamokṣan || 15

Canto 3

irika ta karaṇanyāya ndan ta vruhi rumuhun | nihan iki phala maṅgəh nāhan kavruhi vəkasan | krama ni tanu bhaṭāra hyaṅ buddhāṅhibəki sarāt | aganal alit anūkṣmāṣṭeśvaryecchanira sukha || 1

kunaṅ ikiṅ inucap don nirdon tā mucapa rikā | apan ika təka pə̄hniṅ kārya mvaṅ karaṇa pinet | niravaraṇa nikin ton lvir jñāna niralaya | aparək ika sakeṅ śrī sarvajñā saha mavəkas || 2

colophon

jinārthiprakr̥ti || pralambaṅ kamahāyānin ||

The asterisk * is used to flag lemmata or forms of lemmata not recorded in the Old Javanese-English Dictionary.

Arlo Griffiths typed the text (2011) and converted it to TEI format